استفسار بخصوص العضيب للسيارات

[قرناس نجد]

يا شباب الله لا يهينكم

انا موتري فيه طق طقه ومريت على العضيب وكشوف عليها

وطلع لي لسته ودي اصلحها عندهم هل مستواهم او مستوى العماله عندهم في التصليح

ممتاز ولا مشي حالك

الخراب الموجود في السيارة المساعدات والمقصات يعني جلب وغيرة لكن السعر حق شغل

اليد اشوفه غالي

ابي رايكم

[صقر ا لفز عة]

يا شباب الله لا يهينكم

انا موتري فيه طق طقه ومريت على العضيب وكشوف عليها

وطلع لي لسته ودي اصلحها عندهم هل مستواهم او مستوى العماله عندهم في التصليح

ممتاز ولا مشي حالك

الخراب الموجود في السيارة المساعدات والمقصات يعني جلب وغيرة لكن السعر حق شغل

اليد اشوفه غالي

ابي رايكم

أخي قرنآس
تحية يالطيب وبعد :
أنــــا أنـصـحـك دآيــم تـمـُر عـلى ثلاث ورش أقل شيء مـُتـخـصصة في الخلل الذي تشكي منه ُ

بـعـدين تـطـلـُب مـنـه ُ أن يـفـحـصـهـا ويـطـلع لـك قـآئمة { List } بالخرآبآت ووش يبغآلها.

من الأ فــضــل دآئــم مــا تـصـلح الـسـيـآرة عـنـد الذي كـشف عليهـا .

أبـحـث أول شـيء عـن فـحـصـهـا عـند وآحد عليمي {{{ يعني ماهو مشهور }}} .
ثــُم عـند مـنـه ُ أفـضل مـنـه ُ ثــم عـند أحسـن وآحد

حـتى لو طلبو على الكشف درآهم وطلعو لك قائمة خرآبآت وو ش الحـل ؟
أفـضل مـن أن تـصلح أشــيـاء يـمـكن مـا تحـتـآج تصليح .

بـعـدين أذا دخل تحت السـيـآرة : أدخـُل مـعـُه وخلـُه يوريك ويثبت لك أش هو الخرآب

ترآه أنت بأ ُم عيـنيك أفــضل مـن أن يـخـبص لك .


وبـــــــــــــــــــــــذلــــــــــــــــــــــك :
أنـتـهـيـنـا ووفـرت درآهـمك بجيبك وتعلمت شيء جديد .
وضـمـنت شــُغـل مليون بالمئة صح.

قال الأمـام العظيم الشـآفعي رضي الله عـنه ُ:
""" ما حـك جـُلدك مـثـل ُ ظفـرك ‘ فـتـول أنـت زمـآم ُ أمـرك """
مــــــــوفــــــــــــــــــــق
وتــلــقــى خــيـر.


أقول قولي هذا وأسـتــغـفـر الله العظيم من كـُل ذنبً عظيم.

""" و الله ُ أعــــــــلـم وأكـــــمـــل """
تـــآ بــع د ر و ســـي لـلـفـآ ئـد ة:
أ ُعـلـمـك كـيـف تـُـصـبـح مـُهـنـدس سـيـآ رآت وكـهـربائي سيارآت ومـنـآزل ؟؟؟ 100% (http://www.mekshat.com/vb/showthread.php?t=226714) ‏(http://www.mekshat.com/vb/images/misc/multipage.gif 1 (http://www.mekshat.com/vb/showthread.php?t=226714)2 (http://www.mekshat.com/vb/showthread.php?t=226714&page=2)3 (http://www.mekshat.com/vb/showthread.php?t=226714&page=3))

أن تـرى أني قـد أفـدتــُـك بــشيء ذا مـعـنى ... ;)
وأستحق مـــــــنــــــــــــك دعوة صالحة
فـــلا تــنــــــــــــــســآ ني :no2:
مـــــن صــــــآ لـح د ُعـآك.
http://www.allfordmustangs.com/forums/avatars/mplumlee6.gif?dateline=1060436965 (http://www.allfordmustangs.com/forums/members/mplumlee6.html)http://www.allfordmustangs.com/forums/avatars/mplumlee6.gif?dateline=1060436965 (http://www.allfordmustangs.com/forums/members/mplumlee6.html)http://www.allfordmustangs.com/forums/avatars/mplumlee6.gif?dateline=1060436965 (http://www.allfordmustangs.com/forums/members/mplumlee6.html)
تـحـيــــــــــــــــآ تي
<<< أ بـو عـبـد ا لـرحـمـن >>>
""" ا لأ صـيـل ا لـحـجـآ زي """
{{{ صــــقــر ُ ا لـفــــــز عـــة }}}

[ابو خالد 1992]

هـــــــــــــــــــــج نصيحة لوجه الله تعالي لو تكسر عليك سيارتك كسرة كسرة اسأل مجرب نصااااااااااابين خابرلك باكستانية زي الورد إذا جيت بنك الراجحي خذ معه يمين سيدة لين يجيك حرف تي شف الورشة على اليسار كلهم باسكتانية وشغلهم زين المحل على فتحتين شرقية جنوبية

[سهم قيادي]

فحصو لي سياراتي وطلبوا علي 3200 ريال اجرة يد فقط بدون قطع الغيار:(
صلحتها بر مع قطع الغيار 2500 ريال عند فلبيني :good2:

[منصور الغامدي]

حبيبي عليك بميزان ((((الدرع)))) أفضل وأرخص من واقع تجربة0
وان ماخاب ضني خوينا ابو خالد 1992 يقصدهم0

[تاميلون]

نعم نصيحة مجرب أبتعد عن العضيب بس خرد فلوس على الفاضي

[قرناس نجد]

جزاكم الله الف خير ما قصرتو بشوف غيره

والله يكتب الي فيه الخير

[شطب]

اخي الكريم


اللي فهمته منك ان المشكله جلب

يعني مايبيلها شي

اذا تبي نصيحتي ابتعد عن المحلات المشهوره لانهم بياخذون فلوس زياده عشان الشهره

دور لك ورشه صغيره متخصصه بالتربيط وبيحلون مشكلتك وماراح يكلفك كثير واذا ماتعرف اسأل ترا من سأل ماضاع وانصحك لاتبعد عن الصناعيه القديمه

اتمنى لك التوفيق

[مكشات 505]

لا بعد ازود على كلام اخواني انك لو تجيب القطع انت قالو لك ماتركب او تجاريه ويقولون احنا نجيب القطع ويجيبونها من محلات خاصه لهم واسال اي واحد يوزن او يغير جلد عندهم قل لهم من وين الفواتير تلقها من محل اسمه الاعتماد

[العودالازرقhk]

اخوي سلام عليك شغلك بسيط جدا انصحك بورشه ممتازه ورخيصه بس عيبها اشوي زحمه بعد بنك الراجحي يجيك محل كفرات الحميدي لف بعده يمين تجيك الورشه على اليسار وهذا جوال الهندي 0508179715 وان شاء الله ماتندم واذا الشغله مايشتغلها بيدلك ان شاء الله
والله يكتبلك الصالح
ويوفقك دنيا واخره وجميع المسلمين

[من البدائع]

نصيحة مجرب

فر من العضيب فرارك من الاسد لا يغرك الديكور وشكل الورشه

نصب وعدم اتقان للعمل وغلا فاحش

تصور يأخذون اجره مقابل خراب سيارتك

ولكن هناك ورشه للعضيب اخرى تتفق معها بالاسم وتختلف عنها في الامانه والعمل والاسعار

الاولى المشهوره ابتعد عنها ولهم فرع في المصيف قريبه من بنده المصيف على طريق الملك عبد العزيز ولهم فروع اخرى في الصناعيه حيث لهم مشاكل كثيره مع زبائنهم

والاخرى التي انصحك بالذهاب اليها حيث اتقان العمل وسعر المناسب والامانه

تجدها مقابل جامع الميداني وقصر الحريري على طريق الملك عبد العزيز قبل ان تصل الى اشارة مخرج تسعه وانت متجه شمال داخل محطة بنزين

[شاص]

ما أزيد على كلام الشباب .. العضيب الله يهديه غااااااااالي وشغل أي كلاااااااااااااام من واقع تجربة .. صلحت عندهم موتري جلب وما جلب وما تغير بالموتر شي وماتم شهرين إلا وأنواع الأصوات والقرقعة

[خالد الفالح]

العضيب ******************من واقع تجربه وعلى كفالتي واحد من مدراء المراكز حقتهم سابقا لو تسمعون وش يقول يسوووون كان ماعاد مريتوه ابد راح شيبانهم الله يرحمهم وجا عياله الله يهديهم ما يبالون وش يدخل الصندوق حلال ولا حرام واشهد الله على ما اقول

[هلي93]

يبدو إنهم خذو سمعه بزياده

[kmk9999]

يا أخوان من واقع تجربة العضيب ******والدليل دخلت سيارتي وهي تعشق وكل شيء تمام وكنت أبي أغير الكلتش والديسك والصحن حق القير قالوا إنهم خلصوا ويوم أخذت السيارة أبي أعشقها ما رضت تعشق قالوا عندك الحذاف غيرو الحذاف وقالوا لي على حسابك قلت أوكيه وأنا بداخلي أقول ماراح أعطيهم ولا ريال
وغيرو الحذاف وما صار شيء وقالوا علبة الكلتش قلت غيروه طلع المشكلة من علبة الكلتش وهم اللي خربوه وخليتهم يتحملون قيمة الكلتش والحذاف فكوه ويالله رجعوه لأنه مخدوش
المهم أقولكم لا أحد يتعامل معهم نهائيا وكنت دائما إن بغيت أتعامل أتعامل مع واحد جنسيته تركي ودائما يقول لي المشاكل اللي تصير بالمركز إلين ما تركهم قبل شهر وهو الحين على طريق الملك عبدالعزيز يشتغل عند واحد صديق له بس ما شاء الله الورشة الله هو به توظب مكائن وقيور واللي يشتغلون بهالشغلات أتراك وممتازين وصرت أي شغلة أسويها أجيبه له وما يآخذ أي زود ريال بالعكس إذا بغى يفحص السيارة يقول لك تعال أوريك الخرابات اللي بالسيارة بالضبط

والله يوفقكم ويعينكم

[kmk9999]

وأزودكم من الشعر بيت تدرون إنه يصلح مكائن السيارات الخاصة بمنسوبي الهيئة مجاناً
ليش علشان ما يمسكون عماله وقت الصلاة واللي يقول هالكلام نفس العامل التركي اللي كان عندهم

[ابو jgjc]

والله انا رصصت عندهم بس مازال موتري يرج
اتوقع اخذو سمعه بزيادة

[AMERALNET]

الله يستر منهم
والله اني كنت بروح لهم ودقيت عليهم واخذة الوصف ومادري ايش
عشان بسوي صيناة الدوريه لسيارتي
بس يوم شفت علمهم وهذا شغلهم كتبت عليهم السلام

[سيف الظفير]

اسمع يالقرم

وللكل يالغالين

انا معي جيب 2009


كان الدبل الثقيل ما يشتغل لآن الحساس خربان

مريت العضيب عطاني لسته وقررت البيع

لان السعر بيكلفني فوق 7000

واصلاح الدودة حقت الدركسون فوق 3700


الشاهد بالموضوع مريت على البازعي ونفس الكلام بـ 11.000 ريال


وطلعت السالفة كلها سلك خاص بالطبلون ولا كلفني والله ولا ريال واااااااحد


والدودة اللي تهرب سويتها عند الطاير بالصناعية بت 700 ريال في اربع ساعات


نصيحة يالربع

والله ان العضيب حرامي كبير وكل هاللي تشوفونةة فقط شهره

الكهربائي اللي بفرع مخرج 5 الزول اللي يسوق البل احسن منه الف مرة

الشكوى لله خسرت خساير فوق 500 ريال وبالاخير

سلك ولله الحمد


للعلم ماطور الدبل للاندكروزر فوق 6000 ريال

[سيف الظفير]

اسمع يالقرم

وللكل يالغالين

انا معي جيب 2009


كان الدبل الثقيل ما يشتغل لآن الحساس خربان

مريت العضيب عطاني لسته وقررت البيع

لان السعر بيكلفني فوق 7000

واصلاح الدودة حقت الدركسون فوق 3700


الشاهد بالموضوع مريت على البازعي ونفس الكلام بـ 11.000 ريال


وطلعت السالفة كلها سلك خاص بالطبلون ولا كلفني والله ولا ريال واااااااحد


والدودة اللي تهرب سويتها عند الطاير بالصناعية بت 700 ريال في اربع ساعات


نصيحة يالربع

والله ان العضيب حرامي كبير وكل هاللي تشوفونةة فقط شهره

الكهربائي اللي بفرع مخرج 5 الزول اللي يسوق البل احسن منه الف مرة

الشكوى لله خسرت خساير فوق 500 ريال وبالاخير

سلك ولله الحمد


للعلم ماطور الدبل للاندكروزر فوق 6000 ريال

[الشهابة]

ما اقول إلا حسبي الله و نعم الوكيل على العضيب و بالأخص فرعهم في مخرج 5 في شمال الرياض في حي المصيف ..

صلحت عندهم دفرنس كابرس بـ 1200 ريال و قالوا توكل على الله شغلنا الأفضل و ضماننا شهر و بعد أسبوع بالضبط انفلت الدفرنس كامل من مكانه و صار حادث يروع و لولا حفظ الله كان راحت ارواح و يوم راجعتهم قالوا تأكد من سيراتك يمكن مسرع او كفراتك خربانه و لكن شغلنا مضمون مع العلم إن الدفرنس منفلت من السياره كامله و الكفرات سليمه ماتفقعت و لا كنت مسرع سرعه جنونيه و لكن حسبي الله و نعم الوكيل

[sgl2002]

العضيب يجيب لك الخراب ويحط معه ألف شغله ...

كان معي ددسن أحس فيه فضاوة أو طقطقه في الكفر الأيمن ...

رحت له قال هذي ركب السيارة ،، وما تجي لحالها لازم تجيب مقص كامل مع الركبه للكفرين ، ولازم نسوي تربيط رمان وخرابيط .. المهم حسبها طلعت 900 ريال ...

رحت لميزان بالصناعية ،،، قال سيارتك بس فيها ركبه يمنى ،،، قال رح اشتر ركبة ياباني بـ 70 ريال وتركيب 30 ريال وتربيط رمان بلاش ...
يعني من 900 إلى 100

[AZOZ9091]

نفس القصه حصلت لزميلي مايبدل القير وقالو توضيب يكلف 6000وتراجع عن اتوضيب وبعد وقوف الموتر شهر عند البيت جاه ابن حلال وقاله رح لهاك المحل في الصنا عيه القديمه سوداني ورفع الموتر وخذ هاك القطعه وغيره والحمدلله سلك توقعون بكم ----------------------46ريال فقط فرقكبير

[ابوفتو]

اااااااااااااااه نصابين لعبوا في سيارتي فرع السويدي شارع الابراج
الله لايوفقهم كلفوني 2300 ريال ونفس الاصوات ماتغيرت

لكن حسبي الله عليهم ونعم الوكيل

[برق السنا]

انحش عنهم خذوا قطع غيار سيارتي ومن اليوم الثاني رجعت لهم
ولقيت عمالهم سارقينها وقلت لهم ياللي ما تستحون رجعوا قطع غيار سيارتي
االقديمة وركبوها ومن الخوف اني اجيب الشرطة لهم ركبوها غصب عليهم
ولا عطيتهم ولا هللة وربي حراام الواحد يروح لهم×

[نجم2000]

اخوي

شفلك ورشة تربيط حليوه

وخله يضمن(يدبل) لك الجلد ويربطة

[فكسار الأزرق]

معقوله هذا تقييمها والزبائن يسكرون الشارع من كثرهم وخاصة فرع مخرج 5 !!!
ياخوي ما تلقى موقف لسيارتك داخل الورشة مع كبر مساحتها , والفني يالله يعطيك وجه من كثر اللي يسحبونه
أنا صلحت موتري عندهم أكثر من مرة , والحمد لله ما اشتكيت من شيئ
احترم آراكم , ولكني جربت
صراحة أرتاح للتخصص , فهم متخصصين بنوعين من السيارات فقط ( لكزس , لاند ) ويستقبلون باقي الانواع بالشغلات الخفيفة ( وديت لهم هايلوكس واعتذروا لي ) فيعني لو يشتغل عندهم الواحد وهو عليمي بيتعلم بسرعة لأن المواترمعينه , وخاصة الاند كروزر عشر موديلات متشابهة القطع والتصميم
على العموم الله يوفق الجميع ويبارك

[ALBDRANE]

من ناحيتي أقول لك عض ثوبك ....

[واطي الجمرة]

نعم نصيحة مجرب أبتعد عن العضيب بس خرد فلوس على الفاضي

:good2::good2::good2::good2::good2::good2::good2:: good2:

[ساري 111]

انحش ..
خصوصاً اللي موجود بمخرج 15 عمالتهم داجه

[عقيل2009]

انحش؟؟؟؟؟؟