إذا معك ( لكزس - جيب تويوتا اوتوماتيك ) ياليت تشاركنا ونشوفك ..

[وين يبون بنا]

السلام عليكم ورحمة الله وبركاته

يجدالكثير ممن يملكون احد هذه السيارات او جربوها سابقاً وجود زر بجانب القير يكتب عليه كلمة
(POWER) ...

هل جربه احد فيكم من قبل ؟؟

اذا كان جربه هل فيه فرق بين الوضعين ؟؟ وكيف عرفت أو كيف حسيت ؟؟؟

هل تتوقع انها عامل نفسي عشان تحس ان موترك F-15 :D

انا عن نفسي جربته وما لاحظت اي فررررررق .. عشان كذا ادخلت العامل النفسي بالموضوع ...

بانتظار ردودكم .. وتقبلوا تحياتي ..

[بركان]

حيا الله راعي اللكزس

هذا الزر موجود في اغلب السيارات الاوتوماتيك
وهو فعلا يعطي قوه اضافيه للمحرك من اجل السرعة في وقت قياسي يعني يسمح بمرور بنزين زياده للمحرك وتحس ان الموتر بيقلع.
اذا موترك مثل ما ذكرت ابحث عن الخلل.

انا عندي مرسيدس اذا حولته على وضع ( اس) ما عاد مسكته خطر يطير فوق الكباري.

[وين يبون بنا]

يامرحبا ويامسهلا ببركان .. ( جعلك ماتثور علي ) :D

كلامك صح وفي محله بالنسبة للالماني .. ( بعدين ترا ما معي لكزس :( )

بس انا قصدي عن التويوتا واللكزس بشكل خاص لاني احس ان اللي بموتري خررررطي ...

شرفني حضورك واسعدتني مشاركتك وتواق للقائك ( والله اثري شاعر ياولد ) ..

بانتظار الشباب الباقييييين

[SilverSniper]

يا هلا أخوي وين يبون بنا..
أنا ما أحب التوماتيك ولا أدانيه.. لكن الوالد معه فكسار 2002 توماتيك... الباور طول الله عمرك يطول وقت النمره... وهذا شفته بنفسي... طق الباور وامسك خط وتأكد.. بتلاحظ ان الوقت بين التعشيقات يطول..

[وين يبون بنا]

ياهلا اخوي سيلفر ...

جربت اللي تقوله من قبل ولكن النمرة بالزر والا بدون تعشق قبل الدخول بالخط الأحمر ( طبعاً الاول والثاني ) ..

تراي نشبه ماهنا شي ماجربته :p

اشكر لك مرورك ومشاركتك ..

[مشغول]

اسمع الله يحفظك يا وين يبون بنا ؟

السيارات القير أتوماتيك غالبا يكون التغيرات 4
والزرار هذا يخلي التغيرات 3 .
يعني قبل ما تمشي اضغطه بتلقى القير يغير من اول إلى الثاني إلى الثالث أما الرابع فتلقاه بيحن ويطن ما يغيير لين تضغط الزرار مرة ثانية وبعدين بيغيير

وإذا كنت مسرع وضغت الزرار بيرجعك من الرابع إلى الثالث .. يعني كأنك راده بنمرة في القير العادي

هذا اللي اعرفه والله أعلم

وهلا بك

[وين يبون بنا]

الله يجزاك خير يامشغول ( هذا زر الاوفر درايف ) شكلك ماتسحرت اليوم :D

هذا معروف الله يحفظك انه يرد نمرة او يخلي الموتر بثالث .. لكن قصدي ياطويل العمر زر جنب القير على الديكور حق الموتر ...

ياحبي لخشيشك وشكراً ..

[مشغول]

والله إني شاك(ن) في الأمر :(

أجل دبر عمرك .. ما علي منك .:p

يا زين خشيشتك انت .:)

[بن عدوان]

الاخ الكريم وين يبون بنا

الزر (POWER) هذا .. يجعل القير ما يبدل إلى النمرة التالية حتى تصل النمرة الأولى أقصى مداها .. وهكذا .. يعني ما يبدل من الواحد إلى الثاني .. حتى يقول الواحد بس .. خلاص .. ولا يبدل من الثاني إلى الثالث حتى يقول الثاني : تراي بنكسر !!! وهكذا لبقية النمر ..

وللمعلومية يوجد زر آخر بجواه وهو 2ND وهذا يا طويل العمر .. إذا كبسته راح يمشي الموتر ابتداءً من النمرة رقم 2 .. يعني يقوم الموتر من النمرة الثانية وليس الأول .. هذا مفيد عند التغريز .. حتى ما يحفر الكفر ..

وآمل أن أكون وضحت الفكرة ..

وسلامتك ..

[جميل جمال]

فعلا يا شباب ..

كلام اخوي وين يبون بنا صحيح ..

انا معي جي اكس ار ولا الاحظ فرق اذا شغلت الباور ..

يعني على قولته شغلت الباور ولا ماشغلته قبل لاياصل عداد الظغط الى الاحمر يغير ..

حتى بالسرعه او التسارع مافيه اي فرق ..

ارجع لسؤال اخونا وش الفايده منه لانه ولاواحد من الشباب للحين عطانا العلم الوكاد ..

بالنسبه للـ 2ND اخوي بن عدوان انا الاحظ اني اذا ظغطتها يثقل الموتر واصير كاني مشغل الدبل الثقيل ؟؟

وانا سمعت انها تستخدم في حالات النزول عشان تمسك الموتر ..

مادري هل انت متاكد من المعلومه او لا ؟؟

وعموما الموضوع جميل جدا وفيه فايده كبيره .. ويسلم من طرحه

[بن عدوان]

هلا والله اخوي جميل جمال ..

وأطمنك .. بأني متأكد مليون بالمئة .. ومجرب ذلك بنفسي ... وكتيب التشغيل موضح في ذلك أيضا على ما أذكر ..

وأنت تشعر بأن الدبل مشغل .. لسبب واحد .. أن عزم السيارة قل .. لأنها تبدأ من النمرة الثانية .. فيكون العزم أقل .. مثل أي سيارة لما توقف وتعشقها في الثاني وتمشي .. العزم يكون أقل .. خاصة أذا كانت ثقيلة مثل اللاند كروزر ... وإلا فالدبل مطفي .. وأذا حبيت تتأكد انظر للمبة الخضراء للدبل تجدها مطفية .. أو رح للطعوس وجرب .. تجد ان الدبل مطفي ..

أما فائدة (POWER) فهي للإستفادة من الطاقة القصوى للمحرك .. في حالة الاضطرار .. ولحث السيارة على التسارع الأقصى .. في السيارات الألمانية وخاصة BMW تسمى هذه الوظيفة بالقيادة الرياضية ويكتب على الزر الذي بجوار الغير حرف S اختصارا لكلمة SPORT بمعنى وضع القيادة الرياضية كالسباق وغيره

آمل أن أكون وضحت لك أخي الكريم .. ما أردته ..

والله يرعاك ..
اخوك بن عدوان

[وين يبون بنا]

السلام عليكم ..

اخوي مشغول .. الله يجزاك خير وشرفتنا بمشاركتك .. لكن لاتنكر ان خشيشتك احلى :D

ــــــــــــــــــــ

اخوي بن عدوان ..

انا رجال(ن) عللللله بهالأمور ولو قلت لك اني جربت الزر طعش مرة ولكن لم اجد اي تغيير او نتيجة ايجابية .. بمعنى آخر الموتر هو هو ضغطت الزر والا ماضغطته .. نفس الفزة .. النمر تغير عن نفس المكان على عداد الضغط ..
بخصوص زر 2ND وكلامك على متمه هذا فعلاً يخلي الموتر يمشي بالثاني وجربته كثير وينفعك خاصةً مع الدبل الثقيل وينفعك مع الخفيف زي ماقلت بحيث ان الموتر مايحفر ...

بس الزبدة زر هال (POWER) هذا هو اللي فاقع(ن) بنكرياسي ..

اشكرك جزيل الشكر على مشاركتك اخوي بن عدوان وننتظر منك المزيد ...;)

ــــــــــــــــــــ

أخوي جميل جمال مالوش مثال :D

جابك الله تأيد كلامي لأني أمس قعدت ازرزر موتري الين قال ربي الله قلت ابتأكد يمكني شاك والامطرز :D

لكن نشوف وش راح يوصله الموضوع عل وعسى ان نجد حلاً شافياً ..

واشكر لك مشاركتك وتشريفك للموضوع.. والفايده ان شاء الله بمشاركاتكم .. والموضوع ماصار جميل الا يوم مريته ياجميل :D :D


ننتظر المزيييييييييييييييد ويـــــــــــــــــــنــــــــهــــــــــــم؟؟؟؟؟؟ ؟ :hot::hot:

[مشغول]

اسمع أخوي .. وين يبون بنا

أولا .. اسمك طويل اتعبنا وانا نكتب فيه :(
ثانيا بالنسبة للزرار البور .. يمكن ان الوكالة حاطته لك بالغلط .. اطمسه إذا كان مشغلك .. ولا افصله ..ولا أقول بع السيارة وافتك منها ومن هذا الزر .:p وإذا إنت عازم على البيع علمني علشان اقول ميد اللي بيشري ترى البور ما يشتغل :D

ويا زين خشيشتك يا بعدهم


وهلا بك

[وين يبون بنا]

هلا مشغول افندي ...

على طاري الخشش :D

هالحين الموتر اللي بتوقيعك هو موترك ؟؟؟

ان كانه هو ترا خشيشتي احلى والعكس صحيح :D

والله اني مبسوط كل ماشفت اسمك ...

لاتقطعنا وتحرمنا من هبقاتك ...:p

(بعدين اسمي ازين من اسمك ______ اسمي رنــان:cool: )

[بن عدوان]

اخي الكريم ... وين يبون بنا

أخاف ان الزرpower عندك ما يشتغل !!!

وعموماًً أنا عندي سيارتين وفيهم الزر هذا ..

الأولى GXRJ 2004 أتوماتيك .. والثانية BMW والزر فيها مكتوب عليه S

وأما BMW فهي طالبة العفة مني من كثر ما أستخدم هذا الزر .. !!!

وأما الجي أكس أر فهو حقيقة مطلعه جديد ماله شهرين .. وما ستخدمت الزر فيه إلا أربع مرات يمكن ..

ومع ذلك أنا متأكد من كلامي 100%

وعلى فكرة .. الوضع هذا يبان بشكل واضح مع السرع العالية .. يعني حط رجلك !!

وحتى لو ما سرعت .. والزر مضغوط .. ما راح يبدل القير عن النمرة ... لأنه لم يصل إلى مداه الأقصى ..

وراح تحس ان القير ثقيل ....

وأما في الوضع العادي بدون الزر .. فتبديل القير يتناسب مع دوسة الرجل ... فمتى رفعت رجلك أنت .. راح يبدل القير ..بعكس لما يكون الزر مضغوط ..

هذا طبعا ... إذا صار الزر عندك شغال ...

أما إذا كان مش شغال .. فهذا شي ثاني !!!

وسلامتك ...

اخوك بن عدوان

[وين يبون بنا]

أخوي بن عدوان ..

اشكرك جزيل الشكر .. وأوعدك اني بسوي اللي تقول .. والظاهر ان البلا بي انا مهب بموتري .. :D

بعدين الله يهديك ويخليك لعين ترجيك تقارن الالماني بالياباني؟؟:confused:

فـــــــــــــــرق .. وهذا جيب وهذي صغيرة ..:redcar:

[Y&Y_4X4]

السلام عليكم ورحمة الله وبركاته

انا يا اخواني من تجربتي الخاصة وهي كالتالي

نعم صحيح ما تحس انه يوجد فرق اذا ضغت زر الباور في حالة ان الموتر مافية حمل يعني خفيف والخط مستوي، لكن اذا الموتر محمل وانت في بداية طلعت الغاط او غيره ادعس بنزين وزر الباور شغال وتشوف العجب .

او بالنفود وتبي تطلع طعس وانت ما اخذت عزم اكبس الابنص كله وشغل الباور والله انك تحس الكبوت يبي يطير.

وكلام اخونا بركان الله يسلمه ويسلم الجميع صحيح 100%.

وانت جرب وانا اخوك واذا ما شفت فرق فهو مثل ما قال اخونا بن عدوان الله يسلم الجميع يمكن انه فيه عطل في الحاله هذي يبيلك تشيك على النظام ...

[وين يبون بنا]

اخوي Y&Y_4X4 ...

اشكر لك مرورك ومشاركتك وننتظر المزيد منك ومن البقية ..

أبجرب ارقى سور بيتنا واضغطه ..:D

[السالمي]

انـــــــا معي لومينا 2000

الزر ذا تضغطه والسياره تمشي ماتحس في فرق

لاكن ادعس بنزين واضغطه مع الدعسه على طول يبدل نمره

وميزته اذا جيت تبي تتجاوز سياره اذا ضغطه مع الدعسه يبدل نمره ويعطيك اعلى سرعه

وتتجاوز بسرعه اكبر

[وين يبون بنا]

اخوي السالمي ...

اشكر لك مرورك ومشاركتك وبانتظار المزيد ...

[الربذي]

شف اخوي SilverSniper لقد اصبت كبد الحقيقة وتركتها مضرجة بدمائها
الاخ مشغول الحقت الي بقي منها وقضيت عليها قضيا
انت اذا كان معك سيارة وتبي تسرع مرة مرة والقير عايدى وشلون سواقتك اكيد تبي تشحط بالاول والتاني وهكذا
وكلام اخوي مشغول جربه واحد فعلا تعشق بثلاث نمر وبس ليش ماعرفش يمكن الرابع مايعطي السيارة العزم المطلوب على السرعات العالية

[وين يبون بنا]

اخوي الربذي ...

ما ادري بس شكلك منتب لمنا اوفهمتنا غلط .. اللي يقصده الاخ مشغول افندي هذا زر الاوفر درايف اللي يخلي الموتر دايم بالثالث مايريح .. وهذا تجده الان موجود ايضاً في سيارات الفورد .. لذلك تجد الاخ مشغول اعترف انه ماعنده ماعند جدتي بعد ذلك :D :D :D

الظاهر ان مشغول اصاب بنكرياس السماء ... :D

اشكر لك مرورك ومشاركتك اخوي الربذي ..

[قناص شقراء]

بسم الله الرحمن الرحيم ..
السلام عليكم ورحمة الله وبركاته ..
الحمدلله والصلاة والسلام على رسول الله وعلى آله وصحبه أجمعين ..

أخي الحبيب ..وين يبون بنا ..
أنا معي (GX-R 2000) وجربت الزر مرات كثيرة و فعلاً لاحظت فرق خاصة اذا رقيت طلعة قوية جداً
يبدأ يطيح عزمه تدريجياً و اذا شغلته يقوى عزمه و يخف الموتر وهو أريح للموتر عموماً ..

وعليكم السلام ورحمة الله وبركاته ..


أخوكم : راعي الهواوي ..

[صقرنجد]

يااخوان أنا الأعرفه عن الباور هو كالتالي



لا بغيت تحس بالفرق لاعشق الموتر إلى الثاني لا تظغط البنزين قوه وأضغط الباور تبي تلقاوه رجع للأول مع الدعسه القويه



جرب



صقر نجد

[وين يبون بنا]

اخوي راعي الهواوي ... ما عقب التجربة شي ..

اشكر لك مرورك ومشاركتك .. وتحياتي لك ..


ــــــــــــــــــــــ


أخوي صقر نجد ....

اشكر لك مرورك ومشاركتك ... وتقبل تحياتي .. :good:

[مشغول]

وين يبون ينا ... إلى الجنة !

خذ راحتك هزء على كيفيك لقيت واحد مسيكين ما يفهم واعترف انه غلطان .. وانت ما صدقت خبر وخذ يا تهزئ .:(

لكن اصبر علي بنزل موضوع عن الزر اللي في الكفر ( البلف ) وان شاء الله ما تعرفة واقعد اضحك عليك :D وأهزئك واهزئك ... الخ . ثم تضرب الكبر والبنكرياس والطحال عندك . :)

وشكرا لك مداعبتك .. يالحبيب .

[وين يبون بنا]

يا مشغول الى باتسر .. ;)

واضح ان لك دبابيس يعلمونك عن تحركاتي .. منتب سهل والله:D

عموماً انا وكبدي وبنكرياسي والزر اللي بموتري اللي ماله اي سنع نفداك يا اخ مشغول ياشاغل بالي .. :cool:

[قناص شقراء]

بسم الله الرحمن الرحيم

السلام عليكم ورحمة الله وبركاته
الحمدلله والصلاة والسلام على رسول الله وعلى آله وصحبه أجمعين



الزر له فوائد منها انك اذا طلعت طلعة قوية يبدأ يطيح العزم تدريجياً
أما اذاشغلته بتلاحظ أن العزم صار أقوى

وعليكم السلام ورحمة الله وبركاته

أخوكم : راعي الهواوي .

[وين يبون بنا]

أخوي راعي الهواوي ...

اشكر لك مرورك ومشاركتك .. وتقبل تحياتي