كفــــرات وإطارات وتوايــــر البالـــون ..

[محنك]

السلام عليكم ..

للأسف لايوجـد كفر مخصص للإستخدام في جميع التــظاريس ..


فكفــر البالـــون معروف بقوة جنبــة وتحملة للحجر الشديد والمناطق الشــديدة الوعــوره ولين مطبه لكونه نايلون وغاطاته قوية وياخذ ويعطي مع الحصى ليس مثل الكفرات الاخرى الحجرية اليابسة اللي قوتها فقط في الدعسة أما الجنب فهي لاتقارن أبداً بجنب الكفــر البالون ,, فكفر البالون يتحمل الشوك والعاذر والرقعة التيوبلس لاكن المفــــروض مايستخدم داخل الـــديرة لأنه متعب لنفسية السائـــق من ستـــة أمــــور ماتسلم من أحدها:

الأمـــــر الاول : الـــرجـــة .. فالكفـــر نايلــون لايحتوي على سلك حـديد ويرج عـــادة حتى لو رصصت أرضي وكانت جنوطك سليمة .. والرجة ملازمة له حتى يحتر مع الخط وتخف الرجة ولابد منها .
الأمــــر الثاني : العفطـــة أو العرجــة اللي تطلع على وطية الكفـــر أثناء الوقوف لمدة أكثر من 72 ساعة وتزيد العفطــتة حسب ثقل الجيب ووزنة وحســب الهـــواء اللي بالكفـــــر .
الأمــــر الثالث : ثقل الجيــب وفقــدان نشاطـة وخفتــه وعدم الاستفادة من الاحصنة والعزم لمكينة موترك نظراً للثقل .
فكــــفر البالـــــون خفيف داخل المحل أما اذا ركب على الجنط وجاه الهواء وإنتفخ صار أثقل من الكفرات الأخرى .. ولابد له من مكـــينة 8 سلند تشيلة وتمشــي بة .. وحتى ال 8 سلندر سوف تضعف جداً ..
الأمـــر الرابــــع : الخطورة في إستخدام كفر البالون وهو مثل جلـــد الضب مايداني المـوية أبد وخطورتة في إنه يزحــف بك لاقــدر الله وتخــونك الفرامـــل والمسافــــــة ....
الأمــــر الخامس : عـــدم الثبات في الطريــق والتركيز أكثر على طارة الجـــيب أكثر من أي كفرات أخرى وربمـــا تخــــرج من مسارك إلى مســـار آخر دون أن تشعر أكثــــر من الكفرات الأخرى في ظل إنشغال الكثيـــرين بالجوال أو بقراءة رســــالة أو غير ذلك وينتـــج عن ذلك حوادث أليمة لاقــــدر الله ...
الأمـــر السادس : يودي إستعمال كفر البالون إلى ضعف عمــر الكلتش والـدودة تتأثر وربما أثر على الكوارين لأن الكارونة تتحمل الكفر الثقيل لاكن لاتتحمل الكفـــر الكبير في لفته ,, وكذلك بعد تركيب البالون تجد الجيب فاجح من قدام وسبق اني كبسته عند الميزان مرات عديده والفجحه بسبب استخدام هذا الكفـــر .
فهذه الأمـــور الســـتة كفيلـــة أيها الأحباب بأن لاتستخدم هذا الكفــر إلا للحاجة الفعلية له للمقناص مثلا .. وتكون لها جنوط راكبة عليها تركبها وقت الحاجة وتفكها اذا رجعت للديرة .. أما إستخدامة من أجل الشكل والجمال على حساب صحتك وسلامتك وإنشــغال ذهنك وتفكــيرك فأنت في غنــى عن إستخدام هذه الكفرات .....
حفظ الله الجميع من كل مكروه ,,,







http://www.mekshat.com/vb/images/misc/progress.gif

[مداريج الأشعاب]

يعطيك العافية اخوي محنك
ماقصرت كفيت ووفيت .

[البوعينين99]

صح لسانك كفيت ووفيت .

[رأس الزعامه]

يعطيك العافيه
لكن ماهي الكفرات البديله التي تتحمل الحجر والطرق الوعره
وماهي الكفرات التي تناسب النفود

نريد راي الجميع

[الطير040]

والله كلااااااامك عين العقل بيض الله وجهك والله يكفينا الشر

[دب ا422]

كفيت وفيت اخوي محنك وبيض الله وجهك
اخوي يا راس ازعامه انصحك بكفرات شاهين دلوب زينه للموتر وخفيفه عليه وتزين ممشاه با نفود تمر بشي اخوي

[طحنون]

التقرير جدا ممتاز
والشي المهم اللي ذكرته انه البالون يتعب الدبل والكارونا والعكوس
لاكن الكثير اللي ماهوب مقتنع من اللي ذكرته

[برق الشفاء]

ما أشري الا بالون لامطانيج ولا هم وفانفود فله

[المكشات]

كلام فيه شي صحيح

لكن مبالغ فيه برأيي

مشكور على كل حال

[عاشق ياباني]

الله يجزاك خير اخزي ولله ماقصرت

[عاشق ياباني]

الله يجزاك خير اخوي ولله ماقصرت

[عاشق ياباني]

الله يجزاك خير اخوي ولله ماقصرت

[عاشق ياباني]

مشكور اخوي

[مقلع الرمث]

تقرير حلو ورائع

[ابوحمد666]

انا اشهد انه كفر
وما يأ دب الارض الوعره اللى هو
وصحيح انه انه يتعب السياره وخاصه سيارات تويوتا لان الجيب عكس
اما الباترول فوالله ما يدري عنه
تحياتي لك اخوي

[مضاد]

وافي

ويعطيك العافيه

[fj44]

والله ياحفر شوارع الخرج
ما يصلحلها الا البالون
رااااااحه وفي البر احلى و احلى
تقبل مروري وتعليقي

[دانكن]

انا اختلف معك بالامر الثالث ..

حيث ان كفر البالون يعطيك فرق بالسرعه .. اذا كان الجيب يفصل على 205 .. بالبالون على هذه السرعه مايقارب الـ 230 بالقارمن اي السرعه الحقيقية للمشي ..

وكفر البالون اقل صرفية بانزين من غيره حيث ان الكيلو فيه اقل من الكيلو بالكفر العادي اذا كنت تمسك خطوط ..


عيوب البالون عيبين اثنين .. 1- في المطر ماتحرك الجيب . 2- والرجه اللي ترجع لك بعد فترة من استخدامه .

[دانكن]

ونسيت اقول انه بالارصفة مامثله ..

[على قد الحال]

كثر الله خيرك يا محنك،

عندي سؤال، في الصخر وش الأفضل للبالون، ضغط 40 أو تنسمه للـ 20؟

[قناص خلاوي]

الله يعطيك العافية اخوي
كلامك فيه الكثير من الصحة وفيه مبالغات
اول شي ماوضحت الفرق بين البالون 6 غاط ( كاندس) و 8 غاط
الستة غاط يعتبر خفيف ومناسب لمكاين ال6 سرندل لكن يعيبه ان عمره الافتراضي ما يطول ولا فيه مضرة كبيرة على الموتر والعكوس والدودة ..

اما ال8 غاط خصوصا كفرات سيام تاير هذي كفرات جبارة وتخدمك في الرمل والوعر وعمرها اطول من الستة غاط لكن عيبها الثقل يبي لها موتر نشيط ومكينة صاحية..
اما بالنسبة للتأثير على الكارونة والعكوس والدودة فهذا حسب استخدام الشخص وجلده للموتر وتطميره للعقوم والارصفة والجروف بدون حساب
ناس كثير ركبوا بالون لسنوات عديدة ولا تأثرت مواترهم ..

اهم عيبين بالبالون >> مايصلح بالمطر والماء ، الرجة ..

[A.B.A]

السلام عليكم

صراحة كفيت ووفيت وبارك الله فيك وأدام عمرك في طاعتة
شكرااااا من القلب

[بعيدالدار123]

الله يجزاك خير اخوي ولله ماقصرت

[راعي الطلعات]

بيض الله وجهك كلامك عين الصواب وكلام صحيح لا جدال فيه ولا يقول ولا يفهم هذه الحاله الا المجرب

واذكر احد الاعضاء قال ان الافظل اشترا كفرات عاديه مناسبة للجيب عندك دخول الصيف وعدم الحاجه للعجلات واستخدام البالون وقت الحاجه فقط والمعروف ان البالون سريعت التلف

بارك الله فيك على هذا الموضوع الرائع
دمت بحفظ الله ورعايته

[موسم النزل]

انا من رائيئ ان اطار Dunlop او اطار Shahen اللي مقاس كل منهما :
245/85/16 هو المناسب والافظل من واقع تجربة وخاصة في النفود.

[الجيب الريو]

صح لسانك كفيت ووفيت .

[أمير الكشته]

بيض الله وجهـك ...
بصراحـــة كلام سليـــم وفي الصمــيم ...
هذي البالون وهذي مشاكلها ...

[turke2545]

انا اشهد انه شين قوه ودك تركبه وتخلي الموتر واقف
لانه ينصب الوقفه بس وعمره شوي كفيت ووفيت
وبيض الله وجهك على التقرير

[ع و ن]

السلام عليكم و رحمة الله و بركاته

عز الله إنه كفر إذا قالوا لك كفر

و أنا ما أعيبه في شيء إلا في شيء واحد .. و اللي هو >> إنه ما يعيش معك مدة طويلة .. أسرع ما يفنى من الكفرات البالون .

و الواحد مو فاضي كل 6 شهور أغير لي طقم كفرات .. يركب كفر له و للزمن

و إذا تبون رأيي أحسن في أنسب الكفرات >>> الشاهين اللي تجيك قريبة من البالون .. على قولة أخواننا المصريين (( بتاع كله )) .

إن بغيته في بر و إلا خط و إلا مطامر أرصفة ..... إلخ .

و مشكووور يا صاحب الموضوع على طرحك للموضوع و أسلوبك الأحلى في كتابة الموضوع

تقبل تحياتي

[هريدي900]

لي كل شي مميزات وعيوب لكن من وجهة نظري ان البالون في البر لامثيل له لي عدة اسباب ومنها:
قوة تحمله مثلا اذا نزلت هواه الى 20 يمشي معك زي الحلاوه حتى في اسواء التضاريس ولا يكسر الموتر وخاصة الباترول

[التعـ King ـديل]

اعذرني على الاعتراض على كلامك .. انا واحد من الناس اللي افك الموتر وكاله واطق له طقم بالون جديد

الرجه عند ميزان المجد مع ان الجنط تجاري تروح وعلى سرعات عاليه تصل احيانا الى 200 كم بالساعه

انا عندي جيب باترول 2005 من شريته وكاله وعليه كفرات البالون كل سنه ونص اغير طقم لاني اسافر

كثير .. والحمدلله لا غيرت الكلتش ولا الدوده فيها شي .. اخي العزيز الكفر البالون يخرب السياره بحاله وحده فقط

عند الاستخدام الجائر .. بالنسبه لثقل الكفر مقارنه بالكفرات الاخرى احب اقولك ان كفر البالون اخف بكثير من

اي كفر ثاني .. وعن تجربتي مع البالون حتى استهلاك البنزين يختلف على كفرات الدنلوب كنت امشي

تقريبا 400 كيلو بالتانكي الواحد وعلى كفر البالون وصلت لأكثر من 445 كيلو .. بالمويه مثله مثل اي كفر اول

شي توزنه وتخليه يترطب وبعدها بيسلك معك زي الكفرات الثانيه بس الخوف من اول رشه .. عزيزي الكريم انا مااقول

كلامك خطاء بس يمكن انت بنيت من تجارب وانا تكلمت عن تجربتي

[راعي الفتك 9]

عليك بكفر نيتو شركة يابانيه جديده

[ياسر111]

يعطيك العافيه
وكلامك عين الصواب
من واقع تجربه انا مركب بالون ولازال موجود على السيارة ونفس المعانة
ومرصص ارضي تروح وترجع
والمويه هذي كلام ثاني برغم ان الكفرات جديده
بس ميزته لين في البر ومطامر الارصفه هذا كلام ثاني لين وبقوه
مالي شهر مركبه جديد نوع مالون 8 غاط قيمته680 افضل نوع واحسن من المكسس في الشكل والاداء
بس يضل بالون له عيوبه وله مميزاته بس زي ماذكر اخونا المفروض على جنوط ثانية وقت ماتحتجه تركبه
الموتر ثقيل
اشكرك على طرحك الموضوع وعلى الاسلوب اللى اكثر من رائع
واسف للاطالة

[خيام الندم]

:l مشكورين

[أمير الكشته]

ياكنق التعديل انا مركبها على فكس ار وطاح العزم وطلعة القدية الجي اكس ار يسقط علي

[واحشني زمانك]

ماندري وين العلم الصحيح

[الجيب الريو]

من أهم ميزات البالون ولم تذكر
هي بالتغريز البالون مايحفر زي غيرة ويعلق لك السيارة على الشاصي
بالاضافة الى انه يرفع السيارة اكثر وهذه الاشياء مهمة بالبر
وسلامتكم

[qsmngee]

والله انا محتار اركب بالون ولا لا ؟
لاكن الظاهر اني ابدور لي على جنوط تجاري واركبها عليها
وعند الطلعات اللي تسوى نركبها
اعتقد ان هذا افضل حل

[محنك]

شكراًً للجميع .. شكراً لأصحاب الردود والمتابعين بصمت ..
وفق الله الجميع ..

[م/الحمود]

البالون قديما كنا نعرف انه مبدع في الرمل وحديثا اكشفت ان مبدع في الاراضي الوعرة مثل الحرة


هذا الكفر يا اخوان صمم للطرق الغير معبدة


اذا كنت تستخدمة في الصحراء اوالنفود اوالمناطق الصخرية فلن تجد من هذا الكفر الا كل تجاوب وابداع
اما اذا انت سوف تستخدمه داخل المدينة فسوف لان يؤدي الاداء الذي صمم من اجلة لذلك يظهر لنا ما يسمية الاخوان عيوب وانا اقول انها ليسة عيوب لننا استخدمنا هذا الكفر في غير ما صمم له


والعكس صحيح بألنسبة للكفرات الاخراى التي صممت للمدينه او صممه للطرق السريعة فهي لن تؤدي الاداء الامثل في المناطق الرملية والصحراء عموما
فليس من الانصاف اننا نقول انها ليسة جيد ونحن لم نستخدمها لما صممة لة


(هذا رآي يحتمل الخطا والصواب)

[على قد الحال]

للحين يالربع ما حد فادنا بالضغط المناسب بالحرار و الصخور، هل هو التنسيم لـ 20 مثلا أو إن يكون كفر قاسي، طبعا للبوالين،

لأني صراحة من 12 سنة أستخدم كفرات عادية و بضغط عالي بالصخر و أنسم بالرمل فقط.

[اميرالصمت]

يااخوان اناجربت البلوان وماالقيت منه الا كل خير بس ابلشني اذا طلعت البر انسمه وحطه على 20 واذا ركبت الخط عبيته على30وعاش معيالكفر اكثر من سنه امانسبه الي رجه فركبت مساعد دركسون اصفر وراحت الرجه والبلون حجمين الجيب 900و850 وانا اشوف 850حلو علي الباترل

[ناصر العدواني]

السلام عليكم ورحمة الله وبركاته
انا كنت ناوي اركب كفر بالون
بس بعد مشاهدتي لهذا الموضوع
قررت عدم تركيبه
الاعضاء مقسومين قسمين
مستخدمين للتويوتا والباترول
ومستخدمين للبر وداخل البلد
البالون للبر وعلى الباترول من كلام الاعضاء انه لاغبار عليه
وبالنسبه لمستخدمي التويوتا وداخل البلد لا يصلح لهم
وبالنسبه للي طلعاتهم للبر قليل فبناءاً على كلام الاعضاء المشاركين
فيه الدينلوب والشهاين
هذي الخلاصه اللي عرفتها من خلال الموضوع
ولكم جزيل الشكر على طرح اراءكم وتجاربكم
ليستفيد منها غيركم

[WAW]

لحظه لحظه

صار لي مستخدمه سنتين ونص في بليزر

ومالاحظت عليه أي شي ،،، كل اموره تمام في رمل وفي مطر وفي طعوس وفي اسفلت

بالعكس مره بنشر وانا ماشي ولاحسيت فيه ووقفت وكل الامور تمام

ومشيت عليه مسافة وهو مبنشر نهائياً ومتطعج وقلت خلاص بمشي عليه مسافة بعدها

ببدله ،،، وتفاجأت اني وصلت البنشر ونفخ الكفر وعمل له رقعه ورجع عادي ومافيه شي

هذي تجربتي واحترم رأيكم

واو 1430

[محمد بن سعيد]

جزاك الله خير على التقرير والمعلومات المفيدة وبارك الله فيك

البالون جميل ونظره على السيارة لكن ليس على حساب صحة الانسان ونفسيته

[ابو ناصر2020]

الأمـــــر الاول : الـــرجـــة .. فالكفـــر نايلــون لايحتوي على سلك حـديد ويرج عـــادة حتى لو رصصت أرضي وكانت جنوطك سليمة .. والرجة ملازمة له حتى يحتر مع الخط وتخف الرجة ولابد منها .
الترصيص اذا كان عند محل قوي ومكينه الترصيص قويه تختفي الرجه تمامن وانا ماركب الا بالون على الباترول والفورتشينر
الأمــــر الثاني : العفطـــة أو العرجــة اللي تطلع على وطية الكفـــر أثناء الوقوف لمدة أكثر من 72 ساعة وتزيد العفطــتة حسب ثقل الجيب ووزنة وحســب الهـــواء اللي بالكفـــــر .
يعفط الكفر بس يوم تتحرك السياره 50 متر يتوازن الكفر لان الكفر نايلون وعمره اطول لانه الكفر ماييبس مثل الكفرات الثانيه
الأمــــر الثالث : ثقل الجيــب وفقــدان نشاطـة وخفتــه وعدم الاستفادة من الاحصنة والعزم لمكينة موترك نظراً للثقل .
فكــــفر البالـــــون خفيف داخل المحل أما اذا ركب على الجنط وجاه الهواء وإنتفخ صار أثقل من الكفرات الأخرى .. ولابد له من مكـــينة 8 سلند تشيلة وتمشــي بة .. وحتى ال 8 سلندر سوف تضعف جداً ..
ثقيل بس تلاحظ اذا انت تمشي 140 السياره الي تمشي معك وكفراته عريضه تمشي 160 يعني كل واحد
الأمـــر الرابــــع : الخطورة في إستخدام كفر البالون وهو مثل جلـــد الضب مايداني المـوية أبد وخطورتة في إنه يزحــف بك لاقــدر الله وتخــونك الفرامـــل والمسافــــــة ....
عش حياتك مع البالون تتعود على قيادته مره ولا عاد تحب كفر غيره .
الأمــــر الخامس : عـــدم الثبات في الطريــق والتركيز أكثر على طارة الجـــيب أكثر من أي كفرات أخرى وربمـــا تخــــرج من مسارك إلى مســـار آخر دون أن تشعر أكثــــر من الكفرات الأخرى في ظل إنشغال الكثيـــرين بالجوال أو بقراءة رســــالة أو غير ذلك وينتـــج عن ذلك حوادث أليمة لاقــــدر الله ...
هذا اذا كان فيه رجه بس اذا رصصت زين وراحت الرجه تشوف الثبات شلون





مشكور على موضوعك بس غير البالون مافيه

[الشهابة]

طيب يا إخوان و ش رايكم بنوعين من البالون ..

الاول ( زيتكس ) 900 / 17

الثاني ( ماكسس ) 900 / 17

ايهم افضل و السياره لاندكروزر

[أمير الكشته]

انا من رأيي يالشهابه الماكسس هو المعرووف والماشي بسوقنا لأن الماكسس مشاكلها أقل من غيرها وخذ الشي المجرب ...............

[راعى_الهدد]

السلام عليكم ورحمة الله

محنك ماشاء الله عليك

انا موترى gx v6 2009قير عادى وراعى الطير غادى
مركب بوالين هيرو 17- 8كاندس غاط الموتر الحمدالله لاهو ثقيل ولاهو خبل خفيف مثل بعض الناس مع مواترها

الحمدالله ثبات ولاقرقعة ولاعوار راس يضرب الحصا ويطيرها هناك بوجه الحوثية الرافضة
وانت ياراعى الموتر ماتحس بتعب تقول البالون جاى على الكروزر من مصنع وكالة التوتا والباقى حتوتا

ونصيحتى ركبو الهيرو له 4 اشهر لارجة ولاهزاز
ودخلت على الخبارى والضلعان المطينة والحجرة وهواه الخلفى80 والامامى40
وشكرا

[الشهابة]

يعطيك العافيه و ماقصرت اخوي امير الكشته

[ابوحمد666]

اخوي راعي الهدد
كاني فهمت منك انك تضع الهواء 80 او 40 في المناطق الوعره
ياليت توضح او يمكن انا فاهم غلط
تحياتي لك

[برباتوف]

راعي الهدد

احد يحط بالكفر هواء ثمانين الله يهديك ؟؟
حتى بالحصى نحطبه اربعين

[exsoskeleton]

شكرا على المعلومات القيمة ...........

[أمير الكشته]

البالون بالديرة وبالبر كلها الهواء 20 .........

[أمير الكشته]

لكن ماهي الكفرات البديله التي تتحمل الحجر والطرق الوعره
وماهي الكفرات التي تناسب النفود ؟

[mr.majid]

نشكر المحنك على الموضوع وحرصه على سلامة الأعضاء ومركباتهم.
وهي تعتمد على الاستخدام اللي يسحسح شرواي ولا هو راعي سرعه اتوقع مناسب أما اللي عند كل اشاره دوس هذا هو اللي معرض للأضرار.
انا أبعرض عليكم تجربتي:
معي لا ندكروزر 8 سنلدر 2009 ، ومشيت على كفرات دنلوب 13 ألف، وانا أهل الرياض والحقيقة شوارع الرياض لا تعليق خصوصاً شرق الرياض، وبلشت تكسرت السياره اذا نقصت هواه كثير صار الموتر ثقيل واذا خليته عادي بشلت، وبالبر لو تدخل النفود لو على خفيف وانت عجل لازم تنسم عشان ترتاح من الدوس والمعافر.
اللي صار قلت نجرب البالون مقاس 17 ركبت ماكسس 8كاندس مستعمل للتجربة جربته والحقيقة ندمت على ال 13 ألف اللي مشيتها في الدنلوب ، ارتحت في الديره والبر. وسافرت عليه ورحت وجيت وكشت والحمدالله الامور تمام في الديره هواه 35 عشان ما يبطنج اول ماتمشي والامور تمام، وركبت بالون جديد. والآن عارض الدنلوب للبيع خمس كفرات ماشيات 13 ألف والاستبنه جديد اللي خابر زبون حياه الله.

[ابوعبودالسبيع]

السلام عليكم ورحمة الله وبركاته
مشكور اخوي
تقرير حلو ورائع
الله يجزاك خير اخوي ولله ماقصرت

[علي1221]

انا ضد بعض الكلام
البالون افضل تاير للبر والرمل

[fj44]

السلام عليكم ورحمة الله

محنك ماشاء الله عليك

انا موترى gx v6 2009قير عادى وراعى الطير غادى
مركب بوالين هيرو 17- 8كاندس غاط الموتر الحمدالله لاهو ثقيل ولاهو خبل خفيف مثل بعض الناس مع مواترها

الحمدالله ثبات ولاقرقعة ولاعوار راس يضرب الحصا ويطيرها هناك بوجه الحوثية الرافضة
وانت ياراعى الموتر ماتحس بتعب تقول البالون جاى على الكروزر من مصنع وكالة التوتا والباقى حتوتا

ونصيحتى ركبو الهيرو له 4 اشهر لارجة ولاهزاز
ودخلت على الخبارى والضلعان المطينة والحجرة وهواه الخلفى80 والامامى40
وشكرا

ماشاء الله اسلوبك فل كامل
تحياتي لك

[ابو عنقا]

اخواني الاعزاء

اسعد الله اوقاتكم بكل خير وبركة

بالنسبة للبالون يا صاحب الموضوع فأعتقد انك بالغت كثيرا في سبه وهو بالعكس تماما

عندي جيب شاص ومركب له بالون على جنوط لكزس ولا شفت من الا كل خير

وفيه نقطه مهمة

يمكن بعض الاخوان يركبون بالون تاريخه قديم وهذا طبعا يسبب مشاكل

اتمنى انني وفقت بما ذكرت

تقبلو تحياااااتي