نار الزحفتين ... وش رأيكم سمعتو به ... حياكم تدفوا عليه.

[راعي المدّى]

أعزائي الزملاء
نار الزحفتين كما يطلق عليها الأولين .. هي النار التي توقد من أغصان نبات العرفج اليابسة ، حيث يتميز هذا النبات بسرعة الأشتعال وشدة حرارة النار . لذا سميت النار التي يوقد بها من هذا النبات بنار الزحفتين ... والسبب لإنه عندما تشتعل النار الله ينجينا وإياكم منها يبتعد عنها موقدها لشدة حرارتها ثم يعود اليها بعد أن تخمد سريعاً على قولتهم توج ثم تطفأ بسرعة فهو يزحف عن النار لشدة حرارتها ثم يزحف راجعاً اليها ليتدفأ بباقي جمرها . ولكم تحياتي .

اخوكم :
راعي المدّى
ابو ابراهيم
sishaye@hotmail.com

[القماري]

الف شكر غلى هذه المعلومة ياراعي المدى

[نقا هشال]

هلابك ياغالي

وتسلم على المعلومه

[فـ(الجـوف)ـتى]

مكشور على المعلومه 0

[راعي كيف]

الله يكفينا شر النار وما يقربله وجعلنا من الهدات الهادن المصلحين ومن اهل الجنة اجمعين امين يارب العالمين.
شكراً على المعلومه المفيدة .
عندك الغضا نارة وجمرتة مرة حامية لاكن عمرة قليل
عندك السمر النار والجمر يبرد الكبد يعني يطربك وعمرة اطول .
عندك الأرطى النار هادية والجمر هادي وعمرة اطول بكثير من جميع انواع الحطب والريحة لك الله .
والرمث نار قوية والجمر يعبر الحال والريحة اتوقع انة من عطر اهل الجنة والله اعلم يوسخك ويحوسك بالرماد خصوصاً إذا كنت بالمشب يقلب ثوبك اصفر بدل ماهو ابيض لكن الريحته تغطي على عيوبة .



شكراً واسف على الإطاله .



اخوكم المحب راعي كيف
ابو ناصر

[السمح]

سلمت يابو إبراهيم على المعلومة القيمة وخاصة الزحفتين ، وهذي ما تطلع إلا من خبير عرف الحياة وزحف مرتين عن ضو العرفج :D
الحمد لله على السلامة وأجعلها سلامة دايمة إن شاء الله
وين حقنا من القميري :p

أحلى تحية

[خلف]

مشكور ياراعي المدّى على هذا الموضوع وما قصرة

وانا كنت احسب الموضوع يتكلم عن معركة حدثت في الجاهلية.

[صقر]

السلام عليكم

تسلم يا بو ابراهيم على هذه المعلومة الرائعة.

وأول مرة أعرف هالمعلومة ...

بارك الله فيك.

[عبدالعزيز الدباسي]

يمال العافية يا ابو ابراهيم ، وماقصرت على هالمعلومة
الله لا يخلينا من هالطلات اللي كلها ملح .

وانتبه لا يشوف هالموضوع خشم الحصان ترا على طول يضيفك مع لستة الشيبان حقتهم :p

مشكور وماقصرت يالغالي

[خشم الحصان]

الاخ الغالي
ابو براهيم
يالله ان تحييه وشلونك يابعدهم وش دعوا وش هالقطوعه من عقب هاك الطليعه
غبة اللهم ياكافي .
شف يابعدهم نار الزحفتين قشراء والي اشد منها نار عسبان النخل لكن الي تجيه ام الركب ولا يمديه يزحف
تهقا هدبه وحجانه تسلم وماريته مغير يتمايل مره يمين ومره يسار كنه مساحت مرسدس من شدة الضو والحراره يعني اذا زحف لا يصير تحته شوكة سلمه ولا طلح ثم من الغزه ولاه ناقز و طاب في الضو سنه ابو قباس
مشكور يابعدهم علي هالمعلومه والله يغفرلك ويرفع من قدرك يابعدهم ولاياك تبطي علينا يابعدهم
اخوك
خشم الحصان
................................
شقردي
وش فيهم الشيبان الله وكبر الي بيسمعك يقول هذا توه وانت الظهر متقوس سنك واحد يتهايق في قليب تراك اكبر مني بس انا الشيب الي في وجهي من كثر ما يقلون بيض الله وجهك:mad: :mad: هين لبد من يوم ونضيفك في السته انا ماذبحني الا تطليعة هالسان اهه من يقضبك. منشكور يابعدهم الله يغفرلك
اخوك
خشم الحصان

[راعي المدّى]

الله يبارك بنار الزحفتين
كل الحبايب عندي اليوم .... مشرفينا الغالين
ابو تركي الغالي والحبيب ... الف شكر على تشريفك ... وعسى تمر الهند يغني دراويشه .. يابعدي رحنا للساحل وطحنا بين يدين اولاد على وعليك الباقي .. لاوبعد يوم رجعنا صار لنا موقف بالعلا بعدين اعلمك به.

صقر اخوي الغالي الف شكر لتشريفك للموضوع .
ابو عبدالله .. هلا والله بالغالي تسلم وشرفتنا بمرورك .
ابو محمد ... يابعدهم انت اللي وينك مشتاقين جداً والآجتماع قريب بس نحتري حد السيف زارق له زرقه قريبة
فالك طيب والف شكرلتشريفك .
القماري ... شكراً يالغالي لمرورك .
نقا شهال... شكراً يالغالي لمرورك.
فتي الجوف .. يامية هلا وسهلا براعي الجوف ... الأمطار حولكم ها الأيام ... عرر سايل البارحة عقبال نجد.
راعي كيف ... شاكر تشريفك يابو ناصر .
خلف ... شكراً يابعدي لتشريفك .

اخوكم:
راعي المدّى
ابو ابراهيم
sishaye@hotmial.com

[مريقب العيفار]

على طاري العرفج

فلم ارى اقرف من ريحة جذر شجر العرفج اليابس

يا عليه ريحة ما تنفع ابد

بعكس اغصانه اليابسة فريحتها معقولة

وربما وجد بعضنا جذور العرفج التي كأنها مجدولة

وقام باشعالها بغية الاستفادة منها لكن قد تفسد

عليه جلسته من ريحتها

[ابو شكاع]

تسلم لاهنت على هالمعلومة وانا اخوك

طيب اللي مشتبتن تسبده من كليجا او من تمر وقهوة ...وش تسمى ناره ذي

تسلم

تراه مزحة لا تاخذ بخاطرك

[أبو يوسف]

مشكور على المعلومة

ولا هنت

مع التحية