المشروع السري BIV7000 (سري للغاية ) ((( صور))))

[SilverSniper]

المشروع السري BIV7000 (سري للغاية ) :eek:
مشروع سري أقوم بتنفيذه الآن... :eek: .....
أتوقع يتم الانتهاء من المشروع بنهاية عام 2004 وموعد التجربة الميدانية مع بداية عام 2005 انشاء الله
دعواتكم لي بالتوفيق....
http://www.mekshat.com/pix/upload/images6/mk7239_face.jpg

...........

http://www.mekshat.com/pix/upload/images6/mk7239_side.jpg


................

http://www.mekshat.com/pix/upload/images6/mk7239_int.jpg

.................

http://www.mekshat.com/pix/upload/images6/mk7239_msd.jpg

...............

http://www.mekshat.com/pix/upload/images6/mk7239_ing.jpg

...............

http://www.mekshat.com/pix/upload/images6/mk7239_delco.jpg

.....................
http://www.mekshat.com/pix/upload/images6/mk7239_ing_side.jpg

........................

http://www.mekshat.com/pix/upload/images6/mk7239_yay.jpg

....................

مواصفات الوحش... مكينة جمس 511 ... طرمبة ماء و طرمبة بنزين وكاربريتر وثلاجة إيدلبروك بيرفورمر سيريس ... فلتر هواء وفلتر بنزين إيدلبروك بيرفورمر .. أسلاك بواجي وترانسات وديلكو وكويل وشارجر إم إس دي ... بواجي بوش 4 شمعات... قير جيب بتروس جمس مسننة لأول والثاني.. 3 مراوح للتبريد.. اثنين كهرباء كبيرة وواحدة على السير ( لم يتم تركيبها بعد )... راديتر 8 رصات.. عوارض معدنية في الداخل للحماية ... الشكمانين عبارة عن مواسير حديد 3 بوص تم تلحيمها بالقزوز... ساعة قياس RPM داخلية... دينمو جمس جديد..
أنا حاضر للأسئلة... والمشروع لم يكتمل بعد..
تحياتي...

[عروان]

الله يكفيك شرّة و يطعمك من خيرة.


مرعب هالربع... ما عادهو بربع ذالحين :)

ما تكلمت عن القزوز. يبدولي في الصورة أنها مغيرة:what: ؟


موفق أخوي سنبر الفضي.



أطيب تحية

[SilverSniper]

اللهم آمين أخوي عروان..
القزوز هولي تشليح.. ملحمها في المواصير من تحت

[أيمن]

السلام عليكم ورحمة الله وبركاته

ماشاء الله تبارك الرحمن الله يتمم لك بالعافية ..
بقي أن تعطي لنا مقطع صوتي لهذا الوحش :)

كنت أريد أن أسألك هل تعد هذا الإعداد لمسابقة معينة أو لتجمع معين، أم أنها هواية والمراد هو إخراج سيارة بمواصفات معينة ؟
511 واجد بالحيل على هالموتر أتوقع أنه لا يخلو من وضع خرسانة فولاذية مؤخرة الموتر ..
لو نقارنها بمرهمات أم دباب الصمعاني وربعه بماذا نفرق هالوحش عن غيره من ناحية الأداء ..

أسأل اله لك التوفيق

تحيتي

[Bader-M]

الموضوع مثبت

ولي رجعه

.....

[SilverSniper]

يا هلا أخوي أيمن...
هاذي ماهي لمسابقة ولا لشي ولكن تحدي... تحديت نفسي أقدر أسويها والا لا..
المكينة فعلاً قوية .. في الاختبارات الأولية فرط الدفرنس من قوة المكينة... ثم قابلتني مشاكل الحرارة.. وتغلبت عليها بالمراوح والراديتر... أما المقارنة فما أقدر أحكم مرة لأني ما انتهيت.. لكن أنا متفائل انه يصير زيها
وشرفت الموضوع والله..

[البرنوووو]

بسم الله الرحمن الرحيم
الله يكفيك شرّة و يطعمك من خيرة.

ومبروك مقدما

[صقر]

الله يقويك يا سيلفر

قال سري :D

طيب عندي استفسار:

لماذا اخترت الجيب ... ليش ما اخترت الباترول ... باعتقادي انه راسي أكثر وفيه مساعدات ويايات .. ماهو مثل الجيب ( سست).؟؟؟

وننتظر انتهاء التجربة ان شاء الله .

[SilverSniper]

السبب الرئيسي اللي خلاني آخذ الجيب هذا هو الشاصي ... شاصي هذا الجيب قوي وحديده سميك يتحمل اللحام الكثير والوزن الكبير ( 511 ماهي خفيفة ) ... إضافة إلى ان المساحة تحت الكبوت ممتازة.. شاصي الجيب الباترول ما يتحمل اللحام زي هذا.. لو لحمت قواعد كراسي المكينة عليه وركبت المكينة ينقطم اللحام بسبب وزن المكينة أو ينثني الشاصي.. إلا ان أردت ألحم عوارض أو جسور حديد على الشاصي عشان أقويه .. وهذي شغلة مزعجة .. واليايات أو السست أقدر أحطها أو أشيلها سواء بهذا الجيب أو غيره..
وحياك الله أخوي صقر وهذي الساعة المباركة اللي شفنا ردك..
أخوي طاير بالعجة .. نسى سيارته شغالة عند باب الموضوع وراح يطفيها ويجي.. مدري وراه طول؟؟؟ :)

[رفيع الشان]

ماشاء الله العظيم .... الله يعطيك خيره ويكفاك شره بياكل الطعس أكل ....

بالمناسبه أنا أدور على جيب كذا 84 ولا حولها أخليه للرحلات البعيده والمناطق الجبليه والتجارب ...

حبينا نسلم عليك وفي انتظار التجربه بالعافيه ...

[Bader-M]

SilverSniper


أخوي طاير بالعجة .. نسى سيارته شغالة عند باب الموضوع وراح يطفيها ويجي.. مدري وراه طول؟؟؟

ههههههههههههه

انا جالس

كتب رد
اوله عندك في المجمعه واخره عند باب بيتنا في الرياض
:D

.....
بسم الله نبدء

امممممممممممممممممممم
س1 / بنسه للمحرك 511
على ما سمعت انه نادر جدا وهو اقرب الى الاسطوره
يعني البعض يقول انه
موجود البعض الاخر
يقول
انه غير موجود
وفيه فئه تقول
انه اذا اجريت بعض التعديلات على 454 ( تغير عمود الكرنك )
راح تحصل على 501 وليس على 511
وانا الصراحه بيني وبينك
لا املك خبره في هذا المجال (ما عندك احد )
على العموم
السوبربان الجديد
يتوفر منه محرك 8100 وهو تقريبا (500 انش)

س2 / بعض لا يرى في تعديل المحرك 400 انش وما فوق او ما يطلق عليه البق بلوك
لاسباب التاليه
1- كثرة الاعطال وخاصه الحراره
2- سعر التكلفه
3- النتائج التعديل ليست على المستوى المطلوب
ما رايك في هذا الكلام ؟

س3 / لماذا لا يتجه الشباب الى محركات الدوج (هيمي) مع انها تعطي النتائج رائعه :good:

س4 / (خارج الموضوع ) انا نواي اعدل على محرك (350) طبعا تعديل كامل
( بساتم و بلوف و عمود و ثلاجه و كربلتير و طرنبه بنزين و مويه و نظام اشعال كامل )
كم التكلف المتوقع لمثل هذا التعديل (تقريبا )
و كم القدره الحصانيه التي سوف احصل عليها و العزم كذالك
(طبعا ابغى تعديل يناسب للمحرك للاستخدام اليومي ;) )

س5 / تقريبا كم راح تكلفك هذه الشغله (511)


س6 /
<<< ما يعطى وجه
خلاص خلصت الاساله لهذا اليوم
:D

<<<< نواي يسال مره ثانيه:cool:

تصبح على خير

[SilverSniper]

يا هلا والله... الساعة المباركة اللي شفناك... القهوة يا ولد...
أسئلتك على قلبي زي العسل... أنت آمر وأجيك أطامر..
بسم الله...
ج1 ... فعلاً 511 نادرة جداً... جابها لي قصيمي من الامارات.. كلفتني مبلغ خيالي .. 25 ألف ريال... أما 454 ما تصير 501 إذا غيرت العمود ولكن ان خرطت المكينة وغيرت البساتم .. صح .. تصير 501 ولكن الخرط يضعف جدران المكينه ولا تتحمل الجور...
أما المحرك الجديد.. فيه ناس رهمته.. أنا ما رهمته لكثرة الالكترونيات فيه.. أنا قديم صراحة...
ج2 (( بديت أحك راسي ))..البق بلوك 400 فما فوق هو الأمثل للترهيم.. النتائج يمكن للشخص التحكم فيها بالقطع اللي يركبها... مرهمين أم دباب شغلهم على 454 غالباً
الحرارة مشكلة قابلتني وبهذلتني صراحة.. بس تتغلب عليها ان كانت طرمبة الموية قوية والراديتر كبير والله الله بالمراوح.. واستعمل زيت ثقيل زي شل مثلاً.. أما التكلفة فعلاً انصلخت شوي... المكينه بـ 25 ألف.. البودي والشاصي بـ 3 آلاف... وعدة الايدلبروك بحول التسعة... والراديتر بثمانمية وخمسين.. وعدة الكهرب بألفين وخمس... والمراوح وعدتها بخمسمية.. والكفرات الواحد بـ550 .. ((( بأشحذ عند المسجد في رمضان )))..
ج3. محركات الدوج ما جربتها لكن حسب كلام مستشاري (( وزير على غفلة )) انها ثقيلة وصعب ترهيمها...
ج4.. (( العرق قام يرشخ ))... ان كنت تترهم سمول بلوك 350 للاستخدام العادي غير الكاربريتر والثلاجة إيدلبروك رقم 1405 و 5001 وطرمبة ماء 8811 إيدلبروك وغير أبر الكاربريتر علشان ما يصرف بنزين.. وغير طرمبة البنزين هولي وإجنشن هولي.. وحط أسلاك إم اس دي للبواجي مع بواجي بوش... والله يعينك ان ارتفعت الحرارة حط راديتر 8 رصات.. لا تغير العمود .. القير راح يتحمل ولكن الدفرنس يمكن يفرط ان غيرت العمود.. أما القوة.. الشفر 77 اللي عندي 454 قوته في حدود حصان370.. بعد ما ركبت الكاربريتر والثلاجة رقم 1411 ولا غيرت شي غيرها.. صارت قوته 420 حصان... وهذي زيادة ماهي سهلة.. تخيل قوة موترك..
انتهى الامتحان... وبالله التوفيق..

[عنبري تمير]

بالتوفيق ان شاء الله اخوي سلفر
وان شاء الله تخترعلك موتر جديد وتسميت الموتر علي
وانصحك تركب اكتاوتات على الانوار والسكن والبوري خل الدعوى زحف من جد
تمنياتي لك بالتوفيق

[ابو شكاع]

بالنسبة للي يسالون عن مشكلة البق بلوك اقول لكم ما فيه احسن من الناموسية هههههههههه

ماشاء الله تبارك الله

هالموتر يبي يبدأ يطامر مطامر مثل الضفدع من قوته مهوب ماشي مثل المواتر

بس شوري اذا بغيت تطبح لحمة هرش امغط به لك 20 كلم وبعدين ارجع وحط الكاتم على القزوز وكلها 5 دقايق وتصير لحمة الحاشي هريسه هههههههههههه

الله يوفقك .... ويكون بعونك .....

شكرا لك

[Eagle]

بصراحه الموتر رعب وانشالله يتم ويكتمل على افضل وجه
عندي شوية اقتراحات لك :
1 - لو تحط هود (hood scope) في نوع ينلحم على الكبوت نفسه ما يحتاج تبديل كامل يعطي نظره قويه ويوفر تهويه ومسار جيد للهواء على المكينه ومثل ما انت عارف كل ما ارتفعت الحراره قل العزم
2 - كل ما صغر قطر السير كسبت عزم اكثر والطرمبه العاديه تشتغل على السير وايضا المروحه الي تبي اتظيفها .... اقتراحي انك تاخذ طرمبه كهربائي ضخ قوي ولا تاخذ من من السير من اشهر المصنعين لها CSI
3 - شايف الدينيمو عندك موصول ايضا وانا شايف سيارات سباق تستغني عن الدينيمو بس شايف عندهم نظام كهربائي مختلف واتفيدك ايضا بلاستغناء عن الطريقه التقليديه
4- بالنسبه للاقزوز ( الشكمان ) في توصيله للمواسير على شكل X تعطي نتائج جميله
5- اذا لازال لديك ميزانيه متبقيه اقترح عليك روس مكينه اللمونيوم خاصه الفورتك سعرها منافس لمثيلاتها وقدراتها جيده
6- اذا كان استعمالك للسياره محدود وخفيف اقترح عليك استخدام بساتن ذات ضغط اعلى من العادي (اعلى من 9:5:0) تعطي عزم اكثر لكن يجب عليك اضافه القليل من الاوكتين على الوقود

الاخ طاير بالعجه
الكثير يختلف بمسألة بق بلوك او سمول بلوك وعلى فكره مكينة شفر حجم 400 تعتبر سمول بلوك ومن اقوى محركات السمول
ميزه لصالح محركات السمول بلوك انه وزنها منخفض وحجم اصغر لكن البق بلوك تصل الى قدرة حصانيه اعلى تقدر تعدي 2000 ألفين حصان اما السمول ما يوصل هالرقم (طبعا بعد صرف مبالغ خياليه طبعا)
بالنسبه لمكينو الهيمي تعتبر اقوى محركات السيارات وتصل الى 7 آلاف حصان باستخدام عدد 2 بواجي لكل سلندر ونوع مختلف من الوقود والعديد من التجهيزات الخارقه ... اتوقع القليل يشتغل على هذا النوع من المكائن لانه نادر وللعلم مكينة الهيمي تختلف عن باقي مكائن الدودج
اذا انت معزم في مكائن للبيع جديده ومجهزه بالكامل بس تركبها وتشغل بس غالبا عليها روس مكينه المنيوم (الالمونيوم اخف وزن وابرد ويعطي نتائج اقوى )
اتمنى ان الصوره وصلت

[SilverSniper]

يعطيك العافية أخوي Eagle... مقترحات حلوة صراحة.. وراح أدور عن مضخة الماء الكهربائية... أما الهود سكوب فأنا فعلاً لحمت وحده في الكبوت بس ما صورتها...
اللي محيرني نظام الكهرباء ياليت تعطيني معلومات أكثر عنه..
رؤوس المكينة أنوي فعلاً أغيرها,,, بس ما بعد حددت النوع.. خصوصاً المكينة كبيره..

[أبو يوسف]

الله يعطيك من خيرها ويكفيك شرها
ولكن اخوي
هل الموتر للاستخدام القريب واذا كان المكان بعيد بتسحبه
ولا ما فيه مشاكل ان مشيت عليه
وتقبل تحيتي

[SilverSniper]

يا هلا أخوي أبو هديل... نورت والله..
أنا سيطرت على المشاكل الآن على المدى القصير... ان قدرت أسيطر عليها تماماً .. أقدر أتمشى به في الديره ان بغيت :)
لكن ما أقدر أحكم حتى أنتهي منه وأجربه... وعلى ما يقولون ... هذا الميدان يا حميدان..

[الطبيب]

وفيه شغله محيرتني

متى ما خلصتو نقاش حول الموضوع

اسرحولنا وشهو البق بلوك والسمول بلوك

والايدلبروك

والام اس دي ...........الخ

من الحاجات اللي كنها اسماء نوعيات زيت السياره :)

هذا والله اعلم

والسلام ختام

[بروق الوشم]

السلام عليكم ورحمة الله وبركاته

بالتوفيق اخوي والله يطعمك من خيرة ويكفيك من شرة

اخوك : بروق الوشم

تحياتي

[SilverSniper]

يا هلا والله بالطبيب... نورت والله... القهوة وينها يا ولد..
مكينة البق بلوك ( big block engine ) هي المكائن 8 سلندر كبيرة الحجم مثل 511 و 454 ( مكينة الجمس العبارتين كمثال ) أما مكائن السمول بلوك ( small block engine) فهي مكائن 8 سلندر صغيرة الحجم مثل 350 ( مكينة الجمس العبارة أو الكابرس 88 كمثال) ...
إيدلبروك شركة تصنع كاربريترات ومانيفولدات وعدد تعديل السيارات القوية وكذلك شركة هولي .. و إم اس دي شركة متخصصة في انتاج كهربائيات الترهيم...
أما الزيت .. شل .. ألترا7 ... اكسترا سوبر... عافية... وانت ماشي :)

[القماري]

تسلم يا SilverSniper على سري للغاية ، لاتستعجل بالتجربة وإعطاء المواصفات ترى فيه ناس واجد في النت شغلتهم اللطش والتطبيق (خصوصا اليابانين والتايوان)
عموما بالتوفيق وعقبال مانشوف الفيدو لعمل هذا المصك (الوحش) ولاتنسى تربط حزام السلامة :light:

[رفيع الشان]

أخوي الطبيب ..... :) سبحان من يجمع العقول تصدق أني سيم سيم أنته :)

يالله نعرف كاسترول وشل وهذولا مدخلينا في الكرنك والبواجي :)


أخوي القناص الفضي من كثر مأأتخيل كبر المكينه بسم الله ماشاء الله أحس أنه ماعاد بيمشي ... أحس أنه مابيتعدى الاربعين :) <== وده يحبط معنوياتك ...

ودي أسألك على الطريق المسفلت يوصل 140 ولا أقل ....


شكرا لازعاجك :)

[Bader-M]

Eagle


اذا انت معزم في مكائن للبيع جديده ومجهزه بالكامل بس تركبها وتشغل بس غالبا عليها روس مكينه المنيوم (الالمونيوم اخف وزن وابرد ويعطي نتائج اقوى )
اتمنى ان الصوره وصلت

هذه كم تاصل سعرها

بما انك من الكويت
انا سمعت ان عندكم مكاين كورفت رخيصه مررره
يعني لا تتعدى 2000 ريال
ولا كلام جرايد :D
.........

اممممممم

سوال ثاني

بنسبه للمحركات
الشفر LT1
يقوم بعض المكانكيين
بتعديل بسيط
وهو
تغير نظام الحقن كامل
ثلاجه و كلبريتر
بدال بالخاخات
لان
ومثلك خابر
ان المكينه هذا نسبة الانضغاط فيها عالية و كذالك دورات المحرك عاليه
يعني لا تحتاج الى تغير بساتم و عمود

وعلى ما سعمت انه تعطي نتائج رائعه
تصل القدره الحصانيه الى 350 حصان
المحرك لا يكلف اكثر من 10 الاف ريال
وهي ايضا عملية

ماتعليقك على هذا الكلام
<<< الاتجاه المعاكس :D


..........
تصبح على خير

[Eagle]

عزيزي سيلفر سنايبر
والله قاعد احاول اعصر مخي واتذكر السيستم لانه والله خبري من زمان في سوالف المواتر قطعت عنها من فتره طويله بس الي اذكره القطعه مربعه ولونها بنفسجي بس والله ماذكر الماركه بس اكيد ماهي ام اس دي
بالنسبه للطرمبه متوفره عندنه بالكويت وانت لو كنت جاي الكويت قبل لا تشتغل بالمكينه تلقا كل الي خاطرك فيه وعندنه ناس محترفه في مجال السباق وعندهم قراجات متخصصه في هذا المجال
وعن الروس مثل ما قلتلك في روس ينقالها فورتك تصنعها شفر من اللمونيوم وقوتها معقوله وسعرها مناسب وعندك ايضا روس ايديلبروك بيرفورمر او برفورمر ار بي ام (الاختيار الثاني اغلى واقوى) ايضا من الالمونيوم وقوتها جيده لكن السعر اغلى من الفورتك
وايضا عندك شركة دارت Dart تصنع روس من الحديد تعتبر في الطليعه من ناحية روس الحديد وسعرها تقريبا نصف سعر روس الالمونيوم وايضا قدراتها معقوله وسعر معقول

ازيدك اقتراح بعد اذا كنت من عشاق القير العادي في قيور عاديه وتستحمل مكائن كبيره وقويه اسمها تريميك Tremec

بالنسبه لمسألة شنو الي تشتريه اذا كان عندك المام بالموضوع وتقدر انت تقرر شنو تحتاج من قطع اقترح عليك تاخذ كاتالوج summit وتقدر تشتري من خلاله في كل القطع من الدعاميه لي الدعاميه للامريكي 8 سلندر

والله يوفقك في مشروعك الرائع وخلنا على اطلاع

[SilverSniper]

يعطيك العافية والله أخوي Eagle
سألت واحد من الشباب أعرفه وقال يبي يجيب لي علم عدة الكهرب.. أما الراس فأفكر بإيدلبروك بيرفورمر أر بي إم ... القير اللي عندي مبسوط منه ومجربه... ماركة SilverSniper المحدودة :) ... قير Tremec غالي.. وان شاء الله اني ماني محتاجه... كاتلوج summit عندي واستفدت منه...
أخوي فيصل القاسـ .... آآآآآ ... عفواً ... طاير بالعجة... ((( يا جماعة يا جماعة... يا جماعــ..... ((( واحد صكه مع راسه بكاس القهوة ))) .... ))) .. :)
مكاين الكورفيت سمعت عنها.. العلم عند إيجل ... أما مكينة الشفر ... فيه واحد أعرفه شال البخاخ وحط بدلاً عنه كاربريتر وثلاجة هولي.. وسيارته ماشية زي الساعة....
فاصل إعلاني.. ثم نتابع مجريات الحلقة ... مع إيجل.. :)

[Eagle]

ياخوي ياطاير بالعجه
والله حاليا ماعندي معلومات كثيره حول هالمجال لانه اطلاعي قل عنها
لكن بالنسبه للسعر اعطيك مثال بسيط
اختيار موفق التخلص من البخاخ وتركيب كابريتر لتبسيط المكينه والتخلص من تعقيدات البخاخ الالكترونيه
واحد من الاصدقاء عنده كورفت LT1 والموتر مجهز وقوي ونظيف سعره تقريبا 20 ألف ريال وتلقا كورفت عادي بسعر 10 آلاف ريال
اختيار هذي المكينه اختيار موفق لانها صحيح قويه وعليها روس اللمونيوم وما تحتاج ألا تعديلات بسيطه وتوصلها 350 حصان
على فكره في مكينه ايضا نفس الفصيله تسمى LT4 ومن غير تعديل قوتها تقريبا 340 حصان وما تختلف عن المكينه الاولى كثير
واخيرا محرك القمه من السلسله يسمى LT5 وقوته 400 حصان وذات اربع كامات بس اتركها عنك لانها معقده اكثر ونادره
انشالله انا بأقرب وقت استفسر واعطيك الخبر اليقين بخصوص هذا الموضوع
وسامحونا على القصور

[نقا هشال]

ماشاء الله

الله يعطيك خير ه ويكفيك شر ويوفقك

[Bader-M]

السلام عليكم ورحمة الله وبركاته

.........

سويت بعض البحت عن الفورتيك

ولقيت بعض الصور

ارجوا ان تفيدكم

http://www.2quicknovas.com/vortec.jpg


هذه شكل غرفة الاحتراق


http://www.replikamaschinen.com/Web_Content_110401/Chevy/Big%20Block%20Vortec%20Combustion%20Chamber.jpg
......


تمتاز هذا الراس
هو
طريقه دخول الهواء الى راس المحرك
يدخل غرفة الاحتراف ( السلندر ) على شكل عصار
يعني مثل الاعصارات الي نشوفها في التلفزيون

هذا صفحه من مجله او كتاب تكلم عن الفروتيك

http://www.compcams.com/Base/Images/Articles/CC_CHP0201-002-1.jpg


http://www.compcams.com/Base/Images/Articles/CC_CHP0201-002-2.jpg
......


هذه صوره للمحرك LT1
معروض في الموقع للبيع
وهذه معلومات عنه
CHEV 350 LT1 GEN 2 - Multi point fuel Injected Motor.
Reconditioned motor, 325 HP and 395 HP versions. Comes with alloy heads, water pump, drive plate, new LT4 injection, harmonic balancer, distributor, 395HP @ 5500 RPM, 420LBS Torque @ 4500 RPM. 325HP Cost $5600 #153B. 395HP Cost $6600 #154. 12 months guarantee. (we have sold now over 150 of these motors)

الصوره
http://www.suburbanimports.com.au/motors/350lt1%20fi%20mtr.jpg


وهذا ايضا مثله (LT1)
ولكنه اقوى

المواصفات
CHEV 350 LT1 GEN 2 - Reconditioned
325HP and 395HP Motors. Comes with alloy heads, water pump, HV oil pump, flat top pistons, heavy duty rods, roller cam, balancer. 325HP Cost $3700 #152B. 395HP Cost $4700 #152C. WILL TAKE EARLY INTAKE. 12 months guarantee.

الصوره
http://www.suburbanimports.com.au/motors/350%20lt1%20no%20intake.jpg


طبعا كما تلاحظ الاسعار شبه خياليه يعني اقل سعر حول 20 الف ريال


.......

على فكره
هذه معلومات انا جمعتها من النت

يعني معلومات بسيطه جدا
ولكن قلت عساها تفيدكم وتفيدنا ايضا


تقبلوا تحياتي

[SilverSniper]

يعطيك ألف عافية أخوي طاير بالعجة.... بآخذ معلومات أكثر على كذا قبل ما أشتري روس الايدلبروك... المجلة هذي مجلة شيفي حقت شيفروليه... موجوده عند عمي على ما أعتقد..بأشوفها.. أما المكاين ان كان بتاخذها جديده زي ذي فالله يعين مخباتك.. هذي 511 وزي الفل (( حتى ريحتها زي الفل )) ب25 ألف.... على العموم.... راح أسمي السيارة.... مكشات.... وراح ألصق الكتابه من الباب إلى الاستبنه... واسمك يا طاير بيطير على الكبوت... وإيجل على بابي.... أقل شي ممكن أسويه عشان أشكركم... وأشكر ... مكشات ...

[ابو شكاع]

افا

اخوي سلفر سنايبر انت طمرت وما رديت علي

شكل كلامي ازعجك .... الدعوا مزح الله يسلمك .... ولا يكون بخاطرك شي

والله يوفقك بموترك وتتهنى به

[SilverSniper]

يا هلا والله ببو شكاع... أنا ما طمرتك يا الغالي... أنا بس أحتري لحمة الهرش تستوي... الظاهر اني كثرت المراوح... والا الهرش صدق... هرش... :)
أما الزعل... ماحد يزعل من واحد يشيل قدره فوق راسه... (( ماهو قدر ضغط.. لا تفهم غلط :) )) أما اني انزعجت منك... ماحد ينزعج من تغريد ام سالم... وخاطري منك أصفى من نجوم الثريا بليلة صافية...
الله يسلمك ويقبل دعاك انشاء الله... ومشكور والله

[Bader-M]

http://www.mekshat.com/pix/upload/sign/images/mk3046.gif


هذه ميزه راس المحرك الفورتيك

.......

السيارة.... مكشات.... وراح ألصق الكتابه من الباب إلى الاستبنه... واسمك يا طاير بيطير على الكبوت... وإيجل على بابي....

الله يسلمك و يخليك
بس عاد لا تنسى تصورها في كميرة فيديوا;)

نتمنى لك التوفيق في مشروعك

.......

اذا حصلت معلومات جديده راح احطها في هذا الموضوع


تقبلوا تحياتي

[الجنوبي]

اتمنا ان اشاهد
هذا الوحش في مقاطع فديو
وان يستفيد كل مكشات من هذه الخبرات
.........الله يعطيك خيره ويكفيك شره
اخوي
SilverSniper
............................................الجنوب ي

[أبوأحمد98]

السلام عليكم ورحمة الله وبركاته
الله يعينك ويوفقك ....فعلا .......تعب ومصاااااااااريف ........((الوعدأم دباب عيد الفطر ))

فيه مرهمين جدد((أحمد الصمعاني))و((المشوح))......الله يوفق الجميع .......:)

[ABU-AL-3eeS]

الله مير يطعمك خيره ويكفيك شره :D

[عاشق الصفاري]

الأصل كُتب بواسطة عاشق الدداسن
بالتوفيق ان شاء الله اخوي سلفر
وان شاء الله تخترعلك موتر جديد وتسميت الموتر علي
وانصحك تركب اكتاوتات على الانوار والسكن والبوري خل الدعوى زحف من جد
تمنياتي لك بالتوفيق

[سوبر بنللي]

السلام عليكم ورحمه الله وبركاتة

اختيار موفق للمحرك..وعندي بعض الملاحظات..

انصحك بكالبريتر هولي تعديل ,,

ضغط المكينه لازم توصله لـ11 فما فوق الناس وصلت 14 الحين

عامود التيمين اسال وش يناسب مكينتك وغيره لان قوه المكينه شد بلد ماتسوي شي
مثلا عندنا مكينه 350 عزمها الاصلي 175 حصان بينما وصلها واحد من الشباب لـ450 حصان ماشاء الله تبارك الله ,,

بالمناسبه شاصي الباترول قوي جدا جدا ويتحمل ويفيدك اكثر بالتعليق لان تعليقه ممتاز للنفد والموتر اثبت نجاحه بالامرات حتى صاروا مايتعاملون الا معه سيارات ذات 1400 حصان واكثر :D


والى الامام واول الخير قطره زي مايقولون

[SilverSniper]

أشكر الجميع على الرد....
أخوي سوبر بنللي... حياك الله ...
كاربريتر إيدلبروك بيرفورمر مع ثلاجه إيدلبروك بيرفورمر مهواة يعطيك قوة أكبر من الهولي.. وأنا متكل على الله ثم عليه...
ضغط المكينه عندي يوصل 14... ويتعداها... بس ان تعدى 14 فرط الدفرنس.. أنا أحاول أتعدى المشكلة هذي الآن..
عمود التيمنج اللي عندي متسلفه من واحد راعي ترهيم... لكن مدري والله وش نوعه... قوة السيارة عندي ماقدر أحكم عليها حتى أنتهي... لكن أتوقع اني كاسر حاجز 500 حصان ومتعديه بمراحل..
أما شاص الباترول.. جربوه ناس عندنا وكلهم يلحمون عوارض عشان التقوية... أنا أقدر ألحم بس ما أبغى أزيد الوزن بحديد كثير.. أقدر أستغني عنه بشاص هالمبروك..
ويا هلا والله ومرحبا..

[سوبر بنللي]

السلام عليكم ورحمه الله وبركاتة

مدري عن موديل الباترول الي تكلم عنه ,,انا اتكلم عن من موديل 91 حتى 97 تقريبا وهو المعتمد في الترهيم ,, على فكره مانصحك بمراوح السيور تراها مزعجه للغايه تطيح من عزم الموتر وتقصر من مدته بالنمره ,,

سؤال ,, هل نبي نشوف الليث بام دباب ان شاء الله هالعيد؟ ياليت تشرفنا وترقى مع مرهمات ام دباب ,, عشان نشجعك وان كانك تبي تجي علمنا وشلون نميز موترك من بينهم

[ابو درع]

الله يوفق مسيرتك

عرضك وشرحك جميل ....... ونت اجمل

نبي الجديد..

[الربذي]

اخي الحبيب الغالي سلفر سنايبر مبروك والله يعينك على كثرة عوار الراس اقصد هذى مايركب هذا فرط هذا احترق ولكن الكبار كبار والله يقويك ويعينك ونحن بنتظار لقطات الفيديو للمكشات على اربع عجلات
اخي الحبيب الله يعطيك من خيرة ويكفيك شرة
وياليت هناك نادى لاحتضان مثل هذى الامور
اخي سنايبر سوال بسيط
كيف تقدر تقيس القوة الحصانية
محبك

[SilverSniper]

الباترول اللي أتكلم عنه أخوي سوبر بنللي هو نفس الموديلات اللي تفضلت فيها.... أما اني أدشن مكشات هالعيد فما أدري والله... لكن فيه احتمالية .... وتقدر تعرفه بكتبة مكشات على البودي...
حياك الله أخوي أبو درع... أنت الأجمل يا ملك جمال البران كلها...
أووووهه... الربذي شرفنا بمروره... الله يحييك والله..
هذا مايركب... فرط الله لا يعيده... انكسرت المروحة... وجع... الراس احتر... هذي اسطوانتي اذا جيت أشتغل والله يعين...
القوة الحصانية يا طويل العمر.... أنا عندي حساس مع أسلاكه ودسكاته شاريه من أمريكا بـ150 دولار ... الحساس هذا تربطه بالحذاف أو بالجنط... وتربطه بكمبيوتر ... لابتوب.. ثم تشغل السيارة ... وتمسك بها خط مستقيم... وافجر أم المكينة... يعطيك الكمبيوتر قراءة القوة الحصانية والتورك والتركشن والسرعة القصوى للسيارة ...

[nahham]

ماشاء الله عليك اخوي سيلفر عيني عليك بارده
لا ومن المجمعه يعني قريب مني
تستاهل مني هديه طالما انك من هواة السيارات القديمه
عندي لك جيب نيسان باترول ربع موديل 83 لك مني مجانا هديه
السياره ما فيه احلى منها محركاتها صح وكل شي فيها صح
بس الله يعينك على مصروف البنزين
تحياتي

[SilverSniper]

مرورك أخوي نهام أعتبره أكبر هدية... والله يوفقك انشاء الله.. أما مصروف البنزين فأنا متعود عليه... لاند كروز.. وشفر ... ومكشات... وعليك الحساب.. وان كنت تبي نصيحتي .. ان كان عندك دراهم وودك ترهم.. لا تفرط بهالربع... اشتغل فيه .. تراه بيعطيك خبره... بس يبيله سعة بال.. وسعة دراهم.. ويا هلا بك والله..
وما دام انك قريب من المجمعة... يا سير علي والا أسير عليك.. وش قلت :)

[nahham]

حياك سيلفر
بريدي nas1177@hotmail.com
انتظر منك رساله
لاتنسى توضح العنوان زين
الى اللقاء

[الطبيب]

متى تتوقع الانتهاء من هذا المشروع يا سنايبر ؟؟؟؟؟؟؟؟

مجرد سؤال :)

هذا والله اعلم

والسلام ختام

[SilverSniper]

يا هلا بطب قلبي.. يا هلا بالطبيب..
أتوقع الانتهاء يا طويل العمر ... بعد العيد بأسبوع أو أسبوعين... إذا مشت الأمور على ما هي عليه الآن.. لكن برمضان شغلي خف عنه شوي.. والله يكون في العون.. ويكفي حربثه الله يصلحك.. يعني لازم تحوس :)

[مأيـغـرّز]

السلام عليكم ورحمة الله وبركاته
الله يهنيك على هالموتر بس تذكر يالغالي اهم شي سلامتك وانت تسوق هالجبار العتر ترا يا خوي انا من المعجبين بمواتر التيوتا بوشنب ما عادو يصنعون مثل هالاعاجيب وعندي اثنين ترا موديل 73 و 82 قاعد اشتغل فيهم بس طبعا مو مثل تحفتك العجيبه :) شي على قدنا :)) الله يهنيك ويزيد القريشات اللي في جيبك على شان تكمل جيبك بس لا تنسى اتعزمنا على الطبخه اللي على الشكمان :))))) في امان الله

[SilverSniper]

مشكور على مرورك أخوي ما يغرز وانشاء الله موتري مثل اسمك..:D
من نواحي السلامة يا طويل العمر أنا لحمت عوارض معدنية مقوية داخل الغمارة على شكل هيكل .. اضافة إلى وجود أحزمة أمان...
المستجدات... وصلتني رؤوس المكينة بالأمس... إيدلبروك ألمنيوم.. بيرفورمر أر بي ام.. وهذي صورتها في كرتونها ما بعد فكيتها.. وجبتها بناء على نصيحة إيجل..
http://www.mekshat.com/pix/upload/images6/mk7239_ch.jpg

بأبدأ أركبها الخميس انشاء الله..

[الطبيب]

وش نوع الكفرات اللي انت مركبها على الموتر

ووشهي علاقة الروس بقوة المكينه

مجرد تساؤلات :)

هذا والله اعلم

والسلام ختام

[SilverSniper]

يا هلا والله بالطبيب.. الساعة المباركة والله..أسلوبك في السؤال مهوب زي العادة.. جاف شوي.. عسا ما هنا خلاف؟؟..:)
حياك الله والله.. نوع الكفرات طول الله عمرك برجستون راديال جي تي جنط 16.. والمعروفه بكفرات الجرافة..
رؤوس المكينة تزيد القوة بشكل خيالي.. خصوصاً الألمونيوم.. ونصحني بها إيجل الله يجزاه خير .. وحرصني عليها طاير بالعجه الله يسلمه.. وممكن تشوف شرحهم عنها..
يا هلا بك والله..

[الفهد454]

دعوة صادقة يارب تنجح والى الامام

[الطبيب]

اذا الرد جاف ...........

صب عليه ماء حار ويلين :) :)

هذا والله اعلم

والسلام ختام

[ابو الريم]

اخوي SilverSniper

ما ودي اضيق صدرك بردي بس ترى المكينة 454 وعادية بعد , جي ام ما صنعت مكينة اسمها 511 , اكبر مكينة صنعتها 502 , وتختلف عن ال 454 ان بستمها اكبر وغطيان بلوفها اكبر وعلشان تتأكد فيه رقم على سلندر المكينة مكتوب ورا جهة السواق فوق الحذاف اقراه وشيكه في هذا الموقع وتقدر تعرف كم موديل المكينة وعلى وكم مسمار للسلندر

http://www.mortec.com/bbc.htm

او تقدر تدخل هالموقع اللي يبيع جميع المكاين اللي انتجتها جي ام من اول انشائها http://paceperformance.com/ وبالطبع ما فيه شي اسمه 511

ال 454 تجي شد وكالة 230 حصان بس تتميز بتورك رهيب , ومع التعديلات اللي سويتها زدت من توركها وهذا اللي تحتاجه انت في التطعيس , العزم . وبسبب هذا العزم الزايد هو اللي يكسر عندك الدفرنش او القير . الاحصنة امر ثاني . اتت 454 360 حصان على سيارات السبورت القديمة من 71 الى 73 فقط وهذي المكاين نادرة مرة , ولكن هناك خيار افضل وهو مكاين 454 المارين البحرية تأتي من الوكالة 450 - 550 حصان ولكنها نادرة وتتداول بين شباب التعديل , ولكن بالطبع ان جربت هذه المكينة فاكيد الجيب الربع ماراح يتحمل الا اذا جهزته تجهيزات كاملة .

كل التعديلات اللي سويتها على المكينة تعتبر تسهيل لها وما دخلت بالعميق , وطبعا كل ما تعدل اكثر واكثر تزيد من القوة وبنفس الوقت الحرارة , فمثلا اكثر ما يؤثر على ال 454 هو اختيارك للكام(عمود التايمنق ) , الكامات انواع واشكال وتقدر ترجع لهذا الموضوع لتتعرف اكثر http://www.omdbbab.com/vb/showthread.php?s=&threadid=6486
طبعا هناك ملحقات عمود التايمنق من جنزيل وسبرنقات وروكرات وقفول وغيرها , لا نسسى كم ذكر الاخوة ان زيادة ضغط المكينة يعطيها اداء اقوى بكثير لان الانفجار الداخلي سيكون اقوى , وخاصة ان ضغط المكينة ال 454 العادية ضعيف جدا فهو لا يتجاوز 7\8 :1 تقدر تزيده بتغيير البساتم الى ضغط اعلى مثل هذا البستم
http://static.summitracing.com/global/images/prod/large/trw-l2349f60_w.jpg

بالنسبة للروس فهي تحتاج ميزانية لوحدها , تستطيع ان تعدل بالروس بتكبير حجم بلوفها مع تلميع وتوسيع عند احد خبراء التعديل , او شراء رووس 454 مارين ( بحرية ) تأتي بفتحات اضخم من العادية تصل الى الضعف وتعطيك اداء رهيب ولكن مع تغيير البساتم .


بالنسبة للجيب السفاري فشاصيه اقوى من التويوتا , ودفرنشاته وقيره اقوى من الويوتا ويأتي بنظام تعليق كامل يايات وغيره وهناك مساباقات دولية بالامارات في تل المرعب يضعون على الباترول مكائن ضخمة بمئات الاحصنة وما يقول شي , ولكن مشكلته ان وزنه اثقل , ومسألة الوزن اهم نظيرية يجب الاهتمام بها في التطعيس . ولذلك التويوتا افضل حل لاهل المرهمات .


اخوي طاير بالعجة رووس الفورتك اللي حاط صورها حقت سمول بلوك , نظام البيق في رووس الفورتك مختلف , والافضل انك تاخذ من شركات التعديل الاخرى , ورروس البيق تأتي على شكلين من جهة الثلاجة , شكل بيضاوي (oval) كم هو معروف رووس ال 454 العادية وشكل مستطيل (rectangular)

عموما ان احببت ان افيدك بما اني لي خبرة في هذا المجال فانا حاضر لاي استفسار وتحياتي لك وبالتوفيق

[SilverSniper]

يا هلا والله بأبو الريم.. يا هلا والله ومرحباً
جميل جداً وجودك هنا ورأي واحد خبير في هذا المجال يهمني.. ونستفيد منك وتستفيد منا.. ويا هلا ومرحبا..
بخصوص المكينة .. 511 طول الله عمرك موجودة.وتعطيك أحصنة مثل مكينة المارين بتورك أعلى. وشكلها ما يفرق عن شكل 454 . . الفرق في اتساع البساتم وحجم الكارتير من تحت والوزن الثقيل جداً ( مكينة لوري وليست شيفي ).. وأنا أستغرب انها ماهي موجودة في الموقع.. أما الرقم اللي عند الحذاف فأنا لاحظته.. اذا رحت للديرة انشاء الله بأسجله وأشوف.. بالنسبة للتعديل فأنا لسه ما انتهيت.. أبغير رؤوس المكينة وعمود التيمينج.. والجنزير.. والبساتم جاية في الطريق.. والله يعيني على الحرارة والدفرنس..
أما الشاصي فتلحيم حديد تقوية على شاصي الباترول هو اللي يسبب الوزن الزائد.. واليايات والسست أقدر أنا أحطها أو أشيلها ولا تسبب مشكلة..
الرؤوس صح مكلفة.. كلفتني 9000 ريال للراسين كلهن..
ويا هلا بك والله..

[الربذي]

ياهلا
ردو موضوعك زين يامعود لى فترة ادور علية
محبك

[الطبيب]

حربثه للتوضيح فقط (( يا الربذي ))

:) :)

هذا والله اعلم

والسلام ختام

[مهيلان]

اخوي SilverSniper

الله ييسر امورك

عندي استفسار وطلب

الاستفسار هل القير للتويوتا او للامريكي واذا كان تويوتا هل يركب الداير مباشرة او لازم ترهيم .. وهل يركب عمود الكرنك مباشره او يعدل ؟؟؟
الطلب : اذا انتهى شغلك في الموتر راسلني علشان نجربه في نقرة المشاعله .. اطول نقره بنفود قنيفذه ...


والسلام عليكم[B]

[SilverSniper]

يا هلا بمهيلان.. حياك الله... القير تويوتا.. مركب له تروس الأول والثاني جمس مسنن.. قير التويوتا يركب بدون ترهيم بس ما يتحمل المكينة... يكسر التروس ويفرط العمود على طول ... لازم تلعب فيه.. أو تركب قير خاص بالتعديل مثل قير تريمتك..
الطلب ... على عيني وراسي.. أنت تامر.. خل أنتهي منه بس..

[رفيع الشان]

أخوي القناص الفضي ... نتمنى لك التوفيق فهالمشروع وللاحاطه المشاريع زي هذي تتطلب جهد وتفكير عميق وتؤدي الى تشغيل الذهن وتنشيط خلايا في الرأس للي بس نجبد بهالكبسات واللحم اللين راحت هالخلايا :)
نتمنى لك التوفيق ...

بس عندي سؤال بسيط .... مثلا عندي كبسوله قديم مودي 83 و وودي اركب عليه مثلا مكينة جمس 454 علشان يكون أقوى خصوصا اني استخدمه في البر ... هل تركب عادي من دون تعديلات لأن مكينة الجمس من دون دبل والكبسوله يتطلب يكون بدبل ...
بعدين في واحد من الاصدقاء قلت له على الموضوع وقال في مكينة كبسوله 2000 للبيع في التشليح هل تتوقع تركب على الكبسوله القديم ....

ولك الشكر يالغالي ... مع العلم ان جزء من السؤال سألتك بموضوع ثاني لكن علشان حتى اللي يمر على موضوعك يستفيد .... ودمتم في رعاية الله ...

[SilverSniper]

يا هلا بك أخوي دمعة بعير... وسؤالك في الموضوع الثاني رديت عليه طال عمرك..
بالنسبة للمشروع.. انت نسيت حاجة غير الخلايا... مخباتك تصير كأنها مشقوقة.. تروح الدراهم ما تدري عنها..
مكينة الجمس 454 أو أي مكينة ... ما يجي فيها دبل يا طويل العمر... الدبل جزء ثاني مختلف عن المكينة يتكون من دفرنس أمامي وقير دبل وعمود وشيالات... الكبسولة فيه دبل أساساً.. يعني حتى لو حطيت مكينة 454 راح يظل دبل ما يتغير.. لكن القوة والعزم راح يتغير معك تغير كبير... أما بخصوص مكينة الكبسولة الجديد فما أظن انها تركب لكثرة الالكترونيات والكمبيوتر.. راح تبهذلك.. مكينة جمس 454 أفضل وأقوى... المطلوب انك ترهم كراسي للمكينة.. ولو تغير في المكينة تغيير بسيط.. كاربريتر وثلاجة إيدلبروك أو هولي... وشوف الفرق..
أنا عندي غير المرهم هذا .. شفر سلفرادو 77 رفارف عبارتين.. مكينته 454... مركب له كاربريتر إيدلبروك 1411 مع الثلاجة... ما غيرت غيرها.. وقوته 420 حصان.. تخيل قوة سيارتك بعد مكينة جمس454... :)

[رفيع الشان]

شكرا لردك يالغالي .... أمالي نفسي وارد لك عالخاص ...

[الاحداثي]

بالتوفيق ان شاءالله والوعد صعافيق !!

[صخب]

واش صار على الاختراع