كيف ارفع الربع

[الرسام]

السلام عليكم
حياكم الله جميعا
عندي ربع 2007 ينزل من الخلف اذا حملت العزبة و توانكي الماء و البانزين والعفش للمقناص فودي ارفعه
وش رايكم يا اهل التجربة

[الشبانه]

ركب سسته تحميل الي هي يسمونها ان كاني منيب واهم سسته ايمراتيه تخلي الموتر ثابت ماينزل بسرعه بس يبي يقوا عليك المطب شوي بس حلوه انا مركبها بموتري وعلى احسن مايكون

[الرسام]

سألت و طلعت باكثر من راي
1- ازيد سست ولكن يصير مطبه قوي
2- اركب جلد بين السست
3- ادبل مساعدات ما اتوقع بتفيد

[عنقود]

عندك اكثر من طريقه :

يا إنك تطرق السست وتزود سسته إماراتية ( وهاذي افضل طريقه )

أو انك تحط جلب بين السست لكن بعد فتره بتندق الجلب وينزل الموتر

[عاشق الدهنا]

ركب لعابات اطول......:good:

[الرسام]

بيض الله وجيهكم يا شباب و لكن ودي انكم تفصلون اكثر لاني غشيم
اخوي عنقود تقول اطرق السست و ش الفايدة ؟ وش فرق السستة الامارتيه عن غيرها
عندي5 سست لشاص 2004 اغلبها قصيرة اركبها ؟

عاشق الدهنا وش اللعابات ترى خويك غشيم

[سطام vip]

بسم الله الرحمن الرحيم

السلام عليكم ورحمة الله وبركاته

اخوي الرسام كنت اتناقش انا وخبير في هالامور يوم الاربعاء الماضي

وقلت له ابي ارفع موتري قال تعال انزل تحت السياره وقال شوف اخر السسته من الخلف

تلاقي حديدتين ماسكين السست يقول ركب اطول منها ويرتفع الموتر وهذي اسهل

وافضل طريقه واعتقد هي الي يقصدها اخوي عاشق الدهنا (اللعابات)

واذا حسيت ان عمود الكردان مال نزل كراسي القير وركب مسامير اطول ووردات

بدل مسامير الكرسي شد البلد ويطلع تمام التمام

ان شاء الله اني قدرت افيدك اخوي الكريم

وبالتوفيق لك

(ناوي ارفع موتري هاليومين ياليت نشوف حلول وافضل ورشه تسويها في الرياض)

دمتم بحفظ المولى

[عنقود]

طرق السست يفكون السست ويقوسها باطرق ، فتكون تقويستها اقوى من الوكاله وبكذا ترتفع السيارة

اما بنسبة لسست الشاص ما عندي علم فيها .

[عاشق الدهنا]

افادك اخوي ... سطام vip
اللعابات هي اللي تكون ماسكه السست من الخلف ...

[مانع التميمي]

من واقع تجربه 3 سنوات

أنا طارق سست الجيب مع زياده سسته امارتيه

خلال ال3 سنوات طرقت السست مرتين

وانصحك تطرق السست أفضل من العابات لانها على أسمها تلعب بالسياره وما أحد نصح فيها

تلاقي السسته في الصناعيه القديمه وجنبها ورشتين معروفات يشتغلون زين

إن شاءالله أفدتك

[الرسام]

بيض الله وجيهكم ما قصرتوا مشكلتي انا في الدمام ونادر الورش الفاهمة في السست

[قطوعه]

فيه أيضا تقدر ترفع الموتر بــ ربل(يوضع بين السست)

[الرسام]

اخوي قطوعه هل جربيتها و هل تعرف احد يسويها و هل تتقطع مع الاستخدام

[مانع التميمي]

طريقة الجلب سهل تركيبها
تقدر تركبها انت ما تاخذ من وقتك نصف ساعه

أهم شي قبل لاتركبهن حاول تخليهن نفس بعض متساويات عشان ماتكون جهه تختلف عن الثانيه

ولا تتصيعب تركيبهن جدا سهل حاول تتعبث شوي وراح تضبط

أبحث في قوقل وزاح تحصل طريقة تركيبهن بالصور

[قناص*07]

خبره 8 سنوات بالربع التويوتا
اللعابات تلعب بالسياره ولا هي زينه للجلد
السست الاماراتيه قاسيه وتنطرق خلال سنتين
السست اليابانيه ممتازه بس شوي قااسيه بس نقص منها وخليها 6 سست فقط
الجلد بين السست مالها فايده بالرفع فهي تخفي صوت السست فقط
الطرق يضعف السست ولابد كل سنه وانت راز وجهك عند البنشري عشان يطرقها
انصحك انك تضيف سسته او سستتين من حقات الشاص او اي سسته تكون وحده اطول من الثانيه وركب سنتر جديد اطول من الاول عشان يلحق يربط جميع السست
وسلامتك.
وايضا شفت مره موضوع عن رفع الشروكي في نفس المنتدى ضايف قطعه مستطيله تحت السست يرفع بها الموتر بس ما جت الفرصه اني اجربها

[عاشق الدهنا]

[quote=الرسام;3420303]اخوي قطوعه هل جربيتها و هل تعرف احد يسويها و هل تتقطع مع الاستخدام[/quote


الربل حقات المساعدات اللي قدام رح لاي ورشه وخذهن منه وركبهن تحت السست الطوال فوق السسته الصغيره وطريقة تركيب سهله ارفع الموتر من عند الشاصي ثم حط الربلات من قدام ومن ورا .......

[ورشة بدر]

اخوي شيك على الرابط هذا فيه حل طيب لرفع الموتر والتحميل والضمان سنتين

http://www.youtube.com/watch?v=6eBbkBJ2dIg

[خالد030]

من واقع تجربه زود سسته واحده وامورك تصير طيبه انشاء الله لاو بعد الموتر يرسي معك شوي

[الرسام]

الله لا يهينكم جميعا ما قصرتوا اخوي قناص و خالد ومكنيكي و عروق الدهنا مشكورين و كاني ارتحت لزيادة سسته من حقات الشاص و ان شاء الله يضبط