رحلتنا الى الصمان والشوكي والتنهاة بالصور واعتذار لشايب الصمان

[ابو شكاع]

بسم الله الرحمن الرحيم

اولا اعتذر لشايب الصمان اللي لقيته على الكنوود في رحلتنا ...وبعد تلازيمه علي قلت ابسير عليك صباحا ولكن الظروف ما سمحت .... حيث كان بيني وبينه على كلامه 18 كلم ... لكن ما قدرت ... والجايات اكثر يالغالي

ثانيا كأني لمحت موتر عروان في خبرا البخراء يوم الجمعة عصرا مدري هو او لا

بعد امطار الخير التي هطلت على معظم مناطق المملكة قبل ايام ... قررت شلة الإستراحة الذهاب في رحلة مكشاتية الى مناطق الربيع ... وبعد بحث وتحري وسؤال ومشاهدات لمواقع انترنتية قررنا الاتجاه الى منطقة الصمان ..بعد ما ذكر لنا ان الربيع هناك طيب وفي بداياته ... اتجهنا صباح يوم الأربعاء الماضي على طريق الزلفي – الارطاوية – ام الجماجم وبعد ام الجماجم بمسافة وقبل مفرق مشذوبة نزلنا يمينا على نفود الدهنا ...وكان وصولنا ظهرا ... قررنا المبيت تلك الليلة في النفود ... وه بس .... الكتابة باللغة العربية متعبة ...ابهرج على راحتي ...المهم ... هذي صورة لمكاننا باليوم الأول ..وكانت ليلة كويسة جميلة وش ملحه وش زينه جو ولا اجمل ونفود متماسك عقب السيل ويوسع الصدر

وهذي صور من اول يوم

تكيتنا في الدهنا في اول يوم ...

http://www.qosman.com/uploads/00002407/1.jpg

شبة النار والمعنى وعلوم الرجاجيل في الدهنا <<< وينك عن ياريف النشاما على هالسجع ... اصلح اصير خباز .
؟ :D

http://www.qosman.com/uploads/00002407/2.jpg

نصب الخيمة وكان من اهم اهداف هالرحلة هو تجريب هالنوع من الخيام ...وكانت ممتازة لولا بعض الصعوبات في تركيبها ..لكن على العموم تعتبر جيدة وابعادها هي 3في 2.5 تقريبا .. وهذي صورتين للخيام

http://www.qosman.com/uploads/00002407/4.jpg


http://www.qosman.com/uploads/00002407/5.JPG

بعد ما اصبحنا يوم الخميس اتجهنا على طريق الأسفلت ومن بعد محطة ام رقيبة بمسافة بسيطة وبعد ما تزهل لنا الشيخ جارمن بعد توفيق الله طبعا وسمح لنا وقال من هنا انزلوا لإحداثيتكم اللي هي رديفة فيضة الحاج ...وكانت المسافة 108كلم قطر يعني الأكيد انه اكثر مع اللفات والمطبات ...وصلنا الموقع قبل العصر بشوي .. والصراحة الطريق كان متعب وبعيد جدا .وشفنا ربيع طيب في بداياته وكانوا الشباب ميتين جوع وما لقينا بدربنا احد يبيع خرفان ولا حتى برابر ولاعلى الأقل وبر ولا جراد ... المهم تكينا واتفقنا ان بعضنا يضبط الجلسة وبعضنا يروح يدور لنا خروف علشان ندغدغه لمين يموت من الضحك همن نلهمه ...راحوا الشباب ما لقوا شي قررنا نأجل سالفة الذبيحة لباتسر وتكينا في الروضة وقبل صور الروضة وبالطريق الى الروضة لقينا قطيع من البعارين والبعرينات ...وليقنا بعيرة ترضع ولدها فلتقطت له صورتين
الصورة الأولى
http://www.qosman.com/uploads/00002407/9.JPG

وهذي صورة مقربة بالزوم.....شكله يقول ماما مين الناس دول شكلهم متوحشين

http://www.qosman.com/uploads/00002407/12.JPG


صور لفيضة رديفة الحاج .... والربيع اللي يوسع الصدر

http://www.qosman.com/uploads/00002407/15.JPG

http://www.qosman.com/uploads/00002407/17.JPG

http://www.qosman.com/uploads/00002407/19.JPG

اتجهنا صباحا يوم الجمعة بعد ما افطرنا الى الموقع التالي المذكور بربيعه ..اللي هو خبراء البخراء وكان اتجاهانا شمال شرق تقريبا المسافة 36 كلم تقريبا ...وبعد ما وصلنا للخبراء لقينا ربيعها زين ماشاءالله والجميل بالأمر اننا لقينا بها قطيع نعيمي سالنا الراعي هن للبيع قال نعم قلنا ماشاء الله طيب على كم قال على 400 قلنا هات لنا حبة هريفي بس لايكون لاعب النصر ..قال روحوا لراعي الحلال هو اللي يبيع عليكم ..قلنا وينه قال هناك في بيت الشعر اللي عنكم مطلع قمر ..اتجهنا له ولقيناهم جامعين بين القديم اللي هو بيت الشعر والجديد من التقنية اللي هو صحن استقبال

http://www.qosman.com/uploads/00002407/21.JPG

المهم يوم فاوضوه الشباب قال روحوا للراعي والولد هم يبيعون عليكم ...قلنا تونا جايين منهم قالوا روحوا للشايب ..قال ما عليكم روحوالهم بس وهم يبيعون عليكم اصلا هذي حركة نسويها حنا بالرخوم ..قلنا تسلم تسلم نحسب كلمة رخوم كلمة مدح يوم سالنا عنها بالرجعة اثرها مسبة ..الله يسامحه

رجعناواثناء رجعتنا للراعي والولد لحقنا ولد ثاني للشايب وقال ترى السعر ب 450 قلنا حنا متفقين على 400 قالوا عاد البورصة قفلت على 450 تبون او اطبخوا غداكم على حصى ...قلنا الشكوا لله .. ناخذ ...اصلا الجوع لاعب بنا ولو قالوا ب 455 نبي ناخذه ... وهالحين بعض صور ربيع خبراء البخرا

http://www.qosman.com/uploads/00002407/vv.jpg

http://www.qosman.com/uploads/00002407/vvvv.jpg

الصورة عاد هذي كانت حلم الشباب ..لأن فيها اول وجبة تحتوي على لحم الهرفي الطيب اللي وش زينه .. من زينه ودي لو اني ضامه لدفتر العائلة ...

http://www.qosman.com/uploads/00002407/vvvvv.jpg


موتر احبه جدا صورته من بعيد بالزوم اخاف يهاوشونن وكان مع شباب قريبين مننا في خبراء البخرا

http://www.qosman.com/uploads/00002407/28.JPG

الوقت عصر يوم الجمعة في خبراء البخرا

http://www.qosman.com/uploads/00002407/29.JPG

صباح يوم السبت

الكبدة ...وهي من عمل الشيف ابو ابراهيم ...متخصص ومنفذ مشروع تسمين الشباب 10 كلجم في 5 ايام

http://www.qosman.com/uploads/00002407/36.JPG

وفي صباح يوم السبت اتفقنا على الاتجاه الى الرفيعة وبعدها الى الشوكي والتنهاة ... كانت المسافة للرفيعة بحدود 40 كلم ....وقبل ما نحرك من الموقع ....قمنا بتنظيفه ...فكان هدفنا ان من يجي للمحل يفرح به وبنظافته مثل ما صار لنا ..ويتضح الكيس اللي حطينا فيه الزبالة الله يكرمكم

وهذي صورة الموقع بعد تنظيفه

http://www.qosman.com/uploads/00002407/37.JPG

وبعدها اتجهنا الى الرفيعة ومنها الى الشوكي والتنهاة

وبالطريق بين الرفيعة والتنهاة والشوكي كان الخط للبعارين مهوب للأوادم ...راعين الحلال محتلينه ولا جابوا خبر الناس اللي تستخدمه وهذي صورة للبعارين

http://www.qosman.com/uploads/00002407/38.JPG

وفي الطريق الى الشوكي صادفنا حالة ولادة .... واليكم الصورة

http://www.qosman.com/uploads/00002407/39.JPG

شعيب الشوكي ...

http://www.qosman.com/uploads/00002407/40.JPG

http://www.qosman.com/uploads/00002407/42.jpg


وصلنا الشوكي وسوينا غدانا فيه .... قصدي بوه ...والشباب قالوا خلوا نشيل عفشنا ونروح للتنهاة ..قلنا مشينا .. اتجهنا للتنهاة ..وكان وصولنا للمكان مع المغرب . ولا حصل لنا نصور فيه قصدي بوه....الصور اللي صورناهن بالتنهاة مثل ما تقولون خاصة وغير صالحة للنشر ....تكينا فيه وسوينا عشانا ..وتعشينا وسمرنا سمرة طيبة ..ونمنا .. وقمنا صلنا الفجر ورجعنا نمنا لحد الساعة 10 وكانت بالنسبة لي ازين نومه لاننا دفينا بعد ما طلعت الشمس ,وفي الصبح افطرنا ...واستعدينا للعودة للديار .. وحركنا الساعة 12 الظهر تقريبا ...ووصلنا للرس تقريبا الساعة 4 وشوي ..



• مجمل المسافة للرحلة من والى الرس تقريبا 1400 كلم

• * كانت الرحلة مرستكة ورايقة وما نقصها الا شوية دفا بالليل

• * نصيحة ... لا عمرك تاخذ معك بالرحلة احد عنده دوام

• * لو تنسى كل اغراضك اهم شي لا تنسى الغوري

• وبعد احرص على الحلاوة الطحنية .. الصراحة مع الجبن المثلث شي طيب .... اللي اخذنا حلاوة طحنية طعمة .. مدري هي فعلا طعمة او ان الجوع له دور

• لا تحرص على الشابورة بالرحلة ...لأني ما اكلته ..الشباب ما قصروا قالوا بها

• احمد الله على توفيقه لنا بهالرحلة ..

• الصمان بالربيع من اجمل المناطق ..

. مجموع ما صورنا فوق 200 صورة اخترت لكم منهن الزين

اتمنى ان الصور تعجبكم والسلام عليكم

[عليان الليل]

ماشاء الله رحلة موفقة وسرد ممتع
لكن الخيام الصراحة:good2: ... اول ما شفته احسبه
لـUS ARMY بس ناقصكم جيب همفي وكم هاون
على شوي كتيوشا.. :D
والا خشة البعير اللي يالله من فضلك :looney:
الا وش سر الددسن عند اهل الرس..
والله يعطيك العافية

[شايب الصمان]

أعتذارك غير مقبول ولازم تعوضنا بغيرها :good2:
============================
صورة الموتر الحمر..(ولد الشايب ) وربعه هم واصلوا المسير ورجعت لظروف العمل . وكان معهم لاند كروزر 93 الرصاصى .
----------------
والحمد لله على السلامه

[الوسـم]

الحمد لله على السلامه
وأتحفتنا بموضوعك الرائع
.
.
.
.
والله إنك صادق(لا عمرك تاخذ معك بالرحلة احد عنده دوام )

[بركان]

اخوي ابو شكاع
الحمد لله على السلامه
ماشاء الله رحله متكتكه
ومن وصفك الجميل كأنني معكم
شكرا على تعليقاتك المرحة والتي اضفت المرح والبهجة على موضوعك وصورك الجميله.

دمت سالما لمن تحب.

[عروان]

هلا وغلا بك يا بوشكاع


يا زين ما أخترت, خبرا البخرا من أفضل الخباري اللي بالصمان هالسنة. ربيعة زين بالحيل.


أنا زرتها ثلاث مرات و ودي أكشت فيها بعد مرة رابعة. :eek:



جيتها في ثالث ايام العيد و قابلت شايب الصمان و خوياه. مهو مثلك :j


تراني ضحكت من كلمة "الغوري" لين تعبت. من زمان ما سمعتها طالعة بغبارها. هههههه :D
أما الموتر اللي شفته يوم الجمعة مهو أنا يمكن شبيع لموتري.


لك أرجع و أقول رحلة كانت موفقة. أتمنى من الله أن يحلى أيامك كلها.


أطيب تحية لك

[أبوأحمد98]

(ابو شكاع) الحمد لله على السلامه صور جميله وتعليق اجمل :good2: لكن عندي سؤال يالغالي :what: الخيمه الي معكم وش رايك به ناوي اشتري مثله ونبي رايك ..؟؟ الخيمه كم تاخذ من فراش تنزاني ..؟؟

وشكرا ,,, :)

[تبريزة]

ماشاءالله عليك يابو شكاع

رحله موفقه ماشاءالله وصور اروع

وشايب الصمان عز الله انه قول وفعل وكان بودي اننا مقابلينه ،، الصراحه لقيناه بالجهاز وقال ابذوقكم حنيني ام عبدالله ،، الله يخليه له لكن الله مااراد ،، المرات الجايه انشاءالله

وتسلم على هالتصوير والسرد الممتع

ودمتم
اخوك
تبريزة

[ريع الدياب]

بسم الله الرحمن الرحيم

الغالى أبوشكاع

يازين رحلتكم زيناه ....

السنة الواحد ما وده يطلع من الصمان قبل الصيف

لا حتى فى الصيف ما نستغنى عن ضبانه

صدقت عاد ان رديفة الحاج خبراء 5 نجوم !!!!!

انا ما عاد عندى دوام يابوشكاع ....

لأنى متقاعد ... لكن كل خوياى مساكين موظفين !!!!!

شكرا على امتاعنا بهذا الموضوع الشيق

[محب الشمال]

ما شاء الله تبارك الله على هالطلعة
الله يستر عليكم باين عليها طلعة مرتبه :good2:
بس اخوي ابي اسالك عن اليوكون الي معك مشيت فيه بالطعوس والرمال
وكيف اليوكون معك عملي وتنصح فيه
والله يحفظك ويرعاك
ارجو الرد عن اليوكون على الايميل لانه مرات ما اكون على النت
وشكراً لك

[ملبد]

احسنت يابو شكاع في صياغة رحلتكم بقالب المرح والفكاهة التي نحتاجها ..
الفكاهة هنا دافئة إلى حد ( حرارة حبحر ) الرس ( اللذيذ ) :) ..
وبعدين وش سر صيد كاميرتك للولادات وصغار الحيوانات والطيور ..
العام الماضي فراخ ام سالم ..
وهالسنة ( صخيل ) ..
الرحلة القادمة وش نتوقع ( تصيد ) ؟

[راعي اليوكون]

اخوي ابو شكاع مرحبا ترحيبت البدو في السيل با النسبه للصور يا سلام والوصف مسكت والرحله احلى من كذا افترا(على قوله اخواننا المصريين) كل شىء تمام لكن سؤالي عن اليوكون عساه بيض الوجه ارجو الرد لان بعض الاخوان الله يهديهم عندهم تقديس للاندكروزر يا ليت ترد يا بعدهم وسلملي على اهل الكرم والطيب اهل الرس

[المخضرم]

صور حلوة ومشكور على المجهود

[أبو فراس]

السلام عليكم ورحمة الله وبركاتته

اخوي ابو شكاع

ما شاء الله عليكم انا متأكد انكم انبسطتوا بهالكشتة الين يوم الجمعة تذكروا هالموظفين ان عندهم دوام وانتكست وضاقت انفسكم لانكم متكين على هالنجيلة الخضراء اللي تفتح النفس

بعدين يوم انك رايح من الرس ورا ما مريت علي بعنيزة علشان نخاويكم وتصير كشتتنا وحدة حنا وياكم

المهم الله يهنيكم بهالكشتات والله يديمه

اخوي ابو شكاع هالصورة اعجبتني كثيراً واعتقد انها اعجبت الكثير واصبحت درسا لاهل مكشات وهي

http://www.qosman.com/uploads/00002407/37.JPG

حيث ان المحل اصبح نظيفا وربما كان انظف من السابق لحرصكم على انسانيتكم

[الـ ع ـارض]

ياااااااااا شينك

منزل الصور بسعة وجه يا العديل

[ربيق]

أبو شكاع
.
ما شاء الله عليكم
تغطية إعلامية منقطعة النظير
وكأننا معكم في الرحلة
.
وطباخكم
سلملي عليه ولو ما يمانع حبيله خشمه
.
ما ينفع في الطللعات إلا ( الآشكي )
.
عاد ابحل بهالكلمة ما تلقاها في أعظم قاموس

[رسلان]

الحمد لله على السلامة أخوي : أبو شكاع ...
ماشاء الله على رحلتكم وعلى خوياكم ...
ولو حتى القطة زينه ماتكاسرون :D ...
الله يعينكم على كل هالمشي ... أنصحك تمرخ بفكس تراه جيد :D
على فكرة وشو الغوري :confused:
ماقصرت أخوي شرح وتعليق وصور ممتعة ...
تقبل تحيات ولد الديرة ....

[المسافر1]

السلام عليكم أخوى ابو شكاع
الحمدلله على السلامة ورحلة موفقة ماشاالله انت والنشامى الى معك...والله ابدعت بالوصف والتصوير
ولك مني جزيل الشكر وللجميع...
وبانسبة لمكالمتك لشايب الصمان ومواعدك له ترى فيها حق عليك مثل ذاك الهريفي الى تعبتوبه ولا وبعد فى نفس المكان...وللمعلومية ترى شايبنا والله ماعرفه وإنه ينحب ومعرفته ومعرفتك إنت والرجال شرواكم تشرفنى...
وجزاك الله عنا كل خير.......

[ابو شكاع]

هلا وغلا عليان الليل يالله حيوه
اجل جازن لك الخيام ... هذولي طال عمرك ما صارن كذا لين تكتناهن حطينا في جهه مسحاة وربطنا فيها الخيمة الأولى .. بعدين ربطنا الخيمة الثانية بها بعدين ربطنا الخيمة الثانية باليوكون .. وشديناهن لمين صارن بهالشكل الحلو ...
بالنشبة لجيب الهمفي هذا وش يصير ... وش يقرب للهامر ...
الددسن والرس ياطويل العمر انا اقول لك وش سر العلاقة ... الرس ما بها نفود ... اغلب اراضيها حزوم .. وهي اسمها قبل الحزم ....ومثل ماهو معروف ..الددسن ازين من الهايلوكس بالحزوم والجلد لأنها اقل مطب ...بينما الهايلوكس اقوى بالنفود .. ولكن مطبها يكسر الظهر ... وهذا حسب وجهة نظري سبب كثرة الدداسن بالرس وقلة الهايلوكسات ... وهلابك

[ابو شكاع]

شايب الصمان ..... هلا هلا هلا

التعويض ابشر به ....مع ان الأمر صار غصبن علي ...وعلى فكرة يوم حركنا الصبح حول الساعة 11 اتجهنا لم موقعك ...وانا مغير بهالعامة ياشايب الصمان ياشايب الصمان وما لقيتك ..قلت اكيد اني تأخرت عليه ومشى ..
اجل صار هذا ولد الشايب
ماشاء الله ... ياخوي تقاطرت سعابيلي مع هالموتر ...كان معي مثله ونفس اللون م 92 ياعنك انهن مواتر بس
واحسنت معهم بعد جيب ثاني وكانوا شباب راعين اناسة وسمرتهم وش زينه ووسيعين صدر وراعين سواليف بالليل لأنهم ماكانوا بعيدين عننا كثير هذا غير ان الليل يجذب الاصوات بسبب الهدوء

الله يحفظك ياشايبنا ويمدك بالعافية .... الا على الطاري انت تاصل المسجد او لا :D

[ابو شكاع]

الوسم اهلا وسهلا بك ....وشكرا لك مرورك الكريم ....

[ابو شكاع]

الغالي بركان

اهلا وسهلا

اسعدني مرورك وكلامك الطيب .... والف شكر لك ....

هلابك

ولاهنت

[ابو شكاع]

لي عودة لبقية الأحبة هنا

[شايب الصمان]

{ الا على الطاري انت تاصل المسجد او لا }..... أبشرك أصل ولله الحمد ,,,,, لاتضيع الحق :what:

متى الحق على رأي أخونا المسافر1 :what: ....( وبعدين لاتنسون أني محامي المنطقه الشرقيه ). وأذا

مانفذت الحق بنتوجه للقصيم للمحاكمه وتنفيذ الحق ويش العلم.............

[ريف النشاما]

بسم الله الرحمن الرحيم
""
""
السلام عليكم ورحمة الله وبركاته

ياهلا ويامسهلا أخي بو شكاع فيك وفي حتاويتك اللي ضيقة صدورنا وسعة صدوركم :(
ولاكن مانقول إلا الله لايهينكم ..... وترا --الحق-- زاد عليك يومكم تمرون من قريب ولا تمرون علينا
ولا لا ياشايب الصمان :redcar:
وباقي التعليق من خلال هذه - العجينه :good2: :director:

الحمد لله على البقا والسلامه = يابو شكاع اللي نحبه ونغليه
اللي علينا لافين بأنتضامه= ورسمه وحرفه شادين صادحن فيه
والموقع اللي بان فيه إهتمامه= وشرحن متكز بالسوالف محليه
يوم العراوي خاوته كالحمامه=تمشي على يمناه ونوبن تباريه
يازينها ياحلوها كالغمامه=عفشك تشيله وقاصي الدار تطويه
وياجسرها ياقوها بالقدامه =لاخاوت اليوكون بالخط تتليه
ولامن نزلت الخب فيها نهامه= تبغى جبن سوبر من السوق نشريه
يومه تشوف الربع كلن مقامه= يطلق فعل يمناه وجهن يحليه
وترى الدداسن ياعليّ اليمامه=في رسّنا للجيب تعلن تحديه
شفها تلوف الدار كنه غلامه= والصلب والصمان تاطى جواديه
وفعله تشوفه بالصور لاكلامه=معترضتن بالخب والعفش فوقيه
في رحلة الميون صارت علامه= ابو شكاع وكل منهو مخاويه
شف حالهم وخيامهم ياسلامه=والكيمره ترسم لنا ماتعانيه
بل وبلايل والحوير شهامه= الديس فكه مستحي لانراعيه
وعقبه تلاها للرديفه تمامه= ربيعها اللي يشرح النفس زاهيه
وأمسوبها ياريع أهل القرامه=والصبح قفى للذي هو معنيه
خبراء البخراء ربيعها به دهامه= شين نشوفه والتصاوير تحكيه
وبيت الشعر محلاه (دشه خمامه) = يالله تعدلها عن الميل شاقيه
وعقبه تفتح بالتصاوير بابه =ابو شكاع اللي على القاف نتليه
مر ن ربيع ومر جمسن هوابه=ومرن قدر كاتم على النار حاميه
وفيه الذي من قرب راحو وجابه=خروف أبيض كامل الوصف شاريه
من عقب ماصاروا هواش وطلابه=لحول والله من حلالن يقنيه
لاكن عليك الصبر وإرجى المثابه=ومن لايدوس القرش يرقد بصاليه
وشي يضحك وإن سكتنا نهابه= والله عجايب يازمانن نعانيه
راع الأباعر الأباعر مشابه=على المقير هقوتك ويش حاديه
والعنز والد راعيه ماعنابه=يافرحته بالتيس لاحل طاريه
ومنها دننا و(بُه) حلا الدار ذابه=ابو شكاع أوآآآآه ليتن مخاويه
بأطراف شوكينا مراحب هلابه=وتنهاتنا المزيون تطرب ذواريه
لوهو ربيع ن دون ماينغزابه= فيكم ألا يالرس واللي حواليه
وختامها ختمّ وصايا جنابه=ابو شكاع ن للجماعه سؤآآآآليه
يازينها من رحلتن به غرابه= جبن وخروفن مع طحينه أويلييييييييه
وصجه ولجه وآخرتها حصابه= ميه مع ميه ...حصايد موااانيه
أبك أبك أنا يومين... معكم شخابه=إن قل سبعن وإن رهن الف حاويه
ويومك تقول وتعلنه بالملابه= شوف الموضف.. بالمكاشيت مابيه
أنته علامك تحرقه في عذابه=والواجب إنك في دوامه تعزيه
هها ..تكلم.. لاتحاول هرابه=ولا الموضف.. يالمدرس.. معاديه
لحووووووول ياوالله علومه غدابه=أجل (ضعيف الله) ياكيف تاتيه
لاكن على الله.. وكل قصدي دعابه= ويسلم لنا الددسن وجمسن مخاويه




:no:
:D :D :D

:looney:

[ابو شكاع]

معليش ياجماعة لكن سامحونن ودي اطمر شوي وارد على ريف النشاما ...لكن وش ارد ... والله يانا جازت هالعجينة .... ونبي الشعر كله عجين اذا هو بهالمستوى ...ماشاء الله عليك ابدعت وصورت الرحلة بكلماتك الطيبة ... ابنسخ هالقصيدة وابقراها على اعضاء هيئة الرحلة .... يامال العويفيه وصح لسان وبدن من ابدع ونظم
لكن تعال عاد ....مدام ان الدعوا صارت حقوق علي ...وش السالفة ..شكلكم متفقين علي ...شايب الصمان على فكرة تراي ما اكدت عليك جيتي او اني اكدت الجية ما ادري <<< تحس انه بحل بعمره .... تبي الصدز عاد اصبر خل اروح اشوف المخباة وعلى حسب المخباة اذا هي مليانه ابقول لك اني اكدت عليك جيتي وابشر بالحق ...واذا هي مهيب مليانه ولا بهاولا حق البانزين فانا ابقول ما اكدت عليك الجية وما لك شي عندي ... لا عاد طال عمرك ابشر بالحق وما يلحق ...
نرجع لريف النشاما ....هالحين شايب الصمان ولقيته بالكنوود وصار بيننا اللي صار الله لايعيد هالكنوود تسيف جاب لنا الخساير :p لكن انت وين اراضيك ياعمي ...وينهوبه محلك ... :what: لايكون مارين من عند البيت وحنا ما درينا .... اعتقادي انك لم عريفجان ساحوق وهالمناطق ...او انا غلطان ...
يا اقرب جهاز :director: اريف النشاما / ارسل
حددموقعك
ريف النشاما / نداك وموقعك يالأخو والاهالحين اهجيك بقصيدة اخلي رموشك يحتن (يطيحن)
علم علم :eek: نداي ابو شكاع وموقعي قريب منب بعيد عنك
ريف النشاما / هالكلام ما يمشي علينا ... حدد موقعك بالضبط :mad:
ابو شكاع / موقعي سوق الغنم نبي ناخذ نعيمي طيب او طلي نجدي وحياك الله نحتري اطلالتك انت وشايب الصمان
ريف النشاما / علم علم تولم وتزهب علمن مهوب علمك حنا جايين :mad:
ابو شكاع وهو يبلع ريقه / تم تم هلابك هلابك
:D

[ابو شكاع]

هلا وغلا بعروان.... ربي حيه
بالنسبة لخبراء البخراء كلامك سليم هي ازين ما جينا ... بالنسبة للغوري اجل جازت لك الكلمة ههههههههههههه
هذولا خوياي اللي يسلمك ...اذا جينا نكشت اهم شي بالرحلة الغوري ...هو اول شي يذكرونه ويأمنونه ...بعدين عاد باقي الاغراض .. له محل في قلوبهم ..يقولون ماهنا ازين منه بالطلعات ومريح ولا يتعبك ...
بالنسبة للموتر الصراحة انه قريب كثير من موترك ... يوم تعدى شوي قلت بروحي / هذا عروان او موتر مثل موتره ؟ <<< احلف انك قلتها >>> بدون حلف :)
هلابك ومرحبا والله يمتعك بالصحة على طاعته اشكر لك مرورك الكريم

[ابو شكاع]

اخوي ابو احمد 98
اهلا وسهلا بك وبمرورك الجميل
بالنسبة للخيمة ياطويل العمر ... بالنسبة لنا تحتاج الى شخصين علشان يركبونها خلال من 10 الى 15 دقيقة ...وللحق تحتاج الى قوة جسدية اذا بغيت توصل القوس الى شرع الخيمة بحيث تشد الخيمة من تحت ...وتأخذ للنوم 3 اشخاص اثنين طول وواحد عرض بفراش البر حق السنيدي ...اما الجلسة فتاخذ اكثر ممكن الى 7 اشخاص او اكثر بعد
من عيوبها اطنابها الصغار خصوصا في النفود ..لكن حنا شديناها من جهة باليوكون ومن جههة مقابلة بمسحاة مغروسة بالنفود وبهالطريقة ما احتجنا اننا نكمل تثبيت الأطناب الجانبية ...وهلابك

[ابو شكاع]

هلا ومرحبا بك ياتبريزة
اجل انت متواصل مع شايب الصمان بالكنوود ... وجايبن لك طاري الحنيني ....ايه .....تعال ياشايب الصمان ...ورى ما قلت لي عن الحنيني ....اجل عليك حق << ما صدق على الله :p
مشكور على هذا الاطراء
مشكور اخوي تبريزة لتواصلك والله يحفظك

[نفل]

السلام عليكم ورحمة الله وبركاته


هلا اخوي ابو شكاع والحمد لله على السلامة

ماشاءالله عليك جمعت الثنتين الصور السنعة والتعليق السهل الممتنع ( حلوه السهل الممتنع :) )
والظاهر حسب معلوماتك ان الربيع الزين وسط الصمان واعتقد شرق الصمان بعد اما الغرب فهو باوله
وبصراحة احسد ربعك على وجودك معهم والله يهنيكم .
ومشكور اخوي وجزاكم الله الف الف الف خير .

اخوك ابو محمد

[الرحالة]

ماشاء الله

الحمد لله على السلامه

رحلة موفقه
الله يعطيك العافيه على هالصور إاللي تفتح النفس

والخيام أروع

[ابو شكاع]

فاصل
هذي قصيدة بالددسن اعارض بها ريف النشاما ... تراي ما ادري وش معنى معارضة بس قد سمعت به قلت ياولد سو روحك تعرف :) واذا كانت مهيب لم دفتر هالكلمة ...وهذا احساسي فتكفى ياريف النشاما اكتب بتعليقك ( م س ) وترجمتها ما عندك سالفة يابو شكاع

العصيدة القصماء صوت حنين الددسن


صوت حنين الددسن هيج ثوبي الطملي



الشاصي والنور معاً مــع لمـبه الفراملي



وانت يلي مـنـتـهـي مـبحـلـق تـناظــري



ترن ترن سـيارتي وددسـنـن تـتـرتـري



شريتها مـن نـشبـةٍ في الحلق مثل الطقطقي



قالت له عقب الظهر لــبـقـنـي تحت الاثـلـتي



وواحـد قد سـاقـنـي قـنــيـطـة غـــــربـلــني



فـقـالـت جغاغاغا وقــد بدا يــطــرطـــري



فـقـلـت لاتطرطري والشرهه منحينه على



والقير قرقرقلقللي والـثـاني مـن شـد بـلـدي



ولـو تـرانـي واقـفـاًُ أُأشـرلـراعـي الأجـرتـي



والبوري طط طط دد دد طـطــــــــللي



والكل شف ششف ياحــول ولا يابـــعــدي



انا الكلاك الأجودي من حي ارض الخريزتي



نضمت قطعا عربدت يـعـجـز عـنـهـا الأثولـي



اقول في مطلعها صوت حنين الددسنن

ــــــــــــــــــــــــــــــــــــــــــــ

معاني الكلمات:.



الطملي....المتسخ



مبحلق....النظرمع التعجب



قنيطه....قصير القامه(صغير)



الكلاك....الكذاب



الخريزتي ....حي في مدينه عنيزه

بالأكيد انه منقول :cool:

[شايب الصمان]

أبو شكاع الغالي, السنافي, الكريم , الشهم , الشجاع , المغوار , ( داخلين حرب ) . يكفي ولا بعد .....

الصراحه بعد قصيدة ريف النشاما أقوم بالحق على طول لو أرسل لكل واحد أيد طلي من الراعي اللي شريتوا منه طلي الرحله ..

ألحين بعد هالمدح وتأيدد المسافر1 و ريف النشاما ووووووووووبقية أعضاء مكشات كلهم ..... ,قم بالحق بالسرعه

القصوى وأنتبه للرادار :D . :light: ويش رأيك يأبو شكاع نتقاسم الحق أنا وياك الطلي تقوم به أنت والمكان يكون عندي بالقصيم وألا أقولك أتفق مع أهل جمعت القصيم وضف الحق معهم :good: .
====================
المسافر1 وريف النشاما لازم نشترك ونفتح فرع لمكتب المحاماه في باقي مناطق المملكه ...

[ابو شكاع]

ريع الدياب ...هلابك هلا

اثاريك منتهي من دوامات وغثا الدوامات .... ما شاء الله عليك الله يمتعك بصحتك ووقتك ... شوري عليك دور لك احد يكون ما عند دوام واهتش طال عمرك باراضي الله الواسعة ... غني مات فقير مات وربعك اللي يداومون قل لهم اللي يبي يلحق يجينا بالمحل الفلاني

اشكر لك مرورك
وهلابك
ولاهنت

[ابو شكاع]

ملبد

هلابك ومرحبا ..... ملبد انشهد انك صاحب قلم مميز وتجيبها صح ... انا اقرأ لك مواضيع همن ابحل ما اعرف وش لون ارد ...لأنك ما تخلي لي مجال مداخلة فتجدني مغير احك دميجتي مع تمييل الكشرة يمين او يسار بسبب الإندماج مع الحك همن اصك النت واروح انام :p
اثرك خابرن فروخ ام سالم ... تصدق توي ادري اني متخصص حالات ولادة :p
تسلم لمرورك الكريم ياكريم
وهلابك

[ابو شكاع]

حي الله العديل راعي اليوكون :D

واشكر لك هالكلام الطيب ياطيب .... اليوكون .... اللي يقول عن اليوكون كلام مو طيب ارشه بالديزل :no:
وش فيه اليوكون ... اجدع ناس يعني اجدع سيارة ... واللي يحبون اللاند كروزر اقول لهم الله يهنيكم ..وكلن ينام على الجنب اللي يريحه ....لكن عاد عطي الله لا تمسونه :no2:
وعلى قولة الشاعر
لالاتضايقون اليوكون لا تضايقونه @ لالا خلوه يجني من حياته ثمرها

:alarm:

وهلابك

[ابو شكاع]

المخضرم
اهلا وسهلا بك
واشكر لك مرورك
هلابك
ولاهنت

[ابو شكاع]

ابو فراس <<< نطقه صح :good:
الأحباب واجد الله لايحرمنا منهم ... وما لك الا من يجي محلك << طاب عليك الله يستر لا تلزم
بالنسبة للصورة .. هذي طال عمرك درس تعلمناه حنا من مكشات ....كثير مشاركات كان فيها التعامل مع البييئة بهذا الشكل وانا اعتبر هذا الأمر فضل لمكشات علينا ... ولولا نسيان الأسماء لذكرت لك منهم الأعضاء اللي كانوا يطبقون هذا الكلام وبالصور بعد
اشكر لك مرورك ولاهنت

[ابو شكاع]

العارض
ابو فيصل هلابك
ياخوي انت شفت .... هالحين ادورك بالصمان وتواعدن هناك همن تسهجن :D

بس تدري عاد ... موترك طلع اكشخ من قبل ولا الفرق .... خصوصا انك ضاغطن الصورة وصاير قريب من الأرض ...

حتى لونه صار ازين من قبل ...منول اقول لك الأول ازين لكن هالحين اكشخ واكشخ

هلابك

[ريف النشاما]

السلام عليكم ورحمة الله

هذا الرد عقب سهر وتعب يعني لك عليه يابو شكاع يمكن تجيك الأحداثيه خطأ فخلك ذيب
وبحلق عيونك زين على شان ماتضيع

"
اولا -- لاواجب على شكر -- يعني ماعنده واجب :D وشكر هذا بالصف العاشر
بس أنت فيه يستاهل نفر

إلا ماتقولي وش هالطمره بالقصيده

تراني ما أسمحللك بالتعدي الصريح والصارخ على الددسن بالذات لاصارت ملبقه تحت((( الأثلة))) :D

الله يسلمك يابو شقاع أنا أحداثيتي

شعيب الخفس ياخلي محله = شمال النفد ويسار لطويقي
شعيبن فيه مجموعه وشله= من الخلان يابو شكاع

إلا على طاري شايب الصمان

يابو براهيم عجل ضاقت النفسي = وأشتب في داخلي همن وغربالي
من عقب دارن شمالن غرب للرسي = فيها لقلبي مداهيلن وتجاولي
أمسيت في ديرتن مكشاتها الخفسي = تسعين كيلوا وزودن عشرة أميالي
ياعونة الله كيف تباع بالرخصي = دارن عذيه بدارن زحمه وصجه ولجه :looney:


:looney:


:looney:

وحتى لقاء باسر عقب فنجال كبتشينو :redcar:

[ابو شكاع]

ربيق

يالله حيوه هلا هلا

الا وشو ياخوك الآشكي .... تراي من قريته وانا اهوجس به

لايكون بس شي ممنوع :eek:

تسلم على هالكلام الطيب ياطيب وشكرا لك

[ابو شكاع]

رسلان

ياهلا وياهلا

حي الله ولد الديرة......... والله يانا قعدت اتمقل صوركم ودي اعرفكم بموضوعك هذاك بس عجزت <<< ما به بلاغة ابد

القطة ... بيني وبنيك قوية ... يعني لوحنا مسافرين للسوادن تسان تكفي <<< يارجال وش اللي قوية وانتم تتغدون طحنية وخبز يابس لا وتدفعون بعد بما الاديتر ما معكم ولا ما

الغوري ياطويل العمر هو ذاك الابريق من البلاستيك اللي له زقم ... وشفه باين جزء منه في صورة بيت الشعر

هلابك ولاهنت

لي عودة لبقية الاحبة

[خالد2001]

مشكور اخوي ابو شكاع على الصور تلزينة و التنكيت وخفة الدم :)
:alarm: عندي سؤال :alarm:



ماهي اجداثيات خبراء البخرا


وشكرا

[ولد الشايب]

:director: اعت>ارك غير مقبول عن تصوير الونيت الحمر
لأنه ونيت خويي وحنا اللي كنا بالفيضة يوم تصورنا وكنا مسوي زحمه بالفيضة
وكان والله ودي أتعرف عليك لأن العرق جساس ( من الرس )

على طاري الونيت الحمر من بكره وصلنا فيه حول أعيوج لينة وتراي أمزح معك

[ابو شكاع]

الغالي نفل ... ابو محمد هلابك ومرحبا ..
والله ياخوك انك احرجتن بهالهرج الطيب ..... وترانا نتعلم منكم ومن موقع مكشات .... والله يحفظك ... والف شكر لمرورك الكريم
هلابك
ولاهنت

[ابو شكاع]

الرحالة.... هلابك يالغالي...
الحمد لله ان الصور اعجبتك ... واشكر لك مرورك الكريم
والف شكر لك

[ابو شكاع]

.

شايب الصمان ,,,, والله يانت حجرت لي بقوة ,,, طيب وش رايك بربيع روضة خريم <<< يبي ينسيه سالفة الحق
اسمع الله يطول لي عمرك ... الحق ابشروا به ... بس عاد هاه ... لكم اللحم ولنا العظم ... صرت كأني ولي امر جايبن ولده للمدرسة ... اقصد ما لي خبرة في الذبح والصلخ والنفخ .. لكم اني اجيب الطلي او الهريفي بالمحل اللي تبون .. وانتم عاد تفاهموا معه .. والله يانتم قشران ,,, ان الو داري ان الدعوا حقوق كان سريت لك بذيك الليلة لو بيني وبينك 100 كلم مهوب عاد 18 كلم .. الله يخلي لنا هالقارمنات لكن عاد على قولة المثل ... لا تواعد احد الا وانت متكد من الإحدثيات ...وهذا مثل جديد طلع بعد اجهزة تحديد المواقع
بعدين تعال ... انت وين محلك بالقصيم ...!!
بعدين اخاف اروح احط الحق عند تجمع القصيم وتجي تقول هالحين عليك حقين مهوب واحد ... انا مالي عن احفظ هالصفحة علشان ما يركبن حق ثاني :)
هلابك

[ابو شكاع]

هلا بريف النشاما
ياخوك هالقصيدة لقيتها في موقع
بعدين انا اذا اخطيت بالاحداثيات لا تخاف علي وانا اخوك... تراي ذيب على خبرك ... اوقف بمحلي وبعدين انزل فراشي وانام ... لو اني بارض كلها وحوش واسود ما يهمن <<< الأخ في افريقيا .. ولو هجم علي اسد اقول له عز الله اللي جيت لحتفك وتراي بحاجتك .. اقوم طال عمرك وانقز عليه واغوله ... او امسكه مسكة منومه ... واذا شفت انه قارض هالخبيث طبعا اكون آخذن حسابي ...افك لي قارورة اكتفيد واصبها في فمه... اذا كان قارض ما يكفيه قارورة ... يبي له يالله وبالله وايت اكتفيد ...ادبر لي وايت اكتفيد واصبه في فمه ... وبعدين اصلخ فروة راسه واتدفا بها.. خبرك اخوك مايهاب الا اللي خلقه
اما احداثيتك فهي وصلت ...ما يحتاج ...
وبالنسبة لشايب الصمان ... انا من يوم شفت صورته وانا اللي عرفت انه انا الشايب مهوب هو ...ماشاء الله عليه ..

وحياك ربي يابو نشاما

[ابو شكاع]

الغالي خالد2001
حياك الله ومرحبا بك ... والتنكيت اذا تامر عليه تراه حلالك ... :)

بالنسبة لخبراء البخراء يالغالي

خبراء البخراء احداثياتها هي



N 27 13 800

E 046 39 700

وهلابك

[ابو شكاع]

هلا بولد الشايب هلابه
والله ياخوك اعتذاري مدري وش لون هو قايل .. مير وش اسوي خلاص ركبن الحق غصبن علي
وبالنسبة لزحمتكم والله ياهي اناسة ما عقبه اناسه خل عنك .. عاد تعرف بالليل يمد الصوت + شوية بلاغة بنا ...
اثر الموتر موتر خويك ... اجل خلاص ابصير خوي خويك .. ابي ابشك معه .. الله يعطيه من خيره ويكفيه شره .. الا هو كم سعره جديد ... وهل هو حسب اعتقادي انهم صغروه عن الموديلات اللي قبل او لا ؟
هلابك ومرحبا ... بالنسبة لقولتك العرق دساس ... هذي انتظر عليها رسالة خاصة :)

[شايب الصمان]

ياأبوع شكاع : بتعاون معك شفت اني حليل وطيب وكل علم زين ( شايف نفسه انه هو السنع في كل شىء )

الهرفي الي أبيه نوعيه خاصه ماأحد يعرف يجيبها ألاأنا وولدالشايب فقط .يعني حنا بنجيب الهرفي,,, الذبح والصلخ الله يهديه ولد الشايب فظحنا بالصور يالله معليش نذبحه لك ونصلخه

المكان لو يكون المريخ ,,, أهم شىء الكليه وربع الكبده وبعدين أفكر باللحم والعظام ,,, بس نبي طبخه على حليب نياق هذا شرط أساسي ولا مايعتبر حق.

المكان بالقصيم : بيت الوالد الله يحفظه عنيزه - القادسيه ( بيت التصييف ) .

===================================

[ابو شكاع]

تم تم ....

اجل باذن الله موعدنا اذا جيت للقصيم .. لكن ما نبيه ببيوت ... نبيه بالخلا ..... ونبي يشرفوننا ربعنا المكشاتيين
بس على فكرة يقول التختور ما يصلح ان الواحد يكثر من اللحم الأحمر .... وانت الله يصلح امرك مغير من هريفي لهريفي ....هذا غير الكلية اللي تحلته من بعيد من التفنن بوسط الأفم... وسمعت انك تسوي عصير كبدة مع شقف :D وش رايك .. كرتون دجاج ساديا ما ينفع ؟
امزح معك ... التويس والم .. بس علمن اذا بغيت تجي ... وهذي الساعة المباركة

[صقر]

يعطيك العافية اخوي ابو شكاع

انا أعجبني بالرحلة .............. كل شيء تعليقك صورك توقيت الرحلة ... عفشكم .... خيمتكم.

بصراحة هذي الرحلات والا فلا.

مشكور وبارك الله فيك.

[بهار]

سرد جميل و صور أجمل ، و كشتة ممتازة و مثالية. يا ليتني كنت معكم ، تراي فاضي ، يعني ما عندي دوام.

[ابو شكاع]

ابو احمد
يالله حيوه .... وش لونك الله يسلمك ... وش اخبارك .... وين الناس الله يسلمك .... لا تقول بالقرآن ...انا ما اقصد سورة الناس الله يهديك ... اقصد انت وينك ما لك بينة :)
عاد لا تحذف هالهرج ترى ما به شي ...
نجي لردك
الحمد لله ان الموضوع اعجبك ... وهذي الساعة المباركة اللي تطب محلنا << الأخ ساكن في بيت جديد ...
شكرا لك ولاهنت وهلابك ...

[ابو شكاع]

بهار .... ومن قال لك انك منتب معنا ... خبرت احد يكشت بدون بهار
بهار الدلة
وبهار الشاهي مثل الزنجبيل
وبهار الكبسة مثل بهار ام يوسف الله يعطيه العويفية ويخليه لنا
نجي عاد للعلم الوكاد
والله ياخوك نتشرف بك وبكل مكشاتي ... والجايات اكثررر
تسلم ولاهنت

[شايب الصمان]

مدام أنه تم أجل الخميس عندك من فجر العالمين حتى موعد الطلعه يعني فطور غداء عشاء أنا والمرافقين بس عددهم أربعه ع؟؟؟؟؟.
التختور صادق بكلامه ولكن من الاسبوع الماضي وأنا مفير خضار مسلوقه علشان (الحقوق المدنيه) أقصد الي على الشباب .
الكليه اللي أحلته من التعفن ياله لذه عير طبيعيه....
عصير كبده مع شقف وقطع منجوا ورمان ووووووووو!!!!!
جرب مره تحبه كل مره :good2:
الدجاج ماله موقع عندي الله يسلمك....ولكن أفضل دجاج الوطنيه أشجعا لاسباب خاصه؟؟؟؟؟؟
======================
التويس هذا الله يطول بعمرك على حسن عمل والمسلمين أجمعين تصبيره قبل الوجبه الدسمه :good: :good2:
--------------------------------
الله يسلمك وجعله عامر بأهله وبأذن الله أذا جيت للقصيم بطق عليك مسمار أقصد تلفون .......

[ريف النشاما]

السلام عليكم ورحمة الله

أهلين يالرساويه

اجل مصمل ياشايب الضمان

هادونك بعيري أرتحل عليه لمين تاصل أم سدره بس http://www.mekshat.com/pix/upload/images6/mk8178_wcamel1xxxxx.gif :D

أما انت يابو شكاع اسد الصحراء لي ع :type: وده معك

[3:16]

الله يعطيك العافيه شغلكم كله زين بس ودي اسال الخيمه من وين شريتوها وبكم شريته؟

[ابو شكاع]

شايب الصمان
هلا ومرررررررحبا
اجل ياخوك لك كم يوم وانت مغير بهالمسلوق ... حتى تلاقيه بدون ماجي ..يعني مالغ بقوة عاد يصير بدون ماجي وبدون ملح ...تحس انك تشرب ماء حار ... ما يبي له الا التلقيمة ويصير شاي بالخضار المسلوقة ... بشرط انك تشيل شخالة البريق علشان يطلع لك شقف ههههههه
انتظرك باذن الله وهلابك

[ابو شكاع]

عليكم السلام ياريف النشاما
ابو نشاما هلابك ... ياخوك اثر عندك بعير رحال ... س/ هو كم سلندر س/ يحتمي بالحر يعني يحتاج اني اشيل البلف منه او لا
س/ قوته كم قنفذ س/ اللون الداخلي والخارجي س/ فيه نظام سي دي او مسجل عادي ابو مايكروفون ولمبة حمراء

ثانيا / ليش حددت لشايب الصمان مسافة لحد المجمعة ؟ يعني البعير يفو ور بالمسافات الطويلة او وشو

لاحظت ان بعيرك تانكيين .... قصدي سنامين

ثالثا / اسد الصحراء ابو شكاع ينتظرك ...مرحبا بك

[ابو شكاع]

اخوي 3:16

هلابك ومرحبا وعذرا لتأخري بالرد عليك

الخيمة ياطويل العمر من عند السنيدي في بريدة ... السعر 390 ريال .....واذكر اني شفت لها دعاية بجريدة الجزيرة وحاطين السعر 395 ريال ... حق الاعلان :)

هلابك