اللغز الثاني والعشرون...........<<اللغزمحلول>>...........(((صاح ب الحل:عاشق الصحراء)))

[السمح]

تمشياً مع الخطة المقترحة نستأنف ألغازنا بهذا اللغز الذي يقول فيه صاحبه :


يا ويش عود ٍتَحَسْب حْسابْه الناس= البـدو واللي يســكنون القرايا
إلى حـضر تَريَّـحـوا عـقـب الاتعـاس= وابْعد عن الفلاّح راعي الرعايا

[صالح2]

اخوي السمح
هذا طال عمرك الربيع ولا يهونون الخوان .

[السمح]

حياك أخوي صالح .. وياهلا بك ..

لا مالك لوا مهوب الربيع ..

تحياتي

[صالح2]

وحياك اخوي السمح واباحاول مره ثانية واقول انه المطر !
مع الشكر .

[الهيثم]

السلام عليكم ورحمة الله وبركاته
الحمدلله على السلامه ومن طول الغيبات جاب الغنايم

أضم صوتي مع اخوي صالح2 واقول المطر أو الوســـم , وش رايــك أثنين ضد واحد .

ولك تحياتي ,,,,,,,,,

[السمح]

هلا بك صالح مرة ثانية ..

غير صحيح مهوب المطر ..

وإن كنت قريب ولكن مع الأسف لا ..

===================================

الأستاذ الهيثم ..

تسلم يالغالي وشاكر على شعورك النبيل .. وابشر بكل الغنايم ..

أيضا حلك قريب ولكن لا مهوب الوسم ..

تحياتي لكم ..

[المسفهل]

هذي محاولة وإذا لم تكن صحيحة خلها بيني وبينك

يمكن يكون فصل الشتاء أو الربيع !!!!

[السمح]

هههههه حلوة يالمسفهل ..

يالله علشانك أبخليها بيني وبينك :D :D

ولكنكم يالربع والله قريبين ما نتم بعيدين ..

[الهيثم]

عندي رمعتين وشكلهن مع درب اللي قبلها بس ماعليه محاوله ولكل مجتهد نصيب .
وش رايك في السيل أو العشب

ولك تحياتي ,,,,,

[السمح]

لو إن كلامك صحيح كان قايلين صح لصالح من مبطي ..

لا مهوب صحيح ..

تحياتي ..

[عاشق الصحراء]

وايت الماء (التنكر ) يخلي راعي الرعايا ياخذ راحته بالمرعى.

[السمح]

والوايت ياعاشق الصحراء تحسب حسابه الناس .. :confused:

على طاري الوايت يقولون واحد اشترى وايت .. وقال والله إن ودي أشري غنم لهالوايت ..

شكراً على كل حال .. ويعطيك العافية ..

[تعرض]

مع التحيه أخوي السمح والله انا ابدخل خضم المعركه والله يعين عندي رمعتين اما انه الزرع او التمر وش رايك:light:

[السمح]

حياك أخوي تعرض ...

وسلامتك لا مهوب الزرع ولا التمر ...

ولك إن تستمر في المعركة في محاولات أخرى ...

[المسفهل]

عند رمعة والظاهر إنه زامه بس قايله قايله الله لايعوق وش رايك بعيد الفطر ؟؟؟؟!!!!

[السمح]

أقول المسفهل .. هذي مهيب زامة وبس إلا ضاربة بالضلع الله يدفع البلا ..

بس هالمرة مانيب مخليها بيني وبينك .. :D أبخليها بيني وبين الشاشة ..

لا لالالا :no2: مهوب صحيح ..

بانتظارك يالمسفهل .. وعلى الله ما تصير المرة الجاية هافية ..

[المجًفل]

مساكم الله بالخير
يعطيكم الله العافيه جميع

اخوي السمح خذ هالرمعهالليل

[عاشق الصحراء]

و الله اعتقد ان الجواب هو نجم سهيل


و الله ان الشباب ما قصرو و كلهم حول النيشان , بس اعرفك تقول منتم حوله تبي تضيعنا
عن المكان اللي به صيد و تخلي الصيد لك انت لحالك يا بو تركي.
تر ما تمشي علينا حركاتك.

[السمح]

المجفل :
حياك الله .. ومعليش مهوب الليل .. وخيرها بغيرها ..

===========================================

عاشق الصحراء :
مسكين اللي ما له عاشق صحراء تسلم لي والله عز الله إنك جبتها , وصحيح الإجابة سهيل .. والله الفرق بين الوايت وسهيل :bounce: وكنت يوم تقول الوايت كتبت .. كل وايت وانت بخير، ولكني رجعت ومسحتها خوفاً من الحساسية واكتشفت إنك تتقبل المداعبات والمزح ونفسك خفيفة مع ثقل عقلك ( وش جاب ) .. :D :D
عاد هالحين دورك ياعاشق الصحراء عطنا لغزك الله لا يهينك وليكن عنوانه ( اللغز الثالث والعشرون ) ، ولا تبطي علينا الله لا يصغرك ..

============================================

أشكر كل من شارك وحاول في حل اللغز ..

[الهيثم]

مشكور ياعاشق الصحراء وصح السانك عزالله إنــك جبتها وصح السان اخوي السمح على اللغز الجيمل ولا يخفيك عقدنا شوي والبركة في عاشق الصحراء بيض الله وجهه .
ولكم تحياتي

[حجرف]

نجم سهيل