باثفايندر مميزات وعيوب

[Khalid AlGhamdi]

السلام عليكم ورحمة الله وبركاته

وش مميزات وعيوب الباثفايندر الرئيسية لاني افكر اشتري واحد موديل 2003 ولكن متردد

من اهم الاسباب قطع الغيار انا سمعت انها غالية جدا مقارنة بباقي السيارات

هل الكلام هذا صحيح او لا وهل تنصحوني اشتري باثفايندر ؟؟

[محمد العتيبي]

الباثفندر مايصلح لراعي البر

بغدين انت بتركب حصان والا سلوقي اكيد بتقول حصان

لان الباثفندر ادنا قشعه تقلبه على جمبه

[الذهين]

السلام عليكم ورحمة الله وبركاته

فيه عيوب لكن في رأي بالمقارنة بقرنائة .... هو الأفضل

[عبد العزيز العجاجي]

صغر حجم السيارة وكذلك نزول سعره بعد الاستعمال

[جميل جمال]

السياره عموما جيده جدا ..

لكن فيها عيوب ..

اولها قطاع الغيار الغاليه جدا جدا ..

ثانيها انه تانكي بنزين واحد وصغير بعد .. يعني راعين الطلعات الطويله يبلشون ..

اما من ناحية مسك السعر بعد البيع فهو ما اقول ممتاز ولكن من افضل السيارات اللي تمسك سعره بالسوق ..

وعلى قولة الاخوان صغر حجم السياره من عيوبه ..

عموما مثل ما قال اخونا الذهين فيه عيوب ولكن بالمقارنه مع قرنائه هو الافضل

اما مميزاته يتميز بانه صغير ووذف وكانك تسوق سياره صغيره مشالله .. الشي الثاني العزم الخيالي ..

حيث انه من اقوى الجيوب بالنفود ..

[ولد الشايب]

السلام عليكم ورحمة الله وبركاته

أنا عندي باثفندر موديل 2003 تماتيك فل ماشي معي زي الحلاوه

المميزات :
صغير وذف - عزم ممتاز - أفضل الموجود بالنسبة لو تقارنه بالسيارات اللي مثله ( برادو - شيروكي إلخ.. )
سواقته خفيفة زي السيدان - الدبل عصى - سعره بالسوق ماسك ( يعني 2003فل أوبشن وممشاه زين ما ينزل عن 70 ألف ) - راسي بالخط - بالنفود ممشاه حلو

العيوب :
الجنط 17 ( يعني الكفر غالي حقه وما يفرش بالرمل زي ال 16 ) بس هو اللي مخليه راسي - صغير نسبياً
( يعني الكرسي الخلفي ضيق ) - بالنسبه لقطع الغيار فيه غاليه نوعاً ما ( بس متى تحتاج تغير القطع إلا كل أربعين أو خمسين ألف ) كلها بواجي وفلتر بنزين وفلتر هواء وبريكات ما تكلف 500ريال

بالنسبة للصرف البنزين فهو مناسب يعني 400كم داخل الديره ب 60 ريال تقريبا وأنا من خلال تجربتي أنصح فيه

[الربذي]

السلام عليكم ورحمة الله وبركاته
ياهلا ببو معاذ وينك زماااان ماشفناك اعترف وين الغيبة مبروك عليك الشهر ياخي لية ما ارسلت لى رسالة وانا افيدك يابعدي
اولا المميزات
تعبي فل 60 ريال او 52ريال اول ماتولع المبة يعني تعبي على طول وتمشى فيك داخل البلد للعاقل 400كم
القير العادي طبعا التماتيك اكثر استهلاك
الزيت مع سيفون تجارى 45ريال واصلى 55ريال مقارنة بلجيب 80ريال
حلوة ولم اجربها مع النفود بعد
عيوبها
تنزل من الخلف مرة لو معك اسطوانة وحدة فقط
مابة تكييف مركزي
مابها ثلاجة مابها دف لك
اذا حملت مع عائلة صغيرة قامت تسحب
تفكك بسرعة اذا انك راعي بران ومطامر وجلد يحبة قلبك يعنى اقصد من السفارى كثير وكانها صغيرة و2003حلوةقوية 250حصان يعنى اقوى من 2002وتحت بزيادة 70حصان

[السالمي]

الأصل كُتب بواسطة ولد الشايب




المميزات :
صغير وذف - عزم ممتاز - أفضل الموجود بالنسبة لو تقارنه بالسيارات اللي مثله ( برادو - شيروكي إلخ.. )




من جدك تقارن الباث فاندر بالشروكي فرق السما عن الارض ياخوي

لاقوه لافخامه لااقتصاديه بالبنزين لامركب وكل ذي تنصب لصالح الشروكي

حتى قطع الغيار الشروكي متساوي او ارخص من الباثفندر

[ولد الشايب]

مشكور يالسالمي على هذا الرد

لكن أظنك ما جرتبه ولا سقته خاصة من بعد 2003 وأنت طالع ولا يهون الباقي

من ناحية العزم فالباثفيندر بلاشك أفضل ومن ناحية الاقتصادية فهو أكثر اقتصاديا من الشيروكي ومن ناحية الفخامة هذي ترجع على حسب الشخص ومن ناحية المركب الله يسلمك أفضل بواجد من الشيروكي هذي من واقع تجربة يا خوي أما قطع الغيار فما عندي خلفيه عن الشروكي لكن مشاكله كثيره واسأل أي واحد في الصناعية

عموماً أخوي تبي تعرف عن الموضوع أكثر شايب الصمان كان عنده ثلاثة شروكيات يبيع ويشترى وآخر شي رسى على النيسان البترول

[سنتافي]

السلام عليكم ورحمة الله وبركاته

اصلا وكيل النيسان ذكي بزياده يعني ماشاء الله اذكى تاجر شفته يعرف يبيع السيارات ويسوقها وخاصتا خدمة مابعد البيع يعني شي

والله لولا الله ثم المواتر العدله الزينه الي عنده كان تلقاه في حراج العفوش يحرج


http://www.mekshat.com/pix/upload/images5/mk8041_1121.JPG

[السالمي]

لي رجعه معك ياولد الشايب عن قريب

ودمتم سالمين

[الروضة الشمالية]

والله توهتونا ناس تقول يصلح وناس تقول مايصلح

بعدين الي اعرفه عن الباثفيدر انه مايصرف بنزين نهائيا .

واذكر ان عبيناه من محطة حفر العتش واتجهنا الصمان والى حفر الباطن
ومن ثم نفس الطريق طريق العوده ولا عبىء بنزين ابدا الى ان وصلنا الرياض
وخوينا الثاني معه ربع نيسان عبى مرتين .

يعني فيه فرق - والباثفيدر بأذن الله مايخرب وخراباته صعبه

من الي يوافقني بالكلام الي بالخط الأحمر ..

[سوبر VTC]

الموضوع قديم م2004

اخوي الروض الشمالية
الموتر توافيق بعد الله
يعني ناس تكرفه و لا يخرب و ناس سواقة راكده و خرابات
ميزة الموتر الراحة وخفة النفس و العزم و يصلح للعائلة الصغيرة
و ايضا للاستخدام ممتاز بر سفر ديرة
لكن العيوب الحاصلة و هي كالتالي
تعطل او خراب حساس الدعسة بحيث انك تدعس للابنص و لا يمشي الموتر و اصلاحه يكلف 250ريال
تقريبا و حصلت لنا العام الماضي جريناه من الصمان فياض الحصيبات مسافة 70 كيلو الى محطة ام رقيبة
ثم بسحطه الى بريدة
خراب حساس الكرنك بحيث انك تدق سلف و لا يشتغل
لمبة المفتاح تولع و لا يشتغل الموتر و بالتالي تحتاج برمجه المفتاح
الحرارة توصل النص و الثلثين و الاتش و السبب وجود بلفين 2 في المكينة لكونها راسين
و الحل الغاء بلف واحد
يوجد للمكينة جنزيرين 2 حقات عمود التيمن حيث يوجد على كل جنزير فحمات مثل فحمات الفرامل و فحمات السلف و فحمات دينمو الكهرب الفحمات
تعمل من 0 الى 200 او 250الف كيلو
و بعدها يرتخي جزير التيمن و تحتاج تغيير الفحمات
عند ارتخاء الجنزير يظهر صوت قرقشة له كان صوت بلوف تحتاج وزن
نقطة اخرى و هي نقص الزيت نص او علبة الا ربع كل 1200 الى 1800كيلو
روابط الاعطال موجودة بخيمة الاعطال خصوصا مشكلة الحرارة و نقص الزيت

الموتر ممتاز جدا للاستخدام خصوصا ان الاعطال الان صارت معروفة و معلومة للجميع
سابقا كانت الاعطال غير معروفة
قيمة المستعمل للاستخدام مناسبة جدا

الباثفندر صرفية مناسبة جدا و لا تنسى التانكي صغير 70لتر اذا كا مصفر نهائيا
و يتميز بوجود حساسات اوكسجين لتقليل صرف البنزين + المكينة راسين اقل صرف
اما الربع النيسان معروف من قديم بالصرفية عدم وجود حساس اوكسجين + راس واحد اكثر صرفية

[المرتهي]

مرحبا أخوي

انا مامتلك هالسيارة بس من محبينهاء وقريب بأمتلكها أن شاء الله

سؤالك عن السيارة أعرف ناس مستخدمينهاء
الباثفندر مثل أي سيارة تخرب ولها مميزات وعيوب
الامريكي والياباني والكوري والصيني والالماني قطع غيارها الأصلية غالية

التقليد رخيص

الأصلي أكيد بيكون غالي بحكم أنه جودتة عالية

اذا تعرف لك شخص يمتلكها خذها وجربهاء السيارة جربتهاء تقريبا يوم

الموتر خفيف مو خفة بدي وسريع الأنقلاب
لا الموتر مثل السيارات الصغير تكون راكب جيب وخفته مثل السيارات الصغيره
الجيوب الكبيره مثل الاندكروزر والجموس والباترول تمل منهم بسرعه بحكم حجمة وثقلة
هذي أهم مميزاته
الراحه / مريح بمقارنة بين الجيوب الثانية
صرفية بنزين ماهناك صرفية نطلع من الرياض إلى الجبيل على سرعة 140 نوصل ويكون فيه إلي يمشيك
اذا قلت هذي صرفية بقول لك لاتنسى الموتر 6 سرندل

ماكينتة مجنونة 3500
شكل الموتر
شبابي + عائلي
وتصميمة جميل جدا يكفيك جنوط 17 : )

تصميم الداخلية جميلة

هذا الي عندي وعساء الله يرزقك بسيارة نظيفة وبسعر مناسب ويديك خيرها ويكفيك شرها
واذا شريت أول بديك تجربة : )
واذا أنت شريت فكر : )

[الليث الذهبي]

والله يالموضوع قديمممممم
بس شهدتي فالباث ممتاز والخبره فيه 5سنين يعيبه نقص الزيت والحراره ولقولها حل

[راعي-الباث]

يووووه شلون قبل 9 سنوات تعبون بنزين ب60 واللحين نفلل الباث ب24 ^_*

[سيف وقلم]

قبل ما فيه إلا نوع واحد اللتر ب90 هللة.