وش رايكم ياهل الباتروووووول ؟؟؟؟ ابي شوركم لاعدمتكم

[`ذيب الحرة]

السلام عليكم ورحمة الله




السالفة وما فيها انا رجال راعي طلعات للبر طويله


شريت لي تانكي ماء من السنيدي سعة 100 لتر



تخبرون الماء مثل ما يقولون عصب الحياه


ونا اطول بالبر ولذلك كان لزاما علي توفير هذا العصب بالذات بالسياره



المهم تخبرون احيان املى التانكي ماء لاجيت كاشت يم البر



ويمتلي الخزان واكييييييييييييييييييييييييييييييييييد ( يثقل على المووووتر)



علما بان موتري هو (( نيسان باترول ربع ( سلق) م 93 ))


وياياته والمساعدات كلهن لبلده


وصار الموتر شكله مو بزين خصوصا اذا امتلى التانكي



تقووووووووووول ينزل من الخلف واجد ويعطي صوره غير جيده


وهم بعد يصير ثقيل بالحيل بالممشى




ابي شوركم علي اغير يايات ورفع الموتر من الخلف


ولا اغير مساعدات
ولا كلهن



ووشهو افضل شي يدوم معي منهن ؟؟؟؟؟؟؟




شوركم لا عدمنااااااااكم ؟؟؟؟؟؟؟ يا قوووووووووم النياسين




وسلامتكم

[باترول2008]

هلابك أخوي

وعلى البركه التانكي

وبالنسبه لمشكلة نزول الموتر هذي يبغاله ياي إسترالي

ركبلك المقاس الوسط (3سم ) من الرمايه الظاهر سعره بـ550

وإن شاء الله يبي ينتهظ الموتر ويزين شكله


وبالنسبه للربع دائما يطلع فيه صوت من إلتقاء عمود الكردان بالقير

وهذي حله ينزل القير حاجه بسيطه وفيه ناس محترفين هالشغله ولا تأثر على الموتر وعلى ما أضن تكلفته 150 ريال

وإن شاء الله يفيدونك أهل الربع عن طريقته



دمت بود

[سفاري959]

وانا رايي من رأي اخوي باترول 2008 عندي باترول 99 صالون ركبت ياي استرالي وارتحت مهما تحمل ما ينزل ونفس الراحه بس اهم شي ركبه على مساعدات البلد المساعدات الاستراليه مطبها قوي على السيارة الله يوفقك ويسهل امرنا وامرك

[التعـ King ـديل]

اوافق اخوي باترول 2008 بكلامه

[`ذيب الحرة]

الاخ العزيز باترول2008


الله يبارك فيييييييك
بيض الله وجهك وما قصرت



واكيد باخذ بشورك دام الجماعة كلهم شاروا علي برايك



بس ودي افهم شي بسيط ارفع الياي ولا لا يعني ارفع بالموتر


لا ركبت اليايات الاستراليه وكم ارفع به ؟؟؟؟؟




ولا هنت لاهنت على فزعتك



سفاري959
ما قصرت ومشكور على مرورك


لتعـ King ـديل



لاهنت لاهنت وجزاك الله كل خير ولكل من رد علي

[باترول2008]

ما فهمت كلامك زين ( ارفع الياي ولا لا يعني ارفع بالموتر لا ركبت اليايات الاستراليه وكم ارفع به ؟؟؟؟؟ )

وبالنسبه للياي هو اللي يتحكم برفعة الموتر وقدرة التحميل وقساوته مع المطب والبطناج


بالنسبه لمقاسات الياي للباترول

على آخر زياره لي لمحل الرامية

عنده ثلاث مقاسات يايات إستراليه
النوع الأول إرتفاعه 3 سم وهو أريح المقاسات بعد ياي الوكاله (ومن رأيي أنه الأنسب على موترك)
وكد ركبته قبل على موتري فتك وإرتفاعه زين وسعره على ما أضن 550

والنوع الثاني 5 سم وأقسى من الأول وأقسى للتحميل ولا أعلم كم سعره

والنوع الثالث 6 سم وهو أقسى الأنواع وأقواها في التحميل وهو اللي راكب على موتري حاليا
وسعره 675 على ما أذكر ( لكني ما أنصح فيه للربع لأنه عالي جدا على الربع وبحكم إن شاصي الربع قصير فبتكون زاوية الإرتفاع عاليه لكن على الصالون أو الأربع أبواب مناسب وحلو شكل وقاسي بالتحميل لكن يعيبه قساوت مطبه)


أتمنى إني أفدتك ولا تنسى شغلت تنزيل القير

وبالنسبه لأماكن البيع الرماية بالرياض التخصصي وجده طريق المدينه (هاذي الفروع الي أعرف )



دمت بود

[الشامخ11]

اخوي انا معي موتر كان ينزل اذا حملت عليه اغراض البر
ركبتله كعكات وانظبط تكلفتهن سبعين ريال مع التركيب
طبعا موتر كان جي اكس

[قشميط]

ركب ياي استرالي وريح راسك ارتفاع 3سم
عزالله انه علاج
وتلقاها عند الرماية وقيمته مثل ماقالوا لك الاخوان 550
وارقام الاتصال للرماية
الرياض
التخصصي 014628249 البديعة 014240929
طريق المطار(الفلاح)014655555-283
التحلية الشفا 014621627
الدائري الشرقي (القدس)012402951
الزلفي 064223990
بريدة 063249364
الجوف046262675
حفر الباطن 037215141

[قشميط]

انحش عن الكعكات تسبب احتكاك
الثانية فتره ويرجع ينزل الموتر لان يكون الياي تعبان اساسن
اذا كان طروف المادية حليلة ركب كعكات
اذا كان ظرفك المادية طيبة ركب يايات استرالية لك ولازمان

و

[`ذيب الحرة]

الاخ العزيز باترول2008



مشكور ولاهنت وشورك وهداية الله



وعزالله ما قصرت معي ابد ابد


بيض الله وجهك يالنشمي




الأخ العزيز الشامخ11
مشكور مشكور على ردك وافدتني كثيرا وما قصرت



الاخ قشميط العزيز


عزالله ما قصرت ابد



وصل الرقم وجاري الاتصال




واخيرا احب اشكر كل من رد علي


ولاهنتوا يالوجيه الغانمه

[محمد النيساني]

شباب الأسعار الي تتكلمون عنها هل هي طقم 4 يايات او طقم يايين

[بواردي الدبدبه]

مااقصروو الاخواان

[باترول2008]

شباب الأسعار الي تتكلمون عنها هل هي طقم 4 يايات او طقم يايين



هلا أخوي

هذا الله يسلمك سعر اليايات الخلفيه فقط :D


دمتم بود