ما خاب من أستشار وش أشتري سيارة ؟؟

[هبايب نجد]

السلام عليكم ورحمة الله وبركاتة .
بصراحة راسي جالس يفر فر ولي كم يوم جالس أفكر وش أشتري سيارة طبعا راح أقول لكم وش مقدار الحاجة ..
طبعا عائلة مكونة من ثلاثة أطفال وعاملة منزلية
وشي ثاني أنا صاحب أستخدام يعني أكرف السيارة أكثر من عشر سنوات لين تكثر مشاكلها
وطبعا الميزانية ما يقارب 110 الف ريال وممكن الزيادة الى 120 الف
أهم شي أتوماتيك ودفع رباعي ومكيف خلفي
ويعطيكم العافية

[جرير]

الله يحفطك ويوفقك بالشروه الطيبه
مواصفاتك مميزه عشر سنوات دون تغيير شيء طيب
لكن عليك حساب زيادة افراد العائله خلال هذه الفتره.
راي المتواضع لا تبعد عن الياباني تايوتا او نيسان هي التي لا تطلب صيانه وتريحك وقت طويل
لو المالية اكثر قلت لا تبعد عن اللاند كروزر .
ومواصفاتك الماليه تنطبق علي الباثفيندر او البرادو وحولهم فدندن وابعد عن الامريكي وغيره
نصيحة مجرب , موفق

[ادولف هتلر]

على هالسعر انصحك ..
بالباترول سفاري 2 2009 بتلقاه اخو الجديد بحوالي 120 تزيد او تنقص
انا تقريبا مثلك بس 3 اشخاص العائلة
ومعي سوبر سفاري مريحني على الاخر افضل من الاند ترتاح حق كرف وبر وخط



تحياتي لك

[ابوحمزة 2009]

ان شاء الله يصلحلك جيب لاندكروز 2006 بريمي

[عزوز 2005]

مايبيلها مشاور
لاندكروزر مفخرة 2008 أو 2009 مستخدم استخدام بسيط تلقاه ب 120 ألف

[S4500]

اخوي خذلك باترول

اذا بغيتة خط خذ رجال و اذا بغيتة بر ما يقولك لا و شكل حاجة ثانية

وفي نفس الوقت صبور و يتحمل

[ابوطاقية]

1-برادو V6
2-اكستيرا
3-اكسبلورر
سيارات قيادتها بالمدينه خفيفه وصيناتها خفيفه وان شاء الله 10 سنوات بالراحه

[ابو عبووودي]

فورتشنر فيه كل الميزات المطلوبه 6سرندل 2010سعره بالوكاله حدود110الف ريال

[أبوحمييد]

نعم انا رأي من رأي اخوي ابوعبووودي...

[سوبر VTC]

حدد استخدامك بر ديرة سفر ؟؟؟
نفسك تميل للامريكي او الياباني ؟؟؟
انصحك باليوكون او التاهو م2007 و طالع
موتر نشيط راحة بالسفر وسيع من الداخل اقل صرفية :good:
اخبر احد الربع يذكر شخص بالرياض يبيع الموتر باقل من الوكالة
بحكم انه ياخذ كميات من الوكيل
اذا كان الجديد دفرنسين ب135تقريبا فهو يبيعه لك ب115 او 118 تقريبا

الخيار الثاني
باترول فتك مريح نشيط مركب وسيع يصلح بر ديرة سفر
الصرفية مثله مثل الجيب

لاتنسى الاستخارة بعد الاستشارة

[رفيع المقآم]

طع شوري فتك جديد تلقاه بهالسعر وبعدين ترى انا من عشاق سيارات تايوتا يعني ابي اقولك خذ لاندكروزر بس ما تلقى جديد انصحك بالباترول بانواعه بس اهم شي مكيف مركزي

[اليكي]

1-برادو V6
2-اكستيرا
3-اكسبلورر
سيارات قيادتها بالمدينه خفيفه وصيناتها خفيفه وان شاء الله 10 سنوات بالراحه


مثل ماقال ابو طاقيه
وازيد عليه فورتشنر له انواع كثيره على قد ميزانيتك

[الادعج]

لو كنت مكانك وعندي حول مبلغك او يزيد شوي ...أكون خيرت نفسي بين خيارين لا ثالث لهم..

1/باترول^فتك^ موديل 2009 سفاري 2 ماشي بحدود 40 الف بس اكون معك صررريح ناااااادر ماتلقاه نظيف بالسوق
2/لاندكروزر GX أو GX-R موديل 2008 V6 تماتيك طبعا ماشي بحدود 65 الف ...واحتماله تلقاه بالسوق نظييف كبيره جدا

.....والحقيقه تقدر تأخذ جديد فوتشنر <<<^لاانصحك نهائيا لعد الراحه وخصوصا انت معك عائله^ او تأخذ برادو(الحقيقه ماقدت جربته) ..او تأخذ باث بافندر(مرررريح جدا) لكن كل الثلاث الاخيرات اللي ذكرتهن مايقرنن بالاول والثاني اللي ذاكرهم باول كلامي من كل النواحي ...لا من ناحيه الوسع ( واعتقد ثلاث اطفال وخدامه معك انت وام العيال يعني خمسه ضيق عليهم الفوتشنر ولا الباردو ولا الباث مع احتماليه زيادع عدد الاطفال بالعشر السنين القادمه الله يرزقك برهم)..و من ناحيه الشكل ....الخ والله ييسر امرك ...ونصيحه لوجهه الله دامك ناوي تكد الموتر عشر سنين لاتبعد عن النيسان او التيوتا

[للبر رجلية]

اعتقد أن الفورتشنر 2010 خيار ممتاز
ومايعبه إلا ان الراحة لك عليها شوي , لكن من ناحية قوة وسعر وسعة (3 مراتب) أعتقد خيار ممتاز
وعليك بالمشورة والاستخارة .
نصيحة : لا تشتري موتر إلا وانت مقتنع به تماما من كل النواحي

[ابوعبدالله 22]

نصيحة خذ لك اكسبلورر فورد 2010 وكالة بـ 95 الف .. يابلاش ، والحين اكل السوق وصار مرغوب وقطع غيار متوفرة في السوق وببلالالاش .. راحة وقوة وعزم وسعة

[تناهيت]

يوكن او تاهو 2009 كد ومد

بالتوفيق

[سهم قيادي]

وعليكم السلام ورحمة الله وبركاته
ارشح لك الاكسبلور خفيف وسهل وقليل الخربات ومريح داخل المدينه وخارجها كانه سيارة صغيره
وارتفاعه معقول خصوصا اذا كان عندك احد ما يقدر يركب السيارة الرفيعه ويجي منه ثلا مراتب و6 و 8 سلندر لان السيارات الكبيرة داخل المدينه حدها مشوارين ثم تحس بدوخت الراس
اذا عزمت مره على سيارة معينه استئجارها من حقين الاجار وجربها افضل حتى تكون مقتنع فيها
موفق ان شاء الله ولا تنسى الاستخارة

[بدوي جنوبي]

نصيحة خذ لك اكسبلورر فورد 2010 وكالة بـ 95 الف .. يابلاش ، والحين اكل السوق وصار مرغوب وقطع غيار متوفرة في السوق وببلالالاش .. راحة وقوة وعزم وسعة

ابو عبدالله
اى فئه تتكلم عنها
وهل هو 6 او 8 سلندر ؟

بالتوفيق

[تناهيت]

ابو عبدالله
اى فئه تتكلم عنها
وهل هو 6 او 8 سلندر ؟

بالتوفيق


هلا بك مشرفنا الفاضل
للعلم 8 سلندر اكسبلورر ما ينزله الوكيل الله يسامحه وكل اللي موجود في السوق استخدام امريكي

ابوعبدالله بارك اللة فيه يعني 6 سلندر

تحياتي

ولا زلت انصح صاحب الموضوع باليوكن او التاهو :good:

[هبايب نجد]

الله يعطيكم العافية وأنعم وأكرم بكم من اخوة ونصائحكم القيمة
طبعا يستحيل أن أشتري سيارة مستخدمة مع العلم أني كل ما تاخرت في الشراء راح تزيد الميزانية بمعدل 10 الف ريال شهريا عموما راح أمر المعارض وأشوف جميع السيارات التي اقترحها لي الاخوة
والله يعطيكم العافية

[غواص وقناص]

خذلك فورتشنر V6
جديد لا تشكك في استخدامه ولا شي
مكيف مركزي يتسع ل6 اشخاص با الراحة
وبعد عن الأمريكي
تويوتا او نيسان
واهم شي الأستخارة
والله يسر أمرك

[نيساني قديم]

سوبرسفاري فتك لك وللزمن وقيمته فيه

[فهد773]

خذ لك تــــــــــآهو موتر مريح ونشيط وصيانته خفيفه

[- النشمي -]

1- تاهو

2- اكسبلورر



بالتوفيق ان شاء الله

[الربذي]

سفاري-اولاند او2010اكسبلورر تراه منتشروبقوة

[ساري 111]

أكرف السيارة أكثر من عشر سنوات


مادام هذا طبعك نصيحه اخو لاتعدى التويوتا

[بدرسرور]

فورتشنر ورح يالذيب توكل على اللــــــه .

[طفقان]

خذ مفخره الارض باترول فتك

[الرمح العربي]

إذا كان هذي مواصفاتك للسيارة مقارنة مع عدد أفراد عائلتك وتبيه يمشي معك 10 سنوات يعني منتب راعي بيع وشرا فما لك إلا الباجيرو هو الوحيد تنطبق عليه هذه المواصفات مجتمعة قوة وصبر وتحمل وقلة خراب وطول عمر لقطع الغيار ومريح مقارنة بأقرانه من السيارات الرباعية لكن عليك بأكبر سعة للمكينة لأنه يجي أكثر من سعة للموديل الواحد والأخير فيه شاشة ملاحة. والوكيل تغير اسلوب تعامله مع العملاء وانتهج سياسة جديدة لترغيب العميل.
موفق ن شاء الله.
واستخر أولا وأخيرا.