يايات مفخرة الأرض

[راعي كروزر]

السلام عليكم ورحمة الله وبركاته ..

اخواني عندي لاند كروزر 2009 جكسار ونويت اركب عليه يايات ..

شفت اليايات الإستراليه حلوة لكن الاماميه قالوا يبيلها مساعدات حتى تركب وهونت ..

بعد فتره شفت يايات شركة king springs ارتفاع 2.5 سم ..

قيمتها 650 للطقم وتركب بدون اي مشاكل سواء اللي ورى او اللي قدام ..

حالياً الرماية ماعندهم الا 7 سم وكود انتظر كم شهر حتى يجي الـ 3 سم ..

شوركم علي يا جماعة احد جرب الشركة الثانية وهل واجه مشاكل .. ؟؟

واتوقع الاغلبية مجربين حقات الرماية ,, هل واجهتكم مشاكل .. ؟؟

طبعاً الاهم عندي ارفع الخلفيه لأنه تهابد مع التحميل بشكل يضيق الصدر ..

وبالتوفيق للجميع ..

[الاصلي]

اخوي ليش ماتركب بالون داخل الياي اعتقد افضل لانك تقدر ترفع السياره عند الحاجه
الياي قاسي ويرفع السياره علئ طول يخرب شكل الجيب

[رفيع المقآم]

لالالالالالالالالالالالالالالا الا البالون تراه قاسي راكب ددسن مو جيب ركب ياااااااايات

[صاحب خير]

اخوي بيض الله وجهك

انا بعد عندي لاندكروزر ومحتار اركب يايات اوبالونات لكن اذا ركبت الياي مايضر العمود اوالقير مثل الشروكي وكم كيلو لاني مريت الرمايه قال عندي 200 او300 كيلو وسعرها 725ريال خلفي وش الزين الله يعطيكم الف الف عافيه

[النايف999]

انا مركب كفرات بالون واخاف تحك وودي ارفعه من قدام وورا شوي
بصراحه شكله وهو مرتفع زياده ماعجبني

[علي1221]

ياليت حد يخبر لنا اليايات وين تنباع يايات شركة king springs ارتفاع 2.5 سم
واذا كانت زينه او لا

[راعي كروزر]

حياكم الله ..

واحد من الشباب مركب يايات الرماية ارتفاع الظاهر 5 سانتي ولا صار لموتره شي الحمد لله ..

وبالنسبه لأخوي علي انا لقيت اليايات عندنا بالرياض بمحل 4500 اللي بالربوة ..

بس ماعرف احد جربها للحين ..

بإنتظار باقي الزكرت لعلهم يفيدوننا ..

[اليكي]

اخواني واحد من العيال مركب يايات من الرمايه مادري وش هي بالضبط وكم مقاسه ... مركبها لجي اكس ار 2008 مع كفرات بالوووون ... قبل 3 شهووور بالضبط

الملاحظات
1- انه المطب قااااسي مررره ماهو مثل ياي الوكاله
2- سبحان الله كلهن تكسرن بأخر طلعة بر طلعناها ... للمعلوميه خوينا صقار وراعي تطبيح وتقميز ... بس اليايات للاسف مانفعن ... يمكن ان الموتر ثقيل او انهن ماتتحمل والله اعلم ...
اتمنى اكون افدتكم..