سؤال / وش أقرب طريق لفيضة البريكة للقادم من الرياض؟

[المغترب55]

السلام عليكم

هلا بالغالين

كيف حالكم؟

حبيت اسألكم عن افضل طريق لفيضه البريكة وشعيب الاجردي وشعيب اسهل

هل الافضل عن طريق مشذوبة او الاسياح او سامودة او غيرها
وهل ابا الورود حولها او لأ

افيدوني جزاكم الله خير

[ابو باسل]

اتوقع الأسهل لك هو قدومك عن طريق سامودة اذا كنت وجهتك البريكة
اما ابالورود فيبعد عنها قرابة 100 كم

[المغترب55]

هلا ابو باسل

شكرا على الرد

لكن
هل تقصد اني اجي عن طريق الارطاويه حفر الباطن ثم افرق من عند البطيحانيه؟


ارجو من الاخوه يفيدونننا

[ابو كلام]

السلام عليكم (وش سيارتك)

[غيث المزن]

هلا بك اخوي
انا مشيت يوم الاربعاء الماضي وفرقت مع الاسياح وطلعت على ابالورود وامسيت فيها
ونهار الخميس طلعت من ابالورود على قبه على الطراق وطلعت صحراء
تقريباً 13 كيلو ونزلت على فيضة ام سدر
وتراها اطيب من البريكه وبقوه ,,

وعقبها روضة ام سوسه وربيعها طيب ,, وعقبها البريكه
لكن اذا تبي شوري رح لأم سدره وبتعجبك صدقني ,,


واذا تبي طريق البريكه مثل ماقلت لك

او افرق مع البطيحانيه لين تعدى ام عشر
وبيحيك مفرق مكتوب قبه والطراق يسار لف معه طال عمرك
وبتجيك عقب 20 كيلو تقريبا نفود امش لين تعقب النفود واطلع يسار وخل النفود يسارك والشعيب يمينك
بتمر على البسيتينات وعقبها البريكه


اتمنى افدتك واي استسفار انا موجود

[ابو باسل]

بالضبط اخوي بعد ماتفرق من عند البطيحانية تقريباً 85كجم يجيك مفرق قبه والطراق تسلكه وقبل مايخلص النفود فيه بقالة ( بقالة الكمب) على يدك اليسار تفرق قبل البقالة يسار فيه خطوط صحراوية تجيك خلك معها تقريباً 13كم توديك إلى البريكه
البريكه حلوة جداً جامعة بين الربيع وأشجار الطلح والنخل منظر خرافي وفي فيضة بعدها حلوة الربيع فيها ارتفاعه قرابة 20 سم وأحداثيتها (n 27.24.672
E 44.39.353)
وأنا في الخدمة اخوي الغالي

[غيث المزن]

بالنسبه اذا طريقك من عند البطيحانيه
افضل انك تسلك نفس طريق ابوباسل اتوقع انه تمام وفيه ردميه بعد


لكن اذا بتسلك من عند ابالورود كما ذكرت اعلاه <- حق خطابات


ابوباسل اللي تقصد ارتفاعها 20 سم
هذي طال عمرك ام سدر

[أبو حمود 2222]

السلام عليكم
إذا سيارتك دفع رباعي فأنا من رايي تأتيها من مشذوبة حوالي 39 كم وإحداثية البريكة
N2730576
E4442936
أرجو أني أني أفدتك وشكرا

[البّري]

اخي خذ العلم الوكادي

من تقاطع الدائري الشمالي مع طريق القصيم السريع الى البريكه 512 كم عن طريق الشماسيه همن ابا الورود على قبه على الطراق ومن ثم الى البريكه

اما عن طريق المجمعه البطيحانية ساموده تزود بحدود 50 كم عن الطريق الاول

وان كان انك غاوي صحراء فعن طريق الزلفي جراب همن تخلي الدهنا على يمينك الى الطراق ومنها الى البريكه


الله ييسر لكم الأمر وان تتمتعو برحلة تاريخيه تتذكرونها سنوات

اخوك البرّي

[«نجم الخير»]

حياك الله أخوي

أفضل طريق لفيضة القوعي والبريكة من الرياض
التالي :
1
الرياض - تمير - الشحمة - القاعية - الأرطاوية - أم الجماجم - مفرق البطيحانية - مفرق ساموده - قبه -
2
الرياض - المجمعة - الأرطاوية - أم الجماجم - مفرق البطيحانية - مفرق قبه ساموده -
ميزة الطريق الأول أنك تستمتع بمشاهدة الأماكن الجميلة التي تمر بها على الشحمة وماحولها وأخف زحام
وعندما تصل إلى انفود وتتجاوزها أنزل بمحاذاتها ووجه جهازك على فيضة القوعي
أما بالنسبة للبريكة فهي على يمينك وانت متجه شمال إلى قبه والقوعي يمينك وانت كذلك متجه شمال
والفارق بينهم تقريبا 35 كم .
تمنياتي لكم برحلة سعيدة وآمنه

[سليمان 10]

افضل طريق مؤدي الى البريكه من الرياض 0مفرق ا لبطيحانيه يسار الى ام عشر ثم تفرق يسار مع طريق قبه والطراق بعد 10 كيلو تقريبا يجي عرق نفود بعد ماينتهي النفود تأخذ يسار وتباري النفود حتى تأتيك البسيتينات ومن ثم تنزل جنوب غرب للبريكه 0وعزالله انه ربيع مايوصف 0اللهم لك الحمد حتى ترضى ولك الحمد اذا رضيت ولك الحمد بد الرضى 000

[aboferas2]

بارك الله فيك اخي سليمان
والنفود اللي انت أشرت له هو نفود الدهناء

[«نجم الخير»]

1-لسلام عليكم ورحمة الله وبركاتة
المسافه من البطحانية الى مفرق قبه تقريبا 70 كيلو بعدين تطلع مع المفرق كأنك تبغى قبة. بعدين تمشي 60 كيلواو اقل مروراً با الدهناء الى تصل بقاله ومحطة متنقلة (صندقه )على اليسار انت اذ كنت تبغى البريكة خل البقاله يمينك وأطلع صحراء متجه جنوب تقريبا بعدين تمشي 15 كيلو تقريبي (ليس دقيق طبعا الكيلو قد يزيد قليل ).عند نقطة البداية الي هي من عند البقاله اسلك الطريق الصحراوي الي بين النفود والقاع مرورا بفيضة البسيتينات وهي من اروع الفياض واجملها بعد 6كيلو من فيضة البسيتينات تجي فيضة البريكة طبعا جميع الطرق توديك الى البريكة
اما فيضة القوعي تمشي الى تصل شعيب السهل ومن علامات شعيب السهل وفرة شجر الطلح بداخلة وكثرة مخارج الماء لقطع الشارع(العبارات) لانه يوجد شعيبان فاالاول صغير والثاني كبير.والكبير هو المطلوب اماالمسافه بين الشعيب الاول والشعيب الثاني من 10 الى15 كيلو فا تطلع من قبلة بحوالي 5كيلو يمين وانت متجة لقبة. طريق صحراوي مأثور تمشي 30 كيلو صحراء وهذا الأحداثية (27.43.003)
0(44.20.983)
وانا انصحك بروضة البريكة احسن واقرب لان القوعي طريقة وعر جداً الوصول بعد عناء
وانصحك بستخدام القارمن اذ كان موجود علية الخرايط




2-اخي خذ العلم الوكادي
من تقاطع الدائري الشمالي مع طريق القصيم السريع الى البريكه 512 كم عن طريق الشماسيه همن ابا الورود على قبه على الطراق ومن ثم الى البريكه
اما عن طريق المجمعه البطيحانية ساموده تزود بحدود 50 كم عن الطريق الاول
وان كان انك غاوي صحراء فعن طريق الزلفي جراب همن تخلي الدهنا على يمينك الى الطراق ومنها الى البريكه



اخوك VTC 2005

[المغترب55]

شكرا لك يالغالين
ألف شكر لكم كلن باسمه

شكرا لهذا المنتددى الرائع واعضاءه القروم
خدمات جليله يقدمها هذا المنتدى واعضاءه

ومالهم منا الا الدعاء بظهر الغيب


شكرا للجميع

[غيث الحيا]

أنا عندي لك طريق أظن أنه أقرب وأفضل مع طريق القصيم السريع تفرق مع مفرق الشماسية يمين ثم تتجه للأسياح ومنها إلى أبا الورود إلى هذه النقطة 400 كيلو تقريبا ثم من أبا الورود إلى قبه 40 كيلو ثم من قبه إلى البريكة .
وإذا أنت هاوي بران وقطع الدهناء وشرط أن يكون لك خبرة بقطع العروق ومعكم أكثر من سيارة وهو طريق فيه متعة وتمشية حلوة في عروق الدهناء .تتجه مع المجمعة إلى طريق الحفر وتلف يسار مع مفرق مشذوبة تقريبا 320 كيلو من الرياض ثم بعد ما تفرق 60 كيلو إلى مشذوبة وتحط القارمن على إحداثية البريكة وتسايف مع الدهناء حتى تنزل عليها.
وتاصل بالسلامة.