أنتبهوا من مساعدة النتل تكلف 3000 ريال.

[أبو أسامة]

هذا الموضوع أكتبه لكي يستفيد الأخوة من الخطاءالذي وقعت فيه خصوصاً من يحبون يطلعون المغرزين أقولهم لا ثم لا ثم لا لالالالالالالالالا تنتلون السيارات المغرزة . اللهم هل بلغت اللهم فأشهد .

الموضوع :

حصل لي قبل يومين يعني ثالث العيد في الثمامة بالقرب من الرياض أن وجدت صاحب كابرس موديل 88 وأيضاً كامري 2002 مغرزين تغريزه قويه بطونهن على التراب قلت حرام أتركهم لازم أساعدهم حاولت ماقدرت مع العلم أن سيارتي نيسان أكس تريل قلت ما فيه إلا إنا نادي راعي ربع . قالوا لي بأنهم حاولوا أنهم يوقفون راعين الربع بس ما أحد وقف . قلت الحل قالوا النتل .
نتلت الكابرس 2 وطلع والكامري 3 مرات وطلعت ....لكن طلع معها ..........
صوت مزعج جداً في السيارة وهزه قويه مع دوسي للبنزين . شيكت على السيارة بعد مارجعت لقيت أن الكرونه الي تطلع منها قاعدة العامود أنكسرت .
يعني مساعدتي لهم كلفتني 3000 ريال.
ولا حول ولا قوة إلا بالله .



اللهم أنصر الفلوجه اللهم أنك وليهم والإمريكان لا مولى لهم . اللهم أنصرهم اللهم أنصرهم اللهم أنصرهم وعجل نصرهم ياقوي ياعزيز .

[الفال]

اسأل الله ان يعوضك ادعيلك وانا افطر ... وارجوا ان لاتتحسف على فزعة ارجال وعملك ما كل واحد يسويها واسأل الحامض

[نمر بن حثلين]

الله يعوضك اخوي وابد لا تتحسف من فعل الخير تلقاها عند ربك

والمفروض عند السحب :
1- تحط الدبل على الثقيل
2- تسحب الموتر بشويش بدون تل ومعافر

[بن عدوان]

والله أني ما ني معتقد بشئ اسمه نتل .... لانه أقل ما فيه راح يؤثر على ربلات الشاسي ...

والمتفرض مثل ما قال اخوي نمر بن حثلين استخدام الدبل الثقيل .. هذا طبعا اذا كان معك دبل .. وإلا عليك بالسحب الخفيف بدون نتل .. ودفع السيارة المنغرزة في الرمل من الخلف .. مع ملاحظة أهمية تنسيم الكفرات للسياراتين .. الساحبة والمسحوبة .. فتنسيم الكفرات يعني سهولة في سير الكفرات على الرمال ..

ولا يفوتني هنا أن أدعوا لك بالاجر والخير من الله جلا وعلا .. وأن يعوظك فيما خسرت

اخوك بن عدوان

[Bader-M]

على اجر ان شاء الله

والله راح يعوضك خير ان شاء الله

[SilverSniper]

الله يعوضك ان شاء الله... النتل يكسر الكارونة اذا كان الدبل على الخفيف... يعني تعطي المكينة كل قوتها على ترس ضعيف.. وهذا اللي يكسر الكارونة.. النتل ما يعدم الكارونة وبس... النتل يحرق فحمة الكلتش.. ويشعر الدزق.. ويدمر ربلات الشاصي وعمود التوازن وشيال الدفرنس ... أكبر خطأ النتل.. اذا كنت تبي تطلع أحد في رمل.. نسم الكفرات أولاً.. مهما كان موترك.. وحط الدبل بالثقيل واشبك الدفلوك.. واسحب بشوي شوي.. ولا تدعس بقوة إلا إذا رفعت رجلك عن الكلتش نهائياً.. حفاظاً على فحمة الكلتش وتروس القير والدفرنس.. واذا ما قدرت تطلعه.. ابعد عنه.. صحيح فعل الخير زين.. لكن اذا ما قدرت لا تجبر موترك وتعدمه.. تجربة شخصية.. في الثمامة أيضاً.. لقيت راعي ددتسن انحرق كلتشه في نقره.. جيت بأساعده.. معي لاندكروزر فكسار 93.. جريته حتى وصلت منطقه في أعلى النقرة وما قدرت عليها.. بكل بساطة قلت له ما أقدر.. هذي طاقتي.. قال جزاك الله خير وما قصرت.. فكيته وأبعدت.. جاه راعي شاص.. جا يجره ما قدر.. قام ينتل فيه.. شوي وتفوح ريحة كلتش الشاص .. سحب الددتسن حتى الزفلت ووقف.. وقام الشاص يدخن.. طفاه راعيه وجلس جنبه.. وأنا جيت له وعرضت عليه المساعدة قال لا.. قلت الله يعينك ومشيت..
الله يعوضك يبو أسامة... ولكن هذي طريقة اكتساب الخبرة.. تنلسع مرة وتعرف الخطأ وتتجنبه المرة الجاية :)... الله يعوضك..

[أبو أسامة]

جزاكم الله كل خير وأشكر لكم مروركم جميعاً
كلامك صحيح أخوي سيلفر سنايبر بعد التشييك الكامل على السيارة لقيت 2 من كراسي المكينه معدومات .
وكل الأجرأت اللي قالوها الأخوان من التنسيم والدبل الثقيل كنت مسويها لكن النتل بلوه بلوه بلوه ....
الله المستعان .

[راعي العزبة]

يا اخوي (اسامة) لازم تدري ان الحياة تجارب وان الله مع العبد مادام مع اخيه وان الله لايضيع اجر من احسن عملاً والدراهم ياخوي تروح وتجي ومواقف الرجال شامخة والسلام :good:

[المري]

اخوي اسامة

تسلم وماقصرت يالغالي

واسال الله ان يعوضك خيرا

اخوك / المري

[شايب الصمان]

أخوي أبو أسامه
الله يجزاك على فعلتك خير وتفريج الكربه قدرها عند الله شىء عظيم. وأزيد على كلام الاخوان ( احيانا الفزعه تخلي الواحد ما يفكر بالعواقب المهم انه يفرج كربة من نصاه أو جيت عنده).أنتل مضاره كثيره وخفيه . وأهم شىء ان الواحد يقيس حجم موتره مع الموتر المغرز- مع مراعاة في حالة السحب يجب ان يكون الموتر المسحوب يساعد الموتر الساحب واذا كان فيه أشخاص ممكن ساعدون يكون أفضل حتى تتضاعف قوة السحب. وجزاك الله الف خير على فعلتك .وعمل الخير مثاب الانسان عليه مهما خسر من ماده فأنها عند رب العالمين ماتضيع .

[أبو أسامة]

الأخوان راعي العزبه ، والمري ، وشايب الصمان . جزاكم الله كل خير .

[بركان]

لقد جبلنا على فعل الخير

اذا كان طالب المساعدة في منطقة نائية ويوجد خطر على حياته فساقوم بالواجب مهما كلف الامر.
اما اذا كان طالب المساعدة من مفحطي الثمامة فلن اساعده لأنه رمى بنفسه في التهلكه كما انه باستطاعته استدعاء احد اصحاب الونوش وما اكثرهم بواسطة هاتفه الجوال واغلبهم عاطل عن العمل..

يا اخوان لا تتحمسون الا لمن يستحق المساعدة وفي منطقة نائية ويوجد خطر على حياته اما اذا كانت الامور تغريزه بسبب طيشان شباب فاتركوه يتعلم وبامكانه استخدام جواله ليتصل بابوه او اخيه او صديقه. خاصةاذا كانت سيارة الساحب سوف تتضرر كما ذكر الاخوان. يعني ما على حياته خطر.

[خشم الحصان]

الاخ الغالي
ابو اسامه
السلام عليكم
اخي الحبيب احتسب الي الله فقد عملت مايمليه عليك ضميرك من حب الخير للمسلمين فالله يعوضك خير في الدنياء او تلقاها يوم تقف امامه يوم الحساب وانت ناسيها مع مشاغل الدنياء بعد عمر طويل في طاعة الله
اخي كلام الاخ الغالي
(بركان ) عين الصواب والحقيقه فالثمامه لا تساعد الا العوايل فقط
اما في المناطق البعيده التي يحتاج المسلم العون فيها فالخساره في السياره ربح مع الله (نحسبها) ان شاء الله
اخوك
خشم الحصان

[بن عدوان]

الأخ العزيز بركان ..

أعجبتني مداخلتك كثيرا ..

وتنم عن ذهن حصيف ..

وما شاء الله عليك ..

وأضم صوتي إلى صوتك .. بعض الناس .. ما تستاهل من يضحي من أجلها ..

وجزاك الله كل خير ..

اخوك بن عدوان

[أبو أسامة]

كلامك عين العقل أخوي بركان ..............
جزاك الله خير خشم الخصان .
بن عدوان جزاك الله خير .