=== صـفـة تـتـضـايـق مـنـها===

[المربد]

من بـاب الانـصاف ان نـقـوّ م ذواتـنـا، فـكـمـا ذكـرنا الـصـفـات الحميدة في موضعنا السابق (===صفة تفتخر بها=== (http://www.mekshat.com/vb/showthread.php?s=&postid=176063&t=7736#post176063))

ارجو المشاركة بذكر صـفـة تـتـضايـق منها وتـتـمنى ان تـتخـلص منها .














أما انا فعندي صفة شـينة وودي اتخلص منها وهي:

آخر يوم في الكشتة اكره نفسي واكره خوياي.

[ابو ســــاره]

واهنيك على حسن اختيارك للمواضيع ،،، بدون كثر قرقه انا الحمدلله ما بي بلا بالبر وربعي يحبوني بالبر وكل شي تمام بس انتبه ! اشوف احد حاط يحورف بموتري يتغير مزاجي ولا يسحب احد شوزلي ويقعد يحورفبها اشوي واصير الرجل الاخضر الي يتنفخ وتنشق خلقانه . ومهما حاولت ابتعد عن هالصفة الا انه احسها غريزة اساسية بي ؟؟؟

[SilverSniper]

أنا مدري عن نفسي.. لكن اللي يطلعون معي يقولون اني وسيع صدر زيادة عن اللزوم... الحاجة اللي يخلصونها الناس بدقيقة.. أمخمخ عليها ساعة... وعجزت أفتك من هالعادة... أما صفة أكرهها في الآخرين .. النعومة الزائدة... دم ضروسي الواحد اذا جاء بقذله وثوب مخصر وكنه عود خلال والهوا يمخش وجهه من النعومه ولو يوقع على شماغه ذباب.. وداه غسيل مستعجل... ودي أميسره الين يصير رجال والا يموت بين يديني..

[بركان]

مشكور اخوي المربد
على الاختصار المفيد
لدي سلوك لا يحبه البعض من حاري البطون.

وهي انه اذا قرب الأكل يجهز طبعا الكبسه وش هالأكل معروف اكلنا , رحت اتمشى واذا جهز الاكل الى مانيب حولهم جلسوا جماعة الربع يزاعقون وانا اسمعهم واسفههم طبعا واثق انهم ما ياكلون الا انا موجود والا لو يسوونها حست ابو ابو ابوهم.
طبعا هذه العاده ليست كبر او حب في التميز
انا اقصد منها
ان الكبسه تبرد شوي
يا اخوي بعض الناس من يوم يشوف الكبسه طبت في الصحن وهو يبدأ الاكل قليل الادب وقبل الناس ودرجة حرارة الاكل تفوق 200 درجه لانه مطبوخ في قدر ضغط والضغط يبي له وقت على شان يبرد ويبرد الاكل.

لهذا السبب اتعمد الهروب قبل الغروب لكي عندما اعود يكون الاكل كله برود !!!!

هل معي حق والا لا.؟؟؟

[المربد]

ابو سارة زان الموضوع بوجودك ، ان كان ما هو جاهل اللي يحربث بالموتر فوسع صدرك ترى الصديق اعز من الشوزن والموتر.

السنايبر الفضي قصدك تقول انك بارد شوي، (ياويل قلبي ..) ما يخالف اهم شيء الشغل يقضى بوقته، وشد حيلك بس لاتـزعل من خوياك.

استاذي بركان ما تشوف انها ( نحاسة ) ؟
لان مثل ما يقال مقابل جيش ولا مقابل عيش.

[GENERAL 3NTAR]

كل كلمه تنقال اتبعها بتعليق واطنازه
:(


:p

[المربد]

جنرال عنتر اصلا ما يحلا البر اذا ما فيه تعليق وطنازة ،
بس !! عساها في حدود الادب الشرعي.

[الطبيب]

لاخي ابو هديل

http://www.mekshat.com/vb/showthread.php?s=&threadid=24156


اسمحو لي

ولكن اعتقد بأن الموضوعين تكلمن عن نفس الشيء

والا انا غلطان ؟؟؟؟

هذا والله اعلم

والسلام ختام

[الربذي]

السلام عليكم ورحمة الله وبركاته
ياهلا بالاخ الحبيب الغالي المربد ولايهونون النخبة الى رادين عليك
بس لو اخونا سنايبر؟؟؟ولا بلاش انا فيني طباع مي حلو بالمرة
ضيق صدريعني اتنرفز بسرعة لكن من اليوم ورايح ابي امسك اعصابي بكل يديني اقتدى بسنتة صلى الله علية وسلم
مااتهنى ولااستانس (استاحش) اطلع للبر او اكل لوحدى حتى لو كنتى غصب عني لوحدي افتح الباب واي هندي بالشارع ولا اي واحد اصوتلة ياكل معي !!!!!:confused:
الا هذىمهما غصت وابحرت بعالم الانترنت زي هالاعضاء مالقيت يعني الا ارد ولو قعدت يوم عنكم كنة اسبوع لانكم:p :p

[SilverSniper]

أيوه...؟؟؟؟..... ولعتوا فيني أشووووف:mad:
بس ما عليه... منكم زي العسل..:D ...
الظاهر فهمتوني غلط...:p
أنا حرك ونشيط وأحياناً أشب على ربعي عشان يتحركون...
لكن اذا خربت الشوزن معي مثلاً... أو جا عطل في السيارة... أفكر ألف مرة وأحسب كل حساب لكل مسمار أفكه.. وان جيت أربط شي أبي شغلي زي شغل الوكالة.. وان جيت أرمي .. أقعد أصوب وقت طويل وآخذ راحتي... يعني أن الحرص يخليني أطول وأوسع صدري...:p

[GENERAL 3NTAR]

المربد

في حدود الادب

لكن الربع كل اشوي يقولون : تراك ذبحتنا انت ما خليت واحد ابحاله

:D

بس تراهم يضحكون ما ياخذونها بمحمل الجد و العفرته:)

[كوال]

السلام عليكم

اشكرك اخوي على الموضوع ..........

اما عن الصفة الي ترفع الضغط فهي احيانن تجي من الخويا مع الاسف....وخاصتاً

اذاكان الموتر موترك....اول ماتاصل للمكشات وتنزل العزبة...الا الاخويا متكين وانت "شيل وحط"

الثانية كثرة التعليقات.....وان اقول لاخوي المربد ماهي مشكلة الطنازة والتعليقات بس اذا زادة شوي

عن الادب......
:mad: :mad: :mad: :mad:

[المربد]

هلا والله بالربذي (المصوت بالعشاء) وهذي ماهي صفة شينة بارك الله فيك . نورت يا بعد حيي.

اخوي الشمالي22 شد حيلك ولازم يجي اليوم اللي يتحركون به ، بس لا تستعجل او تيأس.

[طحنون]

اه بس
الصفات واجد
لاكن الاتكاليه الزائده على البعض
يعني انك تطلع مع ناس ماهو ذاك الزود ولا يعرفون حتى ابجديات الرحلات مابقى الا انك تحط اللقمه
في فمه والا واحد مشخص كنه رايح يخطب
اذا مايجيك الشموخ مع كل جه في الوجه والسيقان والرجول :D
يعني ههب ريح
يعني مبرمج على طول

[خشم الحصان]

الاخ الغالي
الملبد(المربد)
شف ياخيي ياكثر العيوب الي فيني انا كلي بثاره وبعض الوقت اسولف علي روحي وقول انت الحين وش الي مقعدك ورا ماتقوم تسوي واذا كنت قاعد اسوي شي قلت ورا الحين غادي كنك (اندونوسيه) من بنات عبد الغني شربت مغير تحط وتشيل وتخم وذولا غادين كنهم دواشق مطويه متسدحين ورا ماتنسدح معهم وتقر يعني ماركد واتقلم مع البر الا بعد يومين ابدا اسدز روحي اني في وضعي الطبيعي ولي يرفع ضغطي وغدي كني امبيرات هلوكبتر
1- للي كل شوي ينشد وين حنا فيه ومتي نبي نمشي وش وجهتنا الثانيه وراذا مندفز وراذا طايح غادي سنه شايب ومتقاعد
2-وكره شي الشخص الي اذا قمت قال بالله علي وقفك جب من الموتر شي بالله علي وقفك عطني بياله
بالله علي وقفك جب البيز معك يعني سنك طالع مع واحد محرول
3-انا انسان اشخر مره ويسمعني الي في بقيق
4- ماوطن الرجال الي يجيه نوم معي في السياره وووووه ه ه ه ياهو دم ضروسي ودي انحزه بمرفقي او افتح الباب ودزه برجلي
5-التسدح عند المشب
6-الشخص العنيد وا لي راسه يابس
7- السلاح ماوطن الشخص الي يجيب في الجلسه سلاحه ثم يحثبر فيه او كل شوي شايله
8-رفع صوت المسجل او لعب الورقه ولا اذا قامو يتلاسنون انت قاطع الا انت ماشحطت ورا مافليت سراك
9- انا بروحي ماوطن روحي
10- الموت الحمر اذا رن الجوال احس اني ما طلعت بر ودي اشب في راعي الجوال وطفيه بشلايخ سمر رطبه :mad: :mad: يجيني تكه وضيقه منه ومن جواله
11-اذا جاء وقت الرجعه ثم انطلقو تقول سنهم في سباق رالي
عموم ياخيي انا معقد وغادي كني كيبل تلفون ضاربه شيول وش بيحل سلوكه وعقده منيب قايله اني بثر
خلوني لحالي الله يغفر لنا ولكم امين ويجزاكم عنا بدخول الجنه امين
اخوكم
خشم الحصان

[ABU-AL-3eeS]

ديني ودي اللي يلعب ورقة وهو طالع للبر وقاعد طول الوقت فطور ورقه غدا ورقه عشا ورقه نوم.
وهكذا طوال الكشتة :(

[tabuki]

السلام عليكم ورحمة الله وبركاته

الصفة اللي اتضايق منها انة اذا احد صحا من النوم بدري يجلس يصحي الشباب كلهم يعني ما يرتاح الا والكل صاحيين معاه وهو ماهمة لو مالهم الا ساعة نايميين
والمصيبة ان هالصفه بعض احيان اسويها مو دايم
وكذالك يرجوك الشباب نبغى نكشت نبغى نكشت (بحكم ان معاي جيب) ولما تجهز وكل شيء تجي تقول القطة تلقى القطة ما تفلل الجيب بنزين
كذالك الاسراف في كل شي في الماء في الطبخ في القنص حتى السهر


سبحان الله


و الحمد لله


ولا اله الا الله


والله اكبر

[المربد]

اخوي طحنون ماهو شرط يصير هب الريح مـمـخـش مع وجهه وايديه ، يمكن هذا يصير خامل وارفل اللي ما يحسب لسلامة نفسه.

اخوي الشاب الظريف صاحب اكبر صورة بالتوقيع خشم الحصان (شرايك بالشاب الظريف). اشكر مرورك يا بو جراح على الموضوع ، ومع كل ما ذكرت من صفات فانا اتمنى ان اطلع معك كشتة ولو يومين.

الاخ عاطل (ليتك تغير هالاسم)
المشكلة فيك انت اوجد لهم البديل واشغلهم عن الورقة.
على فكرة انا عندي صورة تشبه للصورة اللي في توقيعك انا صورتها في شعيب الطيري

التبوكي: اصبر وانا اخوك على الشباب واحتسب والنوم ما يطول العمر واللي طالع للبر لازم يقوم قبل الطيور.

[ابو درع]

انا يقولون بعض الي يطلعون معي او اطلع معهم ... انك موسوس بتنظييف

وهذي اعتبرها ..عاده شينه .. والله يفكنا منها .

[عبد الله الفايز]

الله من كثر العيوب الله لايفتش بنا

وش بلاكم قمتواتقلبوننا يوم حط اسمك ويوم حط صورتك وصورة سيارتك ويوم حط عيوبك ويوم حط صفاتك الزينة

شكلكم تبون تزوجوننا ................. ياويلي من أم ابراهيم

على كل حال

من عيوبي ..... وسيع صدر .. بس ماتاصل للبرودة

أحب الضحوية أتمشى لحالي وأتهرب من انه يروح معي أحد

أقشر شوي على اللي يجدعون مخلفاتهم وخاصة المناديل بين الفرش والمعاميل والسيارات
مع اني أحفر أول ماآصل حفرة واحط به كيس أو كرتون ... أحيانا والله أهوش ناس كبار شوي واتحسف بعدين

أحب اني اتركى عند الضوية وأحيانا أقول أحيانا ماأوثر اللي أكبر مني شوي أما الكبار بالحيل لاوالله

إيه العيوب عد واغلط

اللهم اهدنا لأحسن الأقوال والأفعال واصرف عنا سيئها .... يالله قولوا آمين

[راعي الكيف]

أما أنا ديني ولا دين اللي يلمس الضو لأن الضو فاكهة الشتاء - وللأسف -أنا من الناس اللي ما يخلي أحد يشب ضو إلا هو وإذا شبيتها ياويل اللي يقربها ويلاه !!!!!!!!!!!!!!! تقوم القوايل ولا إن النار تلمس وانا موجود !!!


وياويل الكسرة ((لكسرة = هو الشخص العجاز اللي مايقوم من النوم إلا إذا ظفينا أغراضنا جينا نمشي ولايزين شي أبد كود تقوله سو كذا حط كذا )) مني ويلاه عز الله أني لأخليه آخر مرة يحلم بأنه يطلع للبر في حياته


والباقي كله عادي عندي ولله الحمد وعلى طاري الضو والشبة ، أنا عارفيني ربعي واخوياي أني راعي كيف وراعي الكيف راعي ضو .. فمايتجرأ أحد ويقرب النار إلا بعد تقديم معروض لي يثبت بأن من الفائدة تحريك الضو بالشكل الفلاني فعندها يمكن أوافق أو العكس .....

فالسالفة هي أنه يوم من الايام كشتنا وشبيت الضو وضبطت أمور الكيف كلها ورحت لي بشغلة وأنا جاي سمعت واحد من اخوياي يقول للشباب (( انهجو من النار .. ترا فلان جاي !!!))



وبصراحة هذي خصلة سيئة جدا لأني بصراحة أنحرج مع بعض الزملاء الجدد ((إن كشتنا قريب )) أقعد اهش النار وراح ياخذون مني موقف سلبي فأنا كإجراء أولي صرت ما اكشت إلا مع اخوياي إللي أعرفهم فقط !!!




تعليقات على بعض الاعضاء /


الاخ المربد ::: أشكرك لطرح مثل هذا الموضوع واللذي يهمنا خصوصا في أخلاقنا ولاسيما أن نهتم بأخلاقنا لقول أحد الصحابة عن الرسول - صلى الله عليه وسلم - كان خلقه القران .
فهو القدوة لنا في أمور حياتنا كلها وخصوصا ما يجمعنا هنا وهي الكشتات .
أعاود شكرك على طرح مثل هذه المواضيع واللتي تنم عن ذوق رفيع .


الاخ البركان :::: حلات الكبسة بحرارتها أجل وشوله مسمي نفسك بركان ؟؟؟

[عنـاد]

اكثر سلبياتي هي

1- الحرارة الزايده عشان كذا منيب احب اصير امير كشتة ابد ( الحرارة وراثه في عايلتنا كلها)
2- اني منيب احب احد يساعدني مثلا اذا صار علي الطبخ ولا الحطب ولا اي شي ما اعرف الا انا اسويه وجود شخص ثاني معي يضايقني كثير ولا عاد اعرف اشتغل ابد
( مهيب انانيه بس مدري شلون اوضح لكم )
3- اني بعض الاحيان احب الطمالة شوي في الكشتة يعني مهوب لزوم غسيل البريق عقب كل شاهي ولا مهوب لزوم تغسيل السكين يكفي مسحها والشماغ يستخدم بيز وفوطة تمسيح
4-اني صليب راس
5- جزوم ومنيب اهاب وهذي اكبر مشكله وتسبب لي مشاكل واجد قرصات - جروح - شوك- وما الي ذلك
6- اتضايق من اللي يطلب منك شغله تسويها همن يقعد يدبل تسبدك ليه وشوله وش الفرق بين ذا وذا؟ طيب ياخي يومك تعرف تسوي الشغل ومنتب واثق من تصليحي ورا ما تسويه انت وتريحنا من الصجة واللجة ؟
شوفو لنا حل لا هنتو

(هذي نسخه من ردي على ابو هديل بس اضفت رقم ستة )

وبالنسبه للي ذكروه الشباب من صفات شينة في الاخويا ما اقدر اضيف الا صفتين

1- مليت قوه نرجع
2- الناعمين بس هين هذولا علاجهم بسيط ( جوعهم لين حول ما ياكلونك همن عطهم اي شي كانو يعيبونه منول وشف شلون :) وتبي تلاحظ منهم تغير جذري واضح )