إذا انشدت السلسلة في السحب .. وش الحل ؟

[مشغول]

حي الله الكل والجميع ..

أمس طلعت للشباب في البر في أحد الطعوس القريبة للرياض وأول ما وصلت لقيت الشباب متورطين .. طبعا فرحت لأني بفزع لهم .. طرزان

المشكلة إن صاحب السفاري ما نسم ويوم جاء بغير مكانة غرز وحاول لكن ما فيه فايدة طبعا هذا بعد التنسيم .. بعدها جاء خوينا الثاني وربط الواير السلسلة بين الجيبين وحاول يسحبه بس ما قدر كان السفاري شاقص .. المهم صاحب الجيب الثاني غرز بعد والسلسلة انشدت من جد .. وتعلق الموتر الثاني لا قدر يرجع ولا قدر يتقدم .. طبعا جيت انا واقعد اضحك عليهم ... طبعا طلعت الأول السفاري وبعدين طلعت الجيب الثاني ..

طيب لو ان الله قدر وما جيت انا لهم وش الحل في هذه المشكلة اللي هي أن السلسلة انشدت بين السيارتين ولا يقدرون يفكون ولا يقطعون السلسلة .. اللهم لا شماته

طبعا نسيت اصور المنظر اعذروني .

وش رايكم

[أيمن]

إي والله انك صادق يا مشغول ..
بالفعل ورطة وتحصل دائما، وشبيهة لها حين تسحب موتر مثولث مثلا وانت راقي السيف مع جنبه بقصد سحبه وما نفعت النتلة الأولى !!
يعني لا تقدر ترجع ولا تقدر تقدم لأن الموتر بتدور كفراته بوش ..
الحل في مثل هذي "تنتيع" الموتر بالكلتش ويجلس واحد حول مشباك الواير ويكون حذر على يده - الله يستر - بحيث إذا ارتخى يفكه بشكل سريع ..
ومثله الموترين الأول "ينتع" على قدام والآخر المقابل على ورا، والله يحمينا وإياكم من كل شر ..
هذا إذا ما نفعت أي وسيلة لتحرك الموتر حتى يرتخي الحبل ..

تحيتي

[الموحد]

:mad:
ياكبرها عند الله ......... (متورطين) حته وحده
لوك ماجيت كان حفرنا شوي وطلعنا ولاصار إلا الخير..........
الله مير يهديك ويصلح قلبك....
لكن علومك معروفة والشاهد خشم الحصان الله يحفظه......ولا لا يابو محمد...
وللتفاعل مع موضوعك , أقترح أن يحفر لكل سيارة بشكل كبير لكي لايكون أمام الدفرنس أي عائق رملي ,
ثم ترجع كل سيارة مقدار قليل بأتجاة السلسة والحاجة هنا فقط لبعض السنتيمترات ليس إلا.........
والشرهة علينا اللي خلينا موترك ............................ :p :p :p
واسلم لمن يحبك

[شايب الصمان]

اضافه لكلام اخوي الموحديمكن حفر تحت الكفرات الخلفيه والاماميه للسيارتين.او رفع احدى السارتين من الجهه المضاده للسلسله(رفع السياره الاماميه من الامام او رفع السياره الخلفيه من الخلف).او فك الشنكار المثبت به السلسله.

[بن عدوان]

والله هذا دور العفريته العامودية .. اللي تقوم مقام الونش اليدوي ...!!!

[خشم الحصان]

الاخ الغالي
مشغول
السلام عليكم
يالله شبها يالله وش القصه يابعدهم الحين انا طالع معكم ولا ادري عن شي علمني يالموحد الله يغفر لنا ولك
وشف ترا مشغول له موقف معك وانا شاهد
الجريه هي حاصله وانا منسهل ولا يوم اروح بالموتر يم المحطه علموني ترا اما علمتوني بيطق فيني عرق
باسر ابتصل فيك الا ياصابر
مشغول الله لا يشغلنا الا في طاعته امين من اليوم ورايح ابصير حذر جدآ اذا طلعت معك اخاف تنشر غلطاتي في ابر والخوفه اذا صارت موثقه بالصور :no2: الا
اما بنسبه لكلمك وش الحل اضن والله اعلم انه يكون معك ونش صغير يدوي حق الذبايح وربطه في جيبك والطرف الاخر في السلسه ثم هندل لين ترتخي السلسه
اخوك
خشم الحصان

[المترو]

السلام عليكم
ما شالله مغرزين والمسعف فضيحه امزح يا الربع :no: """"" لا وخشم الحصان الله الاعلم انه نائم من بعد العشاء وماعرف بالسالفه :o !!!!!!!!!!!!!!!!1
اولا افهم من كلامكم انكم تستخدمون السلسله بالسحب وهذا اول الاخطاء السلسله خطره جداً حتى لو هي الالمانيه الاصليه لو انقطعت اعدمت احد المواتر او اي شخص قريب منها ويمكن استخدام سبت السحب النايلون المخصصه للسحب ويجي منها اوزان للجسم المسحوب 2 طن الى 6 طن ثقل ولا تزعج اثناء حملها بالسياره و مالها صوت
اما موضوع شقصت السيارتين بحبل فهي اما تبرح لاحد السيارتين وتحاول تحركها حتى لو حفرت شيء بسيط او تستخدم المطرقه للحبل الى ان يطلع من الهوك من احد السيارتين ويما سوينها وخلصنا عمارنا
بس ما ينفع هذا الحل مع السلسله لانها تبي تطير عليكم وخطره
السلسله خطر خطر خطر خطر سبق انها كسره قزاز السياره الخلفي عند ما انقطعت


والسلام عليكم الرحال2003





نداي على الجهاز بالبر الرحال

[الموحد]

صبحك الله بالخير والعافية ياخشم الحصان :) ........وصبح الله الجميع كذلك.
نـفيد جنابكم المصون رعاك الله بأنك منتاب معنا في هالرحلة .......طلعنا قبل البارح يم الخرج وحدثت الواقعة المشؤومة أجاركم الله . هذا لإحاطة جنابكم المصون لكي لايطق بك عرق ....
أما قولك يالله شبها يالله ...... فنفيدكم رعاكم الله بأنه قد أرعدت فعلاً بالغضى وبالسمر وباللأرطتي بعد !!!!!!! :mad:
وبمناسبة طاري الإنسهال المذكور في ردكم ..... فأنا أحيي فيك شجاعتك لإعترافك الغير مباشر بأنك تنتقل الى العالم الآخر اللاروحي عندما تكون منسهلاً..... :o
حيث تستنفر جميع القوى وكافة الإمكانيات الصوتية المتاحة والمستحدثة لإبلاغكم أن { الغداء محطوط..... ترانا قّلطنا..... ترانا سمّينا .........} ولكن لاحياة لمن تنادي ..... :D :D
حبيب الجميع آمل أني أحطتكم بما حدث لكي أوفر على جنابكم المصون الأتصال سواءً باسر أو عقب باسر مع بقاء الشوق لسماع صوتك :good2:

حبيبنا المنقذ طرزان :heart: لي رجعة..........
واسلم لمن يحبك.........

[مشغول]

هلا والله بأغلى مشرف واحلى مشرف في الدنيا .

أخوي أيمن يا مراحب يا مراحب .. اسفرت وانورت الحته بوجودك .

تبي الصدق فكرة التنتيع حلوة بس ما اظن تصلح إذا كان متعلق .

أشكر لك تشريفك لنا هذا الموضوع .

[مشغول]

هلا والله بالموحد ..

وش فيك زعلان .. قل الحمد لله إني ما قلت اسم موتر أنا قايل الجيب الثاني ولا فضيحة موتر الجعل :) والشرهه على اللي باعك إياه :hot: ..

على العموم اشوى اني ما انتظرت منك شكر .. الشكر لله ... يا بعدهم .

طيب بالنسبة للموضوع ..لو حفرنا كل التحفير اللي انت تقوله طلع الموتر بدون سحب ..

وشكرا لك تفاعلك ..

__________________________________________________ ___


هلا والله بأهل الشرقية أخوي شايب الصمان

تصدق فكرة فك الشنكار حلوة ولا جت على بالي ..جزاك الله خير .

وهذه من فوائد هذا المنتدى الرائع .

__________________________________________________ ___


مراحب أخوي بن عدوان ..

تصدق ما فهمتك .. ليتك توضح !!؟؟

وشكرا لك مداخلتك .

__________________________________________________ __

[مشغول]

مرحبتين كبار يا ابو محمد ..او ابو جراح في قول أخر .. أو خشم الحصان ..

تكفى يابو محمد صرت ضدي يوم انك استلمت الصور سبحان الله تعمل خير تلقى جيوب مغرزه

على العموم يا بومحمد طلعوا الشباب يفطرون ويتعشون على الطعيسات جهت الخرج ويوم وصلتهم لقيتهم ورطانين وبدال ما يحبون راسي اني طلعتهم ويعزموني .. ايه هذي اخرتها ..

وبعدين انت إذا انسهلت وانسدحت ما فيه ازين منك لا صوت ولا نفس ما شاء الله كاتم .حتى ما فيه ريحت ثوم ولا بصل .. والصومعه حقتك ولا ازين منها :good2:

بعدين لا تخاف يابومحمد لا فضايح ولا اي شي نبي نستفيد من خبرات الشباب والكشاته .

اما عن الحل اللي قلته من وين اجيب ونش الذبايح والله لو ان سيارتي مستودع .

شكرا لك حبيب قلبي ..


__________________________________________________ ____


الرحال2003 حياك ربي تحيت المطر ..

فعلا السلسلة خطرة جدا وقد حصلت معي مرة في الدهنا .. لكن الحمد لله كنت اسحب الجيب الثاني على جنب وانطلقت السلسلة بس ما جتني ..والحمد لله .

شكرا لك مداخلتك

[مشغول]

في انتظار رجعتك يالموحد .. الله يستر وش بتجيب معك هالمرة ..

[الموحد]

مشغول هلا بك
الحين تقول زعلان أجل وش فايدة هالقلوب اللي تطامر :heart: اللي كنها طماتين تّدربا من دّرج00000000
ثانياً ( داري 00 داري بتقول وين أولاً ) الموتر اللي أنت فشل من ذكره وليس انا { الي سميته الجعل } أنا شاريه منك صح وإلا لا00000والمثل يقول { العود على أول ركزه } :cool:
ثالثاً / اما الشكرالذي ذكرته فقد صرف لك في حينها وعندي كعب الشيك0000
رابعاً / كل من سحبته بيحب راسك 000فهذي قوية :dance: :no2:
خامساً / العزيمة اللي ذكرتها لخشم الحصان ( الله يصبره عليك000 كاتم وثوم وبصل وصومعه أشوى إني ماقلت إلا ألإنسهال فقط لاغير0) أقول العزيمة تمت ولله الحمد والمنه ولاقمت الا وأنت متعشي 00000 صح والا لا :good2:
هذي دعوتك ياخشم الحصان عسى ما أستجابت 0
00000000000000000000000000000000000000000000000000 000000000000000000
نرجع للموضوع السلسه
كيف الحال 0


واسلم لمن يحبك

[خشم الحصان]

الاخوه الغالين
مشغول
الموحد
السلام عليكم
صدق من قال اذا موترك صغير لا تصير بين ترلتين تريله سميت وتريله حديد الله يغفر لنا ولكم
الحين غديت مثل البنقه مابين مضربين تنس كلن يجلد فيني مع جهه الحين وش جاب الثوم والبصل والصومعه ولا تدخل عليه في الصومعه الا وانت متلطم بعد قولو اني اشخر هذا لي ناقص كملوها
وانت يالموحد بغيناك عون وصرت علينا فررر منيب مكمل
وانت يامشغول اثرك مثل الجمر تحت الرماد من مد يده يحسبه طافي احرقه
سلام عليكم
خشم الحصان

[شايب الصمان]

تابع
ويمكن ربط السلسه بحبل وقطم السلسه ويكون ربط السلسه بالحبل بعد مكان القطم حتى ماترجع بقوه على الموتر او احد واقف.