دليل المطعس لصاحب الهمر او الكابرس - فنون التطعيس -

[Escaled]

السلام عليكم ورحمة الله وبركاته ...

تحية طيبة لجميع الاخوان شباب وشيبان حاضرين والا كاشتين :cool:

ندخل سيدا بالموضوع ,

دائما مايقال ان التطعيس او الدخول في الرمال يعتمد بالشكل الاول على السواق , ثم السيارة ...

مثلا شفنا هنا راعي همر الله يفشله مغرز :p بينما الان لو تروح البر تلقا الناس بكراسيدا طابين وفالينها , نو بربلم :)

ودنا من خبراء البراري والطعوس ان يشرحولنا التالي :

اولا : المواصفات القياسية اللي تكون بالسيارة حتى تساعدك على الدخول .

مثلا يكون ضغط الكفرات على كم , او مثلا يكون ارتفاع الموتر كم .. الخ

نجي ثانيا : عند فنون الدخول للتغاريز والنفود , وانتم ابخص بها ...

اذا حبيتو ثالثا , طريقة التخلص من انواع التغاريز .


حتى يكون في النهاية عندنا دليل كامل لكل شخص بيطلع البر سواء للتطعيس او مجرد الدخول للبر , ويكون يعرف وش يسوي وكيف يتصرف ...

اتمنى ان يلقى هذا الموضوع اقبال جيد من الجميع ,


وتقبلو خالص تحياتي لكم وتمنياتي لكم بتغريز موفق :good2:

[بدر بريدة]

مراااااااحب اخوي (((اسكاليد))))>>>>>>> :heart:
مشكور على الموضوع الحلو اللي أتمنى من الشباب التفاعل معه... :type:
1-بالننسبه لضغط الكفرات"الهوا"تقريبا 10-15ممتاز للهايلكسات والونيتات :good2: أما الجيوب 15-20 أحسن شي ((((وراعي الجيب أبخص))) :rolleyes:
2-إذا غرزت في البر فحاول صنع منحدرات لكي تساعدك السيارة وتشد معك :redcar:
3-لو ترجعون ((لمجلة شباب)) أذكر انهم قد جابو موضوع زي كذا وأبدعوا في طرحه
هذا رايي لو نسمع آراؤكم....................................

أكرر شكري على الموضوع أخوي>>>>>اسكاليد<<<<< :heart:

[شايب الصمان]

وعليكم السلام ورحمه الله وبركاته
قد يطول الشرح كثيرا. في نظري وحسب الذي اعرفه أن السياره تعتمد على السواق لانه هو الذي يوجه السياره على الاتجاه الصحيح . ولكن هناك عوامل مساعده . يعني ضغط الكفرات لازم يكون من 15الى 20 ...(اما عن نفسي فأنني أفتح الابره حتى أسمع صوت تصفيرة الكفر -انه وصل نصف مستوى الضغط.). وهي كذلك تعتمد على نوع الكفر فهناك كفرات لينه اذا نسمت قليل يكفي .والنوع الاخر حتى لو تنسم الى 10 مايبان بأنه منسم . ولكن القاعده الاساسيه هي ان يكون الهواء من 15 الى 20 اذا كان الموتر ماهو محمل أما اذا كان محمل الافضل يكون 20الى 23 حتى تكون محركات الموتر مرتاحه ويمشي معاك وكأنك على الاسفلت ويجب مراعاة ان اسهل طريق لدخول الطعس يكون الجهه الخلفيه حتى الموتر يأخذ عزمه الكافي وما يضعف وعندما تريد الوقوف يفضل أن تكون مقدمة الموتر على نزله حتى ماتحفر الكفرات . وعند الغراز يجب مراعاة التالي : أن تكون الكفرات الاربعه متساويه ( يعني انها ماتكون مثولثه) يعني الكفر الامامي والكفر الخلفي المضاد له تكون ماتتحرك وهنا يجب مراعاة ان تكون الكفرات الاربع تتحرك بفس لسرعه حتى مايضعف عزم الموتر اما اذا ثولث فأنك تدفن الكفرات الثابته وتحفر الكفرات المتحركه وتكون دعسة البنرين ثابته وما تكون قويه حتى لو مشى الموتر لانه عند زيادة النزين يحفر الموتر ويركز اكثر من اول ولكن خل الموتر يقص حتى يرتفع بطنه من الرمله وبكذا يمشي معك الموتر وبأذن الله تطلع من التغريز بسلام . ولاخوان يفيدوننا أكثر وأكثر .... والله الموفق

[كاشخ 24 ساعه]

بالله ياشباب ركزو شوى على الجيوب اللى قيرها تماتيك عشان نستفيد



والله يجزاكم خير على هالموضوع

[Bader-M]

شف في نقطتين مهمتين

الاول
تحصل عليها مع وكثر القياده في الرمل (المطاعس)
وهي
انك تستطيع تقدير الطريق الذي تسلكه
هل مثلا يحتاج الى شد عزم ام ان الطريق سالك
وكذالك
هل تستطيع سيارتك تجاوزه ام يجد بك ان تسلك طريق اخر

اما
الثانيه
وهي
سرعة التغير في النمر (القير) مع التوقيت المناسب
وهذه تحتاج الى خفة يد و كذالك بعض الخبره

وكل عام وانتم بخير

[ابو درع]

موضوع يستحق النقاش ...

انا اقول الخيل من خيالها .. السواق اهم شي .

ميكون خواف...

يسايس المرافع....

ويمشي على هونه ....

الوقوف بنحدار خاصه للسيارات الغير دفرنشيين ..

لمنه جا قدامك رمثه لا تحرف السياره حاول انك نشطفها الله يعين رأسك تبي تنقز شوي لكن معليش ..

القومه لا صرت في الرمل ..

لا تحرص علي النمر الثقيله عللى هونك شد ورخ ..

عند حدوث ميول للسياره ما يرفع رجله عن البانزين علشان مايثولث او لاسمح الله يقلب حسب الميول تعرف الرمل يمسك الكفرات..

بعض الناس اذا نزل من هويه او سيف خاف وحذف السيار للنحدار ..

كذالك يخوي الكفر له دور كبير ..

وقير السياره كذالك له دور كبير هذا بنسبه لكلمك وشي السياره المناسبه .. تقول وش دخل القير حسب ما سمعت من الي يبخصون السيارات .
ان القير في اي سياره له دور كبير في الرمل .. مثل الدادسن يفرق عن الهيلقس...

وكذالك السياره الوتوماتيك احسن من القير العادي ..

ومثل ماقال شايب الصمان عليك ( بتنسيم ) ..

وهذا اجتهاد مني ..

يجونك اصحاب الدرايه والخبره ..

اشكرك ،،

[أيمن]

إجابة للشق الثالث - أخي العزيز - هذا رابط لموضوع أرجو أن تخرج منه بفائدة
http://www.mekshat.com/vb/showthread.php?t=21086

تحيتي

[Escaled]

السلام عليكم , مجددا ...

اشكر كل من تفاعل مع الموضوع , ولو اني انتظر المزيد من فطاحلة التطعيس :)

اخوي بدر بريدة :

نورت الموضوع يالغالي ,,,

مشاركة طيبة ومشكور على تشريفك .


اخوي شايب الصمان :

اهلا وسهلا ,

كورس خفيف وحلو يالطيب , ولاكن انبه ان ماحد ينسى ياخذ ماطور هوا اذا ماكان حوله محطة ...

كاشخ :

حياك الله في الدورة ,

وصدقت في كلامك , نتمنى التركيز على السيارات الاتوماتيك ------- > راعي اسكاليد

طاير بالعجة :

مربحا 1000 على قول اخوانا في ابها :D

صدقت الممارسة لها دور , لاكن قبل لاناصل لهالمرحلة ماودنا نتوهق واجد :bounce:

اما النقطة الثانية , كيف نحل مشكلة انتقاء اوقات تغيير النمر مع الجير الاتوماتيك !!

اخوي ابو درع :

ملاحظات قيمة ومشاركة فاعلة تشكر عليها , وعجبتني المقولة اللي بيسجلها التاريخ بماء من ذهب (( وكذالك السياره الوتوماتيك احسن من القير العادي .. )) :D :D ياحبيلي للاسكاليد

اخوي ايمن :

شكرا على مرورك ,

فعلا الموضوع مهم جدا , ولو تقدر تعدل موضوعي وتدرج رابط موضوعك بدال :

اذا حبيتو ثالثا , طريقة التخلص من انواع التغاريز .

حتى يستفيد الجميع ,,,

ونتمنى ان تفتح الادارة خاصية تعديل الموقوع ....


تحياتي للجميع وبانتظار المزيد

[ملاعب الريح]

السلام عليكم
أخوي (اسكاليد) اشكرك على هذا الموضوع الرائع

1- لا يوجد مواصفات يجب توفرها في السياره انا اعرف واحد يطعس على (كامري) 2000 ومن المعروف ان الكامري طامنه (قريبه من الارض)

2- اول ماتقبل على النفود اسدح جمب الخط وحط ظغط الكفرات 10-15 وانتبه لا يفصخ الكفر (يطلع من الجنط) خل لفاتك خفيفه ولا تكسر الطاره

3- يوجد الكثير من الطرق للتخلص من التغاريز فاذا ما كان معك لا مسحاة ولا شي برح من قدام الكفر 2م تقريبا واول ما تركب امش بخفيف واذا حسيت ان الموتر طلع اكنس عليه وشد العزم لين تتأكد من انك طلعت تمامً100%


4- يجب ان ينتبه اكثر الناس من القصات (المنحدرات الشديده) انا حبيت اورد لكم هذه القصه القصيره



(واحد من الشباب معه هايلكس طلع حول العاذريه وكان يطعس ويبي يرقى رقيه قويه شوي وكان القير بالـــــــــــــــــــــــــــــــــــــــــــثـــ ــــــــ3ــــــــــــــــــــــالث وبدا يقر الموتر (ما يمشي زين) يبي نمره اقل وأخونا في الله رد نمره ودعس ويوم رقا يقول مدري وش صار اقلعنا ولا دريت الا الموتر صياح وواحد منفلق والقزازه منكسره والكبوت معد يتسكر والموتر طافي
يقول اثرنا طحنا بقصه وانا مدري ربطنا شماغ على راس خوينا (انفلق بسبب انه مطلع راسه من القزازه الخلفيه وصقع بالحديده حقت الباب) يقول ومشينا للرياض وحطينا خوينا بمستوصف ورحنا للصناعيه وعدلنا اللمبات كانت مايله شوي وعدل الكبوت كان منعفط ومن بكره غير القزازه)
آسف على الاطاه ارجو ان اكون قد اجدت وافدت هذا والله اعلم وصلى الله وسلم على نبينا محمد وعلى آله وصحبه اجمعين
وتقبلوا خالص تحيات أخوكم ومحبكم في الله (بـــــــــــــــــــو ســـــــــــــــــــــــــــيـــــــف)

[Escaled]

هلا اخوي بو سيف ...

شكرا على المشاركة ,

والاخ اللي دخل المستوصف حطوه ربعه وراحو ؟


هههههههه وش قل الخاتمة هذا :rolleyes:


تحياتي

[أبو أسامة]

السلام عليكم ورحمة الله وبركاته ..
كيف الحال شباب ... الله يهديكم وش تبون بالتطعيس ...
لدي بعض العلوم الخفيفه فيه :
أولاً: أذكروا الله في السراء يذكركم بالشده مثل ( وقت التغريزه وأنت منقطع ماعندك أحد )...

ثانياً : سم بالله .

ثالثاً : تنسيم الكفر يختلف من سياره لسياره آخرى ومن نوع كفر لآخر يعني السياره الثقيله نسم بين 10 -15
والخفيفه على كيفك وإذا كان الكفر لين كان أفضل بالتطعيس وإذا كان عريض كان أفضل بالرمل المنبسط بس بالطعوس لا لأنه يضعف من عزم السياره لأنه راح يكون ثقيل على المكينه وراح تروح كثير من قوة المكينه عشان تحرك الكفر بس ... الأفضل العرض المتوسط
وعرض الكفر لزم يتناسب مع الجنط يعني الكفر عريض والجنط نفسه عريض عشان الكفره ماتنسلخ إذا نسمت بين 5-15 .... والكفر اللين أفضل بالتطعيس من القاسي ... أنا أنسم الكفر دائماً بين 5-10 .

رابعاً : يجب أن تكون السيارة مرتفعه عن الأرض يعني خلوصها ( الأشياء الموجوده بالسيارة من أسفلها ) يجب أن تكون مرتفعها عن الأرض على الأقل 20 سم ... عشان لو نسمت بالكفر راح تنزل السياره حوالي 5 - 10 سم ... هذا بالنسبه بالمشي على النفود ..

خامساً : أما بالنسبه للتطعيس فيجب أن تكون زاوية الدخول والخروج كبيرة ... زاويه الدخول هي أرتفاع الصدام الأمامي عن الأرض وقربه من الكفر الأمامي فكلما أرتفع الصدام الأمامي وقرب من الكفر يعني كان قريب من الكفرات الأمامية كان أفضل للمطعس عشان ما يضرب الصدام بالطعس ويحدث ما لا يسر ....
أما زاوية الخروج فهي بالنسبه للصدام الخلفي كلما أرتفع وأقترب من الكفر الخلفي كان أفضل أيضاً لكي تضرب السيارة من الخلف أثناء طلوع الطعس أو تتعلق السيارة بالكثبان الرمليه الصغير من الخلف ...

سادساً : يجب أن تعرف قدرة سيارتك من ناحية العزم ومن ناحية خفة الوزن ومن ناحية إمكانية المناورة ...
إذا كان عزم السيارة يعطي بسرعه لحظه الدوس على البنزين فلن تواجه مشكله إن شاء الله إلا إذا غرزت وسأذكر بعض أسباب التغريز ....
إذا كانت السيارة خفيفه كان أفضل في التطعيس (لاحظ المطعسين يفكون الكفر الأستبه (الاسبير) ) ...
المناورة ضروريه لأنك لتلعلم ما قد تواجهه فجأة في النفود بعض السيارات لا تستطيع المناورة به لأرتفاعها الزايد ..

أسباب التغريز وأشياء يجب تجنبها ...
1_ لا ثم لا ثم لا تتوقف فجأة كي لا تجعل الكفر يعمل كومة من التراب أمامه ثم أذا نسيت وتوقفت فجأة لا تمشي قدام لأنك راح تغرز أرجع للخلف مسافه معقوله ثم أمش قدام ... كثير من التغاريز بسبب هذه المشكله ...

2_ لا تسيفون يعني لا مشون على جانب الطعس بالعرض ثم تتوقفون إذا صعب تطلعون ومن مشا كل التسييف
أن الكفر راح ينسلخ من الجنط ... وراح تتعب المكينه على غير سنع ...

3_ لا توقف بمنطقة تشوف الموتر يمشي فيها بصعوبه لأنك إذا وقفت ما راح تقدر تمشي ...

4_ مثل ما قالوا الأخوان إذا كنت فوق طعس فأفضل أنك توقف الموتر وخشته يم الدحديره ....

5_ إذا دست على البنزين ولا مشى الموتر معك لا تكابر وتقول معي جيب أنزل وأحفر عن الكفر الله لا يهينك دام
المشكله توها صغيره قبل ما تكبر وتتعلق السياره صح ويضيع وقتك ..

6_ إذا غرزت وحفرت التراب عن الكفر تأكد أن شاصي الموتر ما هو لامس الارض ... وإلا راح يكون حفرك عن الكفر على الفاضي .

7_ إذا عملت الخطوة السابقة دس على البنزين على خفيف من معه جيب يشغل الدبل الثقيل واللي مامعه دبل يخليه على الدوس الخفيف أو يحط القير بالثاني لأن لو دست بسرعه راح تحفر الكفر وبس بكل بساطه ...

8_إذا مشى الموتر معك لا تدوس بقوة إلا إذا حسيت الموتر طلع خفيف دس على راحتك أما دامه لسه ثقيل خل الدوسه على البنزين خفيفه ...

9_ إذا مشى معاك الموتر ووقف أرجع للخلف مسافه قدر ماتقدر السياره ثم رح قدام يعني مهد لنفسك خط ...

10_ لا تنسى تأخذ معك الكريك وعدة الحفر الخفيفه وأيضاً الواير يا زين وجهك وأنت مغرز وتطلب مساعدة ثم يقولون معك واير وتقول لا لالالالالالا هذي مصيبه :mad: :what:

والله يوفق الجميع لما يحبه ويرضاه ......

[ملاعب الريح]

السلام عليكم
أخوي اسكاليد مهوب قلة خاتمه لاكن راحو يصلحون الموتر وشافوه من بكره وشكرا
واكرر شكري على الموضوع الرائع
وتقبل خالص تحيات أخوك ومحبك في الله (بـــــــــــــــــــــــو ســـــــــــــــــــــــــــــيــــف)

[ABU-AL-3eeS]

اشكرك اخوي اسكاليد على هذا الموضوع الشيق وعلى تفاعل الاخوان ماقصروا ..

اقول ان من اهم الاحتياطات قبل الدخول للنفد او اي منطقة ذات رمل ناعم مثل رمال الشواطي بالشرقية :D

1-تنسيم الكفرات الى نصف الضغط تقريبا بالنسبة لي جمس 97 دفرنس واحد 2500 الضغط (20)

2- لاتسرع فجاة وانت على الرمل ابدا بالدعسة تدريجي
3-لاتكسر الطارة وتلف على سرعة خذ الزاوية الكبيرة (طبق مقولة وين اذنك) :good:

4- انتبه على الطارة لاتخليها تلعب تروح يمين ويسار وانت ماتدري

واذكر مره اني قلت معي جمس مايظره ديورت كاني على الزفلت وعلى سرعة بطيئة 40 حسيت الموتر نزل
ودعست الدعسه على الاخير <<<اكبر غلط شفت الموتر واقف تقريبا لكنه بدا يتنافض ويهتز والظغط وصل 3.5

حسيت انه ارتفع ويوم طلع وقفت السيارة ورحت اشوف الاثر :no: الله لايوريكم مدري وشلون طلعت!


محبكم_عاطل_