مشكله( عويصه) في سيارتي اين الخبراء.؟؟؟ [الأرشيف]

بركان

08/10/2004, 03:05 PM

السلام عليكم ورحمة الله وبركاته

يا اخون يا كرام

اشتريت موتر (فان) عائلي ماركة ( كيا ) الله لا يعيدها شرات.!!!
واكتشفت بعد شراءه ان الزجاج للمراتب الخلفيه لا ينفتح... يعني لازم المكيف شغال على طول.

السؤال: هل يمكن ان تتحول الى زجاج متحرك بدلا من الثابت ... واين اعدلها.

فزعتكم لا هنتوا العيال صاروا في مثل المراتب الخلفيه لجيوب الشرطه!!! حماهم الله واياكم .

ولكم تحياتي.

بركان

09/10/2004, 08:34 AM

السلام عليكم ورحمة الله وبركاته

وينكم؟؟؟

وش السواة؟؟

ترى ان ما رد احد بعت الموتر!!!

ناصح

10/10/2004, 04:23 PM

الاخ العزيز بركان

أعتقد انه من الصعب جدا ان تحول الزجاج الثابت إلى متحرك ...!!

ولا تغامر عند الورش خاصة وان السيارة جديدة

ابو درع

10/10/2004, 04:55 PM

بركان حياك الله

انا الم افهم ايش المقصود وحتى مااعرف السياره زين

لكن برآي تروح للي بصناعيه طريق الخرج محل زجاج كبير الي بزاويه
والله ماعرف اسمه وتعرض عليه الفكره او المطلوب بشرط كلم صاحب الحلل
يفيدك ... والله يخلف عليك يالحبيب

تحياتي ...،

الاحداثي

11/10/2004, 12:44 AM

بعد التحيه

مالك الا الله ثم محل زجاج متخصص مثل ما قال اخوي ابو درع والمحل اللي يقصده ابو درع هو ( السالم ) موجود في زاوية تقاطع طريق الخرج مع حلة العنوز ( الأربعين ) الله يحييك . وا ن شاءالله تلقي خير والله يعينك على الكوري وغرابيله !!!!

(((((((((((((((((((((((((((((((((( الاحداثي ))))))))))))))))))))))))))))))

سنتافي

11/10/2004, 01:15 AM

السلام عليكم ورحمة الله وبركاته

انا بصراحه اكثر شي شدني هو رد الاخ احداثي

والله يعينك على الكوري وغرابيله !!!!

--لا تزر وازرتا وزر اخرى -- انا باسألك يالي شاري السياره ليش ما تأكدت من الزجاج الخلفي قبل ما تشتري السياره وش ذنب السياره انك ما انتبهت هذا اولا ثانيا انا اتوقع ان الي معك مهب فل اوبشن اذا ان كلامي صحيح شف الفل في الوكاله وشف اذا زجاجه ينفتح اطلب منهم تعديل الي عندك مثل الفل

http://www.mekshat.com/pix/upload/images5/mk8041_1121.JPG

بركان

11/10/2004, 08:14 AM

مشكورين
وما قصرتوا
والظاهر
اني باخرق القزاز واركب مراوح شفط!!!!!
هالموتر ما لقيت له حل
حيث ان تعديل الزجاج يتطلب فتحة في جوف الابواب لكي ينزل فيها الزجاج اضافة الى دينمو و.. و... و... و..

اخوي ابو درع

المشكله هي : ان الزجاج الجانبي في المرتبه الثانيه والخلفيه يمين وشمال ثابت مايتحرك يعني مشمع بالغراء. الزجاج الذي ينزل تحت وفوق هو زجاج السائق والراكب الامامي فقط لا غير.
والعيال ودهم يشمون هوا ما يبون المكيف خاصة هالايام.
تحياتي.

al-nashmi

11/10/2004, 08:38 AM

[QUOTE]الأصل كُتب بواسطة بركان
[B]مشكورين
وما قصرتوا
والظاهر
اني باخرق القزاز واركب مراوح شفط!!!!!........... :mad: :confused: تدري ليش ذولي !!! بعدين اقولك.....................

اخونا بركان.....تحيه طيبه

انا ودي اشوفك وانت تسوق هالمبروك...... شكلك كنه موزع حلويات وخبز........ههههههههههااااا

خاص نجي للجد..........

القزاز الجانبي الخلفي ماتقدر تخليه يفتح على جنب مثل الاند كروزر الصالوم.... حاول بهذه الفكره ممكن تنجح.....

يالله ياكريم افرجها لبركان واشباله.........

اخوك النشمي

SilverSniper

11/10/2004, 09:05 AM

ما أظن هالحل ينفع يا نشمي... لأن القزازه يبيلها مجرى عشان السحب.. ويبيلك تقص القزاز بعد... لكن ممكن يا بركان انك تخليه يفتح زي فان الأسترو الشيفروليه.. دز على برا ... يمكن تنفع.. مفصلتين حديد من فوق تلحمها في البودي من الداخل وفريم يركب على المفصله يمسك القزازة ... وجرب
ومن رايي أنا ... بعه وفك عمرك... الكوري الخايس ما يستاهل رجلك الكريمة...
((( سنتافي ))) ... كل ما شفت واحد يسب في كوري قحصت كنك مقروص... اثقل شوي... وان كان ما عندك راي لبركان لا ترد وتهاوشه... والشيء الأكيد هو ... الكوري خايس... شاء من شاء... وأبى من أبى

al-nashmi

11/10/2004, 09:17 AM

السلام عليكم ورحمة الله وبركاته

اخونا SilverSniper ..... صباح الخير

فكرتي نفس فكرتك اللي هي تفتح القزاز على برا وهي طريقه تخلي القزاز يبعد عن اللفريم مسافه بسيطه للتهويه.. وهي موجده في اغلب السارات اللي قزازها ما ينزل تحت... وهي موجده في سيارة بركان ال vx.r
واغلب جيوب الاندكروزر الصوالين ،،،،،،،،،،،

تحياتي لك يا القنا ص الفضي ،،،،،،،،،،،،،،،،

بركان

11/10/2004, 09:29 AM

اخوي الغالي النشمي
ساجرب فكرتك فهي الاقرب للتطبيق واذا ما نجحت الفكره
فمثل ما تفضلت
باعرض الموتر على محل للحلويات جنبنا.

تقبل الله دعاؤك لي ولاشبالي ولام الاشبال ولعلمك تراي من يوم شريتها ما ركبت فيها الا مره وحده.اللي يعاني هم الاشبال وامهم.

اخوي الغاليSilverSniper
القناص الفضي
فكرة اخونا النشمي تعمل بواسطة دفع الزجاج الى الخارج لمسافة لا تتجاوز 2 سم والسحب الى الداخل عند الاقفال.وهي كما ذكر مطبقة في جيوب اللاند كروزر.

اخوي القناص الفضي اسمح لي بهذه الاضافة/
A Silver bullet... Loaded in a Silver rifle...Held by a firm hand... Resting on a strong shoulder....imbracing the eye of an eagle...Thats the SilverSniper
ويقابلها بالعربية: البواردي.

SilverSniper

11/10/2004, 09:41 AM

أنا جاء في بالي اللاند الأقدم.. اللي قزازته سحب... ماعليه... تفكيري قديم شوي.. :)
فان الأسترو نفس الفكرة بالضبط.. القزازة تبعد مسافة قليلة عن الفريم وتقفل اذا سحبت للداخل..
الله يوفقك انشاء الله يا بركان ويعطيك العافية يا نشمي..
... ترجمتك صحيحة مية بالمية يا بركان...

عروان

11/10/2004, 09:48 AM

أخوي بركان

الزجاج الجانبي الخلفي لسيارتك الكيا يفتح على برا.

أقصد الزجاج للمقعد الاخير الخلفي. هذا يكفي اذا فتحتهن و فتحت زجاج الابواب الامامية بيكون فيه تيار هوائي داخل من الامام ويخرج من الخلف.

ولا أظن أن الترهيم بيريحك. لان راح يأذيك أنت وعيالك من التنسي و صوت الهواء وفي الصيف أما بيدخل عليك هواء حار أو بيخرج هواء المكيف البارد.

االله ييسر لك أمرك و يوفقك

سنتافي

11/10/2004, 02:07 PM

السلام عليكم ورحمة الله وبركاته

اخوي اسمع رح التشليح ودورلك على بيبان خلفيه حقت الفل (لنفس الموديل ) الي ينزل قزازه وركبها في سيارتك (بعد تغير اللون ليطابق لون سيارتك )

وسلامتكم

http://www.mekshat.com/pix/upload/images5/mk8041_1121.JPG

بركان

11/10/2004, 09:21 PM

اخوي الكريم/ عروان
شكرا على اهتمامك
اول مره اعرف ان الفل له قزاز متحرك
شكرا على هذه المعلومه وبامر عليهم واتفاهم معهم.

اخوي الكريم/ سانتافيه
حل معقول بديل لتركيب مراوح الشفط.!!!! ههههه
شكرا سافكر فيه كآخر حل.

سؤال لا هنت
معرفك سنتافيه
هل هو مشتق من مدينة SANTA FE

تحياتي

سنتافي

13/10/2004, 08:44 AM

السلام عليكم ورحمة الله وبركاته

لا

المعرف مشتق من جيب الهيونداي الكوري SATA FE واحد من مشجعين الصناعات الكوريه :good:

http://www.mekshat.com/pix/upload/images5/mk8041_1121.JPG

وين يبون بنا

13/10/2004, 09:22 AM

هلا اخوي بركان ..

والله الشباب ما قصروا وعطوك بعض الحلول ..

الحين فان هونداي اللي تقل علبة كبريت اشوف بعضهم يحول قزازه الى سحب ( طبعاً يدوي ) لكن وش الطريقة .. الله أعلم .

لكن اوعدك اذا شفت واحد أبحده :redcar: واسأله وأجيك بالجواب ركض :hot:

الله يعين عيالك على صنان السواق :D

وكل عام والجميع بخير .. والشهر مبارك عليكم

بركان

13/10/2004, 10:10 AM

الأصل كُتب بواسطة وين يبون بنا
هلا اخوي بركان ..

لكن اوعدك اذا شفت واحد أبحده :redcar: واسأله وأجيك بالجواب ركض :hot:

الله يعين عيالك على صنان السواق :D

وعد الحر دين عليه
بس اذا حديته تحمل ما يجيك ترى مالي دخل
اما بالنسبة لصنان السائق فقد زدوت عيالي بكمامات ضد الكيماوي كانت لدي وحصلت عليها ايام طيب الذكر ابو عدي يوم ان العلوج يهجمون عليه وقلت ما فيه احسن من لبسها دي الوقتي.
تحياتي وتقديري.

وين يبون بنا

13/10/2004, 12:40 PM

[QUOTE]الأصل كُتب بواسطة بركان

اما بالنسبة لصنان السائق فقد زدوت عيالي بكمامات ضد الكيماوي كانت لدي وحصلت عليها ايام طيب الذكر ابو عدي يوم ان العلوج يهجمون عليه وقلت ما فيه احسن من لبسها دي الوقتي.
[line]

ترا يقولون الصنان يفطر برمضان مثل البخور :D