سلف الفكسار الجديد..

[SilverSniper]

السلام عليكم ورحمة الله وبركاته
عمي عنده لاندكروزر في اكس آر 2002 .. أدق السلف أسمع صوت تك.. ولا يدور.. ولعت اللمبات ودقيت سلف ما ضعف النور والا اشتغل لسلف استنتجت ان الخلل في السلف.. لأن الدقمة تدق ما تفصل.. نزلت تحت السيارة أدور السلف.. ما لقيته.. فتحت الكبوت.. وفكيت الغطاء اللي فوق المكينة ودورت يمين وشمال .. ما لقيته.. قمت وقلت لعمي يدق سلف.. وأسمع الصوت من المكينة.. لقيت السلف تحت ثلاجة المكينة.. وما لقيت له طريق إلا أفك الثلاجة.. وهذي شغلة مزعجة ومساميرها واجد.. هل فيه أحد يعرف طريقة ثانية أوصل للسلف فيها بدون ما ألمس المكينة؟؟ بس تكفون لا أحد يقول لي أوديه للورشة.. بأعتمد على نفسي في هذي.. :)

[عروان]

أبشر بسعدك أخوي سنايبر الفضي

عندي الحل طبعاً لا توديه للورشة. أفضل شي جيب الورشة للموتر :). . . مزحة


أخوي سنايبر شركات السياراة مايخفى عليك أسلوبهم الجديد في صناعة السيارات الا وهو تعقيد الصيانة حبتين علشان ما أحد يقدر يصينه الا وكالتهم و بالتالي يربحون أكثر.

شف عندك لكزس مفكاتها ما توجد عند الورش العايدية ما يوجد الا بالوكالة أو الورش الكبيرة. لا و شارين مفكات اللكزس من الوكالة بالاف الريالات.


ولكن أستغرب خلاب السلف بهالسرعة و هو موديل 2002!!!

يمكن يكون حاجة غير السلف. والله أعلم.


أدري أني ما أفدتك بشي في ردي ولكن لقافة :)

[الفهد454]

والله اسمحلي ماعندي خلفية عن الياباني كلش تبي امريكي ايه

[al-nashmi]

السلام عليكم ورحمة الله وبركاته

اخونا القناص الفضي

تحيه طيبه.....

انا معي VX.R 2001 واسمع احيانأ عند تدوير السلف صوت انقطاع التدوير، واطفي المفتاح واشغله مره اخرى ويشتغل عادي ولحد الان ما تعرضته ولا حربثت فيه على قول المثل اللي يترك اتركه..........

اخي الكريم نصيحتي لك لا تحربث فيه ولا تقربه وده للوكاله او البازعي او اي ورشة ممتازه ومعروفه وريح راسك وراس عمك....... عشان عمك ما يكسر راسك اذا خربت موتره:D تحمل مزحي وهذا العشم فيك...


وينك يابركان افزع للرجال اكيد انك عندك خبره في مشاكل الفكسار الرهيب...... واستشير مستشارك السوداني اللي خرب عليك الجلنط:D :D


وينكم ياهل الفكسارات افزعوا لخوينا ترى هذا وقت الفزعه يا رجال.......


وتقبلوا تحيات وخيكم النشمي


.................................

[SilverSniper]

أخوي عروان.. الورشة ثقيلة.. :) عجزت أجرها... أزريت :)
صح .. بعض الأحيان في هالمواتر الجديدة يغيرون تغييرات تقلب راسك.. أجل السلف وش جابه تحت ثلاجة المكينة؟؟..
الخراب من السلف وهذا متأكد منه ما فيه كلام.. لأنه بالاشتراك ما اشتغل .. والبطارية مليانة.. والدقمة تدق.. ما فيه الا السلف..
أخوي الفهد454... إذا جاني شي ما أعرف له في الشفر 77 بأدورك ويا ويلك إذا ما لقيتك :)
أخوي النشمي.. هماني قايل لا تقولون لي ورشة؟؟؟.. وعمي طول الله عمرك.. أنت صادق في ذي... إن خربت شي يبي يذبحني ويصلخني ويعلق جلدي على الباب.. عشان كذا أدور طريقة ثانية غير المكينة.. وأما من ناحية سيارتك فكان عمي يعاني من نفس المشكلة وانتهت بخراب السلف.. هذي بداية خراب السلف.. غيره في الورشة وعلمني كيف غيرته.. :)
ملاحظة.. سألت راعي ورشة وقال لي عن طريقتهم .. فك الكبوت ولوح البلاستيك وفك مشكبية الظفيره واوصل من ورا.. ان ما جاني طريقة ثانية بأجرب هالطريقة.. كل شي إلا المكينة..

[الطبيب]

يعني ما فيه قوة تيار كافيه لتدوير السلف
شيك على تمديدات الاسلاك

الشيء الثاني
دائما حاول ان تبدأ حل المشاكل الميكانيكيه بأسهل الامور ثم الذهاب الى الاعقد

فعلا :-
السيارات الجديده عباره عن سيارات استهلاكيه

عليك بالقديم بس >> باث فايندر 90 :)

هذا والله اعلم

والسلام ختام

[SilverSniper]

الله يحيي الطبيب.. الله يسلمك أنا حاط هالاحتمال براسي.. بس خلني أوصل له وأشوف الأسلاك وأشوف السلف.. لكن الأسلاك اللي رايحة للسلف من الدقمة سليمة.. الأسلاك اللي عند السلف داخل مدري عنها..

[Eagle]

طريقة عمل السلف انه يدور الفري ويل الواقع بين القير والمكينه
لمه ادق السلف يدور الفري ويل ويحرك باقي المكينه
والفري ويل على شكل قرص دائري وغالبا يكون السلف في الجزء الاسفل
لكن لا يمنع انه يكون في الاعلى او على الجانب الآخر
لكن بكل تأكيد يجب ان يكون ملامس للفري ويل
يعني دور بنهاية المكينه من وره ناحية القير

[ابو الريم]

كلام الاخ Eagle صحيح 100%

والمقصود بالفلويل هو الحذاف ....... سواء كان قير عادي او اوتماتيك .

[SilverSniper]

الحمد لله انتهت المشكلة..
بالفعل أخوي Eagle وأخوي أبو الريم .. السلف تحت الثلاجة من ورا.. قريب للقير..
فكيت الكبوت ونزلته تحت.. لقيت قطعة بلاستيكية مربوطه بمسمارين .. فكيتها.. وفكيت مشكبية تمسك أسلاك الظفيره.. وصلت للسلف ولقيت الأسلاك كلها سليمة .. جيت أفك السلف لقيت المسامير على فوق .. تبهذلت بس فكيتها.. وغيرت السلف ورجعت كل شي زي ما كان.. ودقيت سلف واشتغلت السيارة من أحسن ما يكون. وعمي انبسط بس بهذلني ليش تأخرت.. قلت له طلبوا لي السلف من اليابان.. (( وش أسوي.. لازم أصرفه والا يا ويلي:))).والسبب اللي خلاه ما يروح للورشة انه ما وده تتأخر سيارته وما وده يدفع فلوس للورشة:). إيه.. عنده ولد أخو يطقطق في الميكانيكا يبي يتعلم قال أشغله عندي ببلاش :) مشكورين على الردود.. ويا هلا بكم والله

[Eagle]

مبرووووك مبرووووك
انا معاك ابوتركي ماكو احلى من انك تشتغل بالشغله بايدك وتتعب فيها وبالنهايه تحل المشكله
لها متعه كبيره ماهي بس توفير فلوس

[الربذي]

الاخ العزيز سنايبر وش صار على موضوع مشروعك السري جاوبني والى يرحم والديك انا اطردك من مكان لمكان واسالك ولا رديت على يمكن هاذا عاشر سوال لاني بصراحة ابي علية دورة !!!
اخي اضحك الله سنك
تقول مالقا الا ولد أخو يطقطق في الميكانيكا يبي يتعلم قال أشغله عندي ببلاش والنعم فيك 000 يطقطق ماحد فتحلك !!!
لاتكون تشلح من الفكسار لمشروعك السرى :confused:
اية هين طلبولي السلف من اليابان هين ياجباني :confused:
على طارى الجباني
لقيت مرة واحد معة دباب يبيعة وكنت ادور على دباب فسالتة وش صناعة قال شوف اخوي
مسوى فاهم الحين فية بالسوق
ثلاث انواع منهن
ياباني !!!!
جباني !!!!!!!!!!!!!!!!!!!!!؟؟؟؟؟؟؟؟؟؟؟؟
وكوري
قلت جباني قال اية مثل دبابى تراه جباني !
قلتة حرام عليك دبابك صيني
والى تسمية جباني معناة محرف ولا اليابان بالعربي وجابان بالانجليزى
يعنى ياباني وجباني مثل ماتقول معناهن واحد يالله اقنعتة بعد مابغت تنفقع مرارتى

[وين يبون بنا]

ماشاء الله عليك .. تعجبني والله ..

تصدق ان الورش يصلحون الشغلة اللي سويتها انت بقيمة تتراوح من 700 - 1000 ريال فقط شغل يد ؟؟؟

والسيارة تقعد عندهم اقل شي يوم كامل ..

بصراحة ياحظ عمك فيك ماشاء الله .. الى الامام:good2:

[SilverSniper]

يا هلا بالربدي.. وش دعوى تطرد وراي.. أو تدور القطعة اللي لقتطها من سيارتك وانت واقف عند البقالة :).. الله يسلمك ويحييك.. المرهم وراعي المرهم تحت أمرك.. أنت آمر.. وأنا هالحين بأركب الروس وأجرب التغيير.. لسه المشوار طويل شوي.. أما الدورة.. فالموتر كله لك طال عمرك.. خله يخلص بس.. أما الياباني والجاباني.. ضحكت عليها إلين قلت بس.. جزاك الله خير..
أخوي وين يبون بنا... بالله يزينونها بألف شغل يد؟؟؟؟ أجل عمي ضحك علي :).. بس ما عليه.. فعلاً أخوي وين يبون بنا معهم حق.. الشغلة متعبة جداً.. بس يمكن انهم يفكون الثلاجة.. ما يجون من طريق الكبوت.. حياك الله ومشكور..
أخوي وحبيبي Eagle .. الله يبارك فيك.. فعلاً حسيت بنشوة عارمة يوم اشتغلت السيارة.. حتى اني نسيت ثيابي اللي صارت كوكتيل زيت :)

[عروان]

أخوي أبو خالد

هل تستخدم المنول في اصلاح السيارة Repair Manual؟

واذا الجواب نعم كيف حصلت علية؟



أطيب تحية

[الربذي]

اخي ابو عليان!!!!!
اخي الفضى
بعيد عن المجاملة اتشرفنا بمعرفت واحد شرواك
شغيل( وسنافي)!!!!مو حق الشيبان الى له دعاية ل;) ;) ;)
يمكن مافهمت السالفة معذور انا اقولك
اخونا النسر ايجل يقولك ابو تركي
ومدري من الثاني يقولك ابو خالد انت ابو مين باءه!!!
وبعدين تصدق ضحكتنى يوم تقول الف شغل يد اجل عمى ضحك على لمح لة قل لقيت واحد بالوكالة متهاوش معهم لانهم يقولون لة شغل يدينا الف ريال وهوتغيير سلف بس يمكن يحصل شي ولا تنسانا تخبر نبي نشتري طراطيع والعاب نارية !!!:p :p

[SilverSniper]

أخوي عروان.. يالله انك تحييه.. أنا استخدمت دليل الاصلاح اللي في راسي .. أسمع وأشوف وأعرف وين.. أحصر احتمالات الخلل من وين.. وأفندها واحد واحد.. حتى أطيح على الخلل بالضبط... Repair manual ما عندي يا طويل العمر ولو كان عندي ما يغلى عليك..
أخوي العزيز الربذي... أبوخالد على الوالد الله يسلمك ويسلمه .. وهو الاسم الرسمي بين الزملاء في العمل وغيره.. وأبوتركي على اسم العائلة.. ولا يناديني به الا واحد عزيز على قلبي مثل إيجل .. وواحد في بالي يعرف نفسه :).. وصراحة أنا أفضله على أبوخالد لأنه يطيح الميانه أكثر ..وأحب أن أنادى به في المنتدى لأنكم كلكم مكانكم دكه وجلسه في داخل قلبي.. أما انت أبو مين بأه قلبت لي منوفي.. عسا ما شر :)
أما عمي فما أقدر أقول له شي هالحين.. خل يطلع رمضان :) والا يطير الفطور :).. عزوبي وأنت خابر :)
أنا اللي تشرفت بمعرفتك والله أخوي الربذي.. ويا عروان انت منت زميل.. أنت خوي .. أبو تركي الله يسلمك..

[}{التميمي}{]

فعلا كانت بيني وبين احد خبراء الورش في الرياض المعروفين
مناقشه
بين الفكسار الجديد والقديم وقالي عن هذا العيب افك مكينه عشان سلف ما صارت





وهذا الرجال تجيه جيوب دركسون يمين ويعكسها يسار تخيل الا سلاك الكهرباء والبلاوي تقول مصارين وهو ممتاز افضل ورشة كهرباء في الرياض



ترا المدح من شي شفته