&& عاجل ... هايلوكس دفرنسين قير تماتيك ....&& [الأرشيف]

مشاهدة النسخة كاملة : && عاجل ... هايلوكس دفرنسين قير تماتيك ....&&

مخاوي الليل

15/12/2009, 12:30 PM

مالي الا الله ثم انتم ياهل مكشات

ابي رايكم بالهايلوكس غمارتين دفرنسين قير تماتيك

لأني ناوي اشري لكن ودي اعرف هل الموتر عليه ملاحظات او مشاكل

اللي اعرفه ان القير العادي ماعليه كلام بس التماتيك ياليت احد قد جرب الموتر ويعطينا الراي

والله لايهينكم على كل حال

راعي الطلعات

15/12/2009, 12:43 PM

والله مالي خبره بس بقول شي قير تماتيك واربع سلندر وانت اكيد تبي تستخدمه بالبر احس انه راح يتعبك والله
وان شاءالله يفيدك احد مجرب هايلوكس قير تماتيك

ولا تنسى ا لاستخارة وبالتوفيق

الادعج

15/12/2009, 02:05 PM

والله يالغالي قبل تقريبا 3 شهور ^جدي ^اشتراله وحد بحدود 93000 دفرنسين تماتيك ..ومحاتسيك سقتها وطلعت عليها كذا مره معه ... ..المهم .......كانك والله رجال راعي بر دايم وعزب وتوانك ماء و و و و ..الخ فالموتر والله ثقيل الى ابعد ما تتصور وخصوصا بالنفود اذا صار محمل والنمره الاولى بالقير تحسها قصيره مره ...يعني الموتر ماياخذ عزم طويل بالنمره الاولى على طول يبدل للثاني ...................اما اذا كنت راعي طلعات خفيفه واغلب وقتك بالديره ..فالموتر ممتاز ماعليه وما يعيبه الا الثقل ..والثقل الواجد بعد.. والله يكتبلك مافيه الخيرلك

سوبر152

15/12/2009, 02:09 PM

4سرندل ودفرنسين وتماتيك هج مادام الأررض بيدك

مخاوي الليل

16/12/2009, 07:45 AM

ماقصرتوا يالربع بيض الله وجيهكم

انا ماكتبت الا ابي الشور من شرواكم

مخاوى ابوه

16/12/2009, 08:35 AM

شف يا طويل العمر
لاتكلم لك عن تجربه
وقعد معى الموتر 9 شهور قبل ما اسافر
وهذا هو مع ابوي
الموتر مهوب موتر مراقى
تبيه تمشي خذ ولد
وحمل عليه الين تقول بس ما يقول لا
وكنت حاط عليه شد حايلى
ومحمله فرش وعزب وجراكل ماء
رحت به الصمان والدهنا
لمده اربع ايام
والله الموتر يبرد الكبد
مهوب ذا العزم لكن يمشيك
وترى عزمه يفرق عن العايدى هو اقل منه شوي
وانت استخر وشف
والله يكتب لك الى فيه الخير

مكسر الشوك

16/12/2009, 10:32 AM

اناا مانصحك فيها خذ قير عادي اقوى وارغب عند البيع
ولك الخيار

صدى الآهات

16/12/2009, 11:08 AM

4سرندل ودفرنسين وتماتيك هج مادام الأررض بيدك

فعلاً اذا هو اربع سرندل هج عنه ما ينفع ولا بقرش بالنفود خاصه اذا كان محمل

سيف الظفير

16/12/2009, 11:18 AM

الدفرنسين على الاربعه سلندر دماااااااار

لا تكملها بالتوماتيك

أمير الكشته

16/12/2009, 11:41 AM

الســـــــلام عليكــــــم ..........
يعتمد إخــتيار هــذه السيارة على أمرين :
الأمر الأول : ضرورة تجربة السيارة بقيادتها في الديرة وفي الرمل مع الدبل .
الأمر الثاني : هل إنت من النوع الراكد اللي غباره مايطلع في البر .. وهل إنت تطعيسك عالخفيف . ومنت حريص على العزم .
لأن فيه ناس كــذا !!! رآكد بشكل عجيب وراضي بضعف مكينة سيارته ..
وهل إنت طلعاتك خفــــــيفة وكشــــتاتك شعبان أكثر من العـــــروق والرمــــل ؟
لأن ال 6 سلندر عند بعض الناس غير مرضية من ناحية العزم والنشاط والأحصنه
وال 8 سلندر مرضي لهم , مابالك بال 4 سندر ..
أما إذا كنت من الـــنوع اللي يبحث عن النشاط والعزم وتبي تزره تحت العرق ويرقى بك هذي إنسها .. وكذلك إذا جيت بتسقط على سيارة في مسار واحد أكيد ال 4 سلندر يضيق الصــــــدر ..
وسمعنا كثير من اللي جربوه ذموه بالنفود .
ولاتشتري إلا على إقتناع تام بأنك لاتبحث عن نشاط ولاعـــزم .. والعــــزم اللي فيه مرضيك تماما . حتى أثناء التطـــــعيس ..
والتطعيس يبي لك تنزل الهواء مررره وتطعيس راكـــــــد وتبعـــد عن المواقع المرتفعه والعروق ووو. وبكــذا تكون عارف قدرات مكينة موترك وماتعسرها على شي ماتقواه .. فإحذر أن تقع في هذا الخطأ وتشتريه وإنت رجال رجلك حاره ..
خصوصا التماتيك لايمديك ترده بنمره ولاشي والموتر يبي له مسايس بالنفود الصعب وواحد سوآق . . . . إسأل نفسك هذه الأسئلة ..
وفقك الله ..

مخاوي الليل

20/12/2009, 07:05 PM

ماقصرتوا

الله يعطيكم العافيه

شكلي خيرت عن التماتيك

أبو مسفر

20/12/2009, 10:52 PM

مخاوي الليل

22/12/2009, 11:15 AM

صراحة انا اشوف ان سعرها مبالغ فيه بزيادة
حوالي 93 الف ياخي القيمة هاذي تجيب لك فوتشنر ستة سلندر او برادو
حتى لو مستعمل موديل 2007 او 2008 او حتى 2009 اذا كان نظيف تراه ابرك من الهايلوكس دفرنسين تماتيك
شف عالرابط
http://www.mekshat.com/vb/showthread.php?t=254095

يعطيك العافيه يابومسفر .........

بس وانا اخوك انا ماجبت طاري السعر

يمكن هذا احد ردود الإخوان

وان كان تبي سعر الموتر تراه ب85500

أبوعبدالعزيز11

22/12/2009, 12:05 PM

ماينفع التماتيك مع الأربعة سلندر ونيت او جيب