طلب المشورة من الوجيه البيض

[abofahad01]

اشتريت سوبربان 2000 دبل استخدام امريكي من صالة في معارض الشفا بالرياض

والسيارة ماشاء الله تبارك الله نضيفة وممتازة جدا

لكن العزم لك عليه شوي

فحصته كمبيوتر وقالو لي يبيله تصفية مكينة

السؤال / وش يعني تصفية مكينة واحسن ورشة تسوي تصفية مكينة بالرياض ؟

انا رحت لشالنجر اللي في الصناعية القديمة وقالولي شغل يد خمسمية بدون القطع

وش قصدة بالقطع ؟ وهل سعرهم مناسب وكم عادة تكلف تصفية المكينة وهل هي ضرورية يعني لازم اسويها

وهل فيه حلول ثانية ؟

لانه واحد قال لي صب في تانكي البنزيز علبة زيت سوبرشل وامسكبة خط وبتصفيلك المكينة

وش راي اهل الخبرة

لا خلا ولا عدم

[lr3]

لا يشيخ اي زيت في الماكينه اتوقع تخبط السياره قبل تحرك

التصفيه هي تغيير البواجي و الفلاتر و تنضيف البخاخات وخلافه ...الخ

بس احسن محل... ما ادري وين

بالتوفيق ...

[فصاص]

السلام عليكم

اما الي قال لك صب زيت مع البنزين هذا خبرة سياكل وانا اخوك

تصفية المكينه مثل ماتفضل اخوي lr3 من بواجي واحيانا اسلاك بواجي تنظيف بخاخات وفلاتر والاشياء الي تساعد المكينه انها تعطيك اداء فضل

اما تشالنجر معروف انهم غالين والسالفه مهيب صعبه ولا يبي لها دكتور

تقدر تشوف المراكز الي في النسيم حقات تشييك الكمبيوتر - الغروب والبريدي وغيرهم

[بواسامه]

نعم صب زيت عليه او اقل بس مهوب زيت مكينه
صب زيت دركسون اللي لونه احمر 10 يسمى زيت قير
لانه يساعد البساتم في الاحتراق على الحركة لقدم المكينه وما قد مسكت خط طويل الا واصب علبه في التانكي الكبير والسيارة لاند كروزر وماضرها شي و
وسألت مهندس تويوتا قالي الامر عادي ومايضره
التصفيه
تشمل البواجي والفلاتر وصفاية البنزين ووزن الديلكو واسلاك البواجي
حتى تصفر المكينه من الاهتزاز ويكون الاحتراق فيه جيد والعزم مناسب
الله يوفقك

[المميز99]

السلام عليكم ورحمة الله وبركاتة

أخوي في البدايه انصحك تشتغل تدريجي عشان ماتخسر كثير

أول شي غير البواجي وصفاية البنزين وبعدها الفلاتر وتشوف أذا ضبط او لا والبخاخات
قد يكون الامر بسيط ولا يحتاج الا بواجي فقط
وقد يكون اسلاك بواجي كل شي جايز

ولكن محلات التصفيه الي يطلب منك 500 ريال هذا طال عمرك بيغير كل شي يعني قد يغير شغلات كويسه عندك وبالتالي زيادة تكلفه عليك وعلى فكره حاول دائماً ماتعتمد على كلام مهندس واحد حاول تشوف لك ثلاث محلات على الأقل وتشوف رايهم وبعدها انت الي تقرر في حال اتفاقهم جميعاً

تحياتي لك واتمنى انه وصلت المعلومه

[الاركان]

وانا اخوك لا تتعدى واحد من ورشتين
البريدي بشارع المعارض بالنسيم او القرعاوي بشارع الضباب شمال الغرفة التجارية

ترى التصفيه ميبيلها اختراع
والي ذكرتلك اسعارهم معقوله البريدي (300) والقرعاوي أقل من ذلك
عند التصفية عليك بالتالي
بواجي
اسلاك بواجي اذا كان
صفاية بنزين
اصلاح بخاخ
فلتر هواء
وترى هالقطع كلها بحدود 250ريال

[راشد الحربي]

اول شي تر كلام تصفية المكينة هذا شغل مهندس ماهو عارف العلة ..

واكبر نصاب البريدي اللي بشارع المعارض والله انهم سودانيين ماعندهم ماعند جدتي ... وكلامي من تجربة ويعلم الله على هذا الشي ...

لاني مريتهم مرة كان معي اكسبيديشن فيه تقطيع .. طبعا سوو لي فحص بمائتين ريال قالوا تحتاج تصفية كاملة تكلفك مع شغل اليد الفين ريال ...!!!

قلت وش بتغيرون قالوا صفاية بنزين وبواجي وفلتر هواء قلت الاشياء هذي ماصار لي اسبوع مغيرها قالوا عادي لازم نغيرها احنا من جديد ..!!!

واقعد اكاسرهم بالسعر واطلع واخليهم وامر مركز بجنبهن اعتقد اسمه كاركت او حول هالاسم ... واعلمه بالمشكلة كاملة - طبعا الرجال سوري- قال نسوي فحص بمائة ريال على الكويلات ... ويسوي فحص على الكويلات ويحصل واحد ماشتغل (لان الاكسبديشن يجي كل بوجيه عليه كويل) واجي ابطلع اجيب كويل جديد قالي لحظة تعال .. ويطفي السيارة ويطمر فوق عند المكينة ويحرك الكويل واذا السلك منفصل حق الكهرب .. ويشبك ويشغل الموتر والحمدلله على كيفك ...!!!

فهل فيه فرق بين الفنييييييييييييييييين ؟؟؟!!!!!!!!!!

أمر آخر البريدي يصلح كشف على السيارات اذا بغيت تشتري لكن صيانة والله ماعندهم أحد ... حتى لدرجة تشوف الفرق بعيونك بين زحمة البريدي والمراكز الثانية ..!!!



نرجع لصلب الموضوع ..

موترك اذا تبي رأيي غير صفاية البنزين .. والبواجي .. وفلتر الهواء ... ثم غير فلتر القير !!
لانه بأمريكا يمكن هالامور من فترة ماغيرت ابد ...

يعني الاشياء الاستهلاكية ... ثم جرب الموتر وشف ..!!!


اتمنى لك التوفيق ...@@@

[بواسامه]

البريدي مبالغ واسعاره فوق الوكاله وماعنده الا تغيييير على طول ولزخ ويذكيك ولا يسمي عليك

صدقني امر السياره سهل
واذا تبي شوري رح لورشة ضمان البيان بالشفا اسعارهم فيها زيادة عن لسوق بس متخصصين في الامريكي

الله يوفقك للخير

[Riyadh City]

مبروك الموتر ويعطيك خيره ويكفيك شره

مثل ماقالوا الشباب الموضوع طبيعي وما يخوف

أي سيارة تاخذها مستعمله لازم تصلح لها تصفية ماكينة على الاقل علشان تعرف القطع متاك مغيرهم وتخليها نقطة بداية لتشيكات قادمة ..

لا تدفع اكثر من 300 ريال للتصفية والقطع عليك بالتوفيق

[الموسيقار6]

دور ورشة فاهمه وماعليك من الورش الكبيرة الغالية ترى الدعوه ماتسوى ,,