وش رايكم بـ كاديلاك اسكاليد Escaled في البر ؟

[Escaled]

السلام عليكم ورحمة الله وبركاته ...

يالغالين ودي استشيركم بفعالية الاسكاليد في البر , لاني كما سمعت انه من اقوى سيارات الدفع الرباعي ...

ياليت من الخبراء يعطونا خبر :)


واليكم بعض الصور , وكلكم يذكر الله :)

وممنوع دخول راعين الشاص :D

حياكم الله جميعا , ومع الصور :

http://www.cadillac.com/images/models/escalade/gallery/photoExt1_med.jpg


http://www.gmarabia.com/content_data/LAAM/BV/en/GBPBV/006/images/escalade_photoExt2_med.jpg


http://www.cadillac.com/images/models/escalade/gallery/photoExt3_med.jpg

http://www.cadillac.com/images/models/escalade/gallery/photoExt4_med.jpg

http://www.cadillac.com/images/models/escalade/gallery/photoExt5_med.jpg

[Escaled]

http://www.cadillac.com/images/models/escalade/gallery/photoExt6_med.jpg


الان الصور من الداخل ,, اذكرو الله مرتن ثانية :D

http://www.cadillac.com/images/models/escalade/gallery/photoInt1_med.jpg

http://www.cadillac.com/images/models/escalade/gallery/photoInt2_med.jpg

[Escaled]

تابع :

http://www.cadillac.com/images/models/escalade/gallery/photoInt3_med.jpg

http://www.cadillac.com/images/models/escalade/gallery/photoInt4_med.jpg

http://www.cadillac.com/images/models/escalade/gallery/photoInt5_med.jpg

http://www.cadillac.com/images/models/escalade/gallery/photoInt6_med.jpg

http://www.cadillac.com/images/models/escalade/gallery/photoInt7_med.jpg

http://www.cadillac.com/images/models/escalade/gallery/photoInt8_med.jpg


واترككم مع بعض المواصفات :

6.0L Vortec 6000 V8 H.O.: 345 horsepower and 380 lb-ft torque

علبة التروس :

- 4 سرعات اوتوماتيكي

الدفع : رباعي

نظام التعليق :

- نظام تعليق امامي مستقل

- قضيب إتزان امامي وخلفي

- إمكانية تحديد مستوى تسوية التعليق يدويا

العجلات والإطارات :

- عجلات المنيوم مقاس 17×7 انش

- إطارات مقاس P265/70SR17 لجميع المواسم والظروف الجويه نوع Goodyear

- إطار إحتياطي بالحجم الكامل تحت الهيكل

أنظمة الامان :

- اقراص فرامل اماميه وخلفيه

- نظام ABS على جميع العجلات الاربع

- نظام سيطرة الاستقرار

- نظام سيطرة قوة السحب (التركشن)

- وسائد هوائيه اماميه وجانبيه

- وسائد هوائيه للمقاعد الخلفيه تعمل حين انشغال تلك المقاعد الخلفيه

- قفل للابواب الخلفيه لحماية الاطفال

- قابلية تركيب مقاعد الاطفال

- مسندان اماميان ووثلاثة مساند للرأس في الخلف

- نظام حماية ضد السرقه وعدم عمل المحرك إلا بالمفتاح الاصلي للسياره

- اضواء عاديه للوضع العادي وزينون للوضع العالي

- اضواء ضباب

- إطفاء الاضواء الاماميه اوتوماتيكيا في حين نسيانها قيد العمل

- اجهزة استشعار خلفيه

- إشارة الإنعطاف على المرايا الجانبيه

الملائمه:

- يمكن لهذه السياره ان تحتوى 7 اشخاص

- اثاث جلدي

- يمكن ضبط المقاعد بـ 10 طرق آليا

- إمكانية ضبط إرتفاع المقعد

- يحتوى مقعد السائق على دعامة قطنيه قابله للضبط

- تدفئة مقعد السائق ومقاعد الركاب بعدة مستويات

- نظام دفع ذاتي السرعة المتناسب

- نظام تثبيت السرعه

- إمكانية التحكم بالصوت من خلال المقود

- حاملة اكواب للمقاعد الاماميه والوسطيه والاخيره

- جيوب في الابواب الاماميه

- قابلية التخزين خلف المقاعد الاماميه

- قابلية التخزين في المقصوره الاماميه

- منفذ طاقة 12 فولت في الامام والخلف

الأبعاد :

قاعدة العجلات : 116 انش / 2946 ملم

الطول الكلي : 198.9 انش / 5052 ملم

العرض الكلي : 78.9 انش / 2004 ملم

الارتفاع الكلي : 74.2 انش / 1885 ملم

المقطع الامامي : 65 انش / 1651 ملم

المقطع الخلفي : 66 انش / 1676 ملم

توزيع الوزن بالامام : 52%

توزيع الوزن بالخلف : 48 %

سعة الجلوس في الامام : 2

سعة الجلوس في الوسط : 2 او 3

سعة الجلوس في الخلف : 3

مسند الرأس في المقدمه : 40.7 انش / 1033.7 ملم

مسند الرأس في الوسط : 39.4 انش / 1000.8 ملم

مسند الرأس في الخلف : 37.4 انش / 950 ملم

مساحة القدم في المقدمه : 41.3 انش / 1049 ملم

مساحة القدم في الوسط : 38.6 انش / 980.4 ملم

مساحة القدم في الخلف : 27.3 انش / 693.4 ملم

مساحة الكتف في المقدمه : 65.2 انش / 1656 ملم

مساحة الكتف في الوسط : 65.1 انش / 1653 ملم

مساحة الكتف في الخلف : 64.4 انش / 1635.8 ملم

بقي الان تعليقكم علىالسيارة وكفائتها في البر :)

تحياتي الخالصة

[طحنون]

[align=center] السلام عليكم ورحمة الله وبركاته
كيف حالك اخوي اسكاليد
يعطيك العافيه على الصور الرائعه والشرح الوافي عن المواصفات
فعلا سياره تعتبر من سيارات النخبه وسياره تجمع الرفاهيه والترف والابهه
وبين قوه المحرك والتعليق يعني موتر ينحسبله الف احساب
......................
بس اخوي اسكاليد كل هل الكلام له سلبيات من وجهه نظري
يعني من يدفع ثمن التكنلوجيا والتطور والدلع وانت في الربع الخالي مثلا يمكن مايتحمل الظروف الشاقه
ودرجات عاليه من الحراره
يعني راعيه يمر عند محل الايسكريم ويأخذ ايسكريم ويتمشى على الكرنيش احسن له ههههههه
وجهه نظر
ترأ انا ماعندي شاص علشان ماتقول منحاز انا اتكلم عن قوه التحمل يعني الموتر ذا لو تمشي فيه
طريق كله مطبات 400 كيلو بسرعات عاليه صدقني يرجع بصطحه
والسياره في البر ممتازه مره وكذالك في الطعوس بس تراها على السواق اذا كان السواق بطران
خذ سياره
ارجع واقول تراها وجه نظر لاني شايف موتر مثله كل شوي يغرز يوم قربت حوله ألا وطلع سواقه صغر سن
اسف على الاطاله
اخوك طحنون

[SilverSniper]

برايي .. ولا تزعل أخوي أسكاليد... الأسكاليد ما هو موتر بر... موتر ديره عائلي وراحة أكثر منه موتر بر.. حسب ما رأيت .. وزي ما قال أخوي طحنون.. يتحلحل بسرعة.. وما يتحمل الجور...(((( نظام سيطرة الاستقرار

- نظام سيطرة قوة السحب (التركشن)

- وسائد هوائيه اماميه وجانبيه

- وسائد هوائيه للمقاعد الخلفيه تعمل حين انشغال تلك المقاعد الخلفيه

- قفل للابواب الخلفيه لحماية الاطفال

- قابلية تركيب مقاعد الاطفال

- مسندان اماميان ووثلاثة مساند للرأس في الخلف

- نظام حماية ضد السرقه وعدم عمل المحرك إلا بالمفتاح الاصلي للسياره

- اضواء عاديه للوضع العادي وزينون للوضع العالي

- اضواء ضباب

- إطفاء الاضواء الاماميه اوتوماتيكيا في حين نسيانها قيد العمل

- اجهزة استشعار خلفيه

- إشارة الإنعطاف على المرايا الجانبيه

.....................................)))
هذي وش فايدتها في البر....؟؟؟؟؟؟
أنا منيب راعي شاص بعد... ولكن عندي شفر 77.. وجيب عشه مرهم 511 :):)

[Escaled]

ألاخ طحنون والاخ سيلفر ...

اشكركم على آرائكم وتحليلكم الرياضي :D

لاكن يالطحنون , على اي اساس حكمت انه مايتحمل درجات حرارة عالية ؟
كذلك من عطاك معلومة انه مايتحمل الطرق الوعرة والمطبات ؟

في انتظار ردكم الكريم :)


اخوي سيلفر ,

فعلا المميزات اللي ادرجتها في ردك مالها علاقة في البر , لاكن ماتظر ايضا :)

لاكن ودي اعرف وشلون حكمت انت ايضا بأنه ماهوب حق بر ؟

هل لانه فخم وكثير المميزات ؟

في انتظار ردكم الكريم ايضا :)

واتمنى رؤية المزيد من التجارب والتعليقات والمعارضات :cool:


تحياتي الخالصة

Escaled

[ولد الشايب]

السلام عليكم ورحمة الله وبركاته

شف يا خوي اسكاليد أنا واحد من ربعي عنده سكاليد الموتر ما عليه كلام مريح فخم رزه إذا مشى بالشارع لكن موتر البر كل ما قلت مواصفاته كل ما صار أحسن وكان عملي أكثر يعني أعطيك مثال الشاص أو الربع سواء نسيان أو تويوتا عملي في البر لكن بصراحة غير مريح في الديره أبدا لكن الواحد ياخذ الموتر اللي ينفع هنا وهنا باترول باثفيندر لا ندكروزر برادو وأنت ماشي . فشي يعوض شي

ويعطيك العافيه

[Escaled]

اهلا اخوي ولد الشايب ...

كلامك سليم 100 لمية وانا معك :)

لاكن حنا الان نتكلم عن الاسكاليد , فخم مريح قوي .
فهل من واقع تجربة او خبرة ان هالاشياء تخلينا نقول انه غير قوي في البر ؟

انتظر تعليقك :)


تحياتي

[SilverSniper]

أخوي اسكاليد... الموتر ما هو موتر بر.. والكلام من تجربة وعلم.. وأنا سحبت واحد عند نفود الحمادة قبل ستة شهور تقريباً.. والسبب انه واحد من حساساته تعطل.. فتعطل الموتر كله.. والموتر لولد عمي .. وخسر عليه 8 آلاف.. عشان يصلح هالحساس اللي خربه يوم طب بنقرة.. والأنظمة تظر .. من قال ما تظر؟؟؟.. اذا جاها ماء من شعيب والا من منقع.. وقف الموتر بكبره... قلة الأنظمة أهم سمة في موتر البر.. وهذي حقيقة لا يختلف فيها اثنان... الموتر موتر ديرة عائلي فخم.. وليس موتر بر.. يمكن تدخل به بر سهل.. الثمامة والتنهاة وغيرها.. لكن لا تطب الصمان والا الدهناء به... والا الشوكي والحثاقي.. تبي مواتر البر؟؟؟ زر ام دباب يوم وشف مواتر البر..

[Escaled]

اخوي سيلفر , اشكرك جزيل الشكر , ورأي الخبراء امثالك يهمني كثير ...

في انتظار البقية :)


تحياتي

[السالمي]

والله ياخوي اسكاليد انا معك في اللي قلته

ولعلمك هو تقريبا حجمه كبر حجم الاند كروزر

بس فرق السما عن الارض في الفخامه

يعني ماعليك بيوصلك فياض الصمان انشاء الله ( وعين الحسود فيها عود )

ومافيه شي يمنع مايكون عملي في البر دام الموتر رفيع ودفع رباعي

اجلده ماعليك واحكم بنفسك بعدين

بس ترى اللي يطلع للبر ومامعه الاموتر واحد غلطااااااان

مهما كانت قوة موتره ومهما كان معه من احتياطات

وزين اللي لقينا ناس تفكر بغير الاند كروزر

[وين يبون بنا]

أخوي اسكاليد ..

ماشاء الله مشكور على هالصور الحلوة ..

في اعتقادي الشخصي ان اليوكون عبارة عن اسكاليد مع اختلاف الشمعات .. فاللي جرب اليوكون اتوقع انه لا يختلف عن الاسكاليد الا في الاكسسوارات والامور الثانوية ( أمور الزبرقة الله يحيييييك ) :D :D

وتقبل تحياتي ...

[Escaled]

السالمي :)

اشكرك وبعنف :)

رأيي مثل رأيك , دام المكينة قوية والدفع رباعي والموتر عالي وش المشكلة ؟

لاكن الاخوان يقولون ان كثر التقنيات قد تنكبك :)

وربما يكون كلامهم صحيح :)

وانوه على النقطة اللي ذكرتها ,,,

اللي يطلع بموتر واحد غلطاااااااااااااااااان حتى لو ان معه همر :)

تحياتي الخالصة ومازلت انتظر المزيد ...

[Escaled]

وين يبون بنا ----- > كتبت اسمك صح ؟ :cool:

حياك الله ان ماي موضوع ...


انا اشوف ان الاسكاليد اقرب مايكون للهايلكس والا :D :D :D

لايزعلون راعين الهايلكس تراها مزحة :)

وينه ووين اليوكون الله يصحلك ,

من الداخل صحيح ان في تشابه كبير , اللهم ان الاسكاليد مزبرق على قولتك والطبلون يختلف 180 درجة عن اليوكون ...


لاكن من الخارج , مافي اي تشابه ابدا و مطلقا وبتاتا :rolleyes:

ياليت تذكرلنا مواصفات مكينة اليوكون حنا نشوف فرق القوة ...


تحياتي الخالصة:)

[القناص]

اخي الكريم اسكليد
شكرا جزيلا لك على هذا الاثراء
واعذر بعض المعارضين لان الانسان عدو مايجهل!

ودي ادفع 150 الف في جيب كدلك ولا ادفع 245الف في جيب تايوتا

الاسكليد ما عليها كلام

واعرف كثيرين من الشباب اللي يعتبرون من النخبه ما يسمعون في الاسكليد.
خصوصا انهم جربوا انواع من الجيوب ومن ضمنها اليابانيات وما عليهم قاصر دراهم.
فالذي جرب وخبر وعاصر ليس كمن لم يعرف في حياته الا التايوتا.
ومعظم الشباب يفكر في غير التايوتا ولكنه يخاف من الاحزاب المتطرفه اللي بتهاجمه بمجرد ما يفصح عن رغبته في جيب غير التيوتا!!! شي عجيب.

الجرأه مطلوبه.
اكسر الطوق وجرب غير التايوتا.
الحياة مليئة بالاثاره. والجيوب اشكال والوان.اختر ما يناسبك.

ومادام ضمان الامريكي يصل الان الى 5 او سبع سنوات حسب الوكاله فما عادت الصيانه مشكله.
كل شي على الضمان ان طالبت بحقك.
مادام استخدامك للسياره مافيه تفريط او افراط

للفخامة عنوان

[Escaled]

اخوي القناص ,,,

نورت الموضوع ...

اشكرك على التشجيع , وعلى قولتك , الناس ماخذين فكرة متطرفة ضد الامريكي :)

ولتصحيح معلومة :

الاسكاليد سعره فوق 150 الف , ويصل الى 210 :)


تحياتي الخالصة

[طحنون]

السلام عليكم ورحمة الله وبركاته
اخوي اسكاليد
ارجو ان لاتفهمني غلط
يعني تمعن في ردي جيدا وراح تلقى الجواب
انا قلت الرفاهيه الزايده لها ظريبتها
لوتسوي مقارنه بين لاندروفر واسكاليد
يعني مغامره ماهي سهله قويه جدا جدا مثلا صعود جبال ونزول منحدرات حاده والمشي في المياه الجاريه
مثل البحيرات والمستنقعات والرمال الناعمه
ولاحظ اني ما قلت لا تايوتا ولا نيسان علشان ماتقول منحاز لهم
والمقصد كله ان السياره ماهي عمليه في البر
شوف الرنج روفر والاند روفر كيف يمش في الجبال والصحاري والماء ومناطق وعره جدا
وكانت النتائج لصالحه بتفوق مع مرتبه الشرف:D
لاكن الا سكاليد موتر كشخه وبس حسب رائيي الشخصي
ههههه
ولو تسوي اختبار مع شاصي موديل 82
الاسكاليد راح يسونله صيانه وكنبيوترات وزحمه
والشاصي يمر عليه مثل الورد ماغير يعبي بنزين :D
اخوك طحنون

[Escaled]

اخوي طحنون ,,,


وعليكم السلام ورحمة الله وبركاته ...

اشكرك مرة اخرى ,

انت يبو انك فهمت موضوعي غلط , اما ماقلت انه اقوى من الشاص مثلا !

لاكن كلامي هل هو قوي ويواجه في البر , بغض النظر عن السيارات الاخرى ؟

تحياتي

[SilverSniper]

أخي اسكاليد... كلام طحنون صحيح... موتر البر ما يهم كونه تويوتا والا نيسان والا رنج ولا غيره... موتر البر له مواصفات معينة.. خذ الايسوزو تروبر كمثال.. موتر بر.. لا هو تايوتا ولا نيسان... الشفر السلفرادو القديم... الفرت القديم .. الشفر Z71... كلها مواتر بر... عزيزي اسكاليد.. في الصمان والدهنا... ما حولك لا ورشات ولا جميح ولا غيرهم... مالك الا يديك.. السيارة اذا كانت الكترونيات وكمبيوترات وخرب عليك فيها شي.. أبسط شي... بتتوهق لأنك لو صلحت شي ما قبل الكمبيوتر... لكن لو معك جيب ربع .. لا .. خل الربع.. قل تايوتا .. خذ الشفر 77 كمثال.. ما تحت الكبوت الا المكينة وعدتها... لو انشق عليك الراديتر والا الكارتير.. تقدر تتصرف.. لو خالف معك الكهرباء.. بتروح على طول للديلكو.. والا الكويل والا البطارية.. وتعرف الخلل وينه وتصلحه بنفسك.. السيور سهلة.. تقدر توقف وتوزن البلوف وتوزن مسامير الكاربريتر لو كان فيها شي... حط كل الاحتمالات في راسك... الصحراء لا ترحم ... ولا يهمها هذا فيه نظام موازنة والا تعليق والا سرقة والا غسيل وكوي... لازم تكون مستعد للصحراء وحاسب لها ألف حساب..

[السالمي]

8
8
8

يالغالي الحين كل السيارات اكترونيه وبخاخات

وانا معك الاسكاليد حساس لاكن لاصرت ماخذه جديد

وعليه ضمان وش اللي يمنع ما اطلع فيه لاصار معي خويا

وكذا موتر الابطلع فيه وتجيه العافيه



ويالقنااااص صح لسانك على مداخلتك الجميله

فعلا الجيوب الامريكه هي الاقوى

وحقين القنص والربع الخالي كانو قبل الشاص

يطلعون بالجموس الدفرنسين واهل الشركات وبالذات ارامكو اكثر مواترهم

دوج وفورد وجمس

[ABU-AL-3eeS]

اخوي سكاليد
اكبر مثال
اهل البر ((اللي يوم في الديرة ويومين في البر :D ))
اذا بغى يشتري جيب لاندكروزر مثلا بياخذ اقل نوع من الvxr لعدة اسباب


مكينة 8 سلندر <<<اهم مايميزه عن الgxr والا ماهو حب في الكشخه :D

وش يبي بالمميزات بالبر (جلد-شاشه-فتحة-سيدي-....) بالعكس يمكن كثرتها تسبب خرابات الكترونية كثيرة لانها كلها على الكمبيوتر.


واخيرا هل تضحي بمبلغ اكثر من 180 الف ريال عشان سيارة تطامر فيها بام عشر هل يعقل هذا الكلام؟؟

[Escaled]

اشكركم جميعا ... :)

اخوي عاطل , من قال اني باخذها عشان اقامز بها في البر ؟

هي في الاصل للمدينة , لاكن قلنالكم 1000 مرة ان السؤال , هل هي مجدية في طلعات البر وتمشي الحال ولالا ؟؟ :)

لاكن في الاصل هي مشتراة للمدينة , لاكن مايمنع نطلع بها , فكان السؤال هل اذا طلعت بها راح تواجه والا لا ...


في انتظار المزيد من المشاركات :)

وتحياتي للجميع

[هواوي]

بسم الله الرحمن الرحيم

السلام عليكم ورحمة الله وبركاته

نصيحه لوجه الله لا تقرب منه تراه موتر مصمم للخرابات والاعطال

اخوي مه واحد وبلش فيه
ومن ناحيه القوه فعز الله انه قوي من ناحيه الراحه فعز الله انه مريح ولكن يخرب خرابات ما تدري من وين

واذكر مره انا قطعنا السيل في الطوقي وكنت انا بلاند ركوزر واخوي بسكاليد وقطعت انا الاول وكل شي تمام وهو قطع وكل شي تمام ولكن بعد ما مشينا تقريبا بخمسه كيلوا بدا يتعتع الموتر ويكتم المهم داريناه الين وصلنا الرياض قبل دوار العويضه وقف هناك واليوم الثاني شلناه بسطحه ووديناه الوكاله وقالوا المويه دخلت المكينه ولا اعرف كيف رغن ان اللاند انزل منه ومع هذا ما خشته المويه وصلحوه ب 11 الف

والان هو في الوكاله لانه طلع صوت في القير رغم ان اخوي من المحافظين على السيارات وكلف تقريبا 14 الفلان فيه اشياء كثير ببتغير فهذي تجربتي معه

سلملي على اللاند فقط

[الجزوم]

السلام عليكم

ارجو عدم المؤاخذه لاني لن امدح الموتر المطروح للنقاش وكفائتة في الصحراء بشكل عام سواء في الصخور

والجبال او في الاودية والطين او في الرمال ...

فهناك ظوابط ومواصفات خاصة جدا لكل ما يحتاجة الانسان في رحلاتة البريه مثلا اقتراب العجلات الامامية

والخلفيه من بداية ونهاية السيارات بحيث ان العجلات تكون اول ما يصدم بالمرتفعات او الجروف وليس اول

ما يصدم الصدام الامامي او الخلفي مما يسبب تلفيات في السياره خاصة اذا كان مركب فيها تجهيزات خاصة

مرتبطة بالكمبيوتر مثل الحساسات ومقياس الحراره الخارجية ...

انفصال الكمبيوتر المشغل للمحرك عن بقية التجهيزات وليس شمولية التجهيزات كلها في كمبيوتر واحد او

ترابط الكمبيوترات ببعضها فاذا تعطل واحد توقفت البقيه عن الاستجابة ...

مدخل الهواء الى المحرك يكون في مكان بعيد ومرتفع عن منسوب المياه بحيث لا يصله الماء بسهوله في

حالة عبور الوديان او الامطار الشديده ...

كذلك ارتفاع الاجزاء الكهربائيه كما هو حال مدخل الهواء ...

عدم وجود تجهيزات كثيره ليس لها اي منفعه في الصحراء وانما لها اضرار كتوقف بعضها عن العمل وتاثيره

على عمل بقية الاجزاء المهمه في السياره ...

من المعلوم ان كثرة التجهيزات لها صلة مباشره بكثرة الصيانه فكلما كانت الامور مبسطة كلما قلت الصيانة ...

هناك امور فنية كثيره يطول الامر لو فصلنا فيها ...

امور اخرى ذات صلة بالموضوع ...

اتجاه غالبية مرتادي الصحراء الى انواع معينة من السيارات لم ياتي من فراغ فلو انهم وجدو هذه السيارات

متعطلة في كل مكان يمرون به لما امتلكوها ...

ولو انهم لم يروها تقطع صحاري الجزيره بكل اقتدار واعتماديه لما امتلكوها ...

ولو انهم وجدو ان غيرها من السيارات اكثر اعتماديه لتوجهو اليها وتركو الانواع المتداوله بينهم ...

فشعبية انواع دون اخرى لم ياتي من فراغ وليس غالبية الناس على جهل والاقلية على علم فمن يرتاد الصحراء

ويعلم عن المهالك والمخاطر فيها يحتاط جيدا ويبحث الف مره قبل ان يقرر ما سوف يشترى ولا يبحث عن الشكل

او التجهيزات بل يبحث عن اكثر السيارات التي جربت في الصحراء واثبتت جدارتها دون مشاكل تذكر ...

ولو نظرنا الى ما تدفعه شركة متسوبيشي في رالي دكار لتثبت جدارة سيارتها في الصحراء وحصولها على

المراكز الاولى دائما انما هو اثبات للعالم ان سياراتها ذات اعتمادية في الصحراء وانها جديره بالثقه ...

وعندنا في الخليج هناك كم نوع من السيارات اثبتت جدارتها ونالت ثقة مرتادي الصحراء واصبحت متاوله بينهم

ولكن السيارة محل النقاش لم تكن من ضمن السيارات المذكوره ...

وانما انتشرت بين فئة معينة من المجتمع الخليجي كنوع من الرفاهية فقط وهذا الامر لا يهم مرتادي الصحراء

فكيف برجل ذاهب للمقناص او من هواة ارتياد الصحراء ولم يستحم او يغير ملابسة من عدة ايام ان يهتم بالرفاهية ...

وقد شاهدت عدة مرات ايام الربيع ناس تزور اقارب او اصدقاء على سيارات مثل الرنج روفر او السكاليد او

من السيارات المشابهه ويكون المعزوم راكب في احد السيارات المذكوره ووراه مجموعه من ربعه او

معاونيه على سفاريات او لاند كروزرات يعني ما عنده مشكلة اذا خرب الموتر الي هو مشخص فيه ركب مع

السيارات الثانية واذا ما خرب ما ضرة كثر المواتر ...

وللجميع التحية

الجزوم

[عبد الله الفايز]

الاخ سكاليد

جرب اطلع للبر سيارتك حلوة وجميلة وقوية جدا بل جبارة أقصد المكينة والجير

وتزبنك في الرمل خاصة والأوحال ومافيها مشكلة

الكلام السابق هذا إذا كنت ( عذرا ) مغنيك الله ومستعد تكشخ مقابل 200000 ريال

بس لازم تنتبه وتاخذ كلام الاخوان وخاصة ( سنايبر ) في الاعتبار لأن سيارتك فيها أشياء حساسة وغالية قد تكلفك كثيرا هذه ناحية

ثانيا لو حصل لاسمح الله أي عطال في البر لن تجد من يستطيع مساعدتك لصعوبة التعامل مع مثل سيارتك بعكس السيارات الأخرى ... تجد لها في أي قرية أو هجرة أو حتى الكشاتة من يصلحها

فالحاصل إن سيارتك مجهزة للبر وللطرق الوعرة ولكن لفئة من الناس إن كنت منهم فلا بأس

أما إن كانت هي أغلب راس المال ففي نظري أنها غير مناسبة

لو عزمت على الطلعة للبراري الوعرة في أي سيارة وخاصة مثل سيارتك فلا تكن وحيد أقصد السيارة لابد من وجود سيارة ثانية

[Bader-M]

السلام عليكم ورحمة الله وبركاته
......

شف يالغالي

اذا كنت صاحب طلعات كثيره
يعني
مثلا
فيه ناس تطلع في الشتاء والربيع و الخريف والصيف
في الشتاء مع الامطار
وفي الربيع مع الخضار
وفي الصيف مع الصيد

بهذه السياره ما تنفع لك ابد

لانها راح تذبحك في الصيانه و التكلفه

اما اذا كنت صاحب طلعات خفيفه
وفتوكل على الله

ولا تنسى
الفخامه لها ضربتها ;)
في الصيانه و المال

عكس السياره قليلة الفخامه
تجدها اقل صيانه و تكلفه

ومثل ماقال الشاعر

يامدور الهين ترى الكايد احلى

:D

[السالمي]

والله يالجزوم كلامك سليم


بس كثرت النوعيه ماهتدل على كثرة التجرب

ترى حب التقليد له دور

وماهو كل من اخذ لاند كروزر فاهم فيه فيه ناس والله لو تنزل من الزفلت تغرز

انا معي شروكي مطلع واحد gxrj النوعيه الجديده

وكان ضغط الهوا عالي قلتله نسم عشان تساعدني

قال لا لا هو يطلع بدون شي ماينسمون له


فيه ناس تمشي على المظاهر وتشوف فلان وش معه وتشتري زيه

ماهو كل واحد يفكر قبل لايشتري والايـــام ذي صار الاند كروزر هو الموضه

صحيح الاسكاليد فخم وحساس والكدلك كله حساس عمومــــا

بس انــــــا وافقت الاخ اسكالـــيد على رايه لانه اعجبني فكر واختار الشي اللي رغب فيه

وهو كان سؤاله يصلح الاسكاليد لطلعات البر

انــــــا اقول يصلح ليه لا وش يمنعه لاكن كلمة انك تنزل فيه وديان توها سايله

وتطبح بالمــــاء هذي حتى الاند ماهو سالم منها اذا دخل فيه ماء بيطفي زيه زي الكدلك

وانـــــا سبق ولقيت vxr طافي بس وين لاهو في شعيب ولا وادي

عنــد مغسله غسل راعيه المكينه في لي ماء وطفا ما اشتغل الا بعد تنفيخ وقلة حيا

اخــــوي اسكاليد اذا انت سبق وشريت اقولك الله يبارك لك فيه

واذا مابعد شريت اقولك عليك بالنيسان الجديد او الجبابره القراند شروكي والدوج


وبـــــــــا التوفيق

[قرم]

Escaled يالله حيه.

يا أخي هنالك ناس والله العظيم مصروفهم اليومي يتجاوز قيمه هذه السيار بكثير !!

بمعنى سهوله إمتلاكهم سياره كهذه تشابه سهوله إمتلاكي انا على قوطي ميراندا

لذلك تجدهم كل يومين بسياره من هالشاكله مره رانج ومره إسكاليد ومره هامر

ومره كايين ومره طوارق ومره X5 وما تلحق السياره تخرب إلا وقد باعها باللي

هوبه اصلاً ولو خربت مساله إصلاحها والتكلفه لاتعني له شيء والنوعيه هذه من

الناس مايتنازل ويقتني سياره من هاللي نركبهن يعتبرها نوع من التخلف وعدم إرضاء

لغروره . فإذا كنت أخي من هذه النوعيه فأشد على يدك وأقول الله يبارك لك فأنت قدها

وقدود وتعيش وتجيب احسن منها ومين قدك يا عم كل يوم سياره ب 250000 ولد فلان

ويش يتعذر به. أما إن كنت من نمونتي وأمثالي اقوووووووووووو لككككككككككككككك


فر منه فرارك من ألأسد والمجذوم وا لداب المسموم:

:director:

[Escaled]

السلام عليكم من جديد على هالصبحية البهية :) :)

لم اتوقع التفاعل هذا مع الموضوع , , , واشكر كل من شارك وابدا رأيه .

فعلا جميع آرائكم في محلها , ولو كنت مثل ماقال اخوي طاير بالعجة , مدمن بر في كل وقت , ماراح اخذ مثل هالسيارة ابدا ...

انما الإستخدام الأغلب داخل المدينة , وينتابها طلعات قليلة للبر لاتشكل 10 % من مجمل استخدام السيارة ...

في حالتي هذي اعتقد انها راح تصبر علي وتمشي حالها معي وتبيض وجهي ان شاء الله ,

اشكر كل من اتحفنا بمعلومات عامة حول سيارات البر , وكل من شرفني برد على الموضوع :)

في انتظار بقية الآراء والتجارب :)

وتقبلو خالص التحية والتقدير

[أبونايف]

السياره أنا جربتهافخمه وفاخره ومميزه وماكينه 345حصان وفيها تجهيزات غير موجوده في غيرها من سيارات الدفع الرباعي ولكن يعتمد وين تبغى تستخدم السياره وكيف استخدامك لها
يعني اذا انت تبغى سيارة تحمل و(دعك )في الجبال والطعوس بدون ماتحاسب على السياره وتقدر تستخدمها في البر كل يوم عليك بالياباني تويوتا أو نيسان وبالنسبه للاسكاليد حرام يندعك في البر كما ان صيانتها مكلفه وفيها تكنولوجيا معقده وشكرا

[Escaled]

مشكور يبو نايف ...

في انتظار المزيد من التجارب :)

تحياتي

[ملاعب الريح]

السلام عليكم ورحمة الله وبركاته
اما بعد اخوي اسكاليد بصراحه الموتر حساس وما يتحمل البران انا اعرف واحد عنده اسكاليد م2003
يقول حده تخييم فوق النفد ويقول انه يروح عليه الطعوس بشكل مستمر وخصوصا بالشتاء والحمد لله ما قد غرز ارجو ان أكون قد افدتك وتقبل خالص تحياتي أخوك(بوسيف):good:

[Escaled]

مشكور جدا اخوي بو سيف :)

في انتظار مثل هالتجارب ...


تحياتي :)

[الطبيب]

المواتر المذكوره الاسكاليد وغيره من مواتر الفخامه

او الشاص والربع نيسان او تويوتا من الموتر الخشنه

همممممممممم ؟؟؟؟؟؟؟؟

اختيار محير جدا ؟؟؟؟؟؟؟

ولكن عندي ان المواتر اللي يستخدمونها البدو اهل الرعي والحلال

هي المناسبه للبر

بمعنى

انك لو تعطلت بسبب سير اسكاليد بروضه من رياض الصمان وقت الربيع

ورحت لاقرب هجره

وقلت له (( لو سمحت ابي سير اسكاليد )) :)

يبي يرد (( الهندي راعي البقاله )) عليك ويقول لك :-

انا ما فيه بيع هدا نوع ايس كريم :)

لانه ما راح يعرف وش هو الاسكاليد

بينما قل له :-

ابي سير ددسن او هايلكس او شاص

فبالتأكيد راح تلقاه

ليه ؟؟؟؟؟؟؟؟

لانها سياره معروفه لديهم

رأيي

اذا فلوسك واجد

واذا انت تحرص على الفخامه

واذا تطلع للبر مره كل سنتين

واذا تحب السيارات الامريكيه

اشتر الاسكاليد وربعه

اما اذا كنت

راعي صيد

وراعي تمشيات كثيره بالبر

وراعي طرد وطيور

فعليك بالمواتر الخشنه

هذا رأيي

وهو صواب يحتمل الخطأ ورأي غيري خطأ يحتمل الصواب

والحق احق ان يتبع

هذا والله اعلم

والسلام ختام

[بركان]

الأصل كُتب بواسطة الطبيب
المواتر المذكوره الاسكاليد وغيره من مواتر الفخامه

او الشاص والربع نيسان او تويوتا من الموتر الخشنه

رأيي

اذا فلوسك واجد

واذا انت تحرص على الفخامه

واذا تطلع للبر مره كل سنتين

واذا تحب السيارات الامريكيه

اشتر الاسكاليد وربعه

اما اذا كنت

راعي صيد

وراعي تمشيات كثيره بالبر

وراعي طرد وطيور

فعليك بالمواتر الخشنه

هذا رأيي

وهو صواب يحتمل الخطأ ورأي غيري خطأ يحتمل الصواب

والحق احق ان يتبع

هذا والله اعلم

والسلام ختام

[القماري]

أخي الغالي (Escaled) مشكور على طرح الموضوع ومشكور على الصور والتعريف بسيارة أسكاليد من كاديلاك.
أقول ومن واقع تجربة ومدعومة بالصور إذا أحببت.
الكاديلاك كما تفضل الكثير من الأخوان المشاركين وكما تفضلت أنت أيضا (سيارة فخمة وغالية وقوية ... الخ)
لاكنها لاتصلح لشخص يذهب البر أو الطعوس دائما ( خصوصا بالصيف أو في اليوم الماطر)
لماذا؟
أولا لأن إرتفاعها عن الأرض غير مجد كثيرا وثانيا الأكسسوارات (رفاريف فيبر ووجه فيبر واطي وصدام خلفي أيضا مغطى بالفايبر ودعسات جانبية ) يجعل منها سيارة دلع أكثر من أن تكون سيارة كرف ، فأقل مرتفع رملي قد يكلفك مبلغ وقدره.
المشكلة إنها سيارة معقدة حتى في التجهيزات الميكانيكية (يعني قد تخرب معك دينمو البنزين عند ذلك ومهما حاولت فلن تفلح - الكمبيوتر سوف يقفل تلقائي وتحتاج لفني متخصص) هذا ليس بعيب بقدر ماهو تقنية مدفوعة الثمن.
السيارة تقيلة مقارنة بشبيهاتها (اليوكن مثلا) على فكرة هي مبنية على قاعدة اليوكن. سبب الثقل (كثرة التجهيزات والفخامة)
آخرا وليس أخرا (أسمها لا يساعدها كثيراُ) فمسمى كديلاك لدينا ، يسمى (أنحش عنه) هذا ليس تقليل من هيبة وقوة السيارة وفخامتها مقارنة بكل أو بمعظم سيارات النخبة ( لكن هو واقع السوق ) أذهب بنفسك لمعارض السيارات وقارن النسبة والتناسب بين موديلات مشابهة في السنة والسعر وسترى القصد.
التجربة:
زميل لنا أشترى أسكاليد 2000 بمبلغ وقدره ، وصادف أنه يعشق الذهاب للبر والطعوس معنا ، فكان اليوم الذي يرغب أن يرافقنا فيه بتلك المذكورة أن يكون يوم تعطيل أكثر من أن يكون يوم متعه.
الأعطال (3 مرات تتعطل مضخة البنزين) وكل مرة يسحب ثم يأخذها الوكالة ويركب جديدة بمبلغ وقدره.
2 مرتين تتكسر له زوايا الرفاريف الفيبرية.
تتعلق في الرمال (أكثر من مرة)
ترتفع الحرارة (خصوصا بالصيف)
أصبح شكلها قديم والسبب ما أصابها من كدمات وخدوش من الأعشاب والأشجار في البر.
الأن فضل مرافقتنا وركنها عند منزلهم.

[كشاته]

مواتر البر لا زم تكون مواتر ينغزى بها


أنا رايح أستانس في البر ووسع صدري


ما رحت وانا حاط يدي على قلبي أقول :
الله يستر لايجيه ما ، الله يستر لا ترتفع الحرارة



أمر ثاني :

أعتقد ان الإسكاليد صرفية البنزين زايدة حبتين ،،، وعلى ما أعتقد ما فيه تانكي ثاني

وهذه مهمة لطلعات البر


أخيرا ً : فكر بعد أربع سنوات بكم تبيعه ؟؟
تشتريه بــ 200000 وتبيعه 40000

لكن وارد اليابان شي ثاني

خسارته لا شي عند البيع


تمنياتي للك بالتوفيق

[Escaled]

السلام عليكم ...

عدنا مجددا للموضوع :)

فعلا آرائكم مهمة جدا ولحست مخي :)

جزاكم الله خير


تحياتي لكم:)

[الحر الوليدي]

الرد بعد 3 سنوات من طرح الموضوع ...

ياشباب انا قريت الموضوع وقريت الردود كلها ..والله الاسكاليد ماهو حق بر ...

تبي موتر بر اما الدقس ولا الهلي ولا الشاص والا الجمس الحوض ...الخ.

يعني (نيسان [قاهر الصحراء] ...ولا تايوتا [مفخرة الارض ] )

اسكالليد اللي بياخذه للبر ..(يقرا الفاتحه على موتره)..

واولا الشباب اللي يقولون ان الاسكاليد انه حق بر ابغى شي يثبت هذا الكلام ...

وثانيا يااخوان بدون زعل الهمر وهو همر اقوى من الاسكاليد ...ومغرز في الطعس ..

وفيه مقطع يمكن كثير منكم شافه ..بلوتوث ...الربع تايوتا اللي سحب الهمر ...

وش رايكم ؟؟ الربع ساحب الهمر اجل الاسكاليد وهو ماهو بقوة الهمر بيطلع النفود ..

انا حق بر ..غير المواتر اللي قلت لا تاخذون ....

وبسأل سؤال بدون اي زعل وارجوا تقبل وجهة نظري الواقعيه ..

هل الاسكاليد يرقى الطعس براحه ام لا ؟؟؟ اذا كانت الاجابه بنعم ورني الصور ...

واذا كانت لا عااااادي الانسان ماهو معصوم من الخطأ ..

واللي يبي يجرب الاسكاليد في البر يروح يجرب بس ..(لايدعي علي اذا خرب )..

ارجوا ان وجهة النظر وضحت للجميع .....

ولو اني مستعجل فالرد _(بعد 3 سنوات من طرح الموضوع)ههههه

تقبلوا تحياتي ....

[kk999]

مشكله اكثر الناس بمجرد تقول له كاديلاك قال ابعد عنها لكن الاسكاليد عباره عن يوكن فخم يعني محركاته كلها نفس الي في السوبربان واليوكن الدينالي
اخر الكلام كثير من الناس يحكم عليه بدون مايجربه وانا متاكد ان اغلب الناس الي حكموا عليه انه ماهو ذاك في البر لوركبوا فيه مره ماعاد ينزلون منه
السياره رائعه جدا جدا وانا شخصيا مجرب واحد ليس لي انا ولكن لاحد الزملاء بصراحه تحس ان تحت رجلك قبيله من الاسود التي لاترحم قوه راحه تحمل وفخامه وش يبي الواحد اكثر من كذا وارجوا غاية الرجاء من الي ماجرب لايقول رايه لين يجرب لاني متاكد 100% انه بيغييير رايه كثيييييييييير بعد التجربه
تقبلوا تحياتي

[kk999]

الرد بعد 3 سنوات من طرح الموضوع ...

ياشباب انا قريت الموضوع وقريت الردود كلها ..والله الاسكاليد ماهو حق بر ...

تبي موتر بر اما الدقس ولا الهلي ولا الشاص والا الجمس الحوض ...الخ.

يعني (نيسان [قاهر الصحراء] ...ولا تايوتا [مفخرة الارض ] )

اسكالليد اللي بياخذه للبر ..(يقرا الفاتحه على موتره)..

واولا الشباب اللي يقولون ان الاسكاليد انه حق بر ابغى شي يثبت هذا الكلام ...

وثانيا يااخوان بدون زعل الهمر وهو همر اقوى من الاسكاليد ...ومغرز في الطعس ..

وفيه مقطع يمكن كثير منكم شافه ..بلوتوث ...الربع تايوتا اللي سحب الهمر ...

وش رايكم ؟؟ الربع ساحب الهمر اجل الاسكاليد وهو ماهو بقوة الهمر بيطلع النفود ..

انا حق بر ..غير المواتر اللي قلت لا تاخذون ....

وبسأل سؤال بدون اي زعل وارجوا تقبل وجهة نظري الواقعيه ..

هل الاسكاليد يرقى الطعس براحه ام لا ؟؟؟ اذا كانت الاجابه بنعم ورني الصور ...

واذا كانت لا عااااادي الانسان ماهو معصوم من الخطأ ..

واللي يبي يجرب الاسكاليد في البر يروح يجرب بس ..(لايدعي علي اذا خرب )..

ارجوا ان وجهة النظر وضحت للجميع .....

ولو اني مستعجل فالرد _(بعد 3 سنوات من طرح الموضوع)ههههه

تقبلوا تحياتي ....
رايك على العين والراس اخي العزيز بس المعلومه الي ماتعرفها ان الاسكاليد اقوى من الهمر لان الهمر له نفس مكينه الاسكاليد لكن الاسكاليد اخف منه بالوزن ;) ياليت تتاكد من هالمعلومه اخي العزيز ولوحتى من الوكاله