شوركم بالافضل ستة سلندر والا ثمانية سلندر .....؟

[درباس فرناس]

[
SIZE="6"]بعد التوكل على الله عز وجل وطلب الخيرة منه ثم مشاورة الاخوان الكرام في هذا المنتدى
قررت شراء لاند كروزر 2009 او 2010 جي اكس ار
ولكني تحيرت ما بين الثمانية سلندر والستة سلندر
ايهم افضل من خلال عدة جوانب
1/ هل عزم الستة سيئ على الطريق أو في التطعيس بالبر وهل هو راسي على الخط مما يجعل الانسان يقدم الثمانية أم أن المسألة فقط قوة مكينة والستة يمشي الغرض
2/ هل صرفية البنزين كثيرة جدا في الثمانية وياليت من يذكر كم يعبي السيارة سواء صاحب الستة أو الثمانية وكم كيلو تمشي تقريبا كل الاثنان
3/ لو رغبت في البيع بعد الاستعمال ماهو الافضل طلبا في السوق الستة أو الثمانية
وهناك سؤال اخير كذلك الاحظ بعض اللاند كروزر يأتي بخط والبعض بدون خط ولا ادري ما الماشي في السوق عند البيع ....
اسأل الله أن يجزي كل من تجاوب معي خير الجزاء ويرفع قدره في الدارين ويغفر له ولوالديه ولجميع المسلمين [/SIZE]

[ابوطاقية]

الثمانيه افضل من السته فقط بالقوه والباقي نفس الشي
الطرق الثمانيه والسته ممتاز
صرفية البنزين السته مع المكينه الجديده اقل
صرفية الثمانيه مقارنه بالسيارات الامريكيه اقل
وللمعلوميه السته المكينه القديمه كانت اكثر صرفيه من الثمانيه
ملاحظه
قبل تقريبا اسبوعين كنت ادور لاندكروزر جديد 2010 بالمعارض وكان يوجد من موديلات 2009 Gxr لاكن كلها كانت سته هذا دليل ان الثمانيه عليه سحب وبامكانك التأكد بنفسك
وبالنسبه للخطوط الناس الحين تفضل بدون خطوط
هذا ماعندي والله يوفقك ويوفق الجميع

[كبسولة2]

6 سلندر ممتااااااز جداً

صرفيه قليلة مشاكل قليلة أقتصادي في صيانته

8 سلندر ممتاز بس عيبه صرفية البنزين ومشاكل الصيانة

بسبب كبر المكينة وعللها

وللمعلومية المرغوب في السوق الآن 6 سلندر بى منااااازع

حتى في الوكالة السحب على 6 أكثر من 8 سلندر

[Somebody]

8ثمانية8

انشد مجرب

[الربذي]

اكيد الاقوى 8سلندر
اريح من ناحية الصوت ويطربك بالعزم لو مافيه فرق تحسه من او ل تجربه
الارغب 8سلندر
الناس تاخذ 6عشانها ارخص فقط
الصرفيه ماتذكر بالاول اقصد 2007 وتحت بين الفي اكس ار والجي اكس ار
اعتقد اقل من 3الى خمسة اريل بس

[بواسامه]

الصلاة خير من النوم

[درباس فرناس]

ابو طاقية شرفتنا بمرورك شرف الله قدرك ويجعل دربك اخضر
ولكن عدم وجود الثمانية يمكن لقلة الطلب عليه لذلك الوكالة ماتكثر طرحه في الاسواق
ويبقى السؤال لمن ينزل في الحراج
ايهم اكثر طلب عند البيع عند عموم الناس الستة او الثمانية
لأن مشكلتي اني ملول يمكن ابيع السيارة بعد كم شهر
ولا ارغب بكثرة الخسائر

[سلطان الغامدي]

الستة مميز جدا في التتعيس حلو مرة

[حان الرحيل]

بسم الله
اسأل مجرب ولا تسأل....
خذ الثمانيه ترا السته...مثل الونيت4سلندر ما يطربك ابد..ابد
لكن ان كنت من اللي مشيهم في الجيب مثل مشيهم في الكدلك...فما تفرق ان كان10سلندر او4 سلندر....
ال8 يمال الغنيمه.. ولا طفشت منه دق على...واذا نويت على السته..فلا تشتري ريح بالك

[ابوطاقية]

حيالله درباس بن فرناس
بالنسبه وش الي مرغوب بالسوق اتوقع ثمانيه لاني شفت كم واحد يسئل عن الثمانيه وللمعلوميه اتحدي تحصل Gx V8 معروض للبيع
وعلى قولة المثل
الحي يحييك والميت يزودك غبن

[يكفيني نظرة]

والله وانا اخوك الثمانيه خوي قلبك ومشاكله ماتجي الا بعد مايتعدى150 الف لازم تغير جنزير المكينه فقط لأني كنت املك في اكس ار 2001 ماشي 300 يوم مشى معي 450 الف ولعت لمبة مكينه بالطبلون وقالوا لي لازم تغير جنزير المكينه والوالد كان معه 99 ويوم مشى 120 الف برضه غير الجنزير وهو فاكه وكاله ولا يجلده . لكن من باقي النواحي لاتسأل عنه لأن الوالد الله يطول بعمره اخذ بعد 99 جي اكس ار 6 سلندر والان له 4 سنوات معه ولاقد مدحه دايم يذمه .ارجوا ان اكون وضحت لك واسف على الاطاله.
يكفيني بس نظرة

[لبيد بن ربيعة]

أخي الكريم:
ليس هناك مجال للمقارنة إطلاقاً
إذا كنت قادراً على ثمن 8سلندر فلا تتردد في الشراء ، ومع تقديري لبعض المشاركات السابقة من بعض الإخوان الكرام ، إلا أن الثمانية سلندر أفضل كثيرا وذلك لما يلي:
1/قوة عزم المكينة ، وجمال صوتها ، وقوة تحملها ، وكونها أخف حنه خصوصا عند السرعات العالية .
2/البنزين لموديل 6 سلندر (95) ، بينما موديل 8 سلندر (91)
3/ماكينة الثمانية أكثر تحملاً وصبراً بشهادة المجربين لها .
4/مكينة 6 سلندر ضعيفة جداً ويموت حيلها عندما تكون السيارة محملة بالركاب والعفش .
5/صرفية البنزين في الثمانية أقل قليلاً .
6/فارق السعر لا يذكر حيث لا يتجاوز عشرة آلاف تقريباً

وختاما : ماسبق وجهة نظر ، والرأي الأخير لك أخي الفاضل وفقك الله

والسلام عليكم ،،،

[بدوي جنوبي]

وهل يخفى القمر
8 سلندر اكيد

[ahmad995]

8سلندر اكيد
شوف الشوارع مليانه منه وهذا دليل على نجاحه
وراح يجيك يوم كل الجيوب بتكون 8 سلندر

[درباس فرناس]

الأخ كبسولة الله يعافيك ويرزقك من واسع فضلة
لكنك زدتنا حيرة بعض الاخوان يرون أن الثمانية هو الافضل عند البيع ...؟
وماتزال الحيرة موجودة

[أبو إبتهال]

من واقع تجربة الــ 8 سلندر فقط اللي يطربك

وعليك بالإستخارة قبل كل شيْ

وبالتوفيق

[saad52]

8 سلندر ماعليه كلام

[رواق الكشته]

8 سلندر

وهو الافضل وخصوصاً مع وزن السياراه والحجم الكبير

8 سلندر اقوى وهذه ميزه مهمه جداً قد تحتاجها في لحظه حرجه ...

انا جربت الـ6 سلندر والـ8 سلندر وبكل صراحه الـــــ8 افضل

ولك الخيار

[ridan]

الثمانيه بلا جدل اكيد افضل
بالبر اقوى بالخط اريح

[العرهبي]

اتكل على الله خذ 8 اسذل مجرب على قولتهم الحي يحييك والراى الأول والأخير لك،،،،،،

[Abu Saad]

الصلاة خير من النوم..
اكثر اللي اعرف باعو السته وخذو الثمانية...
الله يوفقك.

[ابونحت]

اذاتبي نصيحة مجرب الثمانيه سلندر2009وانت راعي مكاشيت مايطربك ولاشيء الازيادة ثقل وبس وتعلق واذا طولت مشغل الدبل ولعت لمبته تشيربارتفاع الحراره للدبل

[درباس فرناس]

8ثمانية8

انشد مجرب

الله يعافيك ويرفع قدرك شور طيب ونشوف تجارب الاخوان العملية وسنضع خلاصتها في النهاية

[عريدان]

Gx-r V8 no
VX V8 no
lexus gear manual may be? but imposiable
G fule option (yes)

[خيال النفود]

عزيزي ثمانيه سلندر مافيها اي كلام احسن . وأقوى وأفضل
والسته سلندر مو قليل شر قوه وراحه بالخط . بس يبقى الثمانيه افضل
ولا هم كلهم حلوين وبلنسبه للبيع لاتخاف كلهم عليهم طلب
انا معي سته سلندر قير عادي وضعه تمام التمام
اناا من راعين الثمانيه سلندر وعشاقه
اظطرتي اخذ سته سلندر قير عادي. لأنه مايجي قير عادي الثمانيه سلندر
عشان كذا ضحيت بثمانيه سلندر عشانه مايجي قيرعادي
وخذت السته سلندر قير عادي
بس نصيحة اخو لا تشري الا خليجي
بريمي
ولا من اليحي
ولا بحريني
السعودي لاتقربه
الاكسسورات صينيه الجنوط صينيه
الشكل الخارجي مو مثل رزة الخليجي ابد ابد

اذ انت ماعندك مشكله بالفلوس توكل على الله وخذ ثمانيه سلندر
واخر تسعيره سعرتها قبل اربع ايام بمعارض النسيم
سعودي ثمانيه سلندر 195 الف فتحه + هزاز موديل 2010
سعودي سته سلندر 176 الف فتحه + هزاز موديل 2010
الخليجي من 200 الف وفوق وعلى حسب الموصفات
اليحي يقول ان شاءلله راح تجي دفعة 2010 يوم السبت القادم على كلامه
وأنا انصحك باليحي سعر مناسب موصفات حلوه بالحيل
وبحطلك كم صوره

هذا اليحي عطي الله بس انه سته سلندر وثمانيه راح يجي السبت على كلامهم ن شاءلله

[/URL]
[URL="http://www.tobikat.com"]http://up4.m5zn.com/9bjndthcm6y53q1w0kvpz47xgs82rf/2009/11/4/10/cij1y9np3.jpg (http://www.tobikat.com)


وهذي مواصفاته

http://up4.m5zn.com/9bjndthcm6y53q1w0kvpz47xgs82rf/2009/11/4/10/do4jra8gv.jpg (http://www.tobikat.com)


http://up4.m5zn.com/9bjndthcm6y53q1w0kvpz47xgs82rf/2009/11/4/10/iwwx6e3oo.jpg (http://www.tobikat.com)


وفيه نقطه لازم تعرفها اخوي
ترا الثمانيه سلندر بجميع فئاته فيه طقه بالعمود
اذ كنت واقف عند الاشاره ومشيت
ترا وضعها طبيعي ميه بالميه
ويمكن تطلع لك بأول ماتشري الموتر ويمكن تطلع لك بفتره
بس خل في بالك انه الوضع طبيعي تشحيم وذا مانفع تبدل العامود
والناس كلها تعرف هالشي
وشوف التوقيع حقي تراه موتري (( قير عادي فل كامل وارد اليحي + مركب عليه يايات استراليه من قدام ورا ))
وأي شي انا حاضر اخوي ولا تنسانا من دعوه صالحه

[خيال النفود]

اخوي وبنسبه للخطوط ترا ماعندك اي مشكله تقدر تخلي العامل حق المعرض يفكه لك وأنت واقف
انا موتري فكيت خطه بعد سنه كامل عند محل 100 ريال
ولا فيه اي بقع ولا اي تغير لون ولا أي شي
حتى يوم حكيت العامل قالي هذا خليجي خط اصلي مافي خرب بويه
يعني لاتاخذ هم الخط شغله كلها خمس ربع ساعه ويفكونه لك

[الوتر الحزين]

اخوي ثمانيه سرندل مامثله ابد لاجاك قير عايدي ياسلام

تحياتي

[فارس الفرسه]

السته سلندر فيه مشاكل با القير
روح الي ورشه الدرع ببريده عنده 3 كلهن توضيب قير

[درباس فرناس]

اكيد الاقوى 8سلندر
اريح من ناحية الصوت ويطربك بالعزم لو مافيه فرق تحسه من او ل تجربه
الارغب 8سلندر
الناس تاخذ 6عشانها ارخص فقط
الصرفيه ماتذكر بالاول اقصد 2007 وتحت بين الفي اكس ار والجي اكس ار
اعتقد اقل من 3الى خمسة اريل بس

الاخ الربذي اسأل العزيز الحكيم الذي استوى على عرشه وعلا على خلقه أن يقر عينك بشفاء ابنك اسامة شفاء عاجل وجميع مرضى المسلمين
مشاركة جميلة اسعدتنا بهذه الفائدة ....

[Riyadh City]

هلابك اخوي

ثمانية بدون خطوط أبيض لؤلؤي

ومبروك مقدما

[محمد-الرس]

8سلندر طيبه وله

[ابوعمر الهذلي]

الثمانيه سلندر افضل اداء وقوه وراحه بالخط
واصلا حرام فرق السعر البسيط وتاخذ سته

[خيال النفود]

السته سلندر فيه مشاكل با القير
روح الي ورشه الدرع ببريده عنده 3 كلهن توضيب قير

عزيزي لو ماعليك امر وش نوع القير قير اتوماتك ولا عادي
وش سبب التوضيب وكم الموديل
اتمنى ترد علي اخوي
وترا ارسلتلك مسج
الموضوع يهمني حيل اخوي

[درباس فرناس]

الصلاة خير من النوم

عافاك الله يا ابو اسامة

[كبسولة2]

الثمانية مشكلته الطقة الي في عمود الكردان مزعجة

غير كذا الحرارة ترتفع مع الدبل لكثرة السحب عليه

نصيحة الجيوب الي تعرفها الناس منذو الأزل 6 سلندر

من موديل 97 إلى 2010

أما 8 سلندر فمشاكلها كثيييييييرة جداً وغير مرغوبة من زماااااان

[فارس الفرسه]

عزيزي لو ماعليك امر وش نوع القير قير اتوماتك ولا عادي
وش سبب التوضيب وكم الموديل
اتمنى ترد علي اخوي
وترا ارسلتلك مسج
الموضوع يهمني حيل اخوي
ارسلت لك مسج

[شمس السويدي]

ياخوان الثمانيه سلندر فل كامل كم سعره

وكم نوع يجي منه وماهو النوع اللي تنصحون فيه

[ذيب زلفاوي]

بعض الناس الله يهديها ماخذه ان القوه على كثرة السرندلات
انا والله مادي عنه لكن اخوي معه 2006 6سرندل والله الموتر ماعليه كلام ماشي اكثر من 220 الف
وكارفه كرف وعزمه ممتاز