كيف احمي واجهة السيارة من الترميل

[comابوسليمانwww]

السلام عليكم ورحمة الله وبركاته..
الاخوة الكرام انا من سكان الرياض ويسر الله لي وظيفة في الشرقية واتردد شبه اسبوعيا ، عاد انتم خابرين الخط وشلون يعدم وجهية الموتر .
فحبيت اشاوركم وش افضل شي لحماية(واجهة) السيارة هل احط برقع او تغبيرة او فيه بخاخ زين يحمي الوجه .
وبالنسبة لبطن الموتر وش الافضل لان موتري جيب واشوف البوية من تحت بدت تتقشر فبعض الشباب اقترح علي ارشه قار ...

فحبيت اشاوركم قبل لااصلح شي ......

* يا اخوان لااحد يقولي التغليف الحراري الشفاف ؛ لانه غالي وموتري مايستاهل .

[yuesf055]

فصل برقع للسيارة من الغرابي اوفر لك

[واثق الخطوه-]

اخوي رح لم ساكو وقلهم عطوني بخاخ اسمه (رش وامش) سعره بــــــ 59.5 ريال ولا تنسى تاخذ الباقي ههههههههههه

[ابو سعد 502]

الله يسلمك عليك بالفيري اوفر ومن ناحيه اسفل السياره القار والله اعلم

[رفيع المقآم]

لالالالالالالالالالالالالالا الا الفيري ترى يخلي الانوار ضبابيه البلاستيك حق الانوار يصير لونه اصفر ما يفرق مشغل النور ولا مطفيه اما من تحت فالقار احلى حل مناسب

[شامخ ألهيلا]

شامبو نونو لادموووووووع بعد الان
لانه لايحتوي على احماض زي الفيري
ولايسبب اي مشاكل للبوية ولا للنوار

[قلم آخر]

على البركة الوظيفة والله ييسر أمرك بالنقل للرياض
وجهية السيارة ارضى بالأمر الواقع لأن الفيري والرشة مزعجتين إلا كانك بتغسل السيارة من يوم توصل الشرقية أو الرياض ، والبرقع مصيرة يتشقق او تتكيسل تركبه


الحل المشي في الليل وتجنب المشي وسط النهار لأن حركة الرياح في العادة تكون ظهرا
سلمك الله

[سوبر VTC]

بالنسبة لرش اسفل الموتر
تحصل بالزينات بخاخ مطفي يجي معه لي قصير مثل لي مكيف الصحرواي
سعره اظن ب8ريال
عموما لو تسال الشباب اللي حولك و الزكرت علموك عنه
احرص على بخ اسفل الموتر
عشان مايملح و يصدي موترك من الاسفل
من رطوبة الشرقية + ماء البحر

مبروك الوظيفة و الله ييسر نقلك
شف ان حصلك انتداب :)

روابط :good2:


خطوات مهمة للحفاظ على لون سيارتك وبريقها (http://www.mekshat.com/vb/showthread.php?t=115618)

وش افضل للخط فيري ولا رشة ولا شحم ولا برقع (http://www.mekshat.com/vb/showthread.php?t=142993)

[ولد وايل..]

السلام عليكم....

شف سلمكـ الله ...

بالنسبة للي تحت رشة رشة موجوده عند محلات الرحلات السنيدي ولا برق الحيا ولا القناص بالدمام تلقى لونها اسود وموجود بها صورة لندكروزر مركب جنزير ولا اذا تبي شغل ابو رفسه رش قار...

اما الوجهية مالك الا بررررقع لككككن لازم يكون برقع مفصول الكبوت عن الشبك والانوار...

ويكون برقع مشدود ومحكووور صححح ع شان ما يطقطق ع البدي...

الله ييسر امورنا وامورك..

[المحتر77ف]

البخاخ رش وامش ..
ياليت ما احد ينصب عليكم تراااهـ مويه وسكر فقط ويبيعون اللتر فوق 50 ريال
نصب وخدااااع
انا سيارتي 2008م واستخدم احدى الطريقتين وهي فعاله واجهت السياره الان مشاءالله
زي ما هي وكاله وانا اسرع واسوق في العج ,,
الطريقه الاولى \ ذوب كميه كبيره من السكرفي لتر ماء واستخدم بخاخ ورشها على واجهت السياره
وبعد الرش اذا حاب جب فاين واغرقه من نفس المويه وامسح على المرشوش عشان
يصير طبقه عازله وغير مؤثره على البويه الا وتعطي سيارتك لمعه تسحر
الطريقه الثانيه \ نفس الاولى بس بطون خلطات خخخخ
من التموينات خذ لك كم علبة سفن اب ورجها وافتحها ورشها زي الطريقه الاولى


الحقيقه جربت الفيري ولازم تلمع السياره كامله بعد فتره من الاستخدام لانه يعطي لمعه زياده
في اماكن استخدامه وكان اللون متغير ومتعب في ازالته والتغبيره دمار وتنشب في الاماكن الضيقه
الشحم ايضاً مضر وكلها توسخ الموتر وتوسخك
السكر او السفن بعد دقائق ينشف ويصير كنك مسوي طبقه شفافه ويحافظ على منضر السياره زائد النظافه
بس ماله داعي احد يلعب عليك ويبيعك قاروره ماء وسكر ب 50 ريال

[H5N1]

انتبه

لاتستعمل بخاخ zero scratch
لأنه يعدم البلاستيك والبوية حسب تجربة اخوي مع سيارته الإسكاليد .

[عنيزاوي999]

يالمحترف

مشكور على الشرح ياخوي
بس حبيت استفسر
طيب لاخلطت الماء والسكر
اخليه ثقيل قريب من العسل ولا كيف

[comابوسليمانwww]

اعتذر اخواني عن التاخر في الرد ..
واشكر الجميع على مرورهم واراءهم الرائعة.
لكن دخل مزاجي فكرت اخوي المحتر77ف الاولى الماء والسكر لسهولتها ولانها شفافه
لكن ابسألك اخوي المحتر77ف الطريقة هذي ماتضر البوية وزي مايقال اخوي عنيزاوي999
كم نسبة السكر بالنسبة للماء .