مشكلتي مع وكالة تويوتا ( اشيرو علي )

[جاروود]

بسم الله الرحمن الرحيم

هلا يشباب كيف حالكم جميعا

مشكلتي اني رحت للوكالة عشان يغيرون الكلتش للهايلكس :hot: ليتني مارحت
المهم

عقب مارحت لمهم قالو نبي نصلحه بذيك الحتساة (القيمة) المهم قلت مافي مشكله الوكاله شغلهم مزبوط وعادي لو اخذو فرق شوي :no2: اسف فرق واجد خليته عندهم وجيت خذيته يوم ركبته والى فيه صوت منيب متعود عليه يوم ضغطت الكلتش راح ناديت المهندس قال ماعليك الصوت يروح قلت مافيه مشكله يوم تحركت شوي الى فيه صوت في القزوز قلت انا لله وانا اليه راجعون قلت اجيه باتسر يوم جيته باتسر قال ترا الصوت الي اذ ضغطت الكلتش يروح هذا صوت رمان القير قلت طيب :no: ويعني قال هذا من اول قلت معصي قال بس مابان الا يوم غيرت الكلتش وقال شف الفاتوره مكتوب فيها كذا ناضرت الفاتور الى مكتوب فيها تيرس نويس قلت انا الله وانا اليه راجعون قلت طيب الصوت حق القزوز قال وش دخلنا فيه انا ماغيرنا الى الكلتش قلت الله على الظالم المهم رحت لم راعي شكامين ابيه يشوف الصوت من وين قال من الجلد الي بين القزوز اذا تجمعت في ماصوره واحده قلت للمكانيكي السالفه قال انهم يمكن يفكونها عشان ينزلون القير براحة كلمت المهنس قال انا الكلام هذا غلط


اني يوم بغيت اصلح صوت تهريب الهواء على حسابي عيت وحده من المسامير عيت تنفك وديته لكم واحد كلهم قالو نفس الكلام لازمنكسر الصاموله ونفك القزوز كلها ومدري وش بعد وعيت والى الحين الموتر ماصلحته

الى ودي تعلموني ياشباب اني مدخل الموتر مافيه الى الكلتش وطلعت هالمشاكل
1- رمان القير
2- وتهريب الهواء من الصوفة الي في مجمع القزوز مع ماصورة الشكمان

وش السواة :confused:

[الجيب الربع]

السلام عليكم ورحمة الله وبركاته

أخوي جاروود

هذي مشكلة الوكالات ولذلك اصحى تروح الا اذا كنت مضطر والله يعينك

يسهلها ربك

لك تحية طيبة

[SilverSniper]

وكالة تويوتا.. أكبر تجمع لمافيا السرقة ومتفنني النصب والاحتيال..
عاد انت يا جارود الله يهديك... مالقيت تغير كلتش الا في الوكالة؟؟؟؟؟ ... خلاص؟؟؟... ماعاد فيه ورشات؟؟؟؟
لا.. وكلتش هايلكس؟؟.. ما هنا أسهل من فكه وتركيبه.. والدزق تشتريه من البقالة مع علبة بيبسي هدية بعد..
أنا يا محاكيك.... سويت لهم سالفة.. أنا كتبتها قبل كذا.. لكن بأعيدها للتذكرة.. أنا عندي جيب فكسار 93... صار عندي عطل ببلف الفريون الكهربائي.. وما حصلته وقالولي دخل الجيب عندنا ونطلبه لك من اليابان.. دخلته وأنا محتد عليهم... وطلعت السيارة منهم بعد شهر وخذوا مني 2000 ريال... وخلص راتبي على سيارات الايجار ... وبعد ما طلعته باسبوع.. رد شغله الأول.. رجعته لهم وقلت بلفكم خرب ثانية... قالوا خل السيارة و تعال بعد اسبوع.. جيتهم.. قال الكمبرسر خربان والليات والمواسير خربانه والرديتر خربان ووووو... وراح يكلفني 12 ألف ريال.. شف النصب..
أولاً... لو ان قطعة وحدة من هذولا خربانة كان ما اشتغل المكيف نهائياً.. ثانياً.. لو غير المكيف بكبره ما وصل 12 ألف.. لما حسبت سعر القطع أنا والمدعو المهندس ( أمحق مهندس ).. لقيناها ما توصل 3000 ريال.. يعني شغل اليد كم ؟؟؟ 9 آلاف ريال؟؟؟ ... قال ..آآآآ .. اعمل حسابك بـ6000 ريال... قلتله طلع السيارة قبل ما أطلع مخك وآكله ني... قال تدفع 300 حق الكشف... قلت أدفع مدق يدق حنكك... أدفع عشان كشف يعطيني القطع السليمة على انها معطوبة ... والله ما تشوف فلس... واسويلهم سالفة ويجي مديرهم وشوي الا تلاقطت معه.. وأخذت السيارة منهم.. ورحت للكهربائي رفيقي .. وفكينا البلف اللي مركبينه.. طلع البلف تجاري ماهو أصلي.. وغير كذا .. بلف باص مهوب بلف فكسار... وألقط فاتورتهم... والى الرقم حق التجاري مكتوب فيها.. والقط البلف .. والفاتورة.. وأكتب خطاب حليل.. ورفعتهن لوزارة التجارة-مكافحة الغش التجاري.. وخذ... شيل وحط.. رده وهاته.. وكلاب تويوتا كل شوي متصل علي واحد يقول جب السيارة ونكشف عليها ببلاش.. وأنا راسي فيه حب ما طحن.. المهم... بعد تقريباً 3 شهور.. أخذت تعويض من الوكالة 4000 ريال.. وجبت بلف أصلي من الامارات .. 500 ريال بس.. وركبته.. والمكيف الآن زي الحلاوة.. والثلاجة والمكيف الخلفي يا سلام..
رايي... كلام الميكانيكي صحيح... أكيد فكوا القزوز عشان يوسعون المكان وما يفكون القير مره.. أما صوت الرمان فعشانهم ما شحموه قبل ما يرجعون القير.. لو اني منك.. أكتب شكوى لحماية المستهلك.. وأخلي الميكانيكي يشهد معي عليهم.. مشكلة الوكالة.. انها ما لقت أحد يوقفها عند حدها..

[الجيب الربع]

السلام عليكم ورحمة الله وبركاته


خالي حصل له مشكلة مع VXR 1997 في الدينمو وقالوا له الوكالة لازم تغير الدينمو وسعره حوالي 3500 ريال تركهم وراح لكهربائي قال له الفحمات حقت الدينمو يبغالها تفيير وفكها من واحد قديم عنده وصلح الدينمو ولا كلفه الا 70 ريال ومشى معه آخر حلاوه لين باع السيارة

مصايب الوكالات ما تحصى والله المستعان

[برقان]

يا جماعه الربع انا لي فتر ابغير الكلتش عند الوكاله وخايف لانهم نكبه


ممكن اتوصفون لي ورشه مضمونه 100% لل g x r



لا هنتو

[aziz2727]

شوري عليك يالغالي ولا يهون الجماعه .. انك تشتكيهم على فرعهم الرئيسي في جده وبشوف وشلون الشغل ... والله يعينك .

انا مدخل سيارتي تشيك على الضمان جيت عن المهندس الي يستقبل السيارة قالي بتكلفك حوالي 318 الى 320 ريال بعد التخفيض قلنا ما يخالف قالي بنغير زيت المكينه والسيفون وبنشدلك الفرامل قلنا ما يخالف .

جيت بستلم السيارة قالي الصندق ادفع 420 :confused: قلتله سلامات عسا ما خلاف :( قال هذا تكلفت السياره قلت طيب وين المهندس الى كشف على السيارة ؟؟ قال خلص دوامه وطلع !!! طيب ما فيه مسئول عنه ؟؟ قال الا فيه كبير المهندسين :eek: طيب وينه ؟ قال هاذاهو . اسمه بعد مصطفى
جيتله وقلت فيه شي غلط !! قال وش العلم ( هذي من عندي ) ايه الحكايه ؟؟
قلته انا جايب السيارة اليوم وقالي المنهدس بتكلفك السيارة المبلغ هذا !! الحين اجي ولقاها كلفة غير كذا ؟؟؟
اخذ الورقه وقلبها وشاف في الكبيوتر وقال مااااااااااا عليك
ادفع المبلغ الحين هذا والمره الجاية بنغيرلك الزيت والسيوفن ببلاش !!!
قنا مدام كذا مافيه اي مشكله . وبنشوف ان شاء الله وش العلم في المره الجايه .

[Waleed1]

]السلام عليكم

واللة أذا تبون الصراحة المفروض أن لما تشترى موتر ب 160000 المفروض أن بس تغيرة لة زيت وفلاتر لمدة 3 سنوات وبعدين ممكن تحتاج ألى قماشات لاكن القهر أن أشوف عند وكالات عبداللطيف مليانة سيارات من الكروزرات موديلات اللفين وأنت طالع هذا عندة صوت فى العكس وذاك عندة صوت فى عمود الكردان الحل عبى قريز كل 6 أشهر غير المساعدات اللى تخرب بسرعة يعنى قلت حياء،

عموماً أن فى نظرى السيارة الجديدة زى المراة الجديدة حافظ عليها ولاتخلى الهنود يبعبصون فى الموتر واللة لو الواحد ينسى كذب الوكالة ويعتنى هو بنفسة فى الموتر كان يطول معاة بدون مشاكل

أخونا الحل أنسى الوكالة وشوفلك ميكانيكى طيب والاجر على اللة ترى سيارات تيوتا ماهى يعنى معضلة لأصلاحها وعسى اللة يعينك.

وشكراً[/size]

[SilverSniper]

لا يا أخوي عزيز.. ما أردى من الأول الا التالي... اشكهم على التجارة.. والا على شركة تويوتا نفسها..
أنا يوم قالولي بتكلف 12 ألف وطلعتها.. شلت البلف وركبت بداله ماسورة فريون .. صار التكييف الأمامي ثلج بينما الثلاجة والخلفي حار.. اتصلت على مركز جده وقالولي المشكلة الأساسية ( التكييف الأمامي ) صلحته؟؟ قلت مؤقتاً نعم .. قال طيب يعني مشكلتك انتهت.. وش تبغى نسويلك اذاً؟؟.. قلت حاسبوا المخطي.. البلف تجاري.. قال انت صلحت سيارتك وهذا المهم.. قمت وقفلت السماعة بوجهه ورحت لمكافحة الغش التجاري وأخذت حقي منهم بالقوة..
لو اجتمعنا كلنا .. وراسلنا شركة تويوتا واشتكينا لهم من سوء ونصب عبداللطيف جميل... يمكن يصير شي.. وعلى قولة بدر... كثر الطق يكسر اللحام..:good2:

[ابن النخيل]

يا لربع أنا معاني منهم من يوم اشتريت اللاند كروزر
من يوم اخذته وهو فيه شوية رجه فوق الميه ورصصوه لي على الالف كيلو .. ولكن سرعان ما عادت الرجه ورجعتها لهم على 15 الق كيلو ..واخذوا مني 200 ريال وايضا "عادت حليمه لعادتها القديمه" وشكيت ان الجنوط حقتهم ماهي اصليه (اكسسوارات)
وبعد السياره فيها حذفه يمين وصلحوها ب 300 ريال وفي اليوم الثانس حسيت ان الحذفه موجوده!!؟

المهم يا شباب هل هذا طبيعي في اللاند كروزر ام ماذا؟؟؟؟؟؟؟؟؟؟!!!!

[السالمي]

8
8
8
8

يارجااااااااااال كلها تجميع صيني

ماعدا المحركات والباقي خرطي




وتمدحون التايوتا

ياروحي والله ياوكالة المتحد تهون عن عبدالطيف جميل

اقل شي يعطون 7 سنوات ضمان على مواترهم

وكل شي زي ماهو من المصنع

وانصحك ياخوي تتأكد قبل تسوي شي

والله يعينك هذا الحديد احيانن يسلك معك واحيانن يعلك