ما أفضل ورشة تربيط جيوب في القصيم؟

[برباتوف]

السلام عليكم

الكتاب باين من عنوانه ..
نبي الشغل النظيف

[دسوقي]

السلام عليكم اذا انت ببريده ومعك باترول من 88 الي 97 انا مجرب مالك الا العتيق الي بصناعيه الرواف والا ابو فهد الفلاج بطريق عنيزه القديم شغللللل محترم وحقين التربيط ببريده كثر التراب بس انا مجرب هذولاا وكلن يمدحهم

[برباتوف]

والله ياخوي دسوقي متولي الخولي كل واحد يعطينا ورشة .. انا ابشوف الاكثريه وش تنصح به وبتوكل على الله .. ابي واحد شغل وكاله يغير كل الربل ويرجع الموتر بلد

[قدر مكتوب]

كثير اللي يربط السياره ولكن وين اللي يربط لك السياره كلها داخل وبرا ويفك لك ديكور الابواب ويربط الباب من داخل والديكور ايضا والطبلون وماخلفه ايضا لتجنب القرشعه

هالشغل هذا شفته بورشة بعنيزه اسمها النجيبان وللعلم ترى ماجربتهم بس شفت شغل سيارات ربعي لي

[لاتكب البيالة]

بعد بحث مطول عن التربيط لاحظت الورش نوعين يا جيد ويبالغ بالسعر او رخيص وشغله ما ينفع والشغل الزين بسعر مناسب نادر
لكن اللي يبي تربيط عليه الكلام يربط سيارته بنفسة من الى والعملية ما تبي خبرة 20 سنة بالميكانيكا انما مفك ومفاتيح وعدة بسيطة ترى هالهنود اللي يربطون بديرته يسمع عن السيارة ولا يشوفه فما بالك يصلحه

[ابو فيصل 99]

بعد بحث مطول عن التربيط لاحظت الورش نوعين يا جيد ويبالغ بالسعر او رخيص وشغله ما ينفع والشغل الزين بسعر مناسب نادر
لكن اللي يبي تربيط عليه الكلام يربط سيارته بنفسة من الى والعملية ما تبي خبرة 20 سنة بالميكانيكا انما مفك ومفاتيح وعدة بسيطة ترى هالهنود اللي يربطون بديرته يسمع عن السيارة ولا يشوفه فما بالك يصلحه
والله كلامك صحيح بس حنا نخاف نفك شي وبعدين مانقدر نركبه نتورط
مثل مره واحد من الربع فك كبريتر سفاري ينضفه
يوم جاء يركب ركبه بس بقى قطع مالقى لها مكان تركب فيه يعني زادن
ههههههههههههههههه

[برباتوف]

اول شئ بالنسبه لاخونا الي يقول ربطوا انتم .. كلامك جميل ولكن بحكم تجربتي الفاشله بالصيانه وهي كل ماخلصت مسوي كل شئ وربطت كل المسامير تبقى معي مسامير زود مادري وين اوديهن ..

والتربيط يااخوان نوعين .. تربيط الي يجيك ويدور على مسامير الموتر ويشدهن من الصدام الى الصدام .. هذا ماله اي فايده الا اول شهرين او ثلاثه وكله كم كشته ويرجع كل شئ كما كان

حنا هنا نتكلم عن النوع الثاني من التربيط .. الي هو يغير الربلات وقطع البلاستك والسفنج كلهن بقطع جديده .. وهذي الي عليها العلم ..

انت اول ماتشتري الباترول لو تنط به من فوق جبل مايتفكك .. لكن بعد مرور ثلاث او اربع سنين تبدا الاصوات تطلع ويبدا يتفكك .. البعض يعتقد ان السبب ان المسامير تنحل ويبيلهن شد .. وهذا كلام خطأ .. الموتر مليان ربلات مع الوقت والشمس والمطر والغسل وعوامل التعريه تبدأ تصغر وتيبس .. فيكبر الفراغ وبالتالي تسمع صوت الطقطقه .. المفروض ان الورش تجي وتغير كل الربل الي بالموتر من الصدام للصدام حتى يرجع معك الموتر جديد ثلاث سنين قدام ان شاء الله

اعطيكم مثال الكبوت وباب ورا .. الكبوت في اي جيب سفاري موديله تحت 2005 تحصل انه يلعب .. والسبب مهب ارتخاء بالمسامير ولكن فيه ربلتين بأطراف الكبوت من قدام .. اذا قدرت تعبي الفراغ الي داخل هالربلتين بلي مكيف مثلاً او سفنج مضغوط تنحل معك المشكله ولا عاد يلعب .. نفس الكلام ينطبق على باب ورا الي هو باب الشنطه .. لو تجيب لي مكيف صحراوي وتدخله في ربلات الباب راح ينقطع الصوت معك بإذن الله ..

أتمنى ان الصورة وضحت .. انا سمعت مره ان فيه علبه فيها كل ربلات الباترول من الصدام للصدام صناعه استراليه او ماليزيه ضد الماء والشمس .. ولا ادري هالكلام عن صحته ؟؟

المهم انا اتوقع على كثر ورش التربيط اكيد فيه احد متخصص

بخصوص النجيبان للي ذكر ورشتهم .. تربيطهم كان بـ 100 ريال مادري هو غلى الحين او لا .. لكن تربيطهم شد مسامير وشغلهم ماشاء الله تبارك الله لكنهم مايعتمدون تغيير اي ربلات ولكن فقط شد مسامير

[محمد-الرس]

عندك ورشة أبو شلق

[برباتوف]

إلى الحين ماجان العلم

[عاشق الدهنا]

حنا هنا نتكلم عن النوع الثاني من التربيط .. الي هو يغير الربلات وقطع البلاستك والسفنج كلهن بقطع جديده .. وهذي الي عليها العلم ..


هذا مهب اسمه تربيط هذا تغيير الله يجزاك خير..

[برباتوف]

ممتاز .. ووش افضل مكان للتغيير طول الله عمرك

[VTC2008]

ورشة الهبيش ابو سليمان سمعت شغل محترم بطريق خضيرا بس اعلمك مشغول لازم تأخذ موعد معه يعني مستشفى السيارات .,, تقبل مروري

[مكيشيت]

كثير اللي يربط السياره ولكن وين اللي يربط لك السياره كلها داخل وبرا ويفك لك ديكور الابواب ويربط الباب من داخل والديكور ايضا والطبلون وماخلفه ايضا لتجنب القرشعه

هالشغل هذا شفته بورشة بعنيزه اسمها النجيبان وللعلم ترى ماجربتهم بس شفت شغل سيارات ربعي لي


ممكن تعطينا وصف هالورشة أخي الكريم