نبي رأي من جرب الجمس دفرنسين 4×4

[الزناد]

مسيكم بالخير جميع او صبحكم بالخير كلن على وفقه :)

يا الربع نبي راي من جرب الجمس دفرنسين 4×4 من 92 وطالع

من ناحية القوه والمتانه وقطع الغيار وخرابه واجد ولا شوي وصرف البنزين

وهل هو خوي في البر ولاّ يهمل خويه ؟

علموني وشهو من لحيه لا تبخلون علي بشي

وسلامتكم :)

[Bader-M]

شف يالغالي

............


بنسبه للجمس

يمتاز

1- سعره رخيص
2- قطع غيار رخيصه
3- صيانه سهله و غير مكلفه
4- وسيع جدا
5- محرك قوي جدا
6- مريح


عيوبه
1- صرف وقود
اذا كنت سياره مخصصه للبر فقط فان هذه العيب يزول

2- اعطاله كثيره ( مقارنه بسيارات اليابانيه )



ملاحظه مهمه جدا

السيارات الامركيه عموما
اعطلها كثيره مقارنه باليبانيه
ولكنه صيانتها غير مكلفه و قطع غيره رخيص

اما الياباني
فانه قليل جدا اعطاله
ولكنه صيانة مكلفه و قطع غياره مرتفع نسبيا


اما عن رائيي الشخصي
افضل الامريكي القديم على الياباني

اما في المديلات الحديثه
فاني افضل الياباني على الامريكي

وبنسبه للجمس 92
فانه محركه ياتي بخاخ (EFI)
هو لا يستهلك وقود نسبيا
لانه محركات الجمس ذات سعه عاليه
ويكفيك ان تعرف ان المحرك الجمس 305 انش ( 5 لتر )
اكبر من محرك الجيب الكزس 4.7 لتر

وناسف للاطاله

وكل عام وانتم بخير

[هاوي الهلي]

والله الصراحه انه ممتاز بس انه خراباته كثيره ويبلشك بالبر (توهيقه)وعلى القوه هو قوي بس مشكلة كل السيارات الامريكيه بالبر انه اول ما تدوس تحفر يعني بالتطعيس مب زينه ابد السيارات الامريكيه عامه الجيب احسن بكثير بس الجمس ما يصلح للي ما يحافظ على سيارته عشانه ما يصبر ابد اما الجيب يصبر اذا كرفته هذا الي اعرفه وجزاكم الله خير اخوكم هاوي الهلي

[السالمي]

اخوي الزناد

خذ العلم ولايهونون الربع


الاسبوع الللي طاف كاشتين ومعنا واحد موديل 92 جمس دفرنسين

وكان توه طالع من الورش تو راعيه موضبه

ومع ذالك يمدحه الي جا عليه

مع انه كان محمل عليه حمول مايشيلها غيره

مع ذالك سواقه يقول والله كني ماني محمل شي وكن الصندوق فاضي

من رساوته وقوته ماشاء الله عليه

اما صرفية البنزين مايصرف لانه بخاخ

والتانكي كبير حقه تعبيه فل بحدود الميه وعليها

الصرفيه مايصرف واختلف مع اخوي طاير بالعجه بالنقطه ذي

ولعلمك السيارات الامريكيه دايم

افضل شي فيها محركاتها من ماكينه ومن قير

ويهتمون فيها اكثر من اي شي

وبعدين تراه جمس يعني قطع غياره بتلقاها في اقرب محل

ولافيه ذاك التعقيد عشان تكثر خرباته

ان بغيت الخرابات بالفورد سؤاء الدفرنس او الدفرنسين

لاكن الجمس عز الله انه موتر

ترى كلامي هذا كله عن الحوض

مدري اذا كنت تقصد السيارات العائليه هذا شي ثاني

[الزناد]

الاخ الغالي / طاير بالعجه

الله لايهينك

معلومات وافيه اشكرك

وبالنسبه للجيب مجربه وانا معك مافيه كلام

وبالنسبه لصرفية البنزين على كلامك ما تهم لان السيارة للبر فقط

اما الخرابات فانا يا واحد اكره الموتر اللي خرابه واجد ويعاكس معك يا الرجّال

يعني ان كانه بيحدني على السحب او بيخليني اشر على الخط ولا ادور سطحه فانا مابيه لو بريال

والمعلومه اللي قلت عن الجمس والجيب اللكزس جديده علي بضيفها لقاموسي :burnout2:

مشكور على كل حال وبيض الله وجهك

..........................

الاخ الغالي / هاوي الهلي

تقول والله انه (ممتاز) بس (خراباته كثيره) ويبلشك بالبر (توهيقه)

ماقدرت افهم هالجمله :confused: :confused:

اما التطعيس وانا اخوك ماني راعي تطعيس الى شفت اللي يطعسون ابعدت عنهم يا بعدي ادور راحة البال

على كل حال مشكور وبيض الله وجهك يالغالي والجيب على قولك احسن بكثير

علمك غانم يا هاوي

......................

الاخ الغالي / السالمي

معلومه طيبه من وجهن طيب

وعلى قولك قطعه بكل مكان

وترى قصدي الحوض بك آب صندوق

طاير العجه يا السالمي يقول فوق 92 ما يصرف لانه بخاخ يمكن قريت كلام اخونا وانت مستعجل

عموما مشكور وعلمك طيب

***************
الله لايهينكم على كل حال وبيض الله وجيهكم يا النشاما

انا سؤالي عن الجمس الدفرنسين الحوض بك آب

اما الجيب مجربه وعندي جيب فكس ار وعندي شاص

وعارفن ادناه واقصاه

لكن اللي ابي اجربه الجمس الدفرنسين وابي اركب عليه تانكي ماء لاني كنت بدور لي شاص قديم شوي

واركب التانكي عليه لكن قلت يمكن على الجمس اكبر شوي واقوى للحمل

اذا احد عنده معلومات زياده عن الجمس الدفرنسين ترى ما استغني عنكم ولانيب مشاور غيركم

[وهبى]

بالنسبه للجمس --- فأنا عندى وانيت شفر م 91 لاكن مركب عليه مكينه 94 كابريتر ضغط عالى وحجم المكينه 350 قير عادى ثلاثه غيار +دبل جير ---والصراحه الموتر قوى لاكن خراباته كثيره ولكن تصليحه رخيص جداابمقارنه باليابانى
ومن ناحيه صرف البانين ----بالديره يشرب --ولكن بالبر احس انه شربه عادى لاكن خراباته كثيره ويصير خويك اذا كان ربعك معك بالبر ----هذا الى عندى وشكرااا ومافى فرق بين الشفر --والجمس
ودمتم
اخوك ابو بندر الحربى

[الزناد]

الاخ الغالي / وهبي

الله لايهينك ماقصرت وبيض الله وجهك على المعلومات

شكرا ياعزيزي ودمت بخير

[محمد العنزي]

السلام عليكم ورحمة الله وبركاته

:good2: أخوي الزناد

جربت الجمس موديل 92 شفر وليس جمس

والله القوة مافيها كلام والشيل يشيل ولايهمه عزمه واحد

والحين معاي واحد موديل 94 والله ماعليه ونشيط وعليه تانكي مويه 300 لتر والله كبير حيل

واليا عبيته تحس انك شايل حمل .... لكن عزمه واحد وصرف البانزين يزيد ... واعتبره عادي

وفيه تنكين بنزبن والياعبيتهم كلهم اروح واقنص وارجع وانا ما مريت المحطة تقول ابو 600 كيلو

ولله الحمد الورشه ما عرفها الا بالحاجات العادية بكل سيارة ....


ه\ا هو :::::::::

http://sary15.jeeran.com/gm.jpg

[الزناد]

عليكم السلام

ارحب يا محمد :)

كفيت ووفيت بيض الله وجهك

موترك ما شاء الله اعجبتني سكبته وهو واقف الله يعطيك من خيره ويكفيك شره يارب ياكريم

ماقصرت يا اخ محمد ومشكور على كل حال

ودمت بخير

[راعي الفزعه]

على كلام الربع من ناحيتي اشتر وآمن
والله يوفق الجميع ..

[الزناد]

مشكور يا راعي الفزعه على الشور والنصيحه

[الفهد454]

المعلومات اللي قالوها اخواني ماقدر ازيد عليها شي ولكن الجموس القديمة انا اشهد لها واعطيك عليها ضمان بكل شي والله الموفق

[pulsar]

ياخوي خذ العلم من راعي مقناص من 1980 الى 1995 رجال شايب و يقنص بالسعوديه و خارج السعوديه 15 سنه من تقاعد وهو يقنص كل سنه طلعتين و خويه الجمس الدفرنسين يقولك ياطويل العمر و السلامه خذ معك طرمبه بنزين و طرمبه مويه و دينمو و سلف كلها على بعضها ماتجي 1200 ريال اصليه و خلها للاحتياط وروح وين ماتاصل رجلك ...

اما المكينه و القير و الدفرنسات لاتشيل همها ارقد و انت مرتاح.

[الزناد]

الفهد

pulsar

الله لايهينكم ومشكورين على التعقيب والاضافه

[مأيـغـرّز]

والله يا اخوان وانيتات الجمس وخصوصا الدبل قير والقديمه اللي اهي بالسبعينات وخصوصا ال 79 تسوى وزنها ذهب بس صرفيتها للبانزين فقط هذا اللي يؤخذ عليها وتقدر اتعدل فيها وتشيل فيها ولا تقول بس انا عندي موديل 82 والله لو يجيني وكيل الجموس ويقول اخذ موديل 2005 والله ما خذيته والحين قاعد ادور لي موديل 79 دبل قير متحسف قد شعر راسي ما شريته من حراج الكويت كان يبي فيه صاحبه 14000 ريال فيا خوي دور لك من هالمواتر الاصليه وترا موديل 91 او 92 ما عليه خلاف جيد وممتاز بس اهي مسأله ذوق وارتياح اخذ وظبطه على مزاجك مع انه اغراضهم صارت غاليه ونادره (اقصد موديلات ال 79 و 82 بس السكراب ما يقصر تلقا فيه قطع الغيار وهذي وجهة نظري

[أبو نوره]

حبيبي الزناد لا هنت ولا هانوا الربع اجابة لتساؤلك فنا معي شفر سوبر قطع 1500 دبل موديل99 له معي ثلالث سنوات ماشي 160 الف مايل مستعمل امريكي رائع جدا وافضله على اي دفع رباعي مع اني قد جربت اللاند كروزر واستعملته سنوات عده لكن لما جربته وجتدته اقوى واقل صرفية وارخص قطع غيار والين مركب واوسع ولم اغير فيه الا طرنبة البنزين منذ شهر وحتى تراه مايصرف تواير هذا رايي وللناس فيمل يعشقون مذاهب ولو احبيت اغيره فالى اليوكن لا ن صديق لي اشترى موديل 2004 وهو راعي تويوتا ويقول لو استقبلت من امري ما استدبرت ما سقت غير اليوكن وسلامتكم يا احبابي

[الزناد]

مشكورين على التعقيب والاهتمام والنصائح الثمينه لاهنتوا جميعاً


دمتم ودام وجودكم ويا اهلا بكم

[saag]

اخوي ولا يهونون الباقين
انا جربت صالون دفرنسين 94 ماكينة 305 حصان مقاس الاطار 1500
مركب تحته تانكي ماء 80 لتر وهوك اجرجر عليه عربة عفش
عزا الله انه يبيض الوجه بالسهل والوعر نزلت عليه مع نقر نفود ورقيت محلات مع العربة والله ان بعض السواقين استغربوا ومشيت عليه طبلونه مع سحب العربة , والله ثمان سنين ما عرف الخراب مع اني اخذه مستعمل امريكي , امشي عليه بسرعة 160 كم مسافة 900 كم ومحمل عفش ويستهلك حوالى 130 لتر بنزين
بس محافظ عليه واسوي له صيانة عادية كل سنة
بعته وشريت بداله باترول سفاري لا عادت عليه صرف بنزين وقل سعة وناوي اغير رايي وارجع للجمس
هذا من واقع تجربتي ولا يهونون الربع اللى ابدوا وجهة نظرهم

[هاوي نفود]

والله يأخوان أنا أسمع إن في الجموس بشكل عام مشكلة في دودة الدريكسون ...


مادري وش رايكم

[طارق الحربي]

معي 94 دفرنسين مافيه احسن منه ماشالله