قلب الاستبنة ... موضوع للنقاش

[أبو يوسف]

السلام عليكم ورحمة الله
كل عام وانتم بخير وعيدكم مبارك عقب الزحمة

ندخل بالموضوع بدون مقدمات

الحين الهايلوكسات والدداسن والشيصان والجيوب الخلفية الاستبنة تحت
وحب ما أعرف في سيارتي ان الوجه الخارجي للجنط يصير للأعلى والداخلي في الأسفل
هذا اللي يسوونه الوكالات
وبكذا يكون تجويف الجنط للخارج
فأُلقي في روعي <<< حلوه ذي :p
القي في روعي اني أقلب الاستبنة يعني يصير التجويف للأعلى
وبكذا يصير فيه تجويف اسطواني قطره على الأقل اربع طعش انش وعمقه على الاقل ست انشات
وهذا في ظني تجويف يمكن وضع الواير أو السلسلة فيه
ويمكن وضع الكنود فيه بعد حمايته باسفنج ونحوه
ويمكن وضع صندوق الفشق اذا كان مهب كبير
عاد وانت وعفشك وحاول تضع فيه الادوات التي لاتعجب الأخوان في الأمن العام ;)

لكن موضوع النقاش هو وش رايكم في هالفكرة من ناحية هل هي عملية ولا لا
هل فيه ضرر على الرافعة حقت الاستبة لأن الحامل حقها بيصير مكشوف نوعا ما
الجنط يمكن يصاب بخدوش وش الحل بنظركم ؟

امل انكم تعطونا رايكم وتقبلوا تحيتي

أخوكم منتظر الربيع :D ( أبو هديل )

[Rahhal_xp]

السلام عليكم،
أولا أحب أشكرك على طرح هذا الموضوع و الذي كان ولايزال يجول في خاطري، وأنا منتظر مثلك ردود أصحاب الخبرة http://smilies.sofrayt.com/%5E/_950/attention.gif

[بركان]

اعتقد بان الفكرة جيده ويمكن تنفيذها ببساطة والشيء الوحيد الذي سوف يتضرر هو بوية الجنط حيث ستتأثر بالاشجار والحصى والطين والماء لان كل شيء سوف يمخشها.

[مشغول]

هلا ابو هديل

والله الفكرة حلوة لكن من الصعب انك بتحط أغراض تحتاجها دائما لأن فك الاستبنة واخراج ما فيها بياخذ وقت ..

مثلا الواير تحتاجه دائما .. وكل ما احتجته بتفك الاستبنة :rolleyes:

لكن ممكن نستفيد من هذا المكان في الاشياء اللي ما نحتاجها دائما مثل بعض عدد السيارة واغراض البنشر ..

وبالنسبة لكلام أخوي بركان أن الجنوط بتتخدش .. ممكن يلبس الكفر تلبيسة تحمية من الأشجار وخلافة .

عموما الفكرة حلوة بس وش اللي نحطة ؟؟

[شايب الصمان]

فكره ممتازه ويمكن اضافة حمايه بسيطه وغير مكلفه وهي:
1- يمكن عمل صاجه من النوع الخفيف تحمي السبير من الاشجار وغيرها .( الصاجه تكون تحت تحت الكفر ).
2- واذا رغبة بزيادة الحمايه يمكن عمل تلبيسه من البلاستك.

[أبو يوسف]

اشكركم اخواني على التفاعل مع الموضوع

أخوي بركان بالنسبة لبوية الجنط مقدور عليها
كحل سريع اراء الاخوان مشغول وشايب الصمان

اخوي مشغول
مايحتاج انك تفك الاستبنة
نزلها شوي وخذ اللي تبي

اخوي شايب الصمان
حلول ممتازة عملية ورخيصة

اشكركم مرة اخرى
وتقبلوا تحيتي

[القناص]

يا حليل الالمان
مسوينها من 40 سنه قالبين الاستبنات في المرسدس ومغطين التجويف ببلاستك على قده وموفرين مساحه تحط فيها اللي تبي
سلام

[بن عدوان]

أوف ... من أربعين سنه !!!! يالقناص ؟؟؟؟ وحنا تو .. نفكر فيها

:)

بس أنا رأيي أنه هذا المكان لن يفيد كثيرا ... لان المساحة التي يوفرها لا تشجع .. ثم اهتزاز الادوات المخزنة لا بد أن يوضع بالاعتبار !!وكذلك تعرضها للماء .. والغبار ... !!

اخوكم بن عدوان