ياصاحب الباترول.هل تعاني من الرجه ؟؟

[اخو نورة]

بسم الله الرحمن الرحيم
الحمدلله والصلاة والسلام على رسول الله وعلى آله وصحبه أجمعين
شهركم مبارك


هل تعاني من رجه في الدركسون مابين سرعة 80 الى 100 ؟

اذا كان ذلك فابشر بالحل :

اولاً : بعد السؤال والتمحيص في الورش واصحاب الباترولات للاستفادة من معرفة الخلل ، وبعد الابحار في هذا المنتدى حول ماكتب عن هذه المشكلة جزاء الله العاملين عليه والمشتركين والقارئ الكريم كل خير .

توصلت الى التالي :
1- مايقارب من ال 50 % من الاخوان الذين شاركو بما يخص هذا الموضوع قد ايدو تركيب (الفرارات).
2- اما بقية الزملاء فكان هناك تضارب حول عدة نقاط ملخصة فيما يلي :
أ- قد تكون المشكلة من عامود التوازن
ب- قد تكون المشكله من عامود الدفرنش الامامي
ج - قد تكون المشكلة من الربلات في اعمدة التوازن او اصابات في نفس العامود
د - قد تكون المشكلة في مساعد الدركسون
ومشاكل اخرى كثيره ذكرت

ثانياً : اتمنى من الزملاء المشاركين في هذا المنتدى ان يدلو بدلوهم على اساس تجربه و واقع وليس على اساس قال فلان او فلانتان لان ذلك قد يكلف صاحب المشكله الكثير من المال . او ان يقترح علاج لهذه المشكله او مشاكل اخرى ويذكر ان هذا مجرد اقتراح او توقع او مشكله واجهت احد زملاءه .

ثالثاً : بعد توفيق الله عز وجل بدءت بحصر المشاكل والورش التى كتبت في المنتدى وذهبت الى احد الورش في منطقة الرياض التى ذكرت في مواضيع سابقه تخص المشكله ( وان سمح لي الزملاء المشرفين وضعت اسم الورشه )
بمبلغ 720 ريال سعودي فقط تم علاج المشكله على النحو التالي :
1- تغيير مساعد الدركسون بمبلغ 140 ريال
2- جلب جديده بمبلغ 230 ريال
تم تغيير جلب الشداد وجلب عامود التوازن وجلب عامود الدركسون وايضاً مساعد الدركسون بمبلغ 350 ريال
والحمدلله تم اصلاح الخلل المذكور والله اعلم هل الاصلاح مؤقت ام دائم والله الموفق .
370 قطع غيار + 350 قيمة شغل الورشة = 720 ريال

اسأل الله العظيم رب العرش الكريم ان يتقبل صيامكم وقيامكم ويجعلنا واياكم ممن يخافه ويرجو رحمته


ماشاء الله تبارك الله

[جهام القصيم]

بسم الله الرحمن الرحيم

السلام عليكم ورحمة الله وبركاته

طبيعة الباترول يرج عند سرعة 90/100/110 وانت توك شاريه جديد (عيب مصنعي ) ولكن اخوكم شرى باترول 2003 جديد وبعد مضي شهر بدات الرجة وبستشارات اصحاب الخبرة اشرو بما هو اتى :-

1- كبس الاذرعه الامامي والخلفي0 التكلفه (200) ريال
2- ترهيم مساعد امريكي اضافي مع الموجود 0 التكلفه (160) ريال
3- ترصيص الكفرات ترصيص داخلي لزق0 التكلفه (100) ريال
وبعد عمل هذه النصائح ضبط الموتر او راحت الرجه , ارجو من الله اني افدت في هذه المداخلة والله يحفظ الجميع 0

[المري]

والله انها مشكلة يالربع هالرجة.

ان توني فاك نيسان بترول من الوكالة وهالحين فيه الرجه حتى مابعد مشى 5 الالاف!!


بس يركبون عادة الربع الذراع الاصفر اللي قدام وتراه تروح الرجة..


وسلامتكم

[اخو نورة]

للاحاطه

سقطت سهواً مع الجوع

تم شد الرمانات ومع الحسبه التي ذكرت



شكراً اخي العزيز جهام القصيم على المداخله بارك الله فيك

[اخو نورة]

اخوي المرى السلام عليكم



هل الذراع الاصفر ( مانع الانقلاب) بعد لطف الله عز وجل ؟

[القماري]

شكراً لك اخي الكريم على هذا المقال ويعطيكم الله الف عافية على المشاركات والتوضيح، السؤال لمن صلح (هل أستخدمت السيارة لمدة طويلة أم أنك لا تزال في الألف الأول؟)
بصراحة الرجة صارت عندي شيء طبيعي وكأني ما أدري عنها (وكتبنا عنها في كم موضوع والوكالة ماقصرت في سحب الفلوس على قلة سنع والورش كلن يدلوا بدلوه) وإن شاء الله نحصل على حل نهائي من الكلام إلي ذكرتوه .
الغريب أن يقول أحد المشاركين أن موتره جديد ماوصل الـ 5000 كلم والرجة طلعت في موتره ( غريبة!) كنت أعتقد أن الوكالة صار عندها خبر بذي السالفة ورفعت الموضوع للمصنع. ( وينكم ياحماية المستهلك والمواصفات والمقاييس؟!)

[SilverSniper]

جميع السيارات الداخلة للمملكة عن طريق الوكالات تخضع لنظام المطابقة الدولي.. حيث يتم الاكتفاء بشهادة مطابقة للمواصفات السعودية من بلد المنشأ ... وسيتم إلغاء هذا النظام والقيام بأخذ عدد من السيارات من كل ارسالية لاختبارها في مختبر السيارات.. والآن يتم تجهيز مختبر السيارات بالأجهزة والمستلزمات الخاصة بذلك..
أما من ناحية حماية المستهلك ووزارة التجارة .. فهم يقومون بدورهم كذلك ولي قصة أحب أن أوردها...
عندي جيب vx-r موديل 93... حصل عندي عطل في التكييف... صارت الثلاجة تبرد ومكيف ورا يبرد والأمامي ما يبرد... عرفت ان المشكلة من بلف الضغط... دورت في السوق عنه ما لقيته.. حتى الوكالة قالوا ما عندنا.. رحت لوكالة تويوتا-لكزس في العليا.. قالوا ما عندنا لكن لو تدخل السيارة عندنا جبناه لك من اليابان.. قلت خلاص.. وأدخل السيارة عندهم.. وتقعدلها 3 أسابيع.. بعدها محطوا مني 2000 ريال وبرد المكيف .. لكن تبريده ضعيف.. ويطلع فيه صوت سدد... رجعت لهم.. قالوا دخلها ونتصل عليك.. وتقعد اسبوع.. واتصلوا علي قالوا تعال... جيت لهم قال المهندس ( فلسطيني ) ان الكومبريسور خربان.. والثلاجة خربانه.. والمواسير كلها لازم تتغير .. والبلوف والفلتر كلها لازم تتغير.. وراديتر الفريون لازم يتغير.. وهذا يبي يكلفك في حدود 11 ألف ريال... قلت له لو واحد من هاللي تقول خربان.. كان ما برد المكيف الخلفي والثلاجة.. قال احنا مهندسين ونعرف... قلت لا ما تعرف.. وآخذ اللسته وأروح لقطع الغيار وأسألهم عن السعر.. طلعت القطع في حدود 3500 ريال... قال المهندس لا انت ما حسبت الربلات.. قلت لا .. وأحسب الربلات .. ما كملت 100 ريال.. قلت هذي حنشلة ذي مهيب وكالة.. قال المهندس.. اعمل حسابك بـ 6000 قلت لا سته ولا عشرطعش.. طلع السيارة الحين.. قال تدفع 200 ريال حق الكشف.. قلت أدفع مدق يدق حنكك.. أدفع على كشف يعطيني القطع السليمة على انها خربانه.. وأسويلهم هيصة.. وطلعت السيارة ولا عطيتهم شي.. وقلت يخلف الله على الألفين.. وأوديها لأحسن كهربائي ومهندس فريون في المملكة.. عاطف ( محله في المجمعة عند مدخل المجمعة الجنوبي مقابل مدخل الصناعية )..
وقال المشكلة من البلف.. وقلت له اني غيرته في الوكالة.. قام وفك البلف.. وقال البلف شد البلد معك؟؟ قلت ايه.. وعطيته إياه.. قام وعطاني إياهن وقال قارن بينهن.. طلع البلف اللي مركبته الوكالة .. تجاري..
ناظرت فواتير الوكالة ولقيت رقم البلف التجاري مسجل.. قلت بس.. وأكتب خطاب شكوى لمكافحة الغش التجاري.. وزارة التجارة.. وأرفق الفاتورة والبلف.. وبعد أخذ وعطاء.. وشيل وحط.. واتصالات من الشركة وشؤون العملاء.. أخذت منهم تعويض 4000 ريال.. وغرامة دفعوها لمكافحة الغش التجاري.. وكنت بأنشر القصة في الجرايد .. لكن الانترنت أفضل.. طلبت بلف من واحد في الامارات وجابه لي ب500 ريال.. وركبته والآن المكيف زي الحلاوة..

[سوبر بنللي]

يبوي وكاله تويوتا نصابين (اللهم اني صائم)

وش اسوي من حر مابي !! ياخي الهيلوكس والكامري تطلب بدون مكيف ومسجل ويركب لهن بجده مكيف
ومسجل صينيات وياخذون فرق السعر بالوكاله!

اثنين من الشباب كل واحد وقف عند كامري بس واحد بمعرض بالسعوديه والثاني بالامارات ويقارنون بالجوال
وراعي الامارات ماغير يعدد من المواصفات وحق السعوديه يقول مافيه مافيه بالنهايه اكتشفوا ان الكامري السعوديه فل كامل والاماراتيه نوعه غير موجود بالسعوديه لكن يقل سعره عن الاماراتيه 10 الاف وملايين المواصفات ,,

واحد من الشباب بيشري ابوه vxr شيكوا على السعودي لقوا سعره 184 الف ريال ينطح ريال ويوم قارنوه بالخليجي اكتشفوا انه حتى التخشيبه مركبه بجده ! والخليجي شد بلد تخشيبته يعني حتى الديكور ماسلم ! كن الـ184 الف ماكفتهم ! يالله سترك بس...

اسفين طلعنا عن الموضوع الرئيسي ,,حبيت اقول انا عندي جيب باترول وقبله باترول , وفيه مشكله تواجهك وهي عند ضرب فرامل وانت تمشي مثلا 100 يصير فيه رجه بالدركسون خاصه اذا فضيت القير رج الموتر كله ! هذي سببه ان عمود الدبل كبير بالحيل وثقيل ..بس قبل لا تركب فرارات تقدر تروح لاي واحد بالصناعيه يفك لك عامود الدبل بـ20 ريال تجرب الموتر وترجعله يرجع العامود ان نجحت الفكره ركب فرارات .

[القماري]

والله ذي البلشة
سيارات نحبها ونمدح فيها ونداريها أكثر من عيالنا وبعدين يطلع الوكيل (غشاش) أو ماعنده سالفة.
ياليت لو المصانع تترك عنا (مسمى موزعين) وتجيب خبرائها ومكاتبها عندنا حتى يكون الأخذ والرد أفضل.
عموما يالسنايبر 4000 ريال قليلة بحقك لو هم منصفين ( الوقت إلي ضيعته معهم لو باليابان كان نصنعت فيه 50 الف لاندكروزر) هذا غير رفع الضغط والمشاوير.
عموما شكينا من قبل لنيسان ولمواقع نيسان عن سالفة الرجة والظاهر ولا من مجيب حتى الساعة ، وبالنسبة لي ماراح أذهب للوكالة لو أيش يصير (مطلقها بالثلاث) والسبة المماطلة والمهندسين (حط تحتها خطين) وإلا وش عرف أبو مصري أو هندي عن سيارة أحدث موديل وتصنيع اليابان حتى يفتي فيها
على الله بس يكون المختبرات إلي قلت عنها تدار بموظفين مستوردين من المصانع مباشرة (مهندسين صج يعني)

[الاجودي]

مساكم الله بالخير جميعا

والله انا ذقت الامرين من الرجة

حتى انها زادت بشكل فضيع بحيث اني صرت ماقدر اسوق السيارة صارت كلها ترج

وديتها الوكالة وغيروا عمود التوازن

وضبطت الامور والحين تقريبا لي سنةوثمان شهور او اكثر وانا مرتاح

لكن كاني هاليومين بديت الاحضها رجعت او بدت ترجع بس خفيفة

طبعا بالملاجد والمخانق ومماسك الشوش خليتهم يصلحونه على حسابهم

وللمعلومية سيارتي سعودية وصلحتها في الامارات

[صقرنجد]

السلام عليكم ورحمة الله وبركاته
أول أحب أهتئكم على دخول رمضان(تو الناس)
المهم نرجع للموضوع
يعني كل الباترول جديد وقديم 1992 أو 2004 كله نفس المشكلة ولا وشلون


أنقذونا جزاكم الله خير


وصلى الله وسلم على نبيه محمد



صقر بن نجد

[اخو نورة]

القماري
شكراً لك اخي الكريم على هذا المقال ويعطيكم الله الف عافية على المشاركات والتوضيح، السؤال لمن صلح (هل أستخدمت السيارة لمدة طويلة أم أنك لا تزال في الألف الأول؟)
بصراحة الرجة صارت عندي شيء طبيعي وكأني ما أدري عنها (وكتبنا عنها في كم موضوع والوكالة ماقصرت في سحب الفلوس على قلة سنع والورش كلن يدلوا بدلوه) وإن شاء الله نحصل على حل نهائي من الكلام إلي ذكرتوه .
الغريب أن يقول أحد المشاركين أن موتره جديد ماوصل الـ 5000 كلم والرجة طلعت في موتره ( غريبة!) كنت أعتقد أن الوكالة صار عندها خبر بذي السالفة ورفعت الموضوع للمصنع. ( وينكم ياحماية المستهلك والمواصفات والمقاييس؟!)

نعم اخوي لازلت في ال 1000 الاول بس البوادر تبشر بالخير وان المشكله باذن الله انحلت
--------------------------------------------------------------------------------------------
SilverSniper
من امن العقوبه اساء الادب يحق لهم ينصبون على خلق الله
-------------------------------------------------------------------------------------------
سوبر بنللي
قد يكون سبب ليه لا
-------------------------------------------------------------------------------------------
الاجودي
حتى انها زادت بشكل فضيع بحيث اني صرت ماقدر اسوق السيارة صارت كلها ترج
نفس مشكلتي بالضبط و اول كانت خفيفه ومتحملها لين صارت ما تطاق ابداً واذكر موقف طريف ان الظهريه كنت اكلم واحد من الزملاء وبدءت الرجه حتى انه والله قالي وش مطمرك في البران ظهريه ويوم دوام قلت وش خلاك تقول كذا قال اسمع صوت بطانيج
--------------------------------------------------------------------------------------------

صقرنجد
يعني كل الباترول جديد وقديم 1992 أو 2004 كله نفس المشكلة ولا وشلون
نعم الظاهر انها ملازمه الباترول والله يستر من 2005

[القماري]

أخو نورة إن شاء الله البوادر تبقى طيبة حتى الـ 100000 كلم ويكون حل نهائي.
أما بخصوص الرجة فأعتقد أنها بدأت مع الموديل الحديث فقط من 99 حتى 2004 بحسب ماهو مذكور وحاصل الآن
وكان عندي في السابق 85 و 97 لم ألحظ به هذا العيب .
والله الموفق

[اخو نورة]

القماري
أخو نورة إن شاء الله البوادر تبقى طيبة حتى الـ 100000 كلم ويكون حل نهائي.
أما بخصوص الرجة فأعتقد أنها بدأت مع الموديل الحديث فقط من 99 حتى 2004 بحسب ماهو مذكور وحاصل الآن
وكان عندي في السابق 85 و 97 لم ألحظ به هذا العيب .
والله الموفق
انشاء الله يارب

[سنجار10]

اخوي العزيز اخو نوره ..

بيض الله وجهك ويعطيك العافيه على هذي النصايح المفيده...

بالنسبه للمساعدات الصفر انا شخصياً مجربها ليس لها اي حل بالرجه ابداًً




سنجار 10

[عبد العزيز العجاجي]

رصصت وغيرت المساعدات وركبت فرارات وكبست الاذ1رعة والرمانات وبعد اقل
من شهر رجت الرجه وبعد مع الشغل السابق غيرت الكفرات نيسان 99

[سوبر بنللي]

كبس الاذرعه اكبر مشكله ميكانيكيه عرفتها الصناعيه
وهي مقلب معروف
غير الاذرعه الله يجزاك خير او سوي لك اي شي المهم الكبس غلط بغلط لانه حل مؤقت

[وقاد]

السلام عليكم يالربع..................... ومبروك الشهر الكريم ايضا

اخواني انشاله ان الكلام الذي اقوله انه حل للمشكله



المشكله في الكفر ونوعيته وحجمه وعلى ورشة الترصيص

وبعد الجنط

وعلي العموم ترى الرجه موجوده في كل الجيوب حتي لاندكوزر

لان الجيوب مرتفعه وثقيله دبل قير

ولاهنتم

[نزلاوي]

السلام عليكم ورحمة الله اخواني
ابي تلفون ميزان الباديه اذا تعرفونه الله يعطيكم العافيه انا في جدة وابي اطلع الرياض وابي اكلمهم قل ما اطلع