تكفون الفزعه يانشاما مكشات

[رايح جاي]

السلام عليكم ورحمة الله وبركاته

اخواني الكرام مشرفي واعضاء هذا المنتدى الغالي ( رجاء )

اشتريت جيب لاند كروزر جي اكس آر موديل الفين البريمي من رجل يظهر عليه الصلاح وطمني على ان السيارة استخدامه وان مافيها شيئ وانا شريت وجه الرجال قبل مااشري السيارة ولكن فوجئت عند تغيير الزيت عندما اخبرني العامل بان الزيت ناقص بحدود علبة ونصف ، وطبعا غيرت الزيت وبعد ما مشيت على السيارة 1200 كم قست مستوى الزيت فوجدته ناقص فعلمت حينها ان السيارة تحرق زيت :mad: استشرت بعض الاصدقاء فاشاروا علي بالبيع ولكن يشهد الله اني مابيعها وامتحن فيها مسلم .
والمطلوب من اخواني الكرام الشور علي هل السيارة مبوشة حقا ؟ وهل اوضب السيارة او اشتري مكينة من التشليح ؟ رغم ان السيارة لايظهر لها دخان من الشكمان وهذا اللي خدعني في البداية وحتى الان ، فقط الاحظ عند الصباح اثناء التحمية خروج دخان وعند التعشيق وبداية المشي فقط .
والسؤال الأول : كيف يمكن ان يحدث هذا لموديل جديد نسبيا خاصة اذا كانت ماشيه عندما اشتريتها 104000 كم فقط حسب العداد ؟
والسؤال الثاني : اشيروا علي مالذي افعله وفي حالة التوظيب اي ورشة تكون امينه لانه ممكن اوضب نصف مكينه اومكينة كاملة حسب راي المهندس ؟
ارجو ممن لديه علم بهذه الحالة افادتي وجزاكم الله خير الجزاء .

[الدبل الثقيل]

السلام عليكم ورحمة الله وبركاتة...
ياخوي أولا قل/ لاحول ولاقوة الا بالله انا لله وانا اليه راجعون اللهم أجرني في مصيبتي واخلف لي خيرا منها
ثانيا ارجع للرجال وقوله السالفه وانك ماتبغى السيارة ويردلك قروشك ولو ياخذ الفين ريال حق استعمالك مايضر ... وان لم ينفع اشتكيه لشيخ المعارض عندكم او لأي جهة حكومية... ولاتنسى قبل كل شي انك مسلم وليس بينك وبين ربك معاريض أو واسطات .. ادعي الله في الثلث الأخير من الليل انه يفرج همك وألح في الدعاء ولاتيئس .. والله ييسرلك...

[رايح جاي]

شكرا وجزاك الله خيرا اخوي الدبل الثقيل فقد واسني كلامك وشد من ازري والله يعوضنا خير اما الشخص اللذي اشتريت منه السيارة فقد ذهب في حال سبيله ولا اعرفه الا باسمه في الاستمارة .

[* الخطيب *]

أخوي / رايح جاي

من حقك ـ شرعا ـ الرجوع على صاحب السيارة فلك ما يسمى بخيار العيب ، ومسألة العثور عليه أمر سهل عند تقديم الشكوى ، حقيقة أكثر ما يغيظني مسألة الغش ( المتعمد ) .

الله يوفقك .

[الدبل الثقيل]

ياخوي لاتتنازل عن حقك .. اذا كان استعمالك للسيارة في هذه الفترة استعمال حشمة ومتأكد ان الخراب من قبل ان تشتري السيارة... فابحث عن الرجل عن طريق كمبيوتر المرور او الأحوال... ولاتتنازل عن حقك أبدا... ورجع السيارة ولو أخذ ثلاثة اللاف حق الأستعمال مايضر... ولاتنسى الألتجاء الى الله انه يحلها بقدرته سبحانه...أسأل الله أن يفرج همي وهمك وهموم المسلمين...

[مفتاح التقنية]

الله يكون بعونك ويفرج همنا وهمك

أولاً مثل ماقال اخوي الدبل الثقيل لا تخلي حقك يضيع والغشاشين بإزدياد مادم كل واحد منا يقول مادري وشلون اجيبه خلاص راحت .

ثانياً السياره لا تحتاج توضيب لا نص مكينه ولا مكينه كامله علتها بسيطه واذا لقيت راعي السياره خذ فلوسك منه وخلو يجي نصلحها عشان ما يغش الناس

( لاحول ولا قوة إلا بالله )

[رايح جاي]

اخواني الكرام
جزاكم الله خيرا و حفظكم من كل مكروه ، مضى على البيع فترة وأعلم بطول الطريق ولن اخرج بشئ يعني مسالة ارجاع السيارة صعبة لكن ساحتسب على الله وإذا تحسنت الأحوال المادية فسوف ابحث عن ورشة للتوضيب وأسأل الله ان اوفق في ورشة امينه .
ملاحظه : من كان يعتقد مثلي ان نظافة البودي والداخل وحداثة الموديل لايمكن الاان تكون بقية الاجزاء نظيفة ايضا فهو مخطي وما حدث لي خير دليل .

[جميل جمال]

اخوي رايح جاي ..

معليش يمكن اقولك شي ما يعجبك ..

الخطا خطاك وانا اخوك ولا الحين ما احد يشتري سياره ما فحصها ,, كلها 200 ريال او اقل وتشيك على الموتر بالكمبيوتر ولو فيه صاموله مرتخيه علموك ..

الحين ما احد ينظمن بها الدنيا ياخوي .. طيب يمكن السياره ما كانت استخدامه شخصي يمكنها كانت مع اخوه ومراهق وطايش وجالد الموتر الين بدا ينقص ..

عموما نصيحتي لجميع الشباب والاخوان لاحد يشتري مستعمل الا وهو فاحص الموتر لانه مهما بلغت معرفتك الا انه قد تغفل عن شي او ماتدري عن خلل بالسياره ..

واسفين على الاطاله.

[رايح جاي]

مشكورين والله ييبعدكم عن الشر و لايحرمني منكم .

[عاشق بلاحدود]

بسم الله الرحمن الرحيم
اخى طالب المشورة اولا انبهك ان الجيب يأخذ من الزيت 7 علب بدون فلتر الزيت ومع الفلتر 7 ونصف وثانيا ارجوان تعرض سيارتك على الوكالة ووكالة السيارة هى عندها الحل لمشكلتك

[السالمي]

يالغالي هذي تصير دايم

ولالها علاقه في الممشى

علاقتها في الاستخدام والظاهر اللي انت شريت منه كارف ابوه

ولاتقدر ترجعه له لانه بيقولك انا بعتك كومة حديد والواجب عليك انك تشيك عليه قبل لاتعطيني فلوسك

بيحجك لاتتعب نفسك واساسن تشييك الكمبيوتر مايطلع اذا الماكينه تنقص او لا

لاكن معايرتك للزيت قبل تشغيل الموتر وهو في المعرض

يمكن توضحلك خاصتن لون الزيت

والا المسأله ذي توفيق من الله



واذا تبي شوري ها الالفين اللي بيرجعها لك زد عليها الفين ثانيه

وخذلك مكينه مستخدمه من التشليح تشوفها قدام عينك

تلقى موتر مصدوم ومكينته جديده وبلا دوخة رااااس

هذا اذا كان موترك تمام وبديه زينه

[محب الشمال]

اخوي
انا اقول انك تدور على رقم الرجال عن طريق المرور
وتتصل عليه وتقوله ايش صار معك يمكن يتغير شي
واذا كلمته ذكره ان الغش حرام وان ديننا حذرنا من الغش
لكن مسألة انك تشتكيه هذي صعبه وليس الصعوبه في انك لن تاخذ حقك
لكن سوف تجلس لك سنه او اكثر وانت من الشرطه للمحكمة للحقوق وشوف عاد
كم مره تستأذن اذا انت موضف وشوف كم مره وانت رايح جاي جاي ورايح وعلى هالموال لين انت تمل وتقول
خلاص بطلت ولا ابي اروح المحكمة عشان موضوع بسيط
أو انك تبيع السياره اذا انت كرهتها في المعارض وتقول العيب الي فيها وتوضح كل العيوب الي فيها
والله يحفظك ويرعاك

[بن نويشر]

صح لسانك جميل جمال ...
وبالفعل الخطأ خطأك عزيزي (رايح جاي) كان الأولى الكشف على السيارة مسبقاً والتأكد من محركاتها . ومثل ما يقولون (ما يقع إلا الشاطر) وهذا درس لك ولغيرك مع إحترامي لك ، وقدر الله وما شاء فعل . إنتهى الأمر .

وعليك عدم الإستعجال وقم بفحص السيارة مجدداً لدى الوكالة أو ورشة متخصصة في هذا المجال . كما آمل التأكد من عداد السيارة إنه لم يعبث فيه وإن العداد صحيح وسليم .

كما ممكن أن تكون المشكلة في شمبر أو خلافة أو أن هناك تهريب ما في الماكينة ولا تستدعي المسئلة لتبديلها .

وتقبل خالص محبتي ..

[ابو رجه]

بسم الله اولا ممكن تكون الدعوه الي في سيارتك يا اخوي من ثلاث شغلات اولها
1: جلد البلوف
2:ضعف الشنبر :
3: فيه تهريب من الصوف الداخليه ولا الخارجيه وبعض احيان تجي ليات بلاستك مقوى تكون منها العله
وشوف ترى الشغله بسيطه عادي لاتهمك ممكن تطلع على اهون سبب

والله اعلم