الجن والانس والبر -

[هواوي]

بسم الله الرحمن الرحيم
السلام عليكم ورحمة الله وبركاته
اخواني الاعزاء
دايم في افكر في الجن اذا طلعت البر واكتشف انهم اخلاق ومحترمين ويقدرون الناس ورمنسيين

طبعا اقول ذا الكلام لسبب واحد وهو

انا اطلع البر لوحدي دايم واقعد ايام ولله الحمد والمنه ما عمر احد من الزملاء الجن اذاني او ظايقني بحركات نص كم من الي تعرفونها او مرت على بعض الاخوه الكشاته الا نادرا وحركات بسيطه تعطي اكشن للرحله
ومع هذا اعتبرهم رهيبين لانهم ماهم هم الي يزعجونك ولكن الي يزعجونك هم
البشر اما سكران او ملاقيف البر او من على شاكلتهم من الي يرفعون الظغط في البر

احيانن اجلس في النفود الي على طريق الصمان جوا الطعوس عند البرج الي على اليسار وانت متجه شرق واكون جوا الطعوس يالله انشاف عايش كاني ملك الكره الارضيه هدوء ما يخربه لا جن ولا عفاريت ما يجيني ويزعجني الا البشر فقط على كم عقرب من جد البشر ملاقيف تلقا الواحد يلمحك وما تنتبه الا وهو يلف من بعيد يبي يعرف وش تسوي ومن انت ومن معك

تطلع البر تلقا البشر متربصين بك يبون يصكونك مخالفه على السرعه
تطلع البر تلقا نقاط تفتيش
تطلع البر تلقا سكارا يساقطونك
تطلع البر تلقا ناس يحدونك
تطلع البر تلقا قطاع طرق
وتطلع البر يجونك ناس يطالعون فيك بطريقه مستفزه
هذا غير الملاقيف الي بتقابلهم على الطريق او مكان ما تكشت
واذكر مره كنت قاعد اطبخ في البر (( كني اتخيل عيال الجن الصغار متجمعين يطالعون فيني وش اسوي ))) وكنت وسط النفود بعيد عن الناس مكان دايم اروحله قمه الهدوء وشوي الا وفيه شاص مر من عندي مسرع وبعد خمس دقايق مره مره ثانيه وهو مهدي وبعد فتره مر وهو يمشي شوي شوي ومقرب مني
واستمر على هذا المنوال الين قرب مني مره وكانت المفاجئه هي انه ال يسوق الشاص هو كنز او محل مجوهرات يعني حرمه ((انثى)) حرمه لابسه ذهب كنه درع اتوقع فيها ذهب يكفي يجمع جميع القراصنه في الارض يعني اتوقع حتى اسنانها ذهب من كثر الذهب الي لابسته ولو ما هي لابسه البرقع كان شفت اسنانها
المهم مرت من جنبي وطالعت فيني ثم راحت ووقفت بعيد ((لو اني حرامي كان عز الله مغتني منها هي وشاصها )) عموما هذي حركات الانس ولا شفناها من الجن ابدا يعني يمكن يجي جني ولا نشوفه ولكن ما شفناهم يتلقفون الا على ناس محدودين جدا حتى الحركات الي يسونها قديمه صارت معروفه ونص كم

عموما من ناحيتي احمد الله ان ماني جني وانتوا احمدوا ربكم ان ماني جني ولا كانت علوم والله اني لاصرقع بكل الي القاهم في البر وافصخ عقولهم وكان فيه قسم في المنتدا عن حركاتي الي اسويها في الكشاته من الانس
((منتدى ما يفعله الجان بلانسان)) بطوله الجني هواوي مجنن الكشاته في البر
والله من جد يا شباب ليش نادرا ما يخوفونا او يزعجونا بينما لو انا جني كانت علوم وقصص وروايات بتصير وكل الازعاج يجي من البشر
مع العلم انه اذا فيه جني ازعجك اذن واقر كم ايه يروح ولكن اذا بلشت في واحد نشبه من الانس في البر وش تسوي تقرا قران ما بينفع معه او تظاربه برضه ما كنك سويت شي من مطب لدحديرا تروح وتتركه بتخرب رحلتك حتى لو كان يبي يقتلك وقتلته بتروح في ابو ابوها وينقص راسك يعني ما تقدر تجبن او تتشجع فكل وحده اطم من الثانيه

واخيرا = سوال لمن سيشارك في الموضوع لو ان الله جل وعلى خلقك جني هل بتهبل بالي تلقاهم في البر اولا؟؟؟؟

ثانيا اذا بلشت وجاك واحد ابلشك بعمره ((انسان طبعا )) وش بيكون تصرفك معه ؟؟؟؟

[SilverSniper]

فعلاً أخوي هواوي.. بعض الناس يجيبلك المرض والضغط في البر.. أنا تواعدت مرة مع واحد من ربعي من أهل الرياض ووده يشوف روضة سدحا والخفس.. واعدته عند طلحة كبيره معروفه لحالها قريبة من ثغب العاشور ومفيض سدحا.. عشانه ما يدل.. وقفت عند الشجره أحتريه.. والا عند الشجرة بعير .. ما علي منه.. شوي ويمر راعي ربع باترول ثوبه شاسف .. وعمره صغير 17-19سنه.. الطاقية 3 متر فوق.. ويقعد يدور حولي.. ووقف عند البعير .. ثم جا ووقف عندي.. وقال البعير لك؟؟ قلت لا.. قال أجل وش عندك هنيا.. قلت أحتري خويي.. قام يضحك علي.. مدري ليه.. ثم قام يفحط ويخمس وحاسني بالتراب الله يحوس راسه وهج..
والثاني .. قاعدين نطبخ طيورنا حدر شجرة في شعيب الحثاقي.. قبل سنة تقريباً.. ويجينا هاك البدوي على ددسن 85 ويهددنا ويقول أنتم حول غنمي وانقلعوا من هنا.. وحنا بيننا وبين غنمه ضلع وطرف الوادي.. ما حنا حوله.. وراح.. ثم رجع وحنا نسولف والقدر على الضو.. وينزل ويرجف قدرنا والى طيورنا ورزنا وغدانا بالتراب.. قمت وشلت الشوزن عليه.. وقاموا ربعي ومسكوه وربطناه بالشجرة ورحنا وخليناه.. وتغدينا جبن وخبز ذاك اليوم حسبي الله عليه..

[أتلى الأجواد]

بسم الله الرحمن الرحيم أهم شي
وعليكم السلام ورحمة الله وبركاته
أخوي الغالي رغم موافقتي لكم في معظم ما قلت إلا أني أستنير أكثر بقول المصطفى صلى الله عليه وسلم
:" الراكب شيطان والإثنان شيطانان والثلاثة ركب " أو كما قال صلى الله عليه وسلم

[عبدالله الصالح]

اما هذا ياكثره والله وتطلع البر يجونك ناس يطالعون فيك بطريقه مستفزه
يارجال اهم شي الوناسة
اخوك القصمنجي..

[عنـاد]

السلام عليكم ورحمة الله وبركاته

والله يا خوي يا هواوي موضوعك جاز لي

وابي اذكر بعض اللي شفته من الانس قبل كم سنة كنت كاشت في الصمان انا والوالد وكنا متقصين في فيضة بعيده ومواعدين ناسن من ربع ابوي المهم وانحن قاعدين نحوف الغداء في هاك الفيضة اللي تسنها سندس مفروش ما عندك بازين منها وينزل علينا ثلاث مواتر هايلوكسين وجيب باترول سلقة وقف راعي الهايلوكس وطلع كميرة فديو اول ما سوا طبعا صورنا وسوا لنا زوم يحبه قلبك :)
مدري وش ذا القرادة فيه ؟
بعدين قام ياشر لخويه واشوف راعي الباترول فر الطارة وبدا يدوس للموتر ويدبل بالكلتش ويخمس والله ثم والله يمكن قعد حوالي 7 دقايق وهو يخمس بدون توقف وحاق الفيضة وحاق كل شي وحتى محلنا حاقه حرث الارض وحاس العشب واخر شي راح هو ويا اخوياه حتى ما قعدو في الفيضة لوهم قاعدين نقول جاهلين وعلى عقولهم غشاوة بس انهم عارفين انهم يخربون ( الله يصلح بعضهم )


السالفة الثانية حول سالفه الحار سيلفر سنايبر
بس انه كان يقول اننا رامين حدا غنمه وانها تعرج من الصفرة ولا جانا الا العصر يطاطي ويصايح وكب المعاميل وكب القدر بس اشوا كان قدر ضغط وتلاقطوه العيال وتربو شنبه :) واحد من الزقرت اللي معنا لوه متوليه تسان اللحين اكتب ردي من السجن يقول لو الغدا مندفق دفقت مخك على ذا الضو :)


اما بالنسبة للمقاريد اللي يدورون عندك ويفحطون ويحبون الخبر ويحبون يعرفون من انت ووش تسوي وكل شي هذولا تتعب وانت تقص عنهم لا في الديرة ولا في البر


برايفت سيلفر سنايبر :

شفتا انك احر مني :)


وياليت بعض اعلام المنتدى يشاركون خصوصا من لهم باع طويل في الكشتات والروحات والجيات

مشكور اخوي هواوي على ذا الموضوع

[الطبيب]

واذا مرني قناص او كشات انشب به لين ينزل ويتقهوا او يوافق العشاء او الغدا

يا الله لا تغير علي :)

سنايبر وعناد

بالله (( الرجال كب عشاكم )) ؟؟؟؟؟؟

الله لا يوريني واحد منهم

لاني ما راح اتحمل

والله ما اهده الا راسه بالنار

او احط به فشقه

=======

ملاحظه :-

يمكن لحبي ان ابعد كثير عن الناس والديره سبب لعدم تعرظي لهذه المواقف

========


اما لو كنت جني :)

فأبي ادور اهل القذل اللي تقل هداهد او الخكاريه

واقعد اهبل بهم

علشان مايأذون احد مرة :) ولا يطلعون للبر مره ثانيه

هذا والله اعلم

والسلام ختام

[المترو]

اما موضوع المضايقات بالبر فهي شر لابد منه لكن الحل لا تحرك تبلش الجن اهون من بعض البشر
اولا ً محاولة الصبر والتحمل مع الجهال والملقف الى حد الذي لا يصل الى التعدي عليك وعلى امورك وكرامتك
الحل الثاني محاولة البعد عن الملاقيف والشر عموما والتشطر عن وجع الراس وعدم الاحتكاك بمن يظهر لك انه نشبه وما وراه الا القراده وهذي فراسه للكشات وطير البر

انا يا محاكيك قبل رمضان طلعنا ماهو بعيد بطعوس الثمامه بصراحه بعيد عن الناس واهل الثمامه اللي انت خابر بعد ما تعدينا نقطة التفتيش يسار
المهم الا وذاك راعي الشروكي اللي الله يهديه والله انه دفن خوياه بالتراب يفحط عليهم وثمن جا جنبنا وهو شاق الشكمان صوت الموتر تقل طياره وخذ تخميس تحت الطعس اللي حنا عليه الى ان انفقعت روسنا من الصوت المزعج للموتر والله ويقوم اخوك ويقول له ادوختنا الله يهديك ويقرب ويتكلم بكلام الله اعلم به ويفحط علينا ويقول الى جيت ببيتكم قل هالكلام وصراحه قالو لي الشباب انت ليش تحكيه اتركه وانت بالبر وعقبها خل الدرعا ترعى صدق ماني بيتنا بأرض الله ويقول واحد من الشباب لو انه طلع سكران ومعه خرازه وين تبي تلقانا الحين

الله المستعان

[عروان]

ما أقول الا الله لا يكثر هالنوع من الملاقيف في البر.

لو أني جن كان قدت للي يفحطون و يزعجون وما خليتهم يتهنون في طلعتهم ولا يذوقون النوم ليلهم كله.

لين تغدي عيون الواحد مثل اللوزة من السهر والتعب والخوف.

وخاصةً اللي يكشتون ثم يمشون ويتركون أوساخهم في مكانهم. والله لو أني جن كان بهذلتهم لين يرجعون وينظفون البر عقبهم.



في الاخير أطيب تحية لك أخو هواوي على هالموضوع.

[بركان]

اخوي الهواوي
ماشاء الله تتونس وانت لحالك
يخوي سالفة راعية الشاص اللي لابسة ذهب يقرقش خوفتني
تدري منهي هذي الله يسلمك جنية متلبسة في ثوب انسية ومتزينه وضاربة الشيطان الرجيم وجاية تختبرك يالهواوي لانها عارفة انك هواوي والا وش هو له تمر وتقرب وتمر وتقرب اكثر ثم توقف جنبك يمكن انها سمعتك مشغل الاغنية اللي تقول الهواوي ما يهزه اي ريح اللي يغنيها خالد عبد الرحمن قالت هذا ما فيه فايده .الله اللي انجاك منها.

اخوي الهواوي
قصة حلوة وممتعة وهادفه واللي شدني اكثر وكملت القصه هي هالجنية راعية الشاص وانا ما تعودت اقرأ اكثر من سطرين او ثلاثه بس موضوعك قريته من طأطأ الى السلام عليكم بس ما طلعت بنتيجه ما عدا انني اكتشفت ان الهواوي فعلا ما يهزه اي ريح.

شكرا لك وابعد عن الشر وغني له وحاول يكون معك سلاح ويكون بارز يعني حطه فوق الكبوت لان فيه ناس ( تدربل عليك ) من بعيد وانت ما تشوفهم وقد تغريهم وحدتك بعمل مكروه , ولا ما نع من ان تطلق في الهواء كم طلقه فقد تبعد هذه الطلقات اولاد الحرام من الجن والانس وما اكثرهم خاصة الانس.

[هواوي]

بسم الله الرحمن الرحيم
السلام عليكم ورحمة الله وبركاته

اخواني الكرام اولا اشكركم على التفاعل مع الموضوع وهذا يثلج الصدر في مكشات

عموما والله انه مشكله المشاكل في البر لما تبلش بناس ملاقيف والمشكله الكبرا في الحل وعدم تشابه الناس في الطباع

الاخ سيلفر صراحه من جد ما ادري كيف تحملتوا الي كب طبختكم احس ربطته في الشجره ما تكفي وهذا الي يخوف في البر نوعيه الرد يعني واحد نزغه واذاك مهما كان ردك فهو كارثه واهونها انك تركه وتروح ومع هذا تقعد منقهر اسابيع وتحس باهانه وهذا اهون حل

الاخ اتلى الاجواد عز الله انك صدقت ولكن تعودت اني اروح لحالي عشان احس بمنتهى الحريه يعني لا احد يقول ارجع او متى نرجع او خلنا نقعد يعني اروح الين امل وارجع سواء اسبوع او ساعه ولو معي احد اضطر اني اجامله حتى لو هو ااعز اخوياك

اخي العزيز القصمنجي هذي المشكله كثرتهم ولكن نسال الله ان يفكنا شرهم

اخوي عناد بارك الله فيك انت وابوك انشااء الله ويفككم من ذيك العينات الي فحط عندكم ولكن لاحض انها سبع دقايق فقط وشف كيف رغم قصرها كيف رفعت ظغطك اليوم كله وانت وابوك اثنين وهم على الاقل اربعه يعني لو ابلوشكم بانفسهم ومعك سلاح والله ما ترضى احد يغلط على ابوك وان تثور فيه ولا تشوف ابوك الله يحفظه لك ويخليه يتعرض لاي مساس بقدره وهيبته

الاخ العزيز الطبيب هذا وانت طبيب تبي تحط براسه فشقه:D اجل حنا الي ما حنا حول الطب وش بنسوي عموما اخي العزيز هذا بلا ابوك يا عقاب هنا المشكله وانا اخوكهي نوعيه الرد من المكشاتي لانه مليون في الميه المكشاته مستحيل انه بيكون جبان ابدا عشان كذا تلقاهم في كل شعيب زي الجن والذيابه ولكن لم تبلش بواحد ما تدري وشو وهو ما يدري وش انت ووش معك فالنتيجه ان اي رد منك او منه بتصير كارثه وخاصه انك في بر منقطع ومن ناحيه انك تعزم اي واحد يمر من عندك فكن حذر من ذي الشي الا اذا حولك ناس

اخوي الرحال عز الله انك صدقت ان الابتعاد عنهم وتجاهلهم هم اسهل الطرق وانجحها انشااء الله ومن ناحيه راعي الشروكي فاكيد انه مراهق زغنطوط يعني صغير بالانقليزي بالذات ذا النوعيه لما يشوف انكم ما تطالعون فيه بروح يدور ناس يطالعون فيه ويستعرض قدامهم

الاخ عروان اجل لو انت جني بتكون صديقي ولكن انا باهبل باي واحد من حقين مكشات عشان اقرا وش بيكتبون عن القصص الي بسويها فيهم اما الي يتركون مخلفات رحلتهم في البر فعز الله انهم يرفعون الظغط والسكر والشاهي بعد

الاخ العزيز بركان اشكرك على قرائه الموضوع وهذا لطف كبير منك ومن ناحيه راعيه الشاص فيا ليتها جنيه كان انا وهي اصدقا هلحين وابيع اللند كروزر واركب معها في الشاص وتمشيات على مستى العالم كان باكشت في سيبيريا اليوم وبكره في سرنقاتي ومن ناحيه السلاح فصراحه ما احب اشيله معي في البر عجرا وياله بعد ولكن اذا وقفت في مكان فزي ما قلت انت ولكن بدال السلاح احط بيت رشاش معى على طول فاضي من جوا واعلقه في مرايه الموتر الي اكون تحتها وهذي والله اسويها دايم

وقصه اخيره صارت العام

كلمني واحد من اصدقاي وقال تطلع البر قلت ايه قال بيروح احد معك قلت لا قال طيب وش رايك اخوي وولد عمي ابيهم يروحون معك طلبوني اطلعهم ولا فيني شده قلت طيب عايدي المهم جوني البيت وطلعانا وهم صغار ومتحمسين للبر اعمارهم على 17 تقريبا طبعا في الطريق هبلتبهم بسواليف كلها نصب عن الجن وان البر زحمه جن وقطاع طرق ومن ذا الخرابيط بس قهروني ما خافوا وتحمسوا مره انهم يشوفون جني او اي شي من الي سولفت لهم عنها هذا الكلام الصبح وقعدنا ويوم جت الساعه 11 في الليل وانا منسدح وهم قاعدين عند النار وشوي يجيك ذاك الادمي الملقوف في باترل اعتقد انه اول باترل انصنع في التاريخ لونه ابيض وجنوط والي يسوقه واحد عمره حول الخمسين وقسم بالله انه لابس اوصخ ثوب شفته في حياتي عاد الشماغ الله لا يوريكم المهم ويجي ويقف قدامنا مباشره وييوجه موترهناحيتنا ومشغل النور وواقف وما بيننا وبينه حواي 20 متر فقط طنشنا ما كنا انتبهناله ولكن مصخها من جد عيا ايروح المهم قمت من انسداحتي في برد وظغطي مرتفع ورحت له ويوم شافني جيته نزل من السياره وقابلني وفي ذيك اللحضه شفت ثوبه وشماغه و انها وصخه المهم نزل وقابلني قال السلام عليكم رديت عليه بعصبيه وقلت الله لا يسلمك وش تبي قال ابي حطب قلت حطب طيب ليش من اول ما وقفت ما قلت ابي الحطب قال هذا شي ما يهمك انا في بر بن سعود قلت في بر بن سعود ولكن النور في وجهي المهم هددته ولا كني اكلم جدار وهو الرجال مره ما كن فيه رجال يكلمه قدامه اخر شي قلت انت تبي تقصر الشر وتروح قال قال لا قلت طيب المهم اخذت طنب لقيته في مكاننا وحطيته عندي عشان احرك الفحم ورجعت وكسرت انوار الجيب الي اصلا اضعف انوار في العالم ويوم شاف الامر جد راح سيارته وخفت لا يكون راح يجيب سلاح المهم لحقته الى عند سيارته ولكن مشا وهو يتوعد ورجعت لاخوياي وجلسنا شوي تقريبا نص ساعه الا وهو جاي ومعه دوريه من مركز الثمامه وسالوني وش صار بينك وبين ذا علمتهم السالفه وحنا جالسين نتكلم مر من جنبنا دباب راعي الدباب وقف وقرب منا ثم مشا ويمكن في اقل من خمس دقايق الا وهو جاي ومعه خمسه في ميركري فورد وجو يبون يضربون ذا راعي الباترل وصرت افك بينهم انا وحقين الشرطه المهم جا واحد من رعيان الميركري قال تعرفونه قلت لا ولكن وش حكايته وش فيكم تبون تضربونه قال هذا حرامي جا المخيم وسرق الغاز وضرب الحارس وقطع اسلاك الماطور ووصف لنا الحارس السياره ويوم شافها خوينا راعي الدباب عرفه من الوصف وجينا قال العسكري جيبوا الحارس ويوم جابوه عرفه واخذوه القسم وافتكينا منه واعتبره اقوى وجه حرامي في العالم يوم يروح يشتكينا وهو سارق المخيم الي حولنا ولكن الله اراد ان يفظحه واكيد او شي بيسوونه الشرطه هو انهم بيغسلون ثوبه وشماغه الله لا يبلانا ومن ناحيه الي طلعوا معي اخوان خويي فهم الى الان كل ما دروا اني بالطلع البر ما انتبه الا وهم وعفوشهم عندي

وسلامتكم واسف على الاطاله

واخيرا اكثر شي يريحني في البر اذا جلست في مكان وجو جنبي مطاوعه من جد رهيبيين

[خشم الحصان]

الاخ الغالي
سيلفر سنيبر
السلام عليكم
وش فيكم كلن قام يكتب بطريقه شد الانتباه بالقوه شيصان وحرمه وذهب وقدر يكب
ياخيي منتاب سال سالم من ها النومونه لو تكشت في سطح البيت لكن اصبر وحتسب والايام تعدلهم لك وجن الاوادم تلقاهم اذا غدة الارض ربيع ونقع ماء جوك لي ينكدون علي المسلمين وخذ
اهنا تفحيط في الروضه
اهنا قلت حياء برفع المسجل يعني لازم تسمع بالقوه
اهنا طلق نار جنبك ولا سريع الطلاقات لو تزل من يده سدح لي في الروضه سنهم دخل
اهنا ناس متقهويه وغادي سنه اريل سبع رصات او ازود ثم ينشبك
اهنا دربيل لو تنسدح وتفق اثمك شاف حليز الموت من الشفاحه
اهنا بثرين كلن قاضب فاسه وخذ تكسير في السدر قالك يبي يشب طيب اخضر الله لا يعمينا الحبيب يبي ريحه
ياخيي جن الاوادم سايدين ام اهل بسم الله يازينهم سم بسم الله الرحمن الرحيم واذكر الادعيه ولا عليك خوفه ان شاء الله اما الاوادم لو تنقع عزيمه وتشربها علي الريق نتق من السحله وقال وش تشرب
لكن ياخيي الله يغفر لنا جميعآ مالك الا الصبر والهون في هالامور ابرك مايهون لئمك وانت ابخص مني لو تنشبت معه قلب الكشته نكد ويمكن توصل الي الشرطه وتروح الكشته ورا القضبان وشلون تبي تشب علي عشاك خلف القضبان لاكن راعي المثل يقول (خل الداب وشجرته)
ياربع الحسي زين بس النتايج شينه لو كل تصرف شين قابلناه باشين منه
اخوي الغالي الله يغفرلك لي ملاحضه علي كلمة
(لو ان الله جل وعلى خلقك جني هل بتهبل بالي تلقاهم في البر اولا؟؟؟؟)كلمة (لو) اضن تفتح باب الشيطان
والله سبحانه لا يعمل الا اشياء ربانيه تليق بجلاله اي خلقنا انسان بامره وعلمه (كن فياكون)
هذا والله اعلم
اخوك
خشم الحصان

[الربذي]

السلام عليكم ورحمة الله وبركاته
الاخ الحبيب هواوي
تصدق انك صادق يارجل ظالمين هالجن ولا تصدق ان فيهم ناس اعقل من بعض البشر ولكن الله سبحانة وتعالى كرم بني ادم
اخي الحبيب هالحرمة الي تقول مرت من عندك يمكن ذابحة العطش المسكينة ومستحة تطلب منك
هذا وهي حرمة وتسوى كذا وشلون وجية اخوانة
ماشاء الله تصدقون اخوي سنايبر عندة صدر وسيع مرة بالحيل
ولايجيك ذا الرجال ويقول البعير لك وش دخلة بالموضوع لا ويسال وش موقفك هنا لا وتعلمة وماشاء الله عليك
وبعدين الاخوان الى جاهم الداشر الى يقول بعدوا عن غنمي اذا بعيدين 00لة الارض الحمد لله((( ارض الله )))
لا ويجي شين وقوى عين وينثر غداكم الا يامطلقة وفية عرق ينبض يعنى كراعة الى كب فية اللاكل والقدر والمعاميل اكسرة اكسرة نعم اكسرة وبعدين اتركة يعاني من كسرة هذا الخرتيت المتخترت
والحمد لله مامر على مثل هالاشكال المسترجلة ولا علوم لاني عصبي مرة مرة مرة مرة مرة

[SilverSniper]

أخوي العزيز الربذي.. ولا يهونون الأخوان.. اللي كب عشانا كان ودي أثور فيه بالشوزن.. بس يدك طال عمرك ماهيب مخلاة لك.. وان آذيناه بلشنا بدمه وهو ما يستاهل.. وأعتقد اننا نعطيه درس صغير بكم يد على كم ركبه.. ونربطه بشماغه بالطلحه ونخليه .. تكفي..
(( ليس الشديد بالصرعة.. ولكن الشديد الذي يملك نفسه عند الغضب))

[عروان]

صح الله لسانك Silver Sniper


كلامك يعكس شخصيتك.


أسجل أعجابي بشخصيتك.

[عبد الله الفايز]

شكلك يالهواوي تقرب لي لأني أحب أطلع للبر لحالي بعض المرات خاصة لاصرت ودي أدوج كثير

بس ماعمر راعية الشاص قربت يمي

على كل حال لو أنا من الجن كان أي واحد يضايق الناس وما يخليهم يستمتعون بالبر كان أخرب سيارته وعدته واحوسه لحد يحلف مايطب البر

فيه قصة قالي اياه واحد من الربع

يقول طلعنا يوم طلعنا ونصيد قميري واللي قسم الله وطبخنا غدانا وحنا نطبخ فيه راعي ددسن عنا يجي له كيلو

أثريه يدربل علينا يقول يوم شاف الغدا منكوب بالصحن ويجيك يمشي ألف ويوقف قال ياعيال ماشفتو بعارين لي يقول قلت الارض مليانة بعارين

قام واحد من الربع استحى قال تفضل والله وينزل ويقعد ياكل أكل أول لقمة قال وش تقولون لو الله يصلطني عليكم
يقول قلنا الله لايصلطك لاعلينا ولا على غيرنا

قال إلا سلطني الله عليكم هالحين آكل غداكم غصب عليكم يقول هاذا وهو ماسكن قميرية بيده

قام اللي عزمه والاه ظفر ويمسك يده ويهزه الين طاحت القميرية ويقول والله انه محرمتن عليك ياكلب

ويقلبه ويسحبه برجله إلا عند الضو وياخذ رماد ويملا وجهه وعيونه وفمه ويحط رجله على رقبته

ويقول إلا سلطك الله علينا سوينابك كذا وال ... يصيح

المهم قام وفرك عيونه وراح يبي يركب سارته ويلحقه خوينا ... أوقف ياكلب والله ويهج ويخلي السيارة
يمكن انه إلا هالحين يركض
يقول كملنا كشتتنا ورحنا والسيارة واقفة

وبس

انتبه إلا صرت لحالك المكان الي تغيب عليك الشمس فيه لاتنام فيه نصيحة مجرب والله العظيم

[أبو يوسف]

قصص مخيفة الله يحمينا بس

انا اقولكم قصة ناس جادعين الحيا وكابين ما الوجه
القصة مروية من صديقي
يقول مرة كنا بالثمامة جالسين ما عندنا من الشيطان طريق
وقمنا نصلي المغرب
وكان هو الامام
المهم سمع سيارة وقفت
صلوا هذولا معهم وهو ثلاثة
وخويي وربعه ثلاثة
المهم يقول خلصنا من الصلاة
وقاموا كأنهم يبون يمشون
يقول خويي بدافع الكرم ونخوة العربي قلت لهم القهوة يالربع
قالوا والله مستعجلين مواعدين ربع لنا لكن قهوتكم ما تنعاف
يقول ونقهويهم
ويجلسون على قلوبنا
لاحنب اللي اخذنا راحتنا ولاهم اللي راحوا
يقول وأخرنا صلاة العشا الى الساعة تسع ونص ولا بعد راحوا
قال اقمنا بنصلي وصلوا معنا
يقول خويي قلت بيصلونا ويمشون
والله ويصلون
ويتواسون عند الضوية صاروا راعين محل
يقول حنا طالعين طلعة سهر ما تجهزنا بعشا الا لنا
يقول استحينا نطردهم وحنا اللي عازمينهم
ومينر نضف عفشنا وقلنا لهم المحل محلكم لكن الفرشة محنب مخلينها لكم :)
ورحنا وطبخنا عشانا بمكان ثاني

وانا العام الماضي كنت طالع لروضة نورة اخر الربيع وكانت مشمسة
كنا اربعة
وعلشانها شمس كان معنا ثلج للما وحاطين لحمنا بالصبارة
المهم كنت اطبخ الغدا وخويي يشوي الدجيجات ( الظهر ) بتقولون عليك مزاج اقولكم
ابي استعرض مهاراتي مع الربع
المهم وحنا قاعدين ما علينا من الشيطان طريق
الا وهاك الباجيرو القديم اللي وقف وفيه خمسة
وقفوا قريب منا وصوتوا
جيناهم ولاهم اللهم يا كافي تقل جايين من الربع الخالي عطشانييييين ويبون ماء
وعلشان الجوحار بدينا نصب لهم ماء ونحط من مكعبات الثلج
هم شافوا الثلج قالوا هذولا عندهم بلاوي
المهم تلقف اللي بجنب السواق
وقال هذا غداكم
قال اخوي ايه
قال شوي الظهر
قلت انا النفس وما تشتهي
قال واحد من الربع
اقلطوا
قالوا اللي بالجيب لا الا اللي سأل عن الغدا قال ما تبوننا نقلط ( صدق قوي عين ) المهم قالوا لنا ماعندكم ببسي تبيعون لنا
قال واحد منا لا والله وان كان لقيتوا احد يبيع اشتروا لنا

قال واحد منهم تبون ببسي عادي ولا ببسي دبي
انا عرفت انهم مولين
قلت الله يسهل عليكم
قالوا بتقعدون الى الليل نجي نسهر معكم
قلت لهم خلاص بهالمحل تعالوا
المهم يوم تغدينا واللي منا قلت لخوياي الهجيج هذولا يوحشون
والله ونمشي مع المغرب وصارت خيره لأن الطريق كان ريغة ولا تقدر تشوف بالنهار اجل وش لو كان بالليل

ومشكور اخوي هواوي على هالموضوع المهم

مع التحية