المساعد الشخصي الرقمي

مشاهدة النسخة كاملة : اووووووووف تعتبت من وزنية الماء علموناااا طريقة تريحني


الاوزبكي
15/12/2009, 03:14 AM
السلام عليكم يالاعضاء



مشكلتي مع وزنية الرز

يعني كل ماسوي كبسة واجي ابي اصب الرز على الماء يا يكون الماء ناقص او يكون زايد


ماعمري سويت كبسة الا يا هي حب او مريس من الماء


ماعندكم حل يخليني اوزن الماء مضبوط


تحياتي لكم

رعد الصحراء
15/12/2009, 03:56 AM
من العنوان شكلك متعقد من الشغله هذي :)

الأمر بسيط

إتبع طريقتي وراح تضبط معاك

الماء يكون أعلى بقليل عن مستوى الرز ولا ترفع عـ النار

وأول ما تنشف المويه تقصر عـ النار للأخير

ولو تغطيه بقصدير أول ما تنشف المويه أفضل

لا تنسى طريقتي وبانتظار طبختك ونشوفها هنا أو تعزمني وتشوف بعينك :)

الله يحفظك

تقبل مروري

الحسن القاضي
15/12/2009, 03:57 AM
والله ياخوك أنا عن نفسي أوزن الماء بالنظر حتى الملح أرش من العلبة رش وماعمري استعملت ملعقة.
على العموم بالنسبة لقدر الكاتم خل الماء يغطي الرز بحيث أنك ماتشوف الرز وجرب غز ملعقة في وسط الرز
إذا ماطاحت فالوزنية زينة.
أما في القدور العادية إذا زاد الماء ماعليك إلا تفتح الغطا وتخلي النار في البداية عالية شوي وبعدين تقصرها على أقل شي والماء يتبخر وجزء منه يمتصه الرز.

ملاحظة:هناك بعض الأنواع من الرز لاتحتاج لماء كثير مثل رز البسمتي لكن لازم يتنقع قبل ترميه في القدر بحوالي 45 دقيقة.
أما الأرز مثل أبو سيوف لازم يتنقع لمدة طويلة حتى يطلع منه كل النشا وحتى لاينعصد في القدر.

الشرطه
15/12/2009, 04:00 AM
وعليكم السلام ورحمة الله وبركاته

مرحبا مليون بالأوزبكي..
وإن شاء الله افيدك بطريقتي
من سنه تعلمتها وترا تبي تطلع نثريه تاكل أصابعك عقبها
جربتها مع الدجاج واللحم والفرًي (سمان)

الرز المستخدم بشاور وتنقيع تقريبا أقل من ساعه بعد الغسل
الماء يكون فوق مستوى الرز بقليل جدآ جدآ جدآ..يعني تقدر تقول مثل مستوى الرز بالظبط
وللعلم أنا ما أطبخ الا بقدر كاتم سيب الفرنسي 10 لتر ..

شب النار قويه..
وأول مايبدأ البلف بالتنسيم قصر النار مرررره وأتركه 11 دقيقه بالظبط وخله مكتوم نص دقيقه وارفع البلف
وسم بالرحمن وجعله بالعافيه.

لاتكب البيالة
15/12/2009, 06:03 AM
السلام عليكم
بالقدر الكاتم نصيحتي انك ما تكتمه اذا كبيت الرز واذا نشف قصر عليه واكتمه 10 دقايق

تركي الحمدان
15/12/2009, 06:13 AM
أخوي الاوزبكي ... والله اني مثلك كنت ااسويه مريس ونزلت موضوع في منتدى ومن زود توصيات الاخوان اللي قالوا لي انك تبالغ في الماء صرت اسوي الرز كنه حب شعير ومثل ما قال الاخ
الشرطه نوعيه الرز هي الحل الاول والاخير لكن مع ذلك ولا مره ضبط معي :(

الاوزبكي
15/12/2009, 06:29 AM
مشكووووووووووووووووووووورين كل واحد فيكم

وان شاء الله تضبط معي وكلكم معزوووووومين

الله لايحرمنااا منكم وجزاكم الله الف خير

الصمت البليغ
15/12/2009, 06:49 AM
هلا ومسهلا الاوزبكي : من يوم خبرت عمري بالطبخ وانا كالاتي :

أول ماتحط الما خله يغطي اللحم او الدجاج : يعني وفه الزود ولا النقص

ثانيا : اذا جيت تكبس وتحط الرز : بعد ماتكب الرز في القدر استخدم بياله سقطها في القدر لين تشوف الرز وتشوف ان البياله غاطسه الى النصف أو اقل شوي :

وأحيانا انا استخدم اصبعي احطها لين ألمس الرز ويكون نص الاصبع السبابه في القدر ههههههههه طبعا يزين طعم الكبسه اكثر ::::المهم الحركه سريعه عشان الماء حاااار

ثالثا : اذا شفت ان الماء زاايد عن نص البياله أو يغطي الاصبع اعرف انه كثييير : ابدأ قلل لحد ماتوصل المستوى المذكور وسلامتك :

دوسريه كول
15/12/2009, 07:12 AM
لقدر الكاتم
كمية الماء زي قياسك لرز يعني أنا أحط ثلاث أكواب رز والماء احطه ثلاث أكواب ونص ماء واحطه بالقدر واملحه وأكتم الغطاء عليه واحطه على عين الفرن واتركه واذا لف( البلف ) خله خمس دقايق وبعدين قصر عليه لمدة 20 دقيقه وطف عليه ...

والقدر العادي نفس الشي ..
لكن اذا نوعية الارز بسمتي لابد ينقع اقلها ساعه واذا بشاور يكفيه ربع ساعه
البسمتي يكثر ماؤه قليلا البشاور يكثر زيته او سمنته بزيادة ملعقتين عن البسمتي ...

وبالتوفيق

قناص سوريا 1
15/12/2009, 07:19 AM
اذا تبي حاجة دقيقة
خذها من اخوك
كل كاسة رز يقابلها كاستين إلا ربع ماء وكل كاسة رز يقابلها حبة ماجي علشان الملح
إذا في الكاتم بالنسبة للوقت
اول ماتسمع صوت الصافرة خمس دقائق على نار عالية وبعدين اقصر على النار وخلها 12دقيقة تماما حاول رج الكاتم كل خمس دقائق وشوف الرز كيف يزبط

التنهات
15/12/2009, 09:33 AM
في كاتم السيف الصيني
نقع الماء حول نصف ساعة
ثم إذا كبسته خله فوق الرز بـ 2 سم
ثم ولع النار بقوة إذا كانت كمية الرز كثيرة
متوسة إذا كانت كمية الرز قليلة
وبعد ما ينسم البلف (تقربا 10 دقائق) اقصر عليه جداً
وخله 11 دقيقة
وبالعافية

MNH
15/12/2009, 10:52 AM
يقولون اقل من نصف الاصبع فوق الرز

زود الرياض
15/12/2009, 02:09 PM
ما اقدر افيدك بشيء

الشباب فيهم الخير والبركه

لو تشتري كتاب طبخ افضل لك ؟ ..........



لو بسوي كبسه يمكن ازود ملح واكثر موية هههههههههههههههههههههههههه

الله يخلي امي لنا والمطاعم

حتى البيض ما اعرف اسوي خخخخخخخ


الله يعينك يا الاوزبكي


تحياتي لك

ابا فهد
16/12/2009, 09:49 AM
بختصار شديد
في قدر الكاتم 1كأس رز يقابله 1وثلث كأس ماء.
في القدر العادي 1كأس رز يقابله 1 ونصف كأس ماء.
بالتوفيق.

محمد أبو حمد
20/12/2009, 09:31 PM
خذ علم جديد ومختصر من أخوك أبو حمد

(( لا تفتح القدر وتسكره مرات عديدة )) يروح الماء وتخرب الشغلة