اللي عنده معلومه عن طيور منغوليا

[stewrd]

يالربع مسيتم بالخير
ودي اسال عن طيور منغوليا الفرخ كم يسوى الوافي 18*18 في هذه الايام ووين القاها ولكم جزيل الشكر

[صقار صغير]

يفيدونك آلإخوآن..

[نمر الصحراء]

موجودمكاتب بيع الصقور
اما كم لااعلم كل طير له سعر

[ALAMIR]

يفيدونك الأخوان

[stewrd]

اخوي نمر ا لصحراء ودي تقولي عن مكان المكاتب اذا امكن الله يكرمك

[راعي البرقه]

انت من وين اخوي وانا احددلك مكتب تقدر تسال عنده على هذي الاموره وموثوقه 100 % 100

[ذيب الحرار]

حط الصروه ونفيدك انشالله اذ المقاس صح من 10000 الي فوق

[stewrd]

يالربع هل يوجد في السعوديه طيور من منغوليا

[stewrd]

للرفع الله يرفع مقداركم

[بو غازي]

السلام عليكم ورحمه الله وبركاته
stewrd:هلا اخوي بالنسبة للأسعار اذا انه وحش ماصقر والطير ريشته طيبه وفيه طرف لون وقطوعه طيبه ووجهه زين بين ال8500 الى 12000 ريال.
والعلم عند الله.
:)

[عاشق التوام]

كفيت ووفيت يابو غازي ولا تتعدى يابو يزيد خابرك متهور

[stewrd]

للرفع الله يرفع مقداركم

[bearKSAlover]

شكرا كثير يا معلمين

[stewrd]

للرفع رفع الله مقداركم

[صاحب نوماس]

اخوي اللي انا اعرفة اذا اقطوعة طيبة ووحش من 15000وفوق والزين ياخذ حقة
انا فية فرخ 18*18 في استراحة احد الاخوان وحش كان حادة ب 25000 برغم انة سيم اول ماجاء ب 35000 اما 8500 هذي والله ماقد سمعت ان فية فرخ منغولي بهالقيمة

[عاشق الطير999]

انا شريت قبل سنتين فرخ 18في 18 ..9000وهديته ع حبارى فصيل طلبها ورددها ونزلها هبوط اظطراري

[stewrd]

ياشباب انا ادور مكان بيعها وين توجد في الرياض او في الغربيه

[stewrd]

الله يكرمكم جميع لاكن ماحد ذكر لي مكانه في السعوديه اللي يعرف الله يرحم والديه دنيا واخره لا يبخل علينا

[بو غازي]

اخوي اللي انا اعرفة اذا اقطوعة طيبة ووحش من 15000وفوق والزين ياخذ حقة
انا فية فرخ 18*18 في استراحة احد الاخوان وحش كان حادة ب 25000 برغم انة سيم اول ماجاء ب 35000 اما 8500 هذي والله ماقد سمعت ان فية فرخ منغولي بهالقيمة

السلام عليكم ورحمه الله وبركاته
صاحب نوماس:صبحك الله بالخير اخوي الوقت غير الوقت وحنا باخر الوقت الطير ابو 50000 صار ب25000 والطير ابو 20000 صار ب10000 انا اتكلم عن الوحش
والسوق غير الاستراحه.
يوم الخميس هذا محرجين على فرخ طيب لامن ريشه ولامن حجم ولامن قطوع وصل بالحراج ب8500 ريال
يعني الرجال الي يبي له وحش بيلقا له وحش طيب وبسعر مناسب.
يارجل بيتيات وسط الطيور بيعت ب2500 و3000 ريال

[بعيد الهقاوي1]

وش عندك ماسكه معك الا منغولي ههههههههههههههه

واجد الطيور الزينه فيه جيره على طريق الدائري الشمالي استراحه كامله

واذا تبغا وحوش شوف محلات الطيور اللي على شارع سلمان الفارسي بالرياض

واسألهم هناك وراح يعلمونكـ كل شي بأذن الله بعطيك معلومه عن الطير المنغولي

( الطير المنغولي نادر مايصيد فصيله لانه في موطنه يتغدا أكثر شي على الفيران )

ولما يجيك فرخ منغولي صافي وش زينه ويقرنس عندك لما يطلع بكر والا هو ارقط

فيه ناس اشترو طيور صافيه من منغوليا فروخ لما جت اباكير والا طيورها رقطان كلها

لكن انت يالغالي وش ذا المسكه الا منغولي ؟ ودي اعرف السبب لو سمحت .. يمكن اغيّر نظرتك

[stewrd]

اولا اكرمكم الله جميع ما قصرتوا
اخوي بعيدالهقاوي اللي خلاها تمسك معاي ان المنغولي حجمه يفرق عن الطيور الاخرى وانا اهتم اكثر شي بالحجم ولك جزيل الشكر

[بعيد الهقاوي1]

اذا تهتم بالحجم اجل اخذ الجير يالغالي

تراه اكبر من المنغولي وازين ريشه واسبق وأكثر امان اذا انت مبتدئ

المنغولي بآخر الوقت اذا هديته وراحت صيدته عليه واعجبه الجو فوق

صكها حوووووومه ورااااااح اول مايمر في باله منغوليا

لكن الجير تهده والا ماتهده ماله موطن أي مكان يجي فيه مرات يجي بالدشاش ويوقع

الجير <--- اكبر حجم وازين شكل واسرع بالهدد وأكثر أمان من الوحوش الاصيله

[stewrd]

اخوي بعيد الثقاوي
انا معك ان الجير اسبق وازين لاكن وين تلقى الجير اللي يرتفع ويكون سبوق على الولع

[بعيد الهقاوي1]

انت ماخذ فكره شينه عن الجير

انا كان عندي جير حر مقاسه 18 ونص

فرخ عندي واهده على الولع ويردده ووريته الحبارى وصادها فصيله ووريته الكروان وصاده فصيله

كل شي طاير يهد عليه بأذن الله وعلى التكايه مايقول شي حتى انه بعد المربط

نقلته اول يوم واليوم الثاني هديته على الملواح وهد عاد لما صار بكر صار ابيض ويرتفع بعد

الحين مزارع التفريخ تطورت صارو يوحشون الطير ويخلونه يطير ويصيد ماهو زي اول من القفص للسوق

كل شي تغيّر الحين

على العموم يالغالي الله يوفقك ان شريت المنغولي .. وان شاء الله اننا نشوف موضوع عن قريب

صور طيرك فيه ونبارك لك ..

اخوك بعيد الهقاوي