أي المثلين ينطبق علي

[ابن الراوي]

أخواني حياكم ربي اليكم هذه السالفة دون مقدمات دخلت قبل قليل للمنزل وشاهدت في فناء المنزل طير على وكره وسألت عنه فقالوا جابه ابنك فضحكت من ذلك وتذكرت موقف لي مع الصقور فكان الوالد رحمه الله من هواة الصيد في الصقور وكان يجلس بالبر مدة طويلة لممارسة هوايته رغم شدة البرودة في ذلك الوقت حتى أذكر انه جانا برد شديد ماتت الماشية في البر وبعض الرعاة وخفنا عليه هو وربعه وكان له حوالي عشرين يوم في البروكنا نسأل عنهم المقانيص وكانوا قله هل شاهدوهم وكان الجواب بالنفي وزاد قلقنا عليهم وبعد مضي حوالي شهر عادوامن البر وعندما سألناالوالد عن تأخرهم قال قنصنا جنوب وجلسنا حوالي عشرين يوم وعندما لم نتوفق في الصيد دخلنا للديرة من الجنوب وطلعنا شمال لمدة عشرة ايام فقلنا وحنا بالديرة خايفين عليك من البرد وممريت فقال مايكون الاالعافية والله البر ادفأ من الديرة فضحكنا من ذلك وأما هوايتي انامع الصقور فحدث ولا حرج فكنت من صغري اشاهدهن في المنزل ولاالتفت اليهن وكان الوالد اذا طلع للبر يترك طير او طيرين ويوصيني عليهن انتبه لطعامهن عطهن جميع انتبه لايتماسكن فكنت ارمي عليهن الطعام جميع واحد باليد اليمنى والاخر باليسرى وبعضهن يقصر الطعام دونه ويستمر يكفخ وانامع كل جهه ادورعصى أو حديده اقرب الطعام له فهوايتي لهن معدومة نهائي وفي وقت الدعو وهو تدريب الصقر قبل المقناص وتهيئته لذلك قال لي بكرى اطلع انا وياك ندعي الطير بحكم انه لايعرف يسوق قلت سم المهم في الصباح تجهز واخذ اغراض الدعومن ملواح وغيره وبعد مضي حوالي ستين كيلو وقفنا في مكان واسع اعجبه فقال هنا ندعي الطير فقلت وش مهمتي أنا فقال بس تفك برقع الطير عند اشارتي لك وأنا اخليه فوق الوكر وفك اسبوقه قلت طيب وراك انت ماتفك برقعه قال وشلون افكه وانا بعيد المهم سار مسافة ثم وقف وعطان أشارة الانطلاق واناابحث عن عصى اواي شي احرك البرقع فيه لاانه ماربطه ويدري اني غشيم بالطير لوابغى افكه يمكن اغوله المهم ماحصلت شي وهو استمر في الاشارة فتقدمت بسرعه للطير وبطرف اصبعي احرك البرقع وارجع للسيارة على طول الصقر يمكن مل من طول الانتظار على طول ينحر مصدر الصوت ويروح ويرجع ويرتفع وينزل وانا فاتح باب السيارة وجالس اتفرج عليه وعلى الوالد وشلون يدعيه المهم فكرة بفكرة قلت بدل مايتعب الصقر روحه وجيه وراي معطيه من الطيور الي صايدين فأخذت قوبعه وعندما قرب لي الصقر رميته له وقبل متاصل الارض وهو واصل به السماء وتارك الوالد وملواحه والوالد يصوت وش الي معه وشلون صاده أنا ياغافل لك الله على طول قلت انا عطيته اياه فبدأ يهوش علي من بعيد ولو قريب لي فيمكن الكف جاهز فقال عزاالله راح الطيرشف وين راح اما الطير فهو يمكن وصل سنجارفمره اشوفه ومرات اضيعه الوالدعندما فقد الامل اتى يمشي للسيارة بخفي حنين وانا افكر وش اقوله من الخجل وصدفه اشاهد ألي ينزل من السماء تقل حصاة ويوقع بالارض اثره صقره مل من الاستعراض ونزل يبغى يأكل من القوبعة اويبغى ينقذ موقفي من الوالد المهم واصرخ يبه ابغى اقول طيرك من الفرحة قلت عصفورك فراح يركض له قبل يأكل من الي معه ومسكه وعلى طول يركب للسيارة وياخذ البرقع ويبرقعه قال مشينا قلت منتب داعيه ثانيه قال بعدين لتأكدت ان البر مافيه غشمان وسؤالي اي المثلين الي ينطبق علي
اعذرونا على الاطالة
تحياتي

[يوسف الخليفة1]

الأخ الفاضل ابن الراوي رحم الله والدك ومتعك بالصحة والعافية وبارك فيك والشكر الجزيل

[ابن سيف 18]

اللي مايعرف الصقــــر يشويـــه

-------------

جزاك الله خير على الرواية الرائعة , وغفر الله لك ولوالديك ولأبناءك.

عموماَ انا والله مثلك مالي هوى بالطيـــور لكن عز الله انها ولعه ووناســـه ,,,
وكل اللي اعرفه من الطيــــور من جدي(ابو الوالدة) رحمه الله
وعمي الله يخليه

وكل واحد افضل من الثاني بس عمي افضل لانه ماله الا الطيـــر اما جدي الله يرحمه كان(بتاع كلو) يعني كلش طيور,سلق,سلاح....

هذا ما عندي وشكرا مرة اخرى ,,,

[فهد الهلالي]

هلابك يابن الراوي والله يمتعك بالصحه والعافيه

متعتنا بهذه السالفه التي حصلت لك مع الوالد والطير

وصغتها باسلوبك السلس والمرن حتى اخرجتها لنا بطابع شعبي عامي لهذه المنطقه مما زاد في جمالها

عساك عالقوه يابوسلطان

يقال يابن الراوي

ابن البط عوام وانت هنا كسرت قاعده هذه المقوله واضح من كلامك

ماتعرف عن الطيور شي بالرغم من السنين الطويله والطيور عندالوالد رحمه الله

والصحيح ينطبق عليك المثل اللي يقول

اللي مايعرف للصقر يطويه

تحياتي لك يابوسلطان

[كساب الطيب]

قال مشينا قلت منتب داعيه ثانيه قال بعدين لتأكدت ان البر مافيه غشمان


اللي ما يعرف لصقر يشويه

[ياعين ابوي]

أضحك الله سنك أخوي ... وسبحان الله الوراثه رآحت لولدك ماهو لك ..

مشكور وماقصرت ,,

[سطام F15]

أخوي ابن الراوي الله يمتعك بالصحة والعافية
حقيقة لو أنا محل الشايب لخليك تمرح هاك اليوم بالبر ولاتطب البيت هالحين الرجل يتعب وأنت بلحظة تخرب كل اللي سوا

لاهنت يالغلا وألف شكر لك على القصة الرائعة
أهم شيء انتبه إن راح الولد يبي يدعي الطير لاتخرب عليه

اللي مايعرف الصقر يشويه

تحياتي لك يالغالي

[بآذر العوآء]

الله يعــطيك عـآفــية أولا على تـوآضعك وثآنيـآ على طرحك للقـصة
والله الأخـوآن ماقصرو ردو على سؤالك
وانا أقــول وآآفي بغـير الطيوور الله يحفظ لك ولـدك ويسعدكم ويـسعد الجميع

[ابن الراوي]

أخواني حياكم ربي وأشكر الجميع على مرورهم وأنا رفيق بندق ومانيب رفيق طير وانا أعرف أن هواية القنص بالصقورمن أحسن الهوايات المحببة للبعض وان حمزه عم رسولنا محمد صلى الله عليه وسلم كان يزاول هواية الصيد بالصقور فهذه الهواية تعلم صاحبها الصبر والاعتزاز بالنفس وحب الشموخ بلا تعالي او كبرياء فيرحب بالضيف ويرحب بالخوي فأنا انطبق علي ا لمثل ألي مايعرف الصقر يشويه وأما ابني رغم أنه صغيرعند وفاة الوالد فهو توجه إلى هذه الهواية فينطبق عليه المثل ابن الجد عوام
تحياتي

[الميلبي العيص]

الله يعطيك العافيه

[الجرح الحزين]

السلام عليكم ورحمة الله وبركاته
اسعد الله اوقاتكم بكل خير
تسلم اخوي على السالفتك الطيبه مع الطير وضحك الله سنك ياابن الراوي
والله يخلي لك ولدك ويرحم الوالد ويسكنه فسيحه جناته..

[إبرا]

سالفة طيبة من رجال طيب
لاهنت

[السبيعي 503]

أمتعتنا بالقصة الله يمتعك انت وشايبك بالصحة والعافية


لكن ماشاء الله الوراثة مب لك ابد انا لو اني مكان شايبك كان تصير علووم وتخابير


لاهــنت على المووضوع

[إبن البادية]

قصة ممتعة أخوي ابن الراوي وأحيي شجاعتك في سرد قصة أنت بطلها ولم تعتبرها محرجة لك. والنعم فيك يا ابن الرواي

تحياتي لك وتقديري

[ابن الراوي]

حياكم ربي جميعكم وما اجتمعنا في هذه الخيمةألا للسواليف وذكر بعض المواقف التي يمر فيها الشخص والحرج مرفوع بين الأخوان
تحياتي

[راعي العجراء]

الله يعطيك العافيه يابو سلطان
قصه ممتعه وسرد طيب
وموقف لايحسد عليه
تقبل تحيتي وتقديري

[سليمان الربيعان]

هههههه لاعمرك تتفنن هاذي الدنيا تعلمك كل يوم درس
تقبل تحياتي....

[ابو صفوق]

المثل اللي ينطبق عليك والنعم والف نعم بالوالد رحمة الله عليه وبك وبولدك طيب من طيب

[Al3rands]

الله يرحمه الظاهر انه كان يحاول يخليك صقار بس الظاهر انك مثلي مالي بالصقاره ولا عندي ازين من شوفة البندق

[بن جعيثن]

الله يرحم ولدك ويحفظ لك وابنك واهم شي لا تسوي باابنك ماسويت باابيك والله يعافيك علمه وسع صدرك عليه

[قوافي ( أم نهار )]

ترفع

سالفه من السوالف القديمه