سيارة البر ..... كيف تفضلها ؟؟؟؟؟؟

[الطبيب]

السلام عليكم ورحمة الله وبركاته

كيف الحال يا الربع

النقاش دائما والجدل يتجدد بيني وبين بعض اصدقائي واخوياي حول سيارة البر

هل الافضل ان تكون سياره ( خاصه ) للبر ومستقله عن سيارة العائله وفيها تجهيزات البر ؟؟؟؟؟؟

ام

تكون سياره واحده للبر وللعائله ؟؟؟؟؟؟

وهل يجب ان تكون سيارة البر جديده ام قديمه ؟؟؟؟؟؟؟؟

=========

رأيي هو التالي

سيارة البر يجب ان تكون مستقله لوحدها اذ انها لا تحمل العائله الا اذا يبون يطلعون للبر ( طلعه خفافي )

اما كونها جديده

فهذا موضوع فيه رأيين

الاول :-

ان السياره اذا كانت جديده فهي مكلفه في سعرها وتتحسف انك تخرم فيها وتثبت الاجهزه وعدة البر

من تانكي ماء

او جهاز الكينوود

......... الخ من الامور اللي ما تخفاكم


وكذلك تحجز مبلغ كبيرا من المال فيها

كذلك اذا ضربت لك مطب قوي والا قمزت لك عقم

او ما تون انت يا راعي الموتر وتتذكر اللي انت شاريبه الموتر

ولكن ما يشفع لهذا الرأي

ان السياره اذا كانت جديده فهي اقل عرضه للخرابات بعد ستر الله عز وجل


الثاني :-

السياره القديمه

رخيصة الثمن

وكذلك ما تتحسف على التخريم فيها

واذا ظربت لك ارض عفاش ووعره

ما على الموتر حسوفه

ولكن ما يجعل هذا الرأي يتردد صاحبه

ان الموتر القديم لا يمكن التنبأ بخراباته

وانه دائما يطلب صيانه

============

اعطيكم ما انا عليه الآن

موتر العائله مخصص للعائله فقط والسفر وهو قديم موديل 91

ولكني اتعاهده بالصيانه اولا بأول

موتر البر

( شبث ) .آسف باث فندر موديل 90

وهو ايضا اتعهده بالصيانه من وقت لآخر



جاء دوركم

آرائكم الله لا يهينكم

هذا والله اعلم

والسلام ختام

[بركان]

اخوي الغالي/ الطبيب
الشهر عليك مبارك.


عزالله انك دكتور
مابقيت لنا شي ( ياخوي ما عطيت الحر فرصه ).
كلامك هو عين الصواب من طأطأ الى السلام عليكم
ولا على كلامك ولا عليك زود.!!!

تحياتي.

[أبو يوسف]

كلام سليم وكلام ذهب :)

بس اللي ما عنده عائلة ماينطبق عليه هالراي
يعني سيارة وحدة تكفي
ومتوسطة العمر
يعني فيها حيل
وبفس الوقت الحسوفة مهب كبيرة
ومشكور اخوي الطبيب على الموضوع

مع التحية

[Bader-M]

السلام عليكم ورحمة الله وبركاته
............
اممممممممم

بنسبه لي اعتقد
<<<<< لا يكثر :D

انه يجب ان تكون للبر سياره مستقله

لانه مثلكم خابر سيارة البر لازم تكون مجهزه تجهيز كامل

وخاصه لاصحاب الرحلات الطويله

........
في اعتقدي الشخصي
<<< لايكثر
...


يجب ان تكون سياره البر خاليه من الفخامه الزائده
وايضا يجب ان تكون سعرها معقول

وانسب السياره في وجة نظر الشخصيه

الجمس
يعني تحصل جمس نظيف وحلو و مديل ليس بقديم (93- 97 )
سعره لا يتجاوز 30 الف
او
الباترول النيسان (98 - 99 )
وهذا ايضا سعره لا يتجاوز 33 الف

اما سياره سعرها يتجاوز 100 الف ريال
اشتريها و اروح اكسرها في البر
وفوق كذا صيانتها مكلفه جدا
وش الله حدنا

على العموم
تبقى وجهات نظر


......
تشاااااااااااااااااااااااااااااااااو

[الطبيب]

بركان

اقول اترك عنك ها السوالف وعطنا وش عندك ؟؟؟؟

ما تمشي علي الحركات هذي :)

لاني ادري ان هذا هو الهدوء اللي يسبق العاصفه :)

شاكر لمرورك

========

ابو هديل

ما اقول الا........




الله يزوجك بنت الحلال اللي تستر عليك وتسعدك

وتعينك على طاعة المولى عز وجل

شاكر ومقدر مرورك وتعليقك

تصدق كل ما اشوف اسمك اشتاق للعزوبيه :)

========

استاذي العزيز طاير بالعجه

كلام سليم ميه بالميه

لكن السؤال هو.............

هل من معتبر ؟؟؟؟؟؟؟

وترا الدعوى اليومين هذي صارت تكشخ على قل سنع

يعني تلقا الواحد يكسر ظهره بالدين علشان يركب في اكس آر

الله لا يبلانا

شاكر ومقدر لمرورك << لا يكثر

ومنور الموضوع يا خلفهم << انجز

وفعلا اذا قالو انك من احسن المشرفين على خيمة السيارات << ليه هم كم واحد يا حلو ؟؟؟

اقول تدري

مياااااااااااو

قصدي

وااااااااااااااااو

لا حول ولا قوة الا بالله....!!!!!!!

تدري ................

هذا والله اعلم

والسلام ختام

[SilverSniper]

موضوع حلو صراحة يا الطبيب... والأخوان ما قصروا
بالنسبة لسيارة البر في نظري... لازم تكون سيارة تعرف انت يا راعيها كل شي فيها...
يعني تعرف الكويل وينه.. الديلكو وينه .. البليتين وينه.. توزيعة الديلكو تعرفها.. توزيع الظفيرة تعرفها.. وزن كاربريترها تعرفه.. سيورها... إلخ
بحيث لو قابلتك أي مشكلة تعرف تصلحها لأنه في البر.. ما حولك ورشات ولا وكالات.. ماهنا إلا يديك..
بعض الناس يعتقد أن الأنظمة والالكترونيات تفيد في البر... نظام موازنة .. نظام تعليق.. نظام وقود.. نظام غسيل وكوي... وهذه الخرابيط كلها لا تنفع اذا خشيت شعيب يمشي والا طبيت بنقرة... كذلك قير التوماتيك... ما أهضمه في البر أبد.. أحس ان السيارة تتحكم فيني مهوب أنا اللي أتحكم فيها..
سيارة البر لازم تكون قوية... البودي يتحمل... المكينة قوية.. والقير يتحمل..
بالنسبة لي.... اللاند 93 ممتاز ويقضي معظم مشاويري البرية... لكن ان كان المكان وعر وجامد ... الشفر 77 هو اختياري الأول... ومستقبلاً سيارتي مكشات راح يكون لها مكان أول ما تخلص..

[المترو]

سلمتوا على الاراء الجميله اما انا اختلف عنكم شوي بالرأي وه

اولا ً لا تقبر ذمتك عشان سياره تطلع فيها للبر فقط

ثانيا سيارة البر دائما افضل ان تكون لم يمر على موديلها 3 سنوات جديده او شببه جديده لدواعي السلامه والعمر والوناسه اهم من الاحتفاظ بكم قرش بالبنك

ثالثا اذا لم يكن بالاستطاعه سياره بالمواصفات التي ذكرت اعلاه اقل شيء تكون نظيفه وعارفها راعيها مسمار مسمار بمعنى ما تعرضني للخطر او تخرب علي رحلتي بخلاء خالي انا وربعي وتكون بدل ماهي سبب بالوناسه تعاسة الرحله

رابعاً يجب ان تكون سيارة البر قليلة الاكسسوارات والزبرقه اللي مالها داعي والقير عادي

خامسا يفضل يكون للعائله سياره خاصه فيها خاصه داخل المدينه وتستخدم سيارة البر للرحلات الطويله مع العائله طبعا هاذ حسب الضروف الماليه لكل شخص

سادسا هذا رأيي الشخصي وكل ابخص بحاله


وسلامتكم الرحال2003

[نقا هشال]

هلابك ياغالي

رايي ان تكون سيارة البر مستقله

وتكون جديده..ومجهزه من جميع المتطلبات..

[ابو درع]

بسم الله الرحمن الرحيم

انا افضل ان تكون سياره البر قديمه مثل ما تفضلت

تخرمها علي كيفك ودفش فيها .. وتتمتع بالسياره

بدون خوف ...

انا عندي بليزر .. اجرف فيه تجريف ، ويقول وين تبي

ام السياره الجديده ممتازه للي معطيه الله .. خاصه
اذا كانت مخصصه للبر .

بستثنا راعي الصقور .. الله يعينه يبيله موتر جديد يساعده
على القنص..

...............والسلام

[القماري]

مشكور يالطبيب على الموضوع
بالفعل أنا في حيرة والسبة السيارة (العائلة ودها تطلع معي البر والسيارة دوب تشيل العفش - سلقة) والسيارة الثانية صالون بس عيبها إنها غير رباعية.
والظاهر أني راح أخسر (ثعلب البر - السلقة) وأبيع الصالون وأشري لي يوكون دبل أو إذا زانت الميزانية طقيت الهمر الصغير H2 (تغيير على الأقل)
وبالفعل يفضل لمن (يحب العبث ) في التطعيس والمطامر أن تكون سيارته قديمة نوعا ما ورخيصة وقليلة الأعطال وأرشح ( سيارة جيب رانجلر أو باترول ستاندرد أو أي سيارة صغيرة مع أداء قوي) حتى لا تكون خسارته مضاعفة