وابثفندراه.....

[الملهماوي]

السلام عليكم ياشباب

موتري باثفندر 2004 تماتيك

زيته ينقص شي مو معقول 2600 كيلو باقي اقل علبتين تقريبا

فيه صوت طقطقه في المكينه اسمعها تقريبا من جوانب المكينة وامامها

راعي ورشة وصفت له الحالة قال يمكن تحتاج توظيب

وش شوركم يالربع ترا ضايق صدري مره على الموتر

[ابومشاري 111]

السلام عليكم

يالغالي انا قد صار لي نفس موضوعك هذا
بس الموتر كامري .. ويوم رحت وفحصت قالو لي
عامود الكرنك بوسط المكينة يعني توظيب :(

ان كانك ماشي عليه واجد والزيت ناقص
وصوت الطقطقه موجود اتوقع توظيب

تقبل تحياتي يالغالي .. والله يعينك

[سفاري959]

الله يعينك نقص الزيت مشكله وعيب مصنعي في الباثفندر والكامري اذا من سكان الرياض عليك بورشه ابو صالح التركي الصناعيه القديمه تحياتي لك

[أبوحمييد]

بالنسبه للباث فيه ورشة ابوبراهيم متخصص بالباث وكل السيارات الي عنده باثفندر ورجال سعودي ويشتغل بيده ممكن يفيدك اكثر للسياره....
وهاذا رابط لرابطة الباثفندر ان شاء الله يفيدونك....
http://www.mekshat.com/vb/showthread.php?t=156827&page=294

[دحيم اللوح]

لك رسالة على الخاص ...

[بدوي جنوبي]

اذا ماخاب ضنى ان الباث ياخذ 3 علب ونص
والنقص معروف فى الباث
وليس كل سياره تنقص يعنى تحتاج توضيب .

اما الصوت اللى يظهر معك
ترا صعب تحديد الصوت ومو اى واحد يجزم ان الصوت من عمود الكرنك
ممكن يكون من البلوف ،، او غيره .
عموما
اذا الصوت فعلا من الكرنك ولك فتره تستخدمه وما تطور الصوت يعنى ثابت
ما عندك مشكله استخدم السياره
لكن حافظ على مستوى الزيت
ولو تغير الزيت بلزوجه اعلى يكون افضل فى مثل هذه الحالات
يعنى اذا تسخدم 20 w غيره الى 30 w

انت ما ذكرت هل الصوت ظهر فجأة او من اول

شف الصوره هذى تبين تأكل سبيكة عمود الكرنك
http://www.mekshat.com/pix/upload03/images144/mk32037_8i.jpg

ممكن عندك تأكل فى احدى السبائك



والله اعلم

بالتوفيق

[قمري قيال]

من رايي ان النقص له اكتر من سبب اما جلد او شنبر اوصوف المكينه الاماميه او الخلفيه
ومثل ماقالو الاخوان النقص طبيعي بالباث اذا كان بدون دخان الابيض

واما الصوت اذا طقطقه متواصله ومرتبه وخفيفه الى متوسطه فهو صوت البلوف وعادي
واما ان الصوت يزود وينقص وخاصه لا صار الضغط قريب الثنين ومع الدوس الخفيف فاحتمال سبايك ويتبعها عمود الكرنك
والافضل تدور واحد مثل موترك وتوقف جنبه ويبين الفرق
وان شاء الله انها خفايف
وارجو اني افدتك

[أبو طريبة]

اخوي تأكد من مسامير الثلاجة بالنسبة للصوت !
اما بالنسبة للزيت انا ازود باثفندري علبة ونص كل 1000 كيلو !
اذا كان معه تفتفة احتمال يكون البلف قافل !

[سوبر VTC]

النقص طبيعي بالباث
تقريبا كل 1500 ينقص علبة الا ربع
احيانا نص علبة
و النقص له اسباب كثيرة
ضعف الشنبر
جلد بلوف
وجه كرتير
وجه غطاء الصدر
صوفة بيت القير و المكينة
تهريب وجه سيفون
وجه غطاء راس المكينة




بالنسبة للصوت
اخبر راعي باث عبا بنزين احمر 95 و راح الصوت :good:
الصوت قد يكون
من شدادات جنزير التيمن
او من الجنزير
او من جلد عمود التيمن
او من سبايك العمود
او بنزبستم بسبب الجلد او الحرارة الشديدة
لو كانت الطقطقة قوية
فهو سبايك
لكن اعتقد ان موترك شدادات او بسبب نوعية البنزين
متى يطلع الصوت ؟؟؟
اي موتر تشغله و هو بارد لازم يطلع صوت للصبابات لان كل الزيت نازل بالكرتير


افضل حل للصوت
ادخل النفود و اشبك الدبل
اذا حملت المكينة راح تبين اذا فيه اصوات بالمكينة
لان ميزة النفود يطلع عيوب المكينة (يهينه)
اخبر جيب به صوت بنز بستم منشعر البستم من عند البستم
الموتر مكينته ممتازة
لكن
اذا دخل النفود طلع صوت مزعج جدا جدا للبساتم
فك افياش البخاخات بالتسلسل و الموتر يشتغل
فطلع صوت الطقطة من البستم الرابع
غير البستم لوحده و راح الصوت :good2:


ان بغيت ورش ببريدة علمن
الرياض
عندك ورشة ابو ابراهيم تخصص باث
بصناعية الدائري الجنوبي
او
ورشة التركي بالصناعية القديمة

[الملهماوي]

والله احرجتوني ياشباب بتفاعلكم واحساسكم بي

انا اشهد انكم رجال عيال رجال
وينشدّ بكم الظهر
الجميع وبدون استثناء
اقولها وبكل صراحة

انكم خففتوا علي بردودكم اللي تبرّد على القلب

وانا الاحظ اغلب الاخوان يمدحون ابو ابراهيم بإذن الله ابمرّه واوافيكم بالعلم ونفيد غيرنا

شكرا لمكشات:s اللي جمعتنا بالوجيه الطيبة


سلام للطيبين

[الملهماوي]

السلام عليكم
رحت امس لابو ابراهيم في صناعية الدائري وسمع الصوت وقال هذا صوت صبابات الزيت ويحتاج توظيب وش راي الربع

[ستوك]

الله يعينك يااخوي

انت راعي تدعيس على الموتر

طيب كم يكلف التوضيب

[عبدوش]

واخيبتاه عليك ياباث فندراه

[سوبر VTC]

طيب لا تستعجل
مر على ورشة ابو صالح التركي بالصناعية القديمة
تخصص نيسان باترول
ورشته بجنب مركز ترايستار
وشف وش يقول لك عن الموتر
ان بغيت رقمه علمن
اقل شي مر على 3ورش

موفق

[ادولف هتلر]

السلام عليكم اخوي

بعد اذن الادارة 0505211693

عندي لك ان شاء الله يفيدك بدون فك وتوضيب وكل شي ومجرب صعب اكتبه لك دق علي واوصفلك مكانهم واشرحلك لا لي دخل فيهم ولاابي منك شي بس انبهرت من الي عندهم

تحياتي

[الساهي 2]

أنا عندي نقص بالزيت بس لاحظت فيه تهريب زيت فوق القير اعتقد تهريب صوفة خلفية بالمكينة الحل ؟
مع باثفندر 2005