كيف تزيل طبقات الصدأ والاملاح عن اصابع البطارية بدون اي مجهود

[الشيخ]

السلام عليكم
لو كنت بمكان مقطوع والبطارية ضعيفة بالحيل وما عندك شي تنظف فيه اصابع البطارية مثل فرشاة سلك او ليف او اي شي خشن

الحل غريب نوعا ما بس مجرب
اولا فك وايرات البطارية
ثانيا صب على الاصابع ببسي ولا كولا وعطها وقت بين الربع والنص ساعة
ثالثا نظفه و نشفه بخرقة ولا ورقة

ثم ركب الوايرات على الاصابع النظيفة بدون تعب ولا بهدلة

[القماري]

تسلم يالشيخ :good:

[راعي الجيوب]

جزاك الله خير وماقصرت

[العيد]

السلام عليكم

مادامكم بالبطاريات فانا ودي استفيد من خبرتكم الله يعطيكم العافيه وشرايكم لو ركبت بطاريه اكبر عشان اضمن انها تتحمل الاجهزه اللي اشغلها مثلا يعني اركب بطارية 80 امبير مكان بطاريه 50 امبير وخاصه بطاريات الامريكي شكلها واحد وامبيراتها تختلف وكل بنشر لها راي ولا ندري من هو الفاهم000 وتسلمون يالربع

[السمح]

مشكور أخوي الشيخ على المعلومة ..

والله ثبت إن البيبسي مهوب سهل ينظف كل شي ..

حتى مراحيض الحمامات أكرمكم الله ..

بلاه من كثر الكيماويات اللي فيه .. أكثر من المنظفات !!!

====================================

أخوي العيد .. ياحياك الله بالمنتدى وياهلا وسهلا ..

كلامك صحيح إذا أنت راعي بر وسيارتك فيها من الأجهزة الكثير مثل ونش وأجهزة ملاحة ..

وأجهزة راديو وسي بي ولمبة بالليل فالأفضل إنك تركب بطارية ذات تخزين عالي ..

وترى كل مازاد الأمبير كان أفضل يعني 75 أفضل من 50 و80 أفضل من 75 وهكذا ..

والبطارية عبارة عن مخزن لكمية الكهرباء اللي تحطه فيها ..

أنا أستخدم بطارية 95 أمبير ولو حصل لي 120 كان أحسن ..

ولا دخل لهذه الأرقام بالفولت فجميعها 12 فولت ..

يعني ما راح يكون هناك أي تأثير على ظفيرة السيارة ..

أحبكم كلكم ..

[الشيخ]

بالنسبة للبطارايات ذات الامبير العالي مثل ما قال اخونا القماري تقدر تحط الامبير الي تبي وما تخاف على الظفيرة بس اهتم بمسألة المقاس انها ما تكون كبيرة و تزحم عليك الوايرات مثل قياس 88 يركب للسيارات الفخمة فهو بحجم كبير لانه بالعادة يكون بالصندوق ماهو تحت الكبوت من ناحيتي انا سيارتي شيروكي والبطارية عندي 70 امبير وماشية مظبوط معاي وافضل البطارية العادية الي تتعبا ماي كل مدة اكثر من البطاريات الامريكية المسكرة ولا تقدر تعبيها او تشحنها من جديد

[الشيخ]

بالنسبة للبطارايات ذات الامبير العالي مثل ما قال اخونا """ اقصد السمح ولا يهون القماري والشباب وسامحنا يا السمح اذا ما انتبهنا """ تقدر تحط الامبير الي تبي وما تخاف على الظفيرة بس اهتم بمسألة المقاس انها ما تكون كبيرة و تزحم عليك الوايرات مثل قياس 88 يركب للسيارات الفخمة فهو بحجم كبير لانه بالعادة يكون بالصندوق ماهو تحت الكبوت من ناحيتي انا سيارتي شيروكي والبطارية عندي 70 امبير وماشية مظبوط معاي وافضل البطارية العادية الي تتعبا ماي كل مدة اكثر من البطاريات الامريكية المسكرة ولا تقدر تعبيها او تشحنها من جديد


~~~~~~~~~~~~~~~~~~~~~

[العيد]

تسلمون يالربع والله ما قصرتوا جعلكم ذخر الحين بجرب بطارية الجمس بركبها على الكابرس واشوف الله يستر :D

[راعي بر]

اشكرك مره اخرى على هذا الموضوع الذي افادنا .

تحذير اخوي : المشروبات الغازية تسبب هشاشة العظام نرجوا الامتناع عنها .

[الشيخ]

يا خوي المشروبات الغازية مثل الربا والخمر والعياذ بالله لها منافع بس مضارها اكثر من منافعها

[راعي الحمره]

السلام عليكم ورحمة الله وبركاته

يا خوي الشيخ والله عجيبه الفكره هذي ومضحكه بعد , والله بصراحه الواحد ما يطري على باله الفكره هذي , وما قصرت طال عمرك .


مع تحيات اخوك راعي الحمره

[تالي الاولين*]

.


يعطيك العافية يالشيخ

وعز الله انها طريقة عملية وسهلة واناجربتها


.

[hkald]

الشيخ :

السلام عليكم

مشكور على الفكرة الجديدة والمفيدة ، الحقيقة أنها سهلة جداً ولاتأخذ وقتٍ ولا جهد.

__________
الله يعطيك العافيه.

[...الطوقي...]

الله يعطيك العافيه اخوي












تحياتي لك
...الطوقي...