بهذلتني طرمبة البنزين في اليوكن دايم تتعطل...وش الحل؟؟؟ [الأرشيف]

علي الشهري

13/12/2004, 12:12 AM

شايب الصمان

13/12/2004, 12:25 AM

سبق وأن صارت نفس المشكله مع احد الشباب معه جاكور ورهم لها طرمبة مازدا 929 .والى يومنا هذا ماأشتكى منها لها تقريبا سنتين ةالسياره موديل 2000. فجرب لك طرمبه نفس قوة الدفع المطلوبه - وأذا انت من أهل الشرقيه فيه ميكانيكي ممتاز ممكن يولف لك طرمبه ... والله يباركلك بحلالك ويبعدك عن الورش وقطع الغيار ....

أبو أسامة

13/12/2004, 01:50 AM

السلام عليكم ورحمة الله وبركاته
أعانك الله أخي التنهات وإن شاء الله تنتهي مشكلتك على خير .
اخي عندما تغيير الطرمبه هل يقومون المكانيكيون بتنظيف خزان الوقود ...
وهل إذا اتيت بالقطعه كنت تتواجد معهم أم تذهب وتأتي عندما ينتهون من السيارة ..
وهل المشكله بالطرمبه كهربائية أم نها تنسد ....
وهل إذا شغلت السيارة قامت تفتف ربما المشكله ليست بالطرمبه بل بالبخاخ أو تصفيةالمكينه ... أو أن الخزان متسخ ..... أو أن لديك مشكلة بحساس الهواء الداخل للمكينه .....

****
طرحت كل الإحتمالات لكي لا تنسى أن تتأكد منها قبل التصليح لأنه ربما لم تكن المشكله من الطرمبه ....

ملاحظه ... إذا تأكدت من أن المشكله من الطرمبه ووجدت بأن طرمبه اليوكن الجديد نفس الطرمبه ليوكنك فأنصحك بطرمبه اليوكن الجديد من عند التشليح لأنه ربما القطع لسيارات القديمه لدى الوكاله بها خلل مصنعي ...

والله يوفقك لما يحبه ويرضاه ... :(

القماري

13/12/2004, 08:10 AM

أخونا التنهات
سالفتك حصلت مع صديق وعنده كاديلاك إسكاليد ( هو واليوكن فصيله وحده وقطع غيار وحده ) ودوم طرمبة البنزين تخرب معه وتكلفه ضعف المبلغ إلي أنت ذكرته ( على أساس إنها كديلاك ) وبالفعل غير الطرمبة مرتين وبمبالغ وقدرها وبدون سنع وفي آخر مره راح بسيارته لكهربائي فني ( أبو هناد - هندي) وقال له السالفة ، فكان الهندي صادق معه ومتعاون وما قصر فك الطرمبة القديمة ( الكاملة إلي تشريها أنت بـ1000 ريال ) وخرج منها الطرمبة الداخلية وركب واحدة جديده تجارية بـ 60 ريال فقط ورجع الكت القديم وسنع الشغلة ، وماشاء الله إلى هذا اليوم وهي شغاله معه زي الحلاوة ( مر على هذك الكلام تقريبا سنه الآن) أخونا بعد ما قصر وأكرم الكهربائي الفني بـ 100 ريال على ما بدله من تحريف وعمل فكان المجموع إذا ما نسيت مبلغ لم يتعدى 160 ريال.
طبعا لا تقول لي وين القى هالورشة أو الهندي ( هذا وأنا خوك تلقاه في كل ديره أهم شيء أنك تعرف أنه فني طيب وله نفس يساعد )
وبالتوفيق

علي الشهري

13/12/2004, 01:31 PM

الأخ الكريم:شايب الصمان
الله يجزاك خير على اهتمامك بالموضوع
لست من سكان الشرقية لكن إذا كان هذا الميكانيكي سيحل مشكلتي فما عندي إشكال أروح له خميس وجمعة
ياليت تعطيني وصف لمكانه وحاول تراعي إني ما أعرف الشرقية زين
ألف شكر لك

أخي الكريم:أبو أسامة
الله يجزاك كل خير على اهتمامك
بالنسبة للورشة فهم ناس معروفين لي جداً ومستحيل يغشوني
أما التانكي فهم يفضونه وينظفونه
ومشكلة الطرمبة كهربائية ما عاد تدفع البنزين
وعند حدوث المشكلة لاتفتفة ولاشيء !!!!فجأة توقف السيارة وتتعطل
وبالنسبة لاقتراحك الأخير..إني أركب طرمبة يوكن من الموديلات الجديدة..هل هذا عن تجربة؟
لأن اللي أعرفه إن مقاسات الطرمبة تختلف من موديل لموديل
أكرر شكري لك

الأخ المكرم:القماري
ألف شكر لك وجزاك ربي كل خير
فكرتك رائعة لكن وين ألقى الهندي المتحمس
إن كان إنك في الرياض فدلني على أبو هنود صاحبكم وبزيده 100 ريال فوق مئة صاحبك
بارك الله فيك

al-nashmi

13/12/2004, 02:38 PM

اخونا التناة,,,,,,

مساء الخير..
شيك على الكهرباء الواصله للطرمبه يمكن المشكله منها وليست من الطرنبه نفسها

رفيع الشان

13/12/2004, 06:06 PM

أخوي التنهات ... بعد التحيه ....

عندي ونيت موديل 97 جمس كان كل فتره تخرب الطرمبه المهم مع الوقت عرفت العلاج وهو ان التانكي ماينقص ان الربع ... ليش ؟
شوف يالحبيب الطرمبه لما ينقص البنزين تسحب الهواء والهواء هو المرض الاساسي لها .

ونصيحه اللي يقول ركب طرمبة ترهيم انا ركبت ره طرمبه تجاري تمشي 420 كلم اذا عبيت فل بينما الاصلي امشي حدود 530 كلم .... شفت الفرق الطرمبات تختلف لاتركب اي طرمبه ثانيه .
بعدين اعتقد ان موديل 98 وطالع طرمباتها كبيره شوي مثل علبة اللبن وفيها أسلاك واجد بينما 97 ومازل تجي مثل علبة الببسي حق المدارس .

بالمناسبه قبل يومين كنت طالع بالونيت وقلت ابعبي من المحطه بعد الجايه يقوقن نظيفه المهم اثاري الطرمبه شفطت الهواء وهالحين تطلع صوت مثل المكيف الصحراوي ومدري وش بسوي فيها يمكن اغيرها ويمكن نخليها فتر كود ان الله يشافيها :)

يعني الزبده غير الطرمبه اصلي ولايقل الخزان عن الربع .... ودمتم

عليم العطش

13/12/2004, 07:49 PM

التنهات مشكلتك هذي مبهذله ناس واجد وكل يعطيك من راسه راي وانا من عرضهم من غير قصور بالربع
انا عندي جمس ونيت وحدثت لي نفس المشكله والسبب لاتخلي التانكي يقل عن الربع 0
السبب ان وضع الطرمبه بوسط التانكي عمودي والطرمبه طولها حوالي 20سم تقريبا واذا نقص البنزين حتى يصل الى اسفل الطرمبه في 5سم الاخيره تبدا الطرمبه تحتر لان البنزين نزل عن جرم الطرمبه بعد ماكان يبردها ومع تكرار هذه العمليه تتلف الطرمبه من الداخل 0
واحيانا يكون هناك التماس بالاسلاك المؤديه الى الطرمبة ويكون الفيوز مغير من قبل ويكون تحمله اقوى من المقرر له بذلك يؤثر ذلك على الطرمبه وتحترق0
عسى ان اكون قد افدت0
تحياتي
عليم العطش

رفيع الشان

14/12/2004, 06:30 PM

أخوي التنهات نسيت قضية الفيوز .... ترا المشكله غالبا يجي حلها بسيط جدا بس لازم توديه عند مهندس فنان جدا جدا ( انتبه لجدا )

لأن اغلبهم تجيه على طول يقول طرمبه وهو مجرد فيوز بسيط قيمته ريالين ...

ودمتم

روضان

14/12/2004, 07:20 PM

السلام عليكم

انا عندي يوكن وصارت لي نفس مشكلتك والحل انك ماتخلي تانكي البنزين يفضا خله دايم فوق الربع

شايب الصمان

15/12/2004, 10:37 PM

التنهات
أعتذر لانني لم أنتبه لردك ....
ولكن رأي من رأي الاخوان جرب كل المحاولات وأذا ثبت انها من الطرمبه أبشر مالك هم أنت أوصل للشرقيه والباقي علي ( عضو مكشاتي ولانخدمه ). والله الموفق

ابو شكاع

16/12/2004, 03:42 AM

السلام عليكم
اخوي التنهات .. انا معي يوكون ...عادة ما اخليه ينقص عن الربع ...يعني لو قلنا من ال 100 مرة اقدر اقول لك انه 5 مرات خليته ينزل عن الربع ..

اذا كان مثل الجديد فترى يجي له صفاية خارجية ...قبل كم شهر غيرتها ...قال لي مسؤول قطع الغيار في احد محلات الامريكي انصحك انك تغيرها وغيرتها

الله يكون بعونك ....وعلمنا وش الحل اذا حليت المشكلة

nahham

16/12/2004, 01:20 PM

حياك الله اخوي
ابشر بالحل وانا مجرب
اولا تصميم الامريكي وحسب الكاتلوج انه ممنوع ملء تانكي البنزين بالكامل حتى تسمح بفراغ ل**** الهواء داخل التانكي وجنا الله خير ما نرضى الا اذا صب البنزين مع الغظاء

مشكلتك صارت معي ومن حسن الحظ صارت معي بالكويت
رحت الشويخ مكان الورض حصلت ايراني قال عادي خراب طرمبه الامريكي قال الغ الاولى الداخليه نهائيا وركب طرمبة كروزر او كراسيدا قديمه ( نفس الشي بس ارخص ) تراها تركب في نصف السياره بجوار الشاص يمن السياره او بسار والله نسيت
الحين لي اكثر من سنتين وما شفت شر
اخونا اللي قال طرمبه مازدا صادق بس عيب طرمبة المازدا سرعة خرابها اذا ضعف الكهرباء مثل عطل البطاريه او اي مشكله بالدينمو او السير
الله يعينا واياك وتراك بتدعي لي اذا خذت برايي
سلام

Waleed1

18/12/2004, 02:11 PM

السلام عليكم

زى ماقلولك الاخوان ياويرات توصيل المضخة تعبانة يا التانكى فية وسخ صحيح أن لاتخلى أقل من الربع وعبى لاكن ليس سبب قوى يؤدى الى عطب المضخة، فى وقت قياسى وبعدين أخونا قال لك يوم تتغير المضخة أنت على راس الهندى وهل فى نفس المكان يجوز أنة هندى نصاب وحصلت معانا كثير واللة يعينك

رقبة حاشي

20/12/2004, 09:12 AM

السلام عليكم ورحمة الله وبركاته
اسمع يالتنهات الكلام المضبوط من اخوك اللي هبلت به طرمبات البنزين بالامريكي وانصحك ان تركب الطرمبه عند وكالة العيسى ؟؟؟؟؟ ليش لعدة اسباب يعطيك ضمان لمدة ستة شهور على القطعه وسنه على شغل اليد اي اذا خربت الطرمبه خلال 6 شهور فيركبونها ببلاش ، واذا خربت بعد ال 6 شهور فشغل اليد مجانا وتدفع قيمة الطرمبه هذا الحل ممكن تقول ان الوكاله غاليه بس اذا فكرت بالضمان سوف تتراجع عن ذلك

ملاحظه هامه @ هل سيارتك امريكي ام سعودي اذا كانت امريكي فلابد من برمجتها عند الوكاله .
ولم نسمع بان طرمبة اللاندكروزر او الباجيرو او الهيونداي تتعطل بسرعه مثل الامريكي .... وعموما هناك عيب تصنيع بكل طرمبات الامريكي .....وانا قال لي واحد ان الطرمبه تجي مثل الكفرات حراره A وحراره B وسيارته فورد... هذا والله اعلم

المستوي 1

23/12/2004, 09:44 PM

كان معي كابرس و صار معي نفس الموال

ثلاث مرات اغيرها و نفس المشكله

نصحني يماني قال انه الطرمبه تصنع في اكثر من مكان ل جي ام

لكن نصحني بالطرمبات من وكالة بالبيد تكون مصنعة فعلياعلى ما اعتقد في كندا

الى ساعتك و الامر عندي اوكي

جرب من هذا المحل عسى يكون هو الحل

مناسب

25/12/2004, 11:34 PM

ماعليك زود انا بهذلتني بالشفر استرو فان الله لايعيدها ابشركم بعتها الخميس بـ 22000 موديل 98 وفكه كله من هالطرنبة

نبهان

26/12/2004, 09:53 AM

السلام عليكم ورحمة الله

اخواني اعظاء وزوار المنتدى بعد التحيه
فيه شغله مهمه لم يتطرق لها احد بخصوص المحافظه على طرمبة البانزين,
وهي اغلاق او تطفية محرك السياره عند تعبئة السيارة وهو اهم من عدم ترك تانكي البانزيم اقل من الربع,
انا عندي يوكن موديل 98 ولله الحمد لم تخرب الطرمبه من شريته وذلك بسبب اني اطفي السيارة عند تعبية البانزيم وكذلك بسبب صيانة اجهزة ظخ الوقود بأستمرار.

اخوكم الجديد نبهان

صقر المرقاب

07/09/2009, 04:18 AM

ابشرو بالحل ياهل مشكلة الطرمبة
الحل انا عندي جمس موديل 97 وتعبت معه سنوات وانا اغير طرمبه شبه شهريا علما انني ما أخذ الا الأصلي ولكن بدون جدوى ووجدت فكرة من احد الاخوان جزاه الله كل خير وقال لي رح للورشة وركب طرمبة فكس آر وتوجهة لهم وفعلا ركبو محلها طرمبة فكس آر والأن والحمد الله مرة ثلاث سنوات ولم اغير شي وعندي تمام ارجو الاستفاده لأن الجموس جميعاها فيها هذا العطل المصنعي ...
ركبو وادعو لصاحب الفكره جزاه الله كل خير والله اني ادعي له كل ماذكرة أو شفت جمس متعطل من الطرمبه .. تحياتي لكم جميعا ،،،

اسدهم

13/09/2009, 05:42 AM

والله ضعت ناس يقولون ركب اصلي وناس ركب فكس ابغاء حل اوكي ونا معي جمس نفس المعاناتكم
وطرمبة الي عندي تون لهاء صوت يشلخ اراس اصوت تسمعه ونت واقف عند الاشارة لا وبعد مقزق مشغل المكيف

اسطورة الصمت

13/09/2009, 06:03 AM

السلام عليكم
والله خوفتوني يالربع انا توني مركب طرمبة لليوكن 2000 اصلية من بالبيد بعد ما بدت الاوله تطلع صوت وقلت اغيرها احسن من انها توقفني انا واهلي بدون سابق انذار .
والله مشكله اذا كل شوي بادفع 1250 ريال حق الطرمبة والشغل .
بس بصراحة اكثر من واحد نصحوني اني ما اخلي التانكي ينزل عن الربع واغير الصفاية كل 6 شهور وكمان اشيك علي الهوا الداخل .
وان شاء الله افيدكم وتفيدوني

إكسير الحياة

14/09/2009, 02:33 AM

يسعد صباحك ومساك الحل طال عمرك مالك إلا طرمبة Vxr 2002 وفوق وتغيرها وتغير الصفايه كل 6 أشهر والله يعطيك خيره ويكفيك شره

دخيل العتيبي

14/09/2009, 04:27 AM

اليوكن يرهمله طرمبة جيب Vxrوحده بوحده

ابوعبدالله9999

14/09/2009, 04:32 AM

راعي المجهم

14/09/2009, 05:04 AM

ركب طرمبة مرسيدس ..... هذا حلها وترى علة الطرمبه في الجموس دايم .... من 99 وتحت يرهم لهل طرمبة مرسيدس ... ولا تتعب نفسك في غير ذلك ..ومن 2000 إلى 2006 لايمكن الترهيم لها فيركب للطرمبة قلب فورد أصلي ... وأنساها سواء بنزين على الربع أو لا... هذا حلها الأكيد ... أخوك مجرب وكان معي تاهو 2003 وصراحة ... تسبب لي بمعرفة سواقين السطحات كلهم من كثر ما يتعطل .

أخي الكريم ولد عمي معه يوكن 2001

مركب له طرمبة فكسار 2002 لها أكثر من

7 سنوات وماشيه زي الحلاوة

طرمبة الفورد ركبوها وفشلت بعد سنة وتسبب تفتفة بالسيارة

طرمبة المرسدس فشلت بعد فترة أيضأ وتسوي نفضة بالسيارة تحس بها

طرمبة الفكسار فيه ناس مركبينها لهم 10 سنوات وماشيه معهم وكنها شد بلد

لأنها كبيرة ومقاربة لطرمبة الجمس من حيث قوة ضغطها

أخوي صاحب الموضوع ركب فكسار وإذا خربت عليك بعد 4 سنوات

أنا أعطيك خسارتك على مايشهدون الأخوان

العارض

14/09/2009, 05:13 AM

أخي الكريم ولد عمي معه يوكن 2001

مركب له طرمبة فكسار 2002 لها أكثر من

7 سنوات وماشيه زي الحلاوة

طرمبة الفورد ركبوها وفشلت بعد سنة وتسبب تفتفة بالسيارة

طرمبة المرسدس فشلت بعد فترة أيضأ وتسوي نفضة بالسيارة تحس بها

طرمبة الفكسار فيه ناس مركبينها لهم 10 سنوات وماشيه معهم وكنها شد بلد

لأنها كبيرة ومقاربة لطرمبة الجمس من حيث قوة ضغطها

أخوي صاحب الموضوع ركب فكسار وإذا خربت عليك بعد 4 سنوات

أنا أعطيك خسارتك على مايشهدون الأخوان

أنصحك بما نصحك به الاخ بأنك تركب طرمبة فكسار موديل 2002

ااكد لك صحة الكلام

ابيك تنشد الكهربائيين عن الطرمبات بيقول لك ركب طرمبة فكسار

والان تلقى اغلب الكهربائيين او قطع الغيار يستوردون طرمبات فكسار من الامارات تركب على الامريكي وخاصه اليوكن بسهوله مرهمه وجاهزه واصلي بعد ويضمنها لك سنه كامله

الله يوفقك

سوبر VTC

15/09/2009, 04:02 AM

طرمبه الجمس م2001
خربت معي 3مرات تنكسر من صفق البنزين
حتى انه جلست سنه كامله و الانبير يسرح و يرعى :D:p
طبعا كلهن يشتغلن :good: بس انكسر الجرم البلاستيك
بالنهايه ركبت طرمبه حديد
مره مسافر و ادق سلف عيا يشتغل الموتر :no:
دخلت يدي :D
من عند السست من عند الكفر الايسر
و حركت فيش الطرمبه و اشتغل الموتر :good:
طبعا المشكله ان الفيش متوسع من الحرارة و محتمي و مسبب كربون لونه اسود
نضفته بفلاش و حطيت شحم و ضيقت الفيش و ضبط :good:
طرمبه الفكسار مهب لازم موديل معين
سعره ب540ريال طرمبه دينسو اليابانيه كرتون احمر
و تجي نفسه طرمبه من شركه دينسو بالسوق كرتون ازرق ب280ريال

راجع موضوعي عن جميع الاعطال للطرمبه + معاناتي مع الجمس

موفقين

ابومعاذ3

15/09/2009, 07:04 AM

تونا مركبين لليوكن طرمبة فكسار ( دنسو ) مممممتازة

مغلي

15/09/2009, 10:36 AM

لو كل شخص جرب طرمبة الفكسار ... يذكر الورشه الي ركب فيها وهاتفها ومكانها بدقه وكم رقم الطرمبه في محلات قطع الغيار .... لأن بالسوق انواع كثيره وورش اكثر واكثر

ر1زي

15/09/2009, 05:40 PM

اخوي نفس مشكلتك كانت مع واحد معه جمس شفروليه وركب طرنبة جيب في كس ار بمتين وفراطه ما اذكر بضبط بس الزبده ان اموره غدت تمام عقب الطرنبة ولا يشتكي منها الى يومك هذا علماُ انه مركبها الحين اكثر من اربع سنوات

المرتاع

15/09/2009, 07:57 PM

ركب طرمة gxr وريح راسك اخوي مركبها على يوكن 97 وكده الين باعه وريح

ayaqaz

16/09/2009, 06:52 AM

مع أن الموضوع له حوالي 5 سنوات الا أنه موضوع مفيد..

جزاكم الله خير..

بالنسبة لطرمبة اللاند كروزر التي تركب على الجمس هل هي خاصة بمكائن 6 سلنددر ولا 8 سلندر؟؟

أرجوا التوضيح حتى يسهل الأمر على من يريد التوليف..

وفقكم الله..

Waleed1

16/09/2009, 08:05 AM

السلام عليكم

حقيقة الاخوان ماخلو لنا فكرة فجزاهم الله خير، عليك وضع الاحتمالات فى ورقة وشوف وش تحتاج تغير، أنا كان عندى سيارة بيوك موديل 93 غيرت الطرمبة مرة واحد مع العلم أنه كانت غير عطلانة ولاكن الفنيين يغيرون وبس ولا عمرى أشتكيت من الطرمبة. المفروض من الطرمبة أن تعمل على الاقل 4-5 سنوات.

أنى ودى أنك تودى الطرمبة المعطوبة لكهربائى جيد وعلى وقت فراغة يفككها ويشوف أين تكمن المشكلة يعنى نوع من التحقيق. قد يساعدك فى الوصول الى أسباب خرابها.

بعدين أذا ثبت أن فيها خلل مصنعى راجع الوكالة مش ربعك ولاكن الشركة الام عن طريق النت عطهم رقم الشاصى وسنة الصنع والموديل لعل وعسى يدلونك على حل للمشكلة.

وشكراً

القناص4800

16/09/2009, 08:18 AM

السلام عليكم اخوي التنهات انا عانيت من نفس المشكله مع بليزر والحل سهل احرص على ان البنزين ما ينزل عن الربع

ذيب قطن

16/09/2009, 05:11 PM

ركب طرمبة فكسار

مغلي

18/09/2009, 02:34 PM

اكثركم ينصح بطرمبة فكسار 2002

طيب ليش بالذات 2002 مع ان الفكسار من 98 الى 2007 كلها 8 سلندر 4700 سي سي

وارجوا من اي شخص جرب طرمبة الفكسار وارتاح معاها ... يذكر اي ورشه ركبتها له بالرياض

لأن مو كل ورشه يقدرون يرهمونها 100%

برق خاطف

26/09/2009, 11:59 PM

عليك بطرمبة التويوتا (( دنسو )) رخيصه وعمليه..
250 ريال يابلاش ..وادعلي

ابويزيد1

27/09/2009, 12:51 AM

اخوي ركب طرمبة تويوتا Vxr ولا تهتم بعد اليوم حتي لو نزل لحد الخط الاخير مجرب

ابويزيد1

27/09/2009, 12:54 AM

اخوي فية ورشة في صناعية ام الحمام القديمة لما تجي عند ورش صيانة هوندا اسئل عن باكستاني اسمة ( امير ) ارجال شغلة زين بس حار شوي وانصح به اسم الورشه المحيذيف اول ما تاخذ يمين مع الدخلة الاخيرة وانت متجه الى المعذر خذ يمين شفها 3 ورشة تفتح غرب وسلمت

مغلي

27/09/2009, 08:49 AM

بيض الله وجهك يابويزيد

jallo

27/09/2009, 07:55 PM

بالمختصر وهذي قاعدة

اعلم انك اذا غيرت شي عدة مرات وكل مرة تخرب فالمشكل خارجها يعني فيه شي من خارجها هو الي يخربها
اما زيادة الضغط عليها
او اي شي اخر

سوبر VTC

27/09/2009, 10:02 PM

بالمختصر وهذي قاعدة

اعلم انك اذا غيرت شي عدة مرات وكل مرة تخرب فالمشكل خارجها يعني فيه شي من خارجها هو الي يخربها
اما زيادة الضغط عليها
او اي شي اخر

الطرمبه ما تخرب
سبب الخراب توسع الفيش من الحرارة
او انقطاع احد الاسلاك الداخليه من داخل عازل السلك
راجع موضوعي
جميع الاعطال عن الطرمبه بالتوقيع + معاناتي مع الجمس
موفق

شايل الظبي

06/10/2009, 01:41 PM

عزيزي
عمي معه صالون 96 جاي من الدمام للرياض
اتعطل الموتر بالرياض وشاله بسطحه للصناعيه القديمه
عند مركز العماله سوريين الكهربائي سأل عمي وش نوع البانزين اللي يعبيه قال 91
قال الكهربائي ال91 سبب مشااااكل كثيره للسيارات
وبالنسبه للطرمبه نصحنا بتركيب طرمبة جيب في اكس ار
تركب وضمان انه ماراح يطفي الا ان يشااااء الله

وبالتوفيق ان شالله

شايل الظبي

ابو البر

12/06/2010, 01:12 AM

ركب طرمبة فكس ار
او كلمني على
تحياتي .

الحمر احمر

18/06/2010, 01:30 AM

عندنا في الكويت يركبون طرمبه المانيه ماركه بوش احذر من الصيني والسلام ختام

cci

18/06/2010, 01:57 AM

وين موقعك يالغالي

العنيد952

19/06/2010, 01:52 AM

موضوع قديم 2004

ابو علي محمد

19/06/2010, 11:11 PM

موضوع ممتع خاصة لاصحاب اليوكن الامريكي من موديل 99 وتحت 00

لكن مافيه احد رهم طرمبة وانتهت مشكلته 00 ياليت احد يفيدنا خصوصا وان الفترة كافيه حيث ان الموضوع من عام 2004 كما ذكر اخونا العنيد 952

مولع بالطير

19/06/2010, 11:47 PM

اخوي مساك الله بالخير اليوكن موديل 98 و99 هاذي عيبه انا كان عندي يوكن مديل 99 وفعلن مثل ماذكرت بين فتره وفتره الا تغير الطرمبه ونا قالولي ركب طرنبت فكسار فيه ناس مركبين ومرتاحين لا كن ماركبتها لاني بعد ثالث مره بعت الموتر قلت اذا خربت معاي بركب بس هاذا الي عندي وتمني اني افدتك

gamer

20/06/2010, 12:33 AM

انا ماقريت ردود الاخوان انا عندي 99 يوكن وجربت طرنبة فكس ار

8 سلندر وشغال زي الحلاوه اتمنا تستفيد

الروضة الشمالية

05/03/2013, 11:04 AM

السلام عليكم
ياخوان عندي يوكن قصير موديل 2000

صار يتفتف الموتر ويوقف واذا شغلت ومشيت - ضبطت السيارة ومشت مسافة كيلوين ثلاثه وتوقف

وقفت عن المحطة وفللت البنزين ( مليته ) الموتر الآن ضبط وصار ممتاز ماشاء الله

بس ما ادري وش المشكلة منه ... اذا وصل الربع قام يتفتف

افيدوني الله يوفق الجميع .... ويفتحها في وجه كل من رد علي

الروضة الشمالية

09/03/2013, 07:32 AM

تم حل المشكلة اليوكن 2000 ولله الحمد

الطرمبة صارت حقت لاند كروزر وكان ماتوصل لآخر التانكي .... فكيت التانكي عند يماني في الصناعية القديمة ضبط لي الموضوع والرجل ممتاز جدا جدا
والموضوع ماكلف وقت ساعه وبالنسبة للمبلغ 200 ريال فقط ...

وانتبهو من السوريين الي في الصناعية ... يا اخوان انتبهو من التعامل مع السوريين تراهم اغلبهم نصابين بمعنى الكلمة .

واحد قالي انزل التانكي 600 ريال والثاني يقول 550 ريال ,,,, ابو يمن الله لا يخلينا
قالي ب 150 واعطيته 200 .. وشغله 100% ...

وابنزل رقمه هنا للفايده .... ووالله الذي لا اله الا هو بأني لا اعرفه ولا بيني وبينه اي تعامل تجاري

اديب .

معاد تفرق؟

10/03/2013, 10:47 PM

خله فوق الربع ولاينقص ولابيطفي عليك

المشكله عندنا نفس الموتر قاهرني اقول لابوي بيعه موب راضي

فك الطرمبه وشبك اسلاكها رئيسيا بدون الفيش بس للحين تستهبل الطرمبه الموتر كرهته بسبب الكهربا والطرمبه

fashahry

22/03/2013, 01:32 AM

تخيلوا ...

خربت الطرمبة قبل رمضان وغيرتها بأصلية وكلفتني مع التركيب حول 1000ريال

وخربت مرة ثانية يوم العيد وكلفتني مع التركيب حول 1000ريال

ثم خربت ثالثة اليوم وكلفتني مع التركيب حول 1000ريال

ولا اركب إلا الأصلي

موديل السيارة 98

تكفون وش الحل؟؟؟؟؟؟؟؟؟؟؟

السلام عليكم ورحمة الله

ادري الموضوع قديم

ولكن من باب عدم كتم المعلومه

انا اعتقد ان الخلل يكون في اسلاك الكهرب حقت الطرمبه من الظفيره الي الطرمبه

يبيلك كهربائي صاحي ينخل السلك من الظفيره الي الطرمبه

ويكتشف الماس ويضبطه

اتمنى للجميع ولك يابو احمد كل التوفيق