لند كروزر تويوتا عبد اللطيف جميل ولااليحيى

[العين99]

السلام عليكم شباب, ارجو النصيحه ايش اختار سيارة لاند كروزر2010 ابو جميل او اليحيى , هناك عدة تساؤلات جميل عليه ضمان بس سالفة القطع الصينيه والاكسسوارات الصينيه صحيحه او لا, واليحيى وين الضمان حقه وكيف والمبلغ غالي اكثر من ابوجميل,وشكرا

[ساري 111]

اليحيى افضل ,,

[العين99]

اخي الحبيب ليش اخترت ا ليحيى وين ضمانه , بارك الله فيك اليوم ودوم.

[اليكي]

بالنسبة لي كنت بنفس حيرتك وخذيت عبدالطيف جميل ...

لانه فارق السعر كبير ... اسأل عنهم الحين يمكن تغير الوضع .. بالنسبه لي كان الفارق اكثر من 20 الف !!

وعبدالطيف جميل توقفه عند اليحي مافيه فرق نفس النوعيه بالظبط ... لان 2010 اختلف وتغير عن 2008 ..

الي يفرق بينهم :
1- الدعاسات ... الخليجي اصلي وعبدالطيف جميل لا .... وقيمته الاصلي عند قطع الغيار 1000 ريال
2- الحساس الخلفي ... يقولون انه يختلف
3- الاسطبات ... عبدالطيف جميل صيني بس ماشفت احد اشتكى ..
4- الريموت << عبدالطيف جميل تشغيل عن بعد اليحي لا
5- الكومبرسر الخليجي اصلي وعبدالطيف جميل صيني برضو ماشفت احد يشتكي ...



والباقي نفسه بالظبط .. مافيه اي تغير ...
وللمعلوميه تلقى سعر عبدالطيف جميل اغلى من الوكالة لانه الاقبال عليه من الخليج ... بسبب فارق السعر ولا فيه فرق.

وانت اكبر دليل لك رح للمعارض ودور Gxr خليجي وسعودي ( مستعمل ) مثلا 2008 وشف كم اسعارهم .
تلقاهن متساويات ...

وهاذي من تجربتي ووجهة نظري ...

والشباب يفتونك ولا يقصرون بتجاربهم .

[العين99]

اشكرك وفعلا كما تفضلت وزود على ذلك الجنط صيني , بس ابغي هل لليحيى ضمان وتصليح في وكالة التويوتا.شكرا 1000 وبارك الله فيك وجزاك الله الجنه.آمين

[ي3ي3]

خذه من البحرين احسن :)

الاخوان يفيدونك

[ساري 111]

ميزه اليحي مافيه اي خربطه ياباني 100%

وسمعت تقدر تدخله على ضمان ابوجميل

عيب عبداللطيف جميل عده امور

الخطوط (نفس شكل خطوط الاصلي بس تتغير مع الوقت)
الدعسات
المسجل
الانوار (تشهب ويدخله غبار مع الوقت)
الجنوط
.. الخ

كله مهب اصليه

[العين99]

تحيه للاخوه الكرام,يعني ابو جميل نكبه وناخذ من اليحيى نهايه اخر كلام. وشكرا

[الكشات]

الضمان ما راح يكون ساري إلا إذا كنت تعمل الصيانة الدورية عند الوكالة كل 5000 الى10.000كلم طوال فترة الضمان ولو تحسب بكم يسوي الصيانة يكون هو طلع حق الضمان عشر مرات واحتمال كبير ما راح تحتاج الضمان بإذن الله تعالى طوال 100.000 كلم الأولى.


قبل كل هذا لا تنسى صلاة الاستخارة والله يدبرك على اللي فيه الخير

[بارق تميم1]

من ناحيتي انا افضل اليحيى لأن مثل ماقالوا الشباب يجي بلد:) مافيه اكتسوارات صينيه:(

ومن ناحية الضمان تقدر تفتحله دفتر ضمان عند عبدالطيف جميل تقريبا مايتعدى 2000ريال
وبالنسبه لفرق السعر بين اليحيى وعبدالطيف جميل تقريبا 4000الف ريال (كلامي هذا على ال Gx_r فل كامل قير عادي موديل 2009 عند اليحيى كان سعره ب174000 الف وعند عبدالطيف جميل كان ب170000الف ريال )

ومثل ماقالوا الشباب لاتنسى صلاة الاستخاره

[رفيع المقآم]

والله وانا اخوك اليحي حلو لكن غااااالي 230 جي اكس ار 8 سنندر فل كامل والله غاااالي

[خالى البال]

انحش عنهم كلهم لجميل ولااليحيى كلهم متفقين - والصيانه عندهم اذا كانة السيارة جيبها من براى يخذون القطع الاصلية ويحطون لك قطع صينية واقصد القطع التي لاتحتاج صيانة
يعني يفكون القطع الاصلية السليمة ويحطون صيني اومن مصانع شرق اسياء المضروبة -حتي تكون كل يوم وانت عندهم صيانة في صيانة

[التعـ King ـديل]

اليحيى افضل مع اني مااحب التويوتا بشكل عام غير البرادو

لكن تقدر تدفع 2500 ريال فتح ملف صيانه عند ابو جميل ويكون مضمون عندهم

[ابن عكاش]

اليحيى بدون ما تشاور وبعدين لا تشيل هم الضمان توكل على الله لأن التيوتا ماشاء الله زيت وبنزين ومافيه إلا العافيه
سعر الجك آر الفل 2010م عند اليحيى 2009آلاف
ارسلي إيميلك وارسل لك صور جيب لكسزس من ابوجميل ان فك الجنط لأنه صيني

[العبله]

اليحيى افضل وانتبه توديه لابو جميل لانه بيلعب فيه اسأل مجرب خذ موترك ولا تفرب للوكاله واذا على الضمان رح للبازعي اذا عنده فتح ضمان ابرك واحسن من ابو قبيح.

[هوايتي مكشات]

ياغالي ابو جميل احسن من اليحيى لانه صاحب الوكالة هذاك لو بتجيب قطعه بتبلش

[المستهدف]

الخليجي اكيد افضل

من عدة نواحي منها عبداللطيف يطلب الموتر بدون

اكسسوارت حتى الجنوط تجي بجنوط المينا على ما قالوا

ومثل ما ذكروا المكيف و الخطوط و المسجل و ...

شف وكالة البازعي فيه عنده صيانه كذلك ضمان

وهذا ماتبحث عنه ..

اسال الله لك التوفيق ،،،

[arab1]

باختصار
اليحيى يستورد سياراته من وكيل الشرق الاوسط في اليمن ( بازرعة ) وأنا أضمن لك 100% أنها يابانية ,

الأهم أن اليحيى يأخذ سيارات من وكيل البحرين ( كانو ) وللأسف يبيعها على أساس أنها نفس سيارات بازرعه

عموما اذا تريد تعرف انها من حق ( بازرعة ) تأكد ان البليته في الزجاج الأمامي غير موجودة يشيلها اليحيى لأن مكتوب عليها بلد الاستيراد ( اليمن )

ثانيا البطاقة الجمركية تلقاها من منفذ ( الطوال )
==
بازرعة بإجماع موقع تويوتا العربيه أفضل مواصفات في الشرق الأوسط واستخير ربك وما بتندم

[ذيب عالية نجد]

فر عن أبوجميل فرارك من الأسد
ياخي خذلك خليجي سواءً اليحيى أو البازعي بس إنحش عن لصمقة أبو جميل وقطعه الصينية والغريب أنه مفضوح لكن الناس إلى الآن تشتري منه

[العين99]

الله يحفظكم دنيا واخره وبارك الله فيكم وفالكم التوفيق يارب , والله يكتب الي فيه الخير للجميع,شكرا .

[العين99]

اخواني اخذ من اليحيى ولا لا؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

[العبله]

اخوي اللي سمعته ان اليحيى ضمانه عند ابوجميل ولا ادري اذا الكلام صحيح او لا..
والله يكتب لك اللي فيه الخير

[أبو ردن]

أنا أنصحك بأن تصلي صلاة الاستخارة وتوكل على الله والله يوفقك

[moooj]

السلام عليكم شباب, ارجو النصيحه ايش اختار سيارة لاند كروزر2010 ابو جميل او اليحيى , هناك عدة تساؤلات جميل عليه ضمان بس سالفة القطع الصينيه والاكسسوارات الصينيه صحيحه او لا, واليحيى وين الضمان حقه وكيف والمبلغ غالي اكثر من ابوجميل,وشكرا


اذا ما شفت السيارتين فلا تحكم على كلام احد
واذا شفتهن فالمفروض تلاحظ الفرق
بالنسبة للضمان من تويوتا اليابان موب ضمان جميل ولا اليحيى يعني لو تشتري الموتر من اي وكيل او موزع وتسافر بوركينا فاسو او موزمبيق تمر الوكالة الي هناك ويسون صيانة للسيارة برقم ال VIN الي هو رقم الشاسي ومال الوكيل علاقة (علاقة ملابس):D
الله يوفقك وييسر امرك

[aliwww]

اجل يالربع توهقت يوم شريت من جميل المشكلة مانعرف إلا ابو جميل وتوهقنا
ياليت احد يذكر الفروقات عندي جي اكس ار 2011 سته سلندر فل على كلامهم

[.أبوعبدالرحمن]

الموضوع قديم من تاريخ

05/04/2010م

يغلق