العلم الوكيد بتسخين السيارة قبل الممشى ( من كتاب السيارة )

[A L T A M I M I]

السلام عليكم

جيتكم أقطع عرق وأسيّح دم وأعطيكم العلم من تاليه

السؤال يقول :

هل انت من نوعية اللي يدق سلف ويحرك على طول ؟

أو من نوعية اللي يسخن الموتر أقل شي ربع ساعة ؟

حقيقة أنا معي لاندروفر ديفندر 91 وتفاجأت باللي لقيته بالكتاب وطلع عكس ما أسوي يوميا ً

شف معي هالصورة مآخوذة من الكتاب





http://www.up-00.com/Feb10/AWD00158.jpg






وقبل فترة يقول واحد من اخواننا بالمنتدى

لقيت بكتاب الهونداي الأزيرا يحذرون من تسخين السيارة

ارجعوا لكتيبات الصيانة بسياراتكم وأفيدونا

هذا العلم وعفاكم




:good2:

[ابو تمام]

انا من ربع شغل وحرك

لكن احيانا أشوف السياره وخاصه إذا كانت بارده ومشيت على طول أشوف السياره يجي فيها تفتفه ؟؟

دمت بود

[هاوي الترحال]

لاحظ التنبيه اسفل الكلام المحدد يقول لازم بلوغ درجة حرارة المحرك المعتاده للمحرك قبل ماتدعس

[بدوي جنوبي]

تسخين السياره اصراف للوقود

اذا كان الطقس بارد شغل المحرك وانتظر من دقيقه الى 2دقيقه

بعدها انطلق على سرعات منخفضه حتى يسخن المحرك اكثر
وهذى طريقتى مع اغلب السيارات اللى استخدمتها والحمد لله لم يحصل اعطال

السيارات القديمه هى التى تحتاج الى تسخين بحدود 3 او 5 دقائق لان محركها مصنوع من الزهر
ويحتاج فتره من الوقت حتى يسخن
اما السيارات الحديثه اغلب معدن المحرك مصنوع من الالمنيوم يحتر بسرعه ويبرد بسرعه


بالتوفيق للجميع

[ترابيع]

الامر سمح يالربع ..

يعني اللي يحمون مواترهم و اللي ما يحمونه كلهم ما اشتكوا من شي ..

انا بالعادة احمي موتري بالبرد اقل شي 5 دقايق .. بس لما شفت واحد من الاخوان مؤذن مسجد يقوم لصلاة الفجر في عز البرد ثم يشغل و الدعسة على المسجد .. وهذا شغله مع موتره من يجي 7 سنين و لا شاف مضرة ..

بصراحة انا بديت احذو حذوه .. و شكرا لصاحب الموضوع ..

[بدوي جنوبي]

لاحظ التنبيه اسفل الكلام المحدد يقول لازم بلوغ درجة حرارة المحرك المعتاده للمحرك قبل ماتدعس

التنبيه يوضح من الدعس المفاجئ للمحرك وهو بارد او عند بداية التشغيل
وهذى الاحظها فى اغلب الناس
اول ما يشغل السياره يدعس بنزين ،،، هذا يرهق عمود الكرنك ويصير عليه حمل زائد
لان اجزاء المحرك (بلوف - بساتم -سبائك - اذرعة البساتم - تكايات - عصافير -الخ )



تكون خالية من الزيت قبل التشغيل ،،، فتحاج لوقت تقريبا 30 ثانيه حتى يصل الزيت الى اعلى نقطة فى المحرك
وتتشبع جميع اجزاء المحرك بالزيت ويصبح ايضا الزيت حار وسهل الانتقال بين مجارى التزييت .
(فتخيل جميع هذه الاجزاء خاليه من الزيت كيف بيكون احتكاكها بالمعدن جميع الاجزاء خاصة البساتم )
لكن اختصروا السالفه فى الكتلوج
وقالوا اذا شغلت لا تضغط على دواسة الوقود ،،،

وانا حبيت اوضحها للجميع بالتفصيل الممل:D

بالتوفيق

[بواردي الدلم]

التسخين ضروري ضروري

واللي يظن التسخين موب ضروري غلطان × غلطان

خصوصا القير التماتيك لان زيت القير يسخن عن طريق الرديتر

وإللي وده يتأكد يشغل السياره في البرد خصوصا ويعشق ويدعس راح يلاحظ الأتي غالبا إما إنطفاء المحرك أو عدم إستجابة القير للتعشيق
حدثت هذه التجربه على سيارة كابرس موديل 82
أرجو أن يكون دلوي ناضحا بما فيه وشكرا

[ذيب الداهية]

بس مكتوب فوق لسيارات تعمل بوقود الجازولين و الديزل
وش قصدهم ..؟

[أبوعبدالملك الجهني]

عندي هايلكس ( مكينة Y3 ) ... سواء كان الجو حار أو بارد أو ثالج ...


دقة سلف و مجرّد ما أظن أن الزيت وصل البلوف .... ادعس ... يعني ثوان فقط


لا أهتم بتسخين السيارة ... أتوكل على الله ؛ و أدق سلف و ادعسسسسسسسسسسس :good2:







.

[ابو وافي 444]

موتري باثفندر ضغطه الطبيعي حوالي 7 ونص واذا دقيت سلفه بالبرد يطلع فوق الواحد ونص
ويبدأ ينزل تدريجيا حتى يصل الطبيعي لذلك انا اتركه يوصلها براحته ومن ثم امشي براحتي برضوا والشغله ما تاخذ 3 دقائق الى 5 وبهالوقت اشغل نفسي بترتيب السياره والكاسيتات وغيره أو افتح الرادو
والوسطيه زينه يعني لا تخربها تدق سلف وتمشي ولا تخيس ربع ساعه تحمي موترك.

[قمة افرست]

هو مايقولك انتظر حتى يسخن المحرك
يقولك شغل المحرك ويقصد يمكنك ان تسير ماراح تقطع معك السيارة بشرط تسير بدون دعس بنزين الين تسخن لاهمية تسخين السيارة
وكاتب تحذير بعدم الدوس على السيارة بقوة وهي باردة بقصد اعطاء المحرك فرصة ليسخن بهدوء يعني لاتستعجل
لانك كذا بتتلف المحرك وهذا يدل على اهمية تسخين المحرك


الواضح من الدليل هو تسخين السيارة او السير ببط الين تسخن مما يعني اهمية تسخين المحرك

مضار الدعس على السيارة وهي باردة
1- تلف التكايات والسبايك
2- انفجار الثلاجة خاصة بالفورد

[همس الغدير]

مشكور اخوي

[شبح الصحراء]

انا عن نفسي اشغل السيارة من دقيقة لدقيقتين حسب برودة الجو وبعدين امشي ببطئ وبدون الضغط على المحرك حتى تصل الحرارة لوضعها الطبيعي ، اتوقع هذا افضل من الوقوف والإنتظار حتى بلوغ الحرارة للوضع الطبيعي ، ولا ننسى ان هناك اجزاء اخرى في السيارة لا تسخن إلا مع الحركة كالجير والدفرنسات وغيره وتحتاج تسخن بالمشي ببطئ لبعض الوقت .

[قطب 999]

حسب السياره اذا هي صغيره مثل الكرلا والكامري وا في قياسها خذلك 1-2دقيقه اما اذا هو جيب مثل الكروزر 5 دقايق والسيارات القديمه الكلبريتر ما تمشي اذ البروده شديده حتى تحتمي 10 دقايق

[كرم العالمي]

مشكور اخوي على المعلومه بس الافضل تسخينها لو دقيقه على الاقل

[نديم السهر]

يعطيك العافيه

الاكيد ان الدعس على البنزين بقوه متكرره يضر السياره

وبالنسبه للتسخين معي يوكن 2008 بالبرد اشغله بالريموت لين يسخن ويطفي ولاامشي وهو بارد وتسخين

السياره يطول عمر المكينه

وهذا اللي موجود بكتاب السياره

(اذا اقلع المحرك فدعه يحمى قبل الشروع بالقياده لاتزد من سرعه المحرك عندما يكون باردا.

اسمح بالوقت الكافي ليسخن المحرك ويصل الزيت الى مختلف اجزاء المحرك التي تحتاج للتزييت.)

[hot_line]

اخواني من يوم عرفت العلم الموتر لازم يتحمى ليش اقولكم ليش

بعد فتره لو ما حميت الموتر البواجي تنعدم عليك

ومن قال ان التحميه يصرف بنزين كلها 10 دقايق ما يروح شيء

انا لو تقطعني لازم احمي السياره 10 دقايق وش وراي

[مغلي]

رايي الخاص
ان الكاتلوج صار العوبه ... نعم ... يكتبون اشياء لو تحاكمهم فيها تكسب القضيه بسرعه ... ولمعرفة الحقيقه ... اقرأكتلوج السياره نفسها بس بدول فيها قانون ومحاكم وتعويضات بالملايين ... لتعرف الفرق بين ....ما يكتب لنا ... ومايكتب لهم

[SRAAAB]

الله يعطيك العافية على طرحك
بس الأفضل إنك تحميها
وإذا كنت مستعجل أهم شي الضغط لا يتعدى الـ3
وأكيد لها أثر إذا كانت السرعة زايدة
والله أعلم