العين حق ,, تجاربكم معها في مواتركم

[Riyadh City]

السلام عليكم ورحمة الله

كثر الحديث عن العين والحسد
طائفة من الناس تعتبر هالأمر أشبه بالخرافة وقصص آخر الليل
وطائفة أخرى تعتقد بالعين إعتقاد كلي " حتى لو أنه عطس قال عين "

بالنسبة للسيارات أكيد معرضه للأعطال لكن تجيك خرابات غريبه تخليك تشك أنها بالفعل عين ..

بقولكم بعض تجاربي مع العين والحسد :

كان معي شبح ماخذه على وقته وما مشى الا 40000 المهم شافه معي زميل في العمل وقال هذا اللون الي يعجبني على المرسدس ,,

بعدها ركبت الموتر يا جماعة أدق سلف يدق بس ما تشتغل السيارة شلتها على سطحة وديتها لمختص مرسيدس
قعدت عنده كم يوم وهو مو قادر يعرف وشهي المشكلة
الى أن هداه الله ولقى فيش موصول بس مو مركب زين وقالي والله بغيت اقولك غير الكمبيوتر لاني عجزت فيها الى ان لقيت هالمشكلة وأنحلت الحمدلله ..

ومره شريت جمس حوض من المزاحمية شيكت عليه كل شي نظيف وماعليه يوم نقلت الملكية وجيت آخذه من المعرض كان فيه شيبان مجتمعين قالي واحد منهم تعطين جمسك وتاخذ موتري شفت موتره ما صلحلي وقلت له مالي فيه المهم يا جماعة والله ما طلع الموتر الزديه الا وزيت الجير كله بالارض شلته على سطحة وعلى صناعية الرياض وتوضيب جير حسبي الله ونعم الوكيل ...


ياليت نسمع منكم بعض هالتجارب وممكن الجميع يستفيد من هذه التجارب ومعرفة الأوراد والأذكار الحامية للممتلكات من الحسد بإذن الله ...

[برق روق]

شي اكيد الواحد اذا اشترى سيارة من الضروري انه يقرأ ورده ويقرأ على السيارة وانشاءالله بيحميها ربك .. صار لي موقف قبل كان معي جيب لاندكروزر 2003 على وقته وكان جديد المهم فيه واحد من الربع متقطع يبي موتري لانه كان يبي يشتري سيارة المهم الجيب كل يوم وطالعه له علة بس الحمد لله كلها كانت حاجات بسيطه بس تكرر معي الوضع اكثر من مرة ,, قريت على الموتر ورشيته من ...........؟ (الكل عارف ) والحمد لله رجع الموتر تمام . الله يكفينا شر كل عين وكل حسود آمين يارب .

[ستوك]

الله يكفينا شر العين

[التعـ King ـديل]

انا عن نفسي كان عندي باترول 98 Gl اشتريته ماشي 140 الف المهم الموتر نظييييييف كان معي واحد بالدوام وكنت وقتها بمشي الامارات

المهم طلعت من دوامي 8 الليل وعبيت بنزين وغيرت زيت ومشيت حوالي 9 بالليل ووجهت للأمارات وعلى الساعه 2:30 الفجر تقريبا وصلت

خويي دق علي يشوف وين وصلت وقلت له اني بالفندق وتوني واصل قال ول ست ساعات من الرياض للعين انا ماجبت للموضوع خبر وقلت الولد ونعم

وانا راجع بعدها بيومين بالخط طقت الحراره من الخط لحد H بسرعه البرق وطقت المكينه عندي لاني كنت ماشي بالخط وكنت وقتها جنب حرض

شيك المكانيكي قالي عليك العوض بالمكينه المهم سحبت الموتر للرياض مع العلم اني كل خراطيش الموتر سليمه وبعد ماغيرت له مكينه 4500 كلبليتر

كل اسبوع يدخل الورشه بنفس يوم مشيت من الامارات المهم طفشت كل خراباته تافهه بس تنوم الموتر يوم على الاقل بالورشه .. سئلت وقالي واحد

عين وتذكرت خويي بالدوام والله ماازل عليكم بحرف اخذت مويه كان شارب منها وصبيتها على المكينه والموتر كله والحمدلله من بعدها سلك معي لحد مابعته

[Just Dream]

موضوع اكثر من رائع


حبيت اضيف كذا نقطة وان شاء الله الكل يستفيد
اول شي يااخاوني العين حق والعين تجي بدون قصد الاذى في الغالب
يعنى تلقى خويك اخوك رحيمك ولد عمك تكون منه العين


الشي الثاني الاذكار الاذكار الاذكار لان الاذكار تحمي باذن الله من كل الشرور


وبالنسبة للتجارب خويي كان معه كرسيدا كرت ماشاء الله موديل 93 المهم السيارة يعنى ماشاء الله ولا رشة والمكينا نظيفة السيارة كانها جديدة وجاك ذاك اليوم يشيل معه يماني عشان في شغله في بيتهم تنجيد ويوم شال اليماني اقسم بالله طلعت ريحة حراق مدري من وين والحرارة مافيها ويوم فتح الكبوت زادت الريحة وبعدين جاب سطحة ووداها للبنقالي وصلحها .




اخير لا تنسى تقول ماشاء الله تبارك الله عند رؤية شي اعجبك منعا للاحراااااااج ولطرح البركة باذن الله في الشي المعجب به:good2:

[الوافيf]

العين حق ...
ونا صارلي موقف من العين ...
كان معي جمس سسيرا 2009 وكاله غماره صندوق صغير ..اول ماطلعت الجمس تمشيت في الرياض وبعدها طلعت به للبر وبعدها نصبت الموتر حطيت له لازقات وكاله وتجاليد وتغبيره ..طلع الموتر شيخ ...ودرت عن معارض النسيم ..اول ما طلعت من المعارض الى الموتر لاغير التغيره الثالثه ..التروس قامت تحك مع بعض ..طبعا الموتر ما مشى الى 900كم .ووديته للوكاله ..وقالو يبيله برمجه قلت طيب ..وسوله برمجه .وبعدها طلعت الموتر ونفس الحاله ...ورجعته لهم ..وقال ميدي الترس الثالث منشعر ..قلت طيب .وقال ميدي انهم صلحو المشكله تعال خذ موترك ..وجيت وخذين موتري ..وبعدها بيون وترجع المشكله ..وروح للوكاله ودخل على المودير وعطيه مفتاح الموتر قلت عطوني موتر بداله ..
قال طيب وعطوني كابرس 2009 لين يخلص موتر من عند الصيانه ..وقعت حوال اسبوع لين خلص موتري ..وقالو ميدي نزلوله قير جديد .وطلع الموتر تمام ...وبعدها 4 ايام رجعت المشكله ..وروح للمحل الي غبر لي السياره ..بغبرها مره ثانيه ..طبعا الي يشتغل في المحل سعودي. هو الي غبرلي قبل .وشاف الموتر وقال هاذا انت الي غبرت عندي قلت ايه ..قال ماشاء الله على موترك ((نصب)) قلت شكرا ...وبعدها اركب الموتر وامشي ويروح الصوت ...وقول لنفسي كل المرمطه في الوكاله على شان عين ذا .....
ولا تنسون ذكر الله اذا شفت اي شي يعجبك ...((ماشاء الله))

[مقلع الرمث]

والله المشاكل واجد والكلام واجد وانا والله حصلت لي قصه اخرتها

قبل فتره كان معاي اوريون جاء واحد من الشباب قال افتح الكبوت نبي نشوف المكينه

جيت انا على نياتي مادريت الا واحد من الموجودين قال مكينتها داخل بوك يعني محفظه

السياره من بعد الكلمه هذي وهي حراره والمكيف مايشتغل وترج ومدري وش جاها

وهي قبل زي الساعه

المهم وديتها للوكاله افحصوها من الصدام للصدام وراحو عليها وجو قالو مافيها شي

المهم طلعتها ونفس المشكله دق علي واحد قالي تبيع قلت نصيبك وانا ابيعها عليه

والحين السياره معها زي الحلاوه

[سامي الجميلي]

الســلام عليكم ورحمة الله وبركاته
الله يعطيك العافيه أخوي الغالي على الموضوع الرائع والمفيد بإذن الله
بالنسبة للعين كفانا الله وياكم شرها حق وكلنا نأمن بذلك وكما نعرف أنها في بعض الأحيان تخرج من أشخاص بغير قصد.
وكما تفضل الإخوان لابد من الأذكار
من المفروض إذا إشتريت سياره جديده بالإضافة إلى الأذكار تقوم بالقراءه في ماء وتنفث فيه أنت بنفسك بعد ذلك تقوم برشه على السياره من كامله .
وايضاً هناك شغله سمعت عنها وما ادري مامدى صحتها وياليت اللي عنده خبره أوتجربه يبلغنا .
وهي إذا لاقدر الله أصيبت سيارتك بالعين تكررت أعطالها وشكيت أنها عين أحد المعجبين فيها قالوا تذهب بها إلى الحراج وتحرج عليها كأنك تريد بيعها بعد ذلك تذهب عنها العين بفضل الله .. لاادري ممادى صحة هذه المعلومه .
أما التجربه التي صارت عليه كان لديه جيب لاندكلوزر موديل 94وكان في موديله تلك الفتره نظيف وكان يميز هذا الجيب قوة نوره كان عليه نور قوي جداً لدرجة أنني معظم الأحيان أمشي بالنور الصغير داخل البلد ومعظم الجيوب أول كان نورها قوي لكن الجيب هذا مامر عليه مثل نوره ماشاء الله المهم يوم وقفت عند الإشاره وكان فيه سياره متوقفه ولما وقفت بجانبه فتح زجاج السياره وقالي (ياولد إيش هالنور أعميتنا )قلتله أذكر الله ياشيخ وبعدها أٌسم بالله العظيم مامشيت مسافة 500متر من الإشاره وتضرب عليه شمعه ركبت شمعه جديده وتضرب الثانيه وماصلح معي النور الين بعته وهو كل شوي شمعه تضرب ...كفانا الله شر العين .

[عاشق القهوة]

السلام عليكم
حبيت اشارك معكم السالفه الاوله لي والثانية لخالي

1- بعد جهد جهيد من اقناع الوالد بشراء سيارة ددسن سوبر جي ال اي 2008 الكلام على وقته وبعد شراء الددسن وهي بغبار وجلايد الوكاله طلعت الهافمون ورقينا كم طعس المهم الموتر بدا يحفر قلت حرام احنه جاني راعي شاص قديم وقال مساعده قلت معك المهم ريوس على خفيف وشوي ألى طق الموتر على خفيف انا توقعت مخش صغير طلع الرفرف والصدام والشبك والمراوح كلها داخله وكلف التصليح بالوكاله 9000 ريال

[عاشق القهوة]

والمشكله هو نفسه راعي الشاص قال قبل ما يسحب الموتر بانوراما المفروض انت تسحبني وعقب هالكلمه جدث ما حدث
تابع

[كاشت وحداني]

بالنسبة لي طالت اعماركم
كان معاي تاون كار 95 من شافه يقول حرام يمشي على الارض
وقفه ومركب وممشى والحمدلله ميه ميه
حتى شافه واحد وقال تبيع قلت انا ما عرضته للبيع لكن اذا تعرف حق الموتر سوم
قال بيننا المعارض
جاب مبلغ في المعارض وهو ما عنده الا ربع القيمه اللي جابها لي
قلت خلاص الله يستر عليك
فلوسك معاك وموتري معاي
وراح وهو يقول والله نفسي فيه
وبعدها ما شاف خير
اول ما خرب المكيف وعجزت الاقي له حل غيرت جميع ما يتعلق بالمكيف من الى عند الفلبيني نور اللي بالبديعه اخيرا الفلبيني يصيح يقول بيع السياره ما رضى المكيف يبرد
وبعدها طلع تفتفه في الموتر واذا دخلت الورشه راحت .
كان هذا الموقف اللي حسيت ان الرجال صفقني فيه

[البوعينين99]

سنه 2005 شريت كابرس برقهام 89 مخزن وبحاله الوكاله وكان ماشي 80 ألف بس . شافه واحد الله يهديه ولزم إلا يشتريه طبعا مابعت الموتر لأني توني ماخذه ، لكن بعد فتره والموتر واقف احترقت اسلاك في الطبلون بدون سبب مع ان الموتر كان طافي لكن الحمدلله بس الولاعه هي الي تظررت ، لكن من يومها والموتر تجيه ضربات وطقات وهو واقف .

وكان عندنا لنكن تاون كار موديل 89 نفس السالفه بعد .
وآخر شي جمس 79 مخصر بعد جاته عين وحادث في أول اسبوع بعد الصبغ والتجديد .

والحمد لله على كل حال

[عاشق البترول]

موضوع مهم ولك جزيل الشكر عليه :)
اما انا فسالفتي هي : عندي باترول فتك2007 فاكه على يدي وكاله
والموتر اول سنه ماشي معي تمام الحمدالله عقبها بدت العين فيه جاني واحد من عيال منطقتنا
واهو اكبر مني بالسن بفارق كبير ولا لي درب عليه لكن جارنا واعرفه زين
صادفته بعرس احد العيال وسألني عن موتري قالي للبيع قلت الموتر تستاهله وفوقه حبه خشم
قالي لا والله مو لي لواحد من الجماعه قلت ابد الموتر موترك بأي وقت لكن ياخوك توني ماخذ الموتر
وماليه نيه البيع ...
توكلت على الله ونويت اروح عليه العمره في رمضان وصادفته عند البنزين وانا توني بحرك للعمره
وكان معه شخص اول مره اشوفه وقالي تذكر يوم اسألك عن موترك للبيع قلت اي بالله اذكر قال هذا الرجال الي يبي موترك قلت ابد والله عزيز وغالي والموتر تحت اياديكم انا الحين ابمشي العمره جان فيكم من يخاوينا قال درب السلامه ...
مالكم بالطويله وصلت العمره وتعمرنا والحمدالله لكن الطامه الكبرى وحنا رادين بالدرب الحراره على الh
وكل شوي نوقف نعبي الراديتر ومانمشي 50 كيلو الا الحراره ترتفع على الh
الوكاد يالله وصلنا الكويت وادخله الوكاله ويفصحونه سبوع كاااامل عندهم وكان تحت الملاحظه شغلا بغرفه خاصه لمده 50 ساعه وعيت لاترتفع الحراره طبعا قبلها كان مفحوص كامل ومافيه شي وسبحان الله من اطلعه منهم ترتفع او ياخذه الوالد الله يحفظه الموتر تمام لكن من اركبه انا ترتفع الحراره
مالكم بالطويله لين مسكت الرجال بمجلس ونطرته يشرب من الماي ولا القهوه ولا الشاي وانا اصب على الموتر
من فضلته ...
عقبها زان الموتر ولله الحمد والشكر لك يارب
:)
اسمحولي على الاطاااااله :)
ماتشوفون شر ان شاء الله

[عارف الشمري]

والله قصص جميله وممتعه الله يكفينا شر العين

الله الله بالاذكار الصباحيه والمسائيه

[mds99922]

الســلام عليكم ورحمة الله وبركاته
الله يعطيك العافيه أخوي الغالي على الموضوع الرائع والمفيد بإذن الله
بالنسبة للعين كفانا الله وياكم شرها حق وكلنا نأمن بذلك وكما نعرف أنها في بعض الأحيان تخرج من أشخاص بغير قصد.
وكما تفضل الإخوان لابد من الأذكار
من المفروض إذا إشتريت سياره جديده بالإضافة إلى الأذكار تقوم بالقراءه في ماء وتنفث فيه أنت بنفسك بعد ذلك تقوم برشه على السياره من كامله .
وايضاً هناك شغله سمعت عنها وما ادري مامدى صحتها وياليت اللي عنده خبره أوتجربه يبلغنا .
وهي إذا لاقدر الله أصيبت سيارتك بالعين تكررت أعطالها وشكيت أنها عين أحد المعجبين فيها قالوا تذهب بها إلى الحراج وتحرج عليها كأنك تريد بيعها بعد ذلك تذهب عنها العين بفضل الله .. لاادري ممادى صحة هذه المعلومه .
أما التجربه التي صارت عليه كان لديه جيب لاندكلوزر موديل 94وكان في موديله تلك الفتره نظيف وكان يميز هذا الجيب قوة نوره كان عليه نور قوي جداً لدرجة أنني معظم الأحيان أمشي بالنور الصغير داخل البلد ومعظم الجيوب أول كان نورها قوي لكن الجيب هذا مامر عليه مثل نوره ماشاء الله المهم يوم وقفت عند الإشاره وكان فيه سياره متوقفه ولما وقفت بجانبه فتح زجاج السياره وقالي (ياولد إيش هالنور أعميتنا )قلتله أذكر الله ياشيخ وبعدها أٌسم بالله العظيم مامشيت مسافة 500متر من الإشاره وتضرب عليه شمعه ركبت شمعه جديده وتضرب الثانيه وماصلح معي النور الين بعته وهو كل شوي شمعه تضرب ...كفانا الله شر العين .
صدقت أخوي أنا سمعت قبل أذا شكيت في سيارتك صابتها عين لا قدر الله ودها للحراج وسوم عليها وبإذن الله ترووح والله ما دري أذا كان هاذا صحيح ولا مجرد أقاويل

[أبو ريم..؟]

صدقت

والعين حق

بالنسبة لي انا محدثكم شريت جيب 2006 بريمي مستعمل والموتر ماعليه خلاف ابد

محركاته والبدي كويسات ووداخلي الموتر نضيف

من يوم طلعت الموتر من المعارض جلس معي ثلاث ايام زي العسل من بعده صرت ما اطيق

اركبه واكرهه كره الويل واذا شفت الموتر كشيت وضاق صدري وقلت ياليتي ماشريت


واذا ركبت الموتر وابطلع مشوار قريب يضيق صدري وارجع ماقدر اكمل مشواري

وتركته موقف له اسبوع وزود وكل من نشدني عنه قلت اني صادم لاكن نفس الحاله كره غير طبيعي بالموتر نفسه بس

ماجلس معي الافتره بسيطه ودفيته وارتحت والله

[وبل السحابة]

ماضيع النااااس
ولا افسد العلاقات الاجتماعية الا هالتفكير السلبي
صرنا بوقت لو تعثرت قلت عين
يا أخي الثقة بالله اقوى من الف عين
وتذكر ولو كانت عين( ما اصابك ماكان ليخطأك وما اخطاك لم يكن ليصيبك) صدقني تعيش سعيد
صرنا بزمن كله موسوسين فلان عيان وفلانه عيانة
وبالاخر مكانك سررررررر

[دوسريه كول]

http://hajisqssu.jeeran.com/v155.gif
لاحول ولاقوة الابالله


العين حق ... وهذي قصة
اخوي مع العين ... اخوي مولع بالسيارات
:
واول سياره اشتراها مرسيدس جديد ومن فرحته فيه بحسن نيه ...
سوا وليمه خاصه بمناسبة السياره
:


وكان فيه احدى الاشخاص من الجيران معروف بانه مايذكر الله عند اعجابه بشيء
طبعا شاف السياره وانهبل وعطاها اخوي حسبنا الله وكفى


لدرجة ان هذا الرجل من قوة حسده حكى للجيران وماقدر يكتمها بقلبه
ويقول عن اخوي ان اختياره للسيارات دائم صح ...
برغم انه كذوب


:
وبعدها بدءت معاناة اخوي بسيارات


المرسيدس ..طلع فيه خراب وهو جديد وباعه وهو مرغم
بعدها اشترا جمس ونفس الشي
جاء ابو لمبه واعطاه اياها وفي وقتها حاول يشغل الجمس ماشتغل


وجلس اخوي طريح الفراش لمدة شهر
وهو يحبي من الاااام بظهره ماشفي الا بفضل الله ثم اخذ غسول
ابو لمبه .........


والى يومكم هذا عشرات السيارات
يشريها اخوي ويخسر الكثير عليها باسباب هذا الرجل


بتقولون خلووووه يترك جيرته ويغير البيت بقولكم مافي فائده لان ابو لمبه يصير نسيب ؟؟؟؟


دعواتكم له والله يكفينا وياكم شر الحسودين .......
وحصنوا نفسكم وتوكلوا ع ربكم
ولن يصيبكم شيئ باذنه
دمتم بود


http://hajisqssu.jeeran.com/v154.gif

[ياعين ابوي]

ابو لمبه .........

:D :D

الله يكفيكم شر ابو لمبه ....

[ghanim911]

من تجاربي الشخصيه : في شهر 4 / 2009 .. شريت لي مرسيدس 350 اس من الوكاله جديد ... وفي يوم 15 /5 /2009 تخاويت مع ربعن لي رايحين عزا .. واحد من اخوياي عينه والقبر .. ويقول لخويي الثاني شف شغل الاماني كل مكان وجنب الا حاطين به اير باق .. والله الذي لا اله الا هو .. سياره ادخلت على طريقي واخذت الجنب الايمن من الصدام لصدام ومافيه اير باق في الموتر الا وانفتح ... شلته على السطحه واخذوه للوكالة ... تكلف تصليه 139000 الف ريال واخذ شهرين لما جهزوه ... والتصليح على التامين ...

[سبع البوادي]

الله يكفينا شر العين والله انه يمكن ثلث مصايب السيارات من ورا العين

الناس يا دافع البلى ماعاد تعطي خير سواء بحسن نية او لسوئها

انا كان عندي تريل بليزر 2006 لون اسود وكنت مهتم فيه جدا لدرجة اني ما اعطي الموتر لأي شخص مهما كامن ظروفه وان احد يبي مشوار انا اوديه حتى لو أستئذن من العمل

الموتر فاكه على يدي من الوكالة

الشاهد اني رحت فيه للديرة وكانت اول مره انزل فيه الديرة وهناك شيبان الله يكفيكم شرهم عيونهم تقول صواريخ موجهة بالليزر

جلست يومين ورجعت والله لا يوريكم طلع عندي صوت طقطقة بالمكينة اول ما دخلت البلد انا قلت انها بلوف ولكن صحيت الصباح وشغلت والصوت يزيد طق حديد في حديد وعلى الورشة على طول وكانت المصيبة حسبنا الله ونعم الوكيل المكينة كا يبيلها توظيب بالكامل حتى يوم فتحو المكينة لقو قطع حديد فيها

نهاية هذا الفلم كلفني التوظيب 12700 ريال والحمدلله على كل حال

لكن يا أخواني الأذكار عليكم بالأذكار فإنها حصن المسلم المنيع بإذن الله

وسلامتكم

[مرير الشوق]

يعطيك العافيه اخوي على الموضوع الجميل ..

صحيح ان العين حق ولكن لاتصل الى درجة الوسوسه ...

انا اعرف واحد من الربع اعوذ بالله .. دخلت غرفة النوم حقته .. لقيته راص حوالي 50 قاروره مقي فيها ..

يوم شفت المنظر دريت ان الرجال موسوس والعياذ بالله ..

وبقول لكم سالفه من باب المزح وجت حقيقه ... ومضحكه :

مره جالسين في مخطط .. وكان مع واحد من الشباب مكسيما جديده 99 مدري 2000 على ايامها ..

المهم جانا الرجال من منطقه بعيده في وقت سريع مشاء الله عليه ..

المهم يوم جانا وكنا جالسين ومعنا واحد مايلحق الحوار امه ههههههههه
اعرف واحد من خواله ( يشبر الحجر بيده وتنكسر الحصاهـ ) هههههههه معروفه سالتفته .
المهم يوم وصل خوينا ..
سلم الرجال ويرد عليها راعي العين .. قال :
اهب مسرعك توصل ... تقول كأنك جاي على سحابه .. عاد المكسيما لونها سماوي هههههههههههه
مسكين مارجع البيت الا وهو صادم ونجاه الله من الحادث وباع الموتر تشيلح بـ 9 الآف

........

وواحد من العيال طالع على طريق سفر ...

ومعه واحد نظوووووول يروع قد حرول بنته ماخلها تمشي لمدة شهر تقريباً ههههههه

يقول كنا على الخط سيد واحد انا وياهـ ..

وقدامنا تريله حقت بنزين .. <<<< الضحيه هههههههه

يقول صار لنا حوالي ربع ساعه نبي نتجاوزها وعجزنا من زحمة المقبلين علينا ..

ويقول خويي . انه التفت علي وقال ... هاه وش رايك ...
هذي ازعجتنا التريله .. وشرايك ..

سكت خوي وصار يدعي الاذكار .. وبداء يصرف الموضوع ..
واثناء السكوت الرجال بداء يتبرعص يمين ويسار .. تقول كأنه يقوس العين قوس
يقول والله ثم والله ماجلسنا 4 او 5 دقايق ..

الا التريله على جنبها وولعت نار ...

يقول وانا اوقف واحب راسه واقول تكفى يابو فلان لاتعرضني هههههههههه
عاد راعي العين هذي اعور ........ يخوف شكله