احذرو من كفرات ميشلان [الأرشيف]

صديق الطبيعة

27/02/2010, 11:27 AM

ياخوان ركبت كفرات ميشلان من معرضهم اللي على طرق خريص بجانب ماكس بحوالي 600 ريال للكفر وبعد سنه 3 شهور حبل احد الكفرات اي حصل له انتفاخ في الدعسه وكنت ماشي على الطريق السريع وستر الله وبدأ في التنسيم وكان التنسيم اكثر من مكان في الدعسه وقمت برقع اكبر مكان للتنسيم بنفسي حيث ايوجد معي رقعه وتم نفخ الكفر ومواصلة السير لإقرب محطة. وتم تركيب السبير وبعد مراجعة الشركة( شركة ابراهيم الجفالي واخوانه للإطارات) في نفس المكان الذي تم الشراء منهم استلموا الاطار وقالو مايجي المهندس الا يوم الاربعاء واخبرتهم بأن الرقعة تم وضعها على الاطار بعد حصول المشكلة. وبعد اسبوع راجعتهم واخبروني بأن المهندس قرر ان سبب المشكلة هي الرقعة !؟
بله عليكم كيف السوات مع هولاء النصابين سبب المشكلة الرقه الذي وضعتها بعد حصول الانتفاغ في الكفر؟! الموضوع ياجماعه يعطونك ضمان مفتوح ويقولون احسن كفرات وتدفع مبالغ ممكن تشتري فيها بدل الكفر 2 وأخير تكون عمليات خداع وكلام لايدخل العقل ويقولون اقبله او سوي اللي تبي. ليش ارواحنا واموالنا صارت لعبه بين النصابين؟!!!!!

الحربي 2010

27/02/2010, 11:43 AM

كفرات مشلان كانت تجي من فرنسا الشركه الام اما الان من شرق اسيا لرخص الايدي العامله لذلك قلة الجوده والله اعلم

عصام 861

27/02/2010, 12:02 PM

أخى صديق الطبيعة كفرات ميشلان احسن كفرات وهم انواع 1الفرنسى والالمانى 2الامريكى3 التايلندى وهذا موعملى ويجب ان تشوف الكفر ممكن يكون مصنوع لاجل الثلج مكتوب علية ايس وهذا غش وسنة الصنع وتحمل الحرارة والسرعةوكلة مكتوب على الكفر وشكرا

كبسولة2

27/02/2010, 01:50 PM

هبوب الأزيب

27/02/2010, 01:55 PM

ميشلان هو السبب الرئيسي للكثير من حوادث الجمسات والجيوب

بعد مشيئة الله سبحانه وتعالى

والدليل على ذلك شوفوا الجمسات والجيوب في التشاليح كلها أنفجار إطارات

والأطارات الي راكبة في السيارات ميشلان بنسبة 90 %

والضحايا عوائل وبزارين حسبنا الله

بسم الله الرحمن الرحيم

وأنت صــادق يا أخوي ...

أنصحــكم بشـراء دانلــوب فهي ممتازة جداً وخصوصاً عن تجربة لي ولي أفراد العائلة

فنجال شاهي

27/02/2010, 02:05 PM

احب اضيف حاجة يفضل الابقاء على كفر الوكاله الي جت فيها وخاصة اذا بتمشي على خطوط طويلة لأن مو اي كفر يركبونه عبط يركبونه بعد دراسة طويلة

الجندي2005

27/02/2010, 02:05 PM

ما لك إلا تردد يالليل مطـــــــــــــــــــــــــــــــــــــولك ،،،،

Khalid AlGhamdi

27/02/2010, 02:10 PM

اقول الله يعين بس
شف هالفيديو وقارن بين الوضع عندنا وعندهم !!!
http://www.youtube.com/watch?v=TsRizv_yJVw

لو فيه جهة يقدر يروح لها الواحد كان احترمت الشركات المستهلكين
لكن على قولة الجندي ، ردد

خشم العرمة

27/02/2010, 03:45 PM

ركب اي كفر لكن اهم شي تتنتبة للاتي
1- تاريخ الصنع يعني كفر تعدى تاريخ تصنيعه سنه لاتشترية
2- حافظ على وزنية الهوى الموصى بها من الشركة اقصد شركة السيارة
3- ركب المقاس الموجود في الكتالوج بالضبط حتى يكون متوافق مئة بالمئة مع المركبة
4- احذر احذر احذر من السرعه السرعه الزائدة مايفرق معها كفر ميشلان ولا بريجستون ولا غيرة
5 - انتبة من الرقعه المخرز اللي تتم مع خارج الكفر هاذيث على طول تحبل بالكفر
اذا بترقع ارقع من الداخل الرقعة الالماني
6- انتبه من الكفرات السيئة التخزين تكون مخزة تحت اشعه الشمس مثلا حتى لو انها جديدة

بالتوفيق

تناهيت

27/02/2010, 04:13 PM

هلا بك اخوي قدر الله وماشاء فعل جميع انواع الكفرات توافيق ونا اخوك مثل الخدم في المنازل ......لك كل الحق بأسترداد المبلغ اذا الكفر لم يستخدم استخدام سيء مثل تقحيط او مسمار او قزاز او ارصفه وقس على ذلك ....الخ
اخوي انا مريتهم قبل اسبوعين في نفس الموقع المذكور وكنت ابي كفرات لفورد فكتوريا 255-60-16 قال فيه الأسباني تاريخ 2009 بــ520 ريال ونصحني بان اذهب لأحد الموزعين الرسميين لهم عشان فارق السعر وفعلا ذهبت لمحل الطيار على طريق انكاس حصلت نفس الكفر اسباني وتاريخ 2009 بـــ430 ريال فرق كبير بالسعر ..

ميشلان الافضل هو الفرنسي ثم الأمريكي ثم الكندي يليله الأسباني ثم يجيك التايلندي قيمته لنفس المقاس المذكور 330 ريال تقريبا فرق 100 ريال ولا انصح به ابدا ..علما بان الصناعيه الموجوده هنا هي الأسباني والتايلندي للأسلف عندنا ما يجي الا اردى الصناعه

خذ هالمثال :الموتر فاكه وكاله موديل 2000 والآن نحن في عام 2010 تخيل ان 2 من كفراته ميشلان من وكالته صناعه كندي قبل اسبوعين راكبه على السيارة هذا يعني ان الكفر جبار وقوي ولكن يعبه انه ما ينسلخ اذا استهلك ينفجر ..

تحياتي الخالصه

صديق الطبيعة

28/02/2010, 06:57 AM

الف شكر للجميع على التفاعل وإبدأ الراي . الكفرات اللي عليها المشكله فرنسية وتاريخ الصنع جديد عند التركيب. ولكن المشكله اللي تقهر هي طريقة الاحتيال والنصب على المستهلكين بأسم الضمان المفتوح وكذلك تقرير المهندس ان المشكله من الرقعة وانا مخبرهم ان الرقعه تم وضعها من قبلي بعد حصول المشكله . ولكن برضه المشكله في نظر المهندس العبقري هي الرقعة. وكلكم تعرفون النظام في هذا البلد على قولة احد الاخوان ردد ياليل........؟ ! ولكن حسبي الله ونعم الوكيل. على كل نصاب ومحتال

POWERFUL505

28/02/2010, 08:26 AM

حياك اخوي

انا صارت المشكله العام

ركبت ميشلان من فرعهم اللي على خريص

750 ريال للكفر

وانا رجال راعي خطووووط

بعد 6 شهور حبل واحد منها

ورحت لهم وقلت وين الضمان اللي مدى الحياة ؟؟؟

قال هذا ما يشمله الضمان وانا واياهم ايلين رحت لحماية المستهلك وليتني ما رحت

وقبل شهرين كنت ماسك خط القصيم شوي ينصلخ على الكفر المامي يمين على سرعة 180

لكن للامانه

ما حسيت به ووقفت

لين الكفر كانه منسم (( ما تقول منصلخ ))

طايره بس الطبقه الاولى ...

والشهر الماضي طقمت برجستون الواحد 500 ريال

يقولون ممتاز !!

وانصحك بمحل على طريق انكاس اسمه (( اطاراتي ))

فبل الطيار

قبل لا اشتري الكفرات ما خليت محل حتى الطيار رحت قال لي 550 ريال

ورحت الغرابي ما لقيت اقل من 600 ريال للحبة

لا ويعبي لك نيتروجين :)

عرق رملان

28/02/2010, 08:51 AM

بعد تدقيق في موضوع الصناعة فرنسي او الماني او امريكي
لاني خلال الفترة الماضية قاعد انشد عن كفرات مشلان ومقاس 17
بعد التدقيق والتمحيص والاستفسار
تبين لي المقاسات تصنع في بلدان مختلفة مثال على ذلك
مقاس 16 يصنع في فرنساء
مقاس 17 يصنع في كنداء
مقاس سيارات الفرود اتوقع 15 يصنع في المانيا
وها كذاء حسب افادة الوكالة والموزعين

عاشق الغضا

28/02/2010, 08:53 AM

ولايهون برجستون المروح

الربوة

28/02/2010, 09:02 AM

نفس المشكله حصلت لى قبل فترة مركب كفرات مشلان تاريخ جديد بعد اسبوعين انفجر واحد من الكفرات وانا ماشى بخط القصيم وبعد مراجعتى لهم فى مقرهم الرئيسى ومعى الفاتورة قالوا راجعنا بعد يومين وذهبت لهم قالوا السبب نقص هواء قلت الهواء 40 وقت المشكلة قالوا هذا كلام الهندس ماعندنالك شى \\\\\\\\\ نصب فى نصب الله لايحللهم احذروا يااخوان من مشلان ووكيله

همس الغدير

28/02/2010, 09:40 AM

قــــال ايــــــش (( وكيل معتمد ونحمي المستهلك ))

صديق الطبيعة

28/02/2010, 10:21 AM

شكرا للجميع على الراي والمشوره ويظهر من من بعض الردود اني لست الوحيد في المشكله ولكن الله لايبيحهم دنيا واخره واحذرو منهم ومن على شاكلتهم ونحن اصبحنا في بلد النصاب هو اللي النظام في صفه وصاحب الحق ردد ياليل مطولك . وكما يقال من امن العقوبه اساء الادب .

عضى

28/02/2010, 10:39 AM

الف شكر للجميع على التفاعل وإبدأ الراي . الكفرات اللي عليها المشكله فرنسية وتاريخ الصنع جديد عند التركيب.

غريب هاالكلام

الله يعوض عليك إن شاء الله

الربذي

24/02/2014, 12:15 PM

معقوله اللي ماتثق شركات الطيران الا به
ميشلان
اعرف ناس كثييير ركبوه لسياراتهم ماشكو منه ويمشيهم فوق 100الف بس للجيوب وعيبه يقسى مع الوقت وينشف بس يكد

.. PATROL ..

24/02/2014, 05:27 PM

اخوي انا معي سيارة صغيرة عليها كفرات ميشلان مقاس 17

مثل حالتك الكفر الامامي الايسر بدا يصعرر وانا مسافر وعلطول ركبت السبير

رحت للرياض راجعت الشركة وبدو بالتهرب مثل حالتك المهندس يجي اليوم الفلاني ومن هالكلام

اخر شي فتحت تطبيق وزارة التجارة ورفعت بلاغ بصورة من فاتورة المحل

يوم واحد اتصل علي المحل وقال تعال لاتورطنا ومن هالكلام

وعوضوني مثل ماهو متفق عليه بالفاتورة

لاتتعب عمرك بالروحة والجية بلغ وهم يدقون عليك يبونك تقفل البلاغ

ابوسند9

24/02/2014, 07:58 PM

معقوله اللي ماتثق شركات الطيران الا به
ميشلان
اعرف ناس كثييير ركبوه لسياراتهم ماشكو منه ويمشيهم فوق 100الف بس للجيوب وعيبه يقسى مع الوقت وينشف بس يكد
طيب اخوي وهل تعتقد ان المصانع اللي تصنع للطائرات هي اللي تصنع لنا الكفرات ؟؟؟
لان اللى اعرفه ان المشلان مليون نوع امريكي وفرنسي والماني ويجي من الخليج ولا ندري من وين مصدره وعدد ولا حرج
لكن حسب معرفتي با المشلان ان الفرنسي او اي مشلان نقشتة قصيره ابعد عنه
وسبق ان ركبت مشلان فرنسي من فرعهم بخريص مقاس 16 بعد ممشى 30 الف صعرر عندي اثنين ,ولما كلمتهم قالو مافيه مشكله ع الضمان وتعويض فلوس وليس كفرات يعني اقسم سعر الكفر على عدد الايام يطلع التعويض ممكن 15 ريال
لكن اللي يبدو لي ان الكفر ذو زرع ونقشه طويله هو الافضل وصناعه كندي

مسير عليكم

11/03/2014, 02:08 PM

الاحض كثير يشتكون من الوكيل ومالقو حل
اجتمعو بشكوي جماعيه عند وزاره التجاره ومعكم ادلتكم وبكذا تجبرونهم بالتعويض وخصوصن انكم جماعه موب واحد

altamimi506

11/03/2014, 02:20 PM

السلام عليكم ورحمة الله وبركاته
وش افضل انواع الكفرات

eameh

12/03/2014, 06:58 AM

السلام عليكم ورحمة الله وبركاته
وش افضل انواع الكفرات

الوكاد انه مو مشلان ولا برجستون
فيه ملاحظه على الميشلان التاليات ماعاد يجي التراكشن دبل AA اتوقع من نزل مستواه الى A وحده صار عليه مشاكل وانا من الناس اللي ما يعترف بالماركه مايهمني في الكفر الا مواصفاه يعني نسبة البري ويطلق عليها تريدينق ونسبه الاحتكاك والتماسك والثبات بالارض يطلق عليها تراكشن ونسبة سرعة تخلص الاطار للحراره ويطلق عليها تيمبوتشر وكلها مكتوبه على جنب الكفر ..... والله اعلم ...

ابو صالح 2

12/03/2014, 08:06 AM

انا انصح ان تروح وتصور بالجوال انه يقولك من الرقعه وقله ان المقطع اللي مصورك بنشره واشوه سمعة المحل

الحين ما يفيد الا التشهير بالمقاطع مثل الاشكال

abahal

12/03/2014, 09:10 AM

ميشلان مقاس 17 يحبل عن تجربه والسبب ترجع لسببين
جودة الكفر
والشوارع المكسره وحفر ومطناج

الصيني رخيص ويتحمل عن تجربه

ZAZ.

12/03/2014, 12:54 PM

السلام عليكم ورحمة الله

ي جماعة الخير انا بغير كفرات للفيكتوريا و درت السوق لقيت الاسعار تتفاوت من 500 ل600 ريال (كلها السرعة 98wو الحرارة a) والترادوير يتراوح بين 240_280 الا الماشلان 620 !!! فقررت اني اشتريه بس بعد م شفت الموضوع ترددت ، ف وش تنصحوني فيه ؟؟ طبعاً المقاس 235/55/17 وياليت تحددون محل

abahal

12/03/2014, 03:38 PM

ابوكشتات

12/03/2014, 04:17 PM

مالك الا انك تتواصل مع وزارة التجاره ومايقصرون معك 8001241616

سيف نجد_

12/03/2014, 06:12 PM

والله اختلف مع كثير منكم!

حنا مشكلتنا الرئيسيه طريقة الشراء!
مرجعنا فلاح جاهل في الامور الفنية انا لا اعيبه! ولكن اوضح قدراته الفنيه يمعنى انه غير مؤهل للنصيحه وهو صاحب تعليم جدا متواضع وعلى قد حاله..

طيب، لما تروح لوكيل الكفرات الوضع مختلف بالكامل، لماذا؟

لان الوكيل لابد تكون عنده كامل المواصفات للكفر والمركبات وما يناسبها ولا يشترط المقاس فقط!

مثال: كان عندي بي ام من مقاس الفئة السابعة اضطريت اغير له طقم اربع كفرات للاسف من جهلي وقتها كنت اعتقد ان الكفرات كلها واحد اهم شي المقاس مطابق لكفرات الوكالة او المكتوب على الباب، ركبت كفرات تويو لاني كنت وقتها اشوف انها الافضل مقابل السعر لكن تفاجأت انها احتاجت هوا اكثر ومزعجه جدا بالخط! الكفرات ما كانت رخيصه لكن بنفس الوقت ارخص من غيرها الاوروبيه بعد مراجعة الوكيل للبنشر وحضور مهندسهم مجرد ما شافها مباشرة خطأنا كلنا و وضح لنا غلطنا والي هو الوزن! وفعلا تقاسمت انا والبنشر قيمة الكفرات وركبنا نوع ثاني من شركة ثانيه! يعني الوكيل ما استفاد اطلاقا وبالعكس صرح ان كفراتهم ما تتحمل هذي الاوزان الى الان.

العبره يا اخوان الكفرات مهمه ولا هو ضروري العلم بكل شيء فيها وامورها التقنية مننا المستهلكين لكن افضل دائما اختيار الكفرات من بعد اقتراح وكيل الكفرات للكفرات المناسبه ولا اعابطه حتى لو فيه كفره دعسته حلوه ونفس المقاس

شخصيا اعشق كفرات الميشلان الLTX لكن ارجع واذكر لابد من التأكد من حدودها سواء:
?- وزن المركبة
?- اقصى سرعة
?-درجة الحرارة
?- الاحتكاك او الثبات
?- مقدار التآكل

Sent from my GT-I9505G using Tapatalk

سيف نجد_

12/03/2014, 06:14 PM

وبالنسبة لصاحب الموضوع تقدر بكل بساطة تروح لوكيل ثاني وتقوله ابي تقرير عن الكفر وحسب خبرتكم وكشفكم

وبعد الكشف اذا يدعم الي تقوله تاخذه وتتجه لوزارة التجارة قسم الغش التجاري وتوجه شكواك وهم يخاطبون الوكيل ويحضرونه وتأكدون منه مثل ما تأكدو منك وان شاء الله بتوصلون لحل مرضي

Sent from my GT-I9505G using Tapatalk

سيف نجد_

12/03/2014, 06:16 PM

واحد من الشباب واخوي كذلك كفراتهم ميشلان غيروه لبريللي وجربت قبل وبعد البيرلي اريح ونفسه يجي على الفكتوريا وكاله

البريلي الي يجي على الكراون فيكتوريا اخبره صناعه تركيه!

وفيه كفرات كثير افضل من البريلي لكن البريللي تفوقت بموديل او فئة معينه وهي كفرات عليها علامة Z بالاحمر مطبوعه على الكفر وهي عادتا للدعسات النحيله وطبعا مقابل الجودة الممتازة تكلفة عاليه

Sent from my GT-I9505G using Tapatalk

سيف نجد_

12/03/2014, 06:18 PM

انا انصح ان تروح وتصور بالجوال انه يقولك من الرقعه وقله ان المقطع اللي مصورك بنشره واشوه سمعة المحل

الحين ما يفيد الا التشهير بالمقاطع مثل الاشكال

واذا ما قدرت تثبت صحة كلامك واثبتوا ان كلامهم صحيح ورفعوا عليك دعوى تشهير وما بيدك اي اثبات واكلوك جلد وتعويض مادي عن الضرر؟؟؟؟؟؟؟

Sent from my GT-I9505G using Tapatalk

لايوجد

12/03/2014, 06:40 PM

تاكد من تاريخ صناعة الكفر جديد ولا قديم

شنطة عده

12/03/2014, 07:41 PM

لو ينفجر عند باب الوكاله وقدام الوكيل نفسه حطو الخطاء عليك
لا رقيب ولا حسيب الاجانب مستلمين الشغله وفاهمين وضع البلد والمواطن زين

سيف نجد_

15/03/2014, 03:41 PM

لو ينفجر عند باب الوكاله وقدام الوكيل نفسه حطو الخطاء عليك
لا رقيب ولا حسيب الاجانب مستلمين الشغله وفاهمين وضع البلد والمواطن زين

الاجانب ياحبي من اصحاب الملايين وحنا اصحاب الملاليم!

لا تتكلم عنهم فوق السحب هم جالسين
وحنا تحتها تتنظر غيث رب العالمين!

الاجنبي عربي مطنوخ مايرده باب ولا بيت
وحنا مابقى لنا الا بابين، باب رب العالمين ثم بوابة مواقع التقديم!

عيال الاجانب احسن تعليم وتفيهم
وحنا عسانا نقدر على التوليد!

اليوم الاجنبي باكبر مطعم يعزم المطانيخ!
وحنا ببيوتنا واتس وتويتر وفيس نغض البصر عن اصحاب الملايين!

ليت معاملة الاجنبي توصلنا سكن وسفر وتدريس وتوليد وتخليص لكل ما يريد.. الحمدلله على كل حال هذا حصاد جيل والدينا ما قصروا ضيفوهم وسكنوهم وبطروهم علينا!

بالامس اللبناني زعلان ان النجدي شريك ابو فلان جاب ابنو معه ماستر مبين انه بيفهم لكن وين بيروح منه بدوه يطيره بسواد الوش! وصرت تعرف النجدي يا اجنبي وتفصل مين يستاهل يقعد ومين يمشي كم انت كبير!

Sent from my GT-I9505G using Tapatalk

جارنشيا

22/03/2014, 04:27 AM

شعبنا مطنوخ بزياده ويميل للمظاهر وهذي حقيقه
فيه ناس يرى ان نوع الكفر وماركته هههههه من ضمن اساسيات الفخافه
وهذا شي واقعي وحاصل
الاغلبيه اذى موتره غالي مايرضى بالرخيص
يبي يركب اغلى واكشخ واشهر كفر
ويشوف من العيب انه راكب موتر قيمته اكثر من 150 الف ومركب كفر رخيص كوري
والا تايلندي
حتى الشركات بدت تحس بشعور الشباب وتفهم طلباتهم ههههههههههه
اخاف بعد كم سنه تجي الكفرات بإطار ذهبي او يجي منها الوان
والله يأخوان وقولوا ماشاء الله قبل 3 سنوات بالضبط مركب كفرات 17-65-265 هانوك
على جيب والى الان على الموتر وفيها نص عمر واحتمال ماغيرها الا لين تكمل
خمس سنوات هههههه وممشاي عليها الى هاللحظه 120 الف كيلو
وعليها راحه وليونه غير طبيعيه كأنها جديده ماشاء الله تبارك الله
لذلك اسم الشركه والدوله المصنعه ماعادت معيار للجوده
كل شي تغير وتغيرت معه سياسات الشركات وصار همهم الربح المادي
خلاص كسبت شهرة تكفيها
قليل اللي يعمل على الجوده والامان

وفي الختام
من عام 2003 الى الان كنت ولازلت معجب بهانوك
لانها دخلت للسوق بقوه وتبي تثبت نفسها