يالربع ماأحد نقز للصمّان ( وش أخبار المطر والربيع ) "عضو جديد "

[راعي المطاريش]

أول شيء السلام عليكم ورحمة الله وبركاته ........

وعيدكم مبارك وكل عام وأنتم بخير وتقبّل الله منّا ومنكم صالح الأعمال :heart: .........

ثانياً ماهي أخبار منطقة الصمّان ، هل هناك أحد نقز له أيام العيد أو الخميس والجمعة الماضية ......

ناوي أنقز له الخميس القادم عطوني رايكم ياللي رحتوا هناك والا أروح استكشف ........

واللّي يشور علي بمنطقة ثانية ربيع وأمطار الله يجزاه الجنة أخوكم عنده دوام حتى الخميس ماعنده وقت أفزعوا لنا .....

[متيهة البكار]

وكل عام وانت بخير

الدهناء وجنوب الصمان جاها مطر ثاني ايام العيد

مناقع الماء خفيفة وشمس الظهر نشفته

الله يجيب الخير

يقال ان قليل المطر خلال هذه الايام الدافئة تنبت العشب.

[المواكب]

السلام عليكم ورحمة الله وبركا ته : الاخ العضو الجديد أولاً حياك الله وكل عام وأنت بخير وجميع المسلمين ثانياً : بالنسبة السيل بالصمان ابشرك البارح واحد من الزملاء جي من حفر الباطن وذكر المطر خفيف بس وصل ام ارقيبه والسيل ممتاز جداً والمناقع على يمين الخط ويساره ونفود الدهناء احمر من السيل الله يديم الخير قل آمين . الله لايحرمنا السيول والخيرات هذه السنه والربيع آمين يارب العالمين : بالنسبة لتاريخ المطر البارح 9/10/1425هـ. اخوك المواكب (( عنيــــــــــــــــــــــزة ))

[صقر]

حياك الله يا راعي المطاريش وأهلا وسهلا بك في مكشات.

بالنسبة لعلوم الامطار... الشباب ما قصروا فكل علوم المطر موجودة في هذا الموضوع المثبت.. اضغط هنا (http://www.mekshat.com/vb/showthread.php?t=23962) ، وفيه أخبار الامطار في كل أنحاء المملكة.

واسمح على نقل الموضوع الى الخيمة المختصة.

وبارك الله فيك

[mox600]

انا عمي توه جاي من الصمان قبل 3 ايام
يقول مطر خفيف والارض ما ربعت لحد اللحين
تحياتي.

[nahham]

اللهم اغثنا
اللهم اغثنا
اللهم اغثنا

[كشّات]

احد الزملاء راح للصمان جهة الرفيعة ويقول
بعض الروضات امتلات من السيل وبعضها خفيف وبعضها ما جاه شي يعني السحاب ضروس يعني غير عام واما الدهنا من جهة جلعودة ( أم رجوم ) فيمدح المطر يعني جايه ولي زين
أرجو أن نكون أفدناك