مكان مخيم قريب للرياض

[كشوتي]

السلام عليكم ورحمة الله وبركاتة

ياشباب وشيبان مكشات الفزعه ثم الفزعه ثم الفزعه

قدرالله علي ووقع علي الاختيار لاكون مسئول رحله عائلية كبيره

وقالو لي وخفو بي انت راعي البر وانت اللي اختار لنا مكان بالمواصفات التالية:
1/ مهوب بعيد عن الرياض
2/ فية ربيع
3/ ارضه زينه (رميلات)
4/ لازم يكون حوله محطة والا تموينات كبيره
5/ يحبذ يكون فية ارسال جوال
6/ يكون فيه توصيل طلبات >>>> هاذي من عندي :D

تكفون ياالربع لا اخلا ولا اعدم ابي كروكي الموقع :)

[الضاري]

هلا بكشوتي ..

وش رايك بحديقة السويدي .. :p

أمزح يالغالي لاتزعل..


تدري شلون أدخل على الرابط هذا يمكن يعجبك المكان ..
روضة خريم ( من الجنوب ) الخميس 25 / 11 (http://www.mekshat.com/vb/showthread.php?t=26795)

والله يعينك على تالي الأمارة..

[كشوتي]

هلا باخوي الضاري

ويني هي به حديقة السويدي >>>>مصدق :looney:

روضة خريم حلوه لاكن المشكله انه زحمة مره
ولو يكون فية مكان اقرب وعلى جال شعيب وجنبك نفد وارض مربعه >>>> اسعد الله

النداء الثاني للشباب والشيبان ماعطيتونا العلم

[مدلّه الرعيان]

الاخ / كشوتي
السلام عليكم ورحمة الله وبركاته
تبي الصراحة ، اذا فعلا" اللي انت ذكرت هي طلبات ربعك ، فشوري عليك اذا انت موظف دولة فقل لربعك اني مكلّف بالحج وإذا كنت تاجر فقل ابسافر اجيب بضاعه ونحش بعمرك...... لو ها الطلبات تحققت حول الرياض ، انا مستعد اراهن ان تكون عجائب الدنيا ثمان بدل سبع !!!!!؟؟؟؟؟؟

اخوك / مدلّه الرعيان

[ملقط الجلة]

هههههههههههههههههههه

الاخ / كشوتي بعــــــــد التحية ( بدون زعل)
من أسمك :dance: بأقولك تطلع بجنب أستاد الملك فهد :confused:






بدون زعل
:bounce: :bounce: :bounce: :bounce: :bounce: :bounce: :bounce:

[هـاوي نفود]

عنديلك مكان مسككككككككككككككت <<<<<<<<<< تراي بوهقك

عموماً تراي ماعرف أي مكان بس على خط الرياض القصيم السريع في شعبان صغيرة حليوه وتقضي لزوم وقريبة للخط و... و .... واللي أنت قلت ( تراهن واااجد )

أتوقع أن هذيك الأماكن بتعجبكم .. وتقبل تحيات موهقك

[وضح النقا]

~


شف ياكشوتي أنا أبفزع لك وأبدلك على محيلٍ زين .. عساي آخذ أجرك عقب مااشتغلوا الشباب عليك ذبات :p

وهالمكان يقع في ألتقاء شعبان صلبوخ مع نفود الثمامه ..لكن كيف توصله؟

فيه الله يسلمك طريق ممهد يمر بجانب مزرعة (العاذريه) اللي في الثمامه.. خذه وخل المزرعه ومسجدها على يمينك ووجهك شمال... بتصير النفود على يمينك والحزوم (الارض الشداد) على يسارك أبتل ألين يجيك نقا الثمامه على اليمين (طعس عالي مره) إذا جا على يمينك شف فيه منازل رمليه على يسارك وشعيبات وش حليلها والربيع بادي فيها ..إذا وصلت هناك فدور لك مكان زين ...وطق خيامك .. وأدع لي ..ترا مافيه مكان اقرب وازين من هالمحلات.. ولا تكثر الدوجي :no2: :looney:

[كشوتي]

الاخ مدلة الرعيان
وعليكم السلام ورحمة الله وبركاتة

ياخي مافية مستحيل بالعزيمة والاصرار نحقق المستحيل >>> مرشح في الانتخابات ;)

لا فيه اماكن يعني صح مهي قريبه بالمره يعني (حلتة خرازه ) وفيها اكثر من المواصفات اللي طلبت

وبالنسبة لتصريف الربع ماعاد يمدين اصرفهم ولا ودي وابشرك لقيت المحل اللي انا ابية وزياده علية
حوله صندقة سياحية يسويلك جولات سياحية اماكن طلح يوديك تبي مناقع ماء يوديك تبي تلقط فقع يدلك
تبي شعيب يمشي يوديك ووسيلة النقل عندهم خمس نجوم بعارين 4*4 :D :D

[كشوتي]

الاخ ملقط الجلة

ابشر طال عمرك باكشت جنب الاستاد ومنها نشوف المباريات بعد :mad: :mad:
شورك وهداية الله بس اهم شي وش تقترح اي جهة من الاستاد :cool:

[كشوتي]

الا خ هاوي نفوذ

تقولها صادق انت لايابعدهم ماوهقتني فعلا طريق الرياض القصيم فيه مواقع مسكته
يحبها قلبك ومليانه شعبان والربيع فيها بادي عطها بس 15 يوم وتشوف الارض كلها خظراء
وشكرا لمرورك

[كشوتي]

هلا باخوي وضح النقا
والله الشباب ماقصرو بالذبات واهم شي يوسعون صدورهم في ها الاجازه

المكان اللي تقوله هو طعس الاستعراض اللي يسمونه الهرم
اذا كان هو والله انه قريب بش مشكلته طريقه جلد وعلشان كذا ماطراء على بالي في المره
بس انت جزاك الله خير نبهتني له وشكلي اليوم ولا بكرا باسير علية
والله يجزاك خير اخوي على التفاعل وابطقك بكم دعوه يحبهن قلبك .

[خيرالحصاد]

أنصحك يا الحبيب بمنتزهـ الثمامه فهو رائع من حيث التجهيزات والطلبات تاصلك لحد عندك
بس تراه بآجار مهوب ببلاش

[كشوتي]

هلا باخوي خير الحصاد

منتزه الثمامه زين بس مبالغين في سعره وخدماته حلوه يعني مافيه تعب مره يعنى ماتحس انك كاشت
ويصلح طال عمرك للسودانيين اما طيور البر لوتقولهم بلاش ماقبلوا علية .

وفية مشكله كبيره ارضه اذا جاء مطر ماتنفع ابد الخيمه تطلع بركه العام كاشتين فيه يوم جاء مطر قوي صرنا نتنقل بين الخيام بلستك :burnout2:

[سهود و مهود]

انا اللي أشوفه تكشت بالقرب من الجسر اللي بالدخل المحدود قل ليش ؟؟
1- عندك مناظر خلابة ولا في المالديف
2-حقين العسكريم والبليلة كل دقيقة مشيكين عليكم
3-اذا واحد مضيق صدوركم ترمونه من فوق الجسر
4-اهم ميزة مرور باص نادي النصر الازرق والاصفر من جنبكم
5-قرب تشليح المرور اذا احتجتوا لا قدر الله استبنه ولا رديتر
6-القرب من التفتيش أمن وأمان
7-على يمينك ويسار هالأجانب كل واحد طالع معه شواية حقت الوقافي يشوون سمك فسيخ ولا لحم بتلو (عجل)وطيرقة شويهم رائعة تعلم
8-مكان مكشوف على شمال الرياض تشوف حي السفارات والديوان الملكي ولا تنسى تجيب معروض
9-احيانا يوجد سامري وهذي ميزة اذا عندكم واحد لابس خاتم احجاز كريمه عشان تسرونه
وأخيرا : يوجد بالمنطقة صرف صحي

امزح حبيبي لا تشيل بخاطرك واتمنى لكم رحلة سعيده

سهود و مهود