تحذير من عقارب روضة الخفس لذغتان بكشته واحده لعائله واحده!!

[المترو]

السلام عليكم ورحمة الله وبركاته
اولا قدر الله وماشا ء فعل سبحانه وتعالى

ثانيا قصة العقارب هذي حصلت يومي الخميس والجمعه 22 و23 محرم 1426 هـ
قرر مجموعه من الاقارب الخروج بنزه بريه للعوائل وتقرر المكان روضة الخفس وتم تجهيز المخيم ومستلزمات الرحله من يوم الاربعاء مساء واكتمل الواصلين الموقع الخميس صباحا وكان الجو جميل والاستمتاع عظيم بالخزاما والارض مكسوه باللون البنفسجي والاطفال يمرحون ويلعبون والجمعه الطيبه مع الاهل والاقارب وكان الجو كذلك الى مساء الخميس الساعه 8 مساء وبين ما كان الجميع مستانسين اخر حلاوه بسمره على الضوي رجالا واطفالا ونساء على فكره لم اكون معهم تلك الليله بالذات رجعت ظهر الخميس وبقيت العائله المهم وبين ماهو الحال كذلك نادى المنادي وارتفع الصياح بخيام النساء والاطفا وعلي النياح عقرب عقرب احد النساء قرصت بعقرب وهرب الجميع الى السيارات وبقيت المسكينه واستنجدت بمحارمها واعلنت حالة الطواري بالمخيم ووجدت العقرب وقتلت شر قتله وحملت بكيس واستنجد ابو نسب 997 وماذا عليه ان يفعل وماهو اقرب مكان لعلاج القرصه من العقرب لام العيال فا ابلغوه ان يتم ربط مكان اللدغه وهيهات له ذلك لان اللدغه بالظهر تقريبا وتم توجيهه الى مركز العاذريه الطبي وطيران الى مركز العاذريه خلال نصف ساعه وهو هناك وتم اعطاء الملدوغه حقنه المصل المخصص للعقرب وعرض عليهم العقرب الجانيه وصراحه كما ذكر انه توحش كبر الكف كبيره كبيره جداً وكذلك اعطيت بعض من المغذيات وكلها ساعه وهم راجعين الى المخيم والامور تمام والحمدلله على السلامه
ولكن لك يبقى بالمخيم الا القليل فقد هرب الغالبيه خوفا من العقارب ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ وبقيت العائله الملدوغه وتم الاتصال بي على ان الجميع يرغب بالعوده ومن ضمنهم عائلتي لان هناك عقارب فقلت انا سوف احضر متأخر 12 ليلاً اليكم وفعلا حضرت بالوقت المحدد متوقعا انهم سوف يعودون ولكن وجدت العالم مستانسه اللي نائم واللي سامر وكان الجو جميل وزخات من المطر تنزل وابو نسب وكم واحد متكين على الضويه وقد اكلو العشا عني ؟؟؟ وضبطت لي صنية قصديره لحيمات وخضارمدفونة بالجمر واكلتها بالعافيه مع بعض المشاركين !!!
وفي الصباح الباكر والامور تمام فطور ووناسه وزقزقت العصافير تملا الافق والجو جميل حتى الساعه العاشره من يوم الجمعه وتقريبا نوينا نمشي على الظهر واذا احد اولاد ابو نسب يسألني فيه شيء يا خال فوق راسي قلت ليش قال فيه شي قرصني قلت وين قال بيدي جيت المس راسي وحسيت بالقرصه قلت اثبت ولا تتحرك خل اشوف ؟؟؟؟؟؟؟وياللهول عقرب فوق راسه؟؟؟؟!!!!! ولحسن الحض يرتدي قبوع من نفس الفنيله على راسه وبصمت شلت العقرب من راسه بالعصا وطاحت على الارض وقتلها وهو المسكين متسمر بالارض قلت له خلاص ما فيه شيء قال يدي تعورني قلت بصراحه قرصتك عقرب صغيره وفعلا كانت صغيره جداً شكلها تنتقم لامها اللي البارحه
واعلن المنادي عقرب قرصت ولد ابو نسب يا ذا ابو نسب حشا شراره ماهو ابو نسب !!!!!!!!!!!!!!!! وهرب البقيه الى السيارات وما تشوف الا غبرتهم واشتد الهواء والمهب قوي وانطلق الجميع بالسيارات معلينين نهاية رحلة العقارب لشلة من الاقارب
اما الولد فقد مروا على مستوصف العذريه الطبي واعطوه حقنه وخلال نصف ساعه وهو بالبيت والحمد لله على السلامه

امل ان يتعض وياخذ الحذر الجميع من هذه القصه الحقيقيه من محاكيكم والتى اول مره بحياتي تمر على هذه الاحداث لدغتان برحله واحده ولعائله واحده ؟؟؟؟؟؟؟؟؟!!!! لكن لله بهذا حكمه


تحذيرخاص لمكشاتي معروف بولعه وكثر روحاته لروضة الخفس انتبه يا خيي ؟؟؟

والمعذره لعدم وجود صور لهذه الرحله بأحداثها ...... وتصدقون وانا اشوف العقرب على راس البناخي اقول بنفسي لو معي كمره صورتها واحد رايق ؟؟؟؟؟؟؟؟


اسأل الله السلامه للجميع

الرحال2003

[المترو]

السلام عليكم ورحمة الله وبركاته
اضافه لاني ما لحقت الوقت المحدد للتعديل وهي

ملاحظه ؟؟؟؟؟؟؟؟؟؟؟؟؟؟
هل للون الملابس علاقه بالعقارب لاني لاحظت ان الملدوقين ملابسهم لونها مقارب لبعض اللون الاصفر الفاتح او البيج تقريبا ؟؟؟؟؟؟؟؟؟؟؟؟؟؟؟؟؟؟؟؟؟؟؟؟
وللمعلوميه لون العقرب اسود !!!!!!!!!

والسلام عليكم
الرحال2003

[ريف النشاما]

السلام عليكم ورحمة الله

الحمد لله على السلامه :no:

الله يخزي شيطانك أنا قاعد أضحك من سواليفك وأقول الله لايبلان :no:

مرن أضحك ومرن سني سني :confused: :looney:

لاكن ما أقول إلا الحمد لله على السلامه وماتشوفون شر

ماقدرت أكتب من الضحك على أسلوبك :D


أماااااااااا


===تحذيرخاص لمكشاتي معروف بولعه وكثر روحاته لروضة الخفس انتبه يا خيي ؟؟؟===

== التكله على الله :row:

تحيتي يالغالي وسلم لي على أبو نسب

[المربد]

ســـــلامــــــات
ســــــــــلامـــــــات !!

الحمد لله على السلامة. وعساها خاتمة القرصات وما تشوفون شر ياالرحال.

وجزاك الله خير على النصيحة

[hani458]

الحمد لله على السلامه
وماتشوفنن شر لنا والعائله كنت في الروضه الى مابعد صلاة المغرب من يوم الخميس وما جانا شي رب لك الحمد والشكر

[عميد النت]

الحمد لله على سلامتهم ومايشوفون شر انشالله
وبصراحة قصتكم هذي عجيبة وتخوف من روضة الخفس
لكن بصراحة الغلط عليكم المفروض يكون معكم حقيبة اسعافات اولية وذلك لتفادي بعض الاخطار والمشاكل مثل ما صار معكم
لكن قدر الله وما شاء فعل

[محب الشمال]

الحمد لله على السلامة والله لا يعيدها ويحفظكم من كل مكروه وشر
اسأل الله الواحد الاحد الفرد الصمد ان يحفظنا ويحفظ المسلمين من كل مكروه
اللهم احفظ المسلمين من العقارب والثعابين وعثرات الطريق يا حي يا قيوم
واخواني لا تنسون بعد توفيق الله دعاء دخول المنازل والادعيه المعروفه وكذلك اذكار الصباح والمساء

[ناصح]

الحمد لله على السلامة

ولا باس عليكم نسأل الله لكم العافية

لكن الحذر واجب من خلال

* دعاء نزول المكان .
* قراءة الورد المسائي والصباحي
* الاهتمام بنظافة المكان وترتيبة
* لبس الاحذية الجيدة لا سيما للأطفال
* مزيد من الحذر في ساعات الليل الأولى
* الدراية بالاسعافات الاولية في حالات اللدغات مع وجود جهاز ( شفط السموم )

والله أعلم

محبك ناصح

[خشم الحصان]

الاخ الغالي
الرحال 2003
السلام عليكم
اخيي هذي تنفع فلم هندي :good2: والله ياني ضحكت الله يغربل البليسك لاياك حاطهم علي محمية عقارب
وبعدين يومك تقول(هل للون الملابس علاقه بالعقارب لاني لاحظت ان الملدوقين ملابسهم لونها مقارب لبعض اللون الاصفر الفاتح او البيج تقريبا ؟؟؟؟؟؟؟؟؟؟؟؟؟؟؟؟؟؟؟؟؟؟؟؟
وللمعلوميه لون العقرب اسود !!!!!!!!!)
لا ياخيي مالها علاقه اضن والله علم وضن ترا مانيب متاكد اضن
انك لبس (كنادرك الله يكرمكم لي تلامع وجت علي النور لي منعكس من كنادرك) ثم اذا كشت مع احد الله يثيبك امش حافي
عموم يابعدهم الحمد الله علي السلامه
اخوك
خشم الحصان
ملاحضه
وهذي نقطه انك مامعك اسعفات اوليه ولا جهاز مص السموم
لاترمي باقي الاكل حول المخيم حتي ولو قطع صغيره جدآ لئن الحشرات تملك حاسة شم قويه جدآ
عند النوم او عند القيام منه يجب نفض الفراش والتاكد من الكنادر الله يكرمكم (مهوب كنادرك لا انت خلك حافي)
تذكير الجميع بدعاء النزول وقرائة المعوذات كل صباح ومساء
اكل سبع تمرات كل صباح علي فكة الريق

[SilverSniper]

الحمدلله على سلامتك يالرحال.. وما تشوف لا أنت ولا اللي تحبهم شر..
الحمد لله ان العقرب سوداء... السودا سمها أخف.. بلاك من الصفرا الله يكافينا واياك شرها...
الطريقة الأحسن في التعامل مع السم.. وأنا مجربها .. بالسكين اجرح خفيف على مكان القرصة.. وبالفم اشفط واتفل.. الطريقة ذي تطلع 50-70 بالمية من السم.. وحط ثلج على مكان القرصة حتى يبطئ سريان الدم ويبطئ انتشار السم في المنطقة..
العقرب كائن عجيب جداً.. ومزاجي جداً..
يعيش أكثر من 25 سنة.. يعيش في مناطق تصل درجة حرارتها 70 مئوية.. يعيش أكثر من سنة بدون أكل.. اذا قرص.. بكيفه.. اذا بغى يحط سم حط.. واذا ما وده.. ما حط.. عجيب جداً.. الله يكافينا واياكم شرهن.. لكن لراعي البر.. العقرب شر لا بد منه..

[عريدان]

الحمد لله على سلامتكم ومن خبرتي المتواضعة أن العقارب تهيج مع موجات الحر و مع الهواء الشديد المغبر لدرجة أن أخوه لي في جلسة واحدة نفس هذه الأيام العام الماضي كانت ثلاث من العقارب تتساقط عليهم من شدة الهواء والغبار وجلسوا حتى بعد تناول العشاء ثم رجعوا لم يضرهم شيء بإذن الله. لا وزود على كذا زاروق مر بوسط الجلسه ونفجهم بجد. شكله معزوم ومستعجل خذ الفرشه قطع.
اللهم إني أعوذ بك من شر كل دابه أنت آخذ بناصيتها أو مخلوق من مخلوقاتك.
أعوذ بكلمات الله التامة من كل شيطان وهامه ومن كل عين لامه.
اللهم أنزلنا منزلا مباركاً وأنت خير المنزلين.

[ملبد]

أولا : الحمد لله على سلامة ابو نسب والجميع يابو ناصر .. وشكرا على هذا التنبيه المناسب في توقيته.. والمشوق في ترتيبه..
ثانيا : لو سألنا ( أي مكشاتي ) من هم نجوم مكشات المميزين لهذا الموسم .. لكان القول : كثير ..
لكن ( الرحال 2003 ) هذا الموسم غير .. :good2: :good2:
ليش ؟
من هذا الموضوع .. ومن موضوعات أخرى في أقسام مكشات .. وتابعوا الروابط في العبارات التالية واحكموا ..
فلقد تنوعت تغطيات رحلات ( الرحال 2003 ) المصورة
نفود الدهنا (http://www.mekshat.com/vb/showthread.php?t=27305)
للنفود الكبير (http://www.mekshat.com/vb/showthread.php?t=27110)
للشمال (http://www.mekshat.com/vb/showthread.php?t=27696)
للصمان .. وفي اكثر (http://www.mekshat.com/vb/showthread.php?t=28155)من مرة .. امتدت تغطياته الاخبارية
من الصمان لنواحي الدبدبة والشرقية.. (http://www.mekshat.com/vb/showthread.php?t=26587)
في ترحاله وضح اننا أمام
رحال واعي
(http://www.mekshat.com/vb/showthread.php?t=28293)ونلمس حسا وطنيا عندما يكتب في المنتدى (http://www.mekshat.com/vb/showthread.php?t=27713)
له أكثر من موضوع تبين من خلالها حرصه على:
الاهتمام بمكشات .. (http://www.mekshat.com/vb/showthread.php?t=26671)
وحث الآخرين على إثرائه (http://www.mekshat.com/vb/showthread.php?t=28447)
هذا فضلا عن البعد الاجتماعي المكشاتي في أكثر من رد وموضوع .. (http://www.mekshat.com/vb/showthread.php?t=26613)
حتى المصورين بأدب يكتب حولهم ملاحظة.. (http://www.mekshat.com/vb/showthread.php?t=26775)
ذلك بعض مما يلاحظه المتابع لابو ناصر في مكشات .. وذلك أيضا( اقصد الروابط ) هي بعض مشاركات ابو ناصر .. راجعوا واحكموا ..
......
قلت لكم ( الرحال 2003 ) هذا الموسم ... غير :good: :good: :good:

[أقرب نداء]

الحمد لله على السلامة

ترى يا أخوان الأسلوب في إبلاغ العائلة بوجود شخص (ملدوغ) مهم

مثلاً في الحالة الأولى، اللدغة كانت عند مخيم الحريم، وهذي ما فيها أسلوب، واسأل مجرب ما فيه إلا صراخ ونحشه، وكل وحده ما عليها من أحد (حتى عيالها) وما نلومهن وما نشره عليهن (من خاف سلم)

أما بالنسبة للحالة الثانية، المفروض داري درى وداري ما درى (اللي فهم شي يعلمني:p) المفروض ان ما أحد يدري إلا كبار ـ القوم ـ ومن الرجال بس، عشان ما يكون فيه حالات هلع وإغماء وتدافع:D،
ياخي سهلة، دور لك أقرب تصريفه :good2: ، قل ناقص علينا شي من البقالة، وبروح أجيبه وباخذ معي فلان (الملدوغ)، أو نبي نتمشى على السيارة، أو على أسوء الظروف، الولد جرحته قزازه ونبي نروح للمستشفى ربع ولا ثلث ساعة وراجعين..

والأذكار يا أخوان مهمة، الكبير يقرأ على نفسه والصغير أمه تقرأ عليه أو أبوه، وما يكون الا كل خير ان شاء الله

والحمد لله على السلامة مرة (ن) ثانية.

تحياتي،،
أقرب نداء

[كشوتي]

الحمدلله على السلامه اخوي الرحال
وتدري ان موضوعك روعن لنا مخيم بروضة الخفس من شمال وكل اسبوع نطلع له
الا الاسبوع الماضي ماحصل طلعه
لكن ها الاسبوع ناوينه والله يستر بس شكلي ابنقل السقاف معي .

[المترو]

السلام عليكم ورحمة الله وبركاته
مساكم الله بالخير واسف على التأخير للرد
خيي ريف النشاما
يقولون منول لا تضحك الا بصايم والا مصلي؟؟؟ اسال الله لك السلامه والجميع والساعه المباركه انك مريت على الموضوع واستانست جعل الله ا يامك كلها سعاده
بس هاه لا تنسى التحذير وفعلا التكله على الله طول عمارنا وحنا نطامر بالبران ولله الحمد ساتر الله علينا مع الاخذ بالاسباب للوقايه (ويمكن اقول لابو نسب يرفع دعوه عليك والمحامي شايب الصمان لانك احد المشجعين على زيارة روضة الخفس ؟؟؟؟؟
وتسلم يا غالي وابو نسب ماني موصل السلام له لاني خلاص مزاعله احس انه نكبة الرحله كلها هو ووراعينه اللهم بالتلفون عشان القضيه ضدك

المربد
هلا بك ومرحبا الله يسلمك وابشرك السالفه عقرب والموضوع تراه بسيط جداً وجت سليمه والحمدلله على نعمة الخدمات الطبيه بأغلب الاماكن موجوده صحيح انها ربكتنا وخاصه انها اول مره لجميع العائله تحصل هذه الامور واعتبرها عظه لهم وعبره ودرس من دروس البر ورحلاته وصراحه ربما ضارة نافعه درس للجميع صغاراً وكباراً

اخوي hani458
شكرا لك والله ستر عليكم فله الحمد والمنه وهذا شيء يا اخوي متوقع بالبر وبهذا الوقت بالذات
الله يحفظكم دائما وابدً ان شالله الله

عميد النت
هلابك وشكرا لمروك وتذكيرك بالادعيه ولا عجيبه ولا شيء بر يعني يحصل مثل هالامور عقارب ديبان وخلافه
الاسعافات موجوده لكن الامر بسيط عقرب اربط القرصه او اشفط السم وانطلق لاقرب مرفق صحي فيه مصل حفظك الله من كل مكروه الادعيه هي اهم شيء والنظافه للمكان وخاصه الدسم

الميناء
هلابك ومرحبا وتسلم على الدعاء والله يحفظك ومن تحب من كل مكروه وشكرا لتذكيرك لنا بالادعيه المأثوره وجزاك الله الف خير


اخوي ناصح
الله يسلمك من كل شر وشكرا لشعورك الطيب وما تشوف الباس يا غالي
اما موضوع قرأة الادعيه للنزول المكان فالله الحمد اعتقد ان الجميع قد قرأوها على انفسهم واولادهم ولكن لله حكمه بذلك

وموضوع النظافه فهذه هي والله اعلم سبب المشكله وهي التي هيجت انوف الدواب لانه كما تعلم لايمكن الاشراف على مخيم النسوان وفيه اطفال بدقه ومتابعته طول الوقت لكن حصل تقصير كبير بهذا الجانب حسب ما شاهدت باليوم التالي وخاصه باقي الاكل مرمي قرب الخيام الى وجدت بها العقارب وتم التنبيه وشرح الاسباب للجميع واعتبرته درس عملي لهم ولو انه درس قاسي وخاصه للملدوغين وللاسف كان الجميع لا يعلم عن هذه الامور شيء ابداً وللعلم كان يعتقد اغلب المجموعه ان قرصت عقرب يعني الموت المحقق وهذا احد الاسباب التى هرب من اجلها البعض وبعضهم بصراحه رجال بس موديل2005 واثروا على الاطفال والله يا فيه ناس طاحوا من عيني !!!!!!!!
وموضوع الاسعافات ووجودها كلامك صحيح ولكن نظراً لقرب المكان من الديره والدعوى عقارب فلم نضطر لاستخدامها اللهم ربطنا مكان لدغة الولد وعلى المركز الطبي


خشم الحصان عميمي الله يحفظك ويرعاك فعلا تصلح فلم هندي بس بطلها ابو نسب وجت سليمه يا رجال وسالفة محمية عقارب الله يغربل شيطانك احمد الله يا معود وازيدك من الشعر شقه 4 غرف وصاله العقارب ماتجي للشهبان اللهبان والشيبان تدور الناس الطريه والمملوحين ماهو؟؟؟؟؟

واما موضوع المبروكات يا خوي كل ماحك عود بعود دخلتهن بالموضوع والله اني وديتهن للسكافي يصلح لمعتهن قال لي خلاص هذي لايمكن ترجع مثل منول قلت ليش قال الافغاني صديق هذا فيه عين واهد اشهب يصيب هذا مبروكات ارمي اهسن فا وش رأيك يا عمي ؟
وموضوع الاسعافات الموضوع مايوزم الديره قريبه والعقرب ماهي بتخالف وخاصه اذا هي سوداء ومكان القرصه ليس بمكان قرب القلب او الراس ؟؟
وقرأة الاورده كلام تمام وواجب والنظافه بعد مهمه وهي سبب المشاكل والله اعلم



SilverSniper
والله يسلمك ويحفظك من كل مكروه وكلامك 100% صحيح كل ماقلته
وخاصه لون العقرب وطريقة التعامل مع القرصه كذلك ومنكم نستفيد ماشالله عليك تبارك الرحمن زادك الله من فضله
بس مالديك معلومه عن اللوان التى تحبها العقرب ؟؟ لانه كما اعلم انك رجال راعي بحوث واطلاع واسع ماشالله عليك ؟؟ ولك الشكر ولمروكم الكريم


عريدان
هلا بك ومرحبا والله يسلمك وكلامك 100% صحيح حفظك الله من كل مكروه وسالفة الزاروق اللي معزوم عند ربك هذي عزومه غصب الحمد لله على انه زاروق ماهو شيء ثاني السنه الماضيه طبت علينا ام جنيب والله انها على الفرشه ولكن فكنا الله منها وقضينا عليها بسرعه وكان الوقت قبل المغرب بشوي وشفناها كنا واقفين نبي نصلي المغرب ونمشي
وتسلم على التذكير بالادعيه حفظك الله من كل شر

ملبد
هلا وغلا والله يسلمك وشكرا لك ولمرورك الكريم
فيما يخص اولاً --الحمدلله ان التنبيه توفقت بوضعه بالوقت المناسب واما مشوق ؟؟؟ الا كما قال جدي وعمي خشم الحصان ينفع فلم هندي ولكن الحمدلله على السلامه للجميع وكان القصد نقل الحادثه للعظه والعبره بشكل حقيقي كما حصل تماما !!

واما ثانيا اثرك ملبد عند كل موضوع لي وخذ تمحيص وتقليب حتى تنويع بمواضيعي واهدافها وصراحه هذا كلام اعتز فيه وتشجيع جميل وانا اعتبره وسام لشخصي المتواضع ومواضيعي المتواضعه لانه ماشالله بمكشات نجوم واشخاص اعتبرهم اساتذتي بكل الامور فهذا الامر وهذا التوفيق كما ذكرت هو من تلميذ من تلامذة مكشات المدرسه الكبيره والتى استفدت منها واستفاد منها الاخرين ايما استفاده اما ايما مدري من وين جت شكلي تحمست اقول لا يكثر

وبعدين يا خوي صرت جده ؟؟؟؟؟ معاد انا الرحال ؟؟
اجمل الاماني والتحاي من الاعماق وشكرا لك من يا ملبد مكشات العزيز


اقرب نداء
هلا بك ومرحبا وشكرا لمرورك الكريم على هذه القصه وهذا التحذير

كلامك بالحاله الاولى صحيح ولو انه الحمد لله كان فيه تقبل من النساء للامر وتم تهدئة الجميع وتبسيط الامر لهم ولو انه ماجب نتيجه بس شيء اهون من شيء
اما الحاله الثانيه وبما انه انا اللي قتلت العقرب ونزلتها من راس الوغيد انا ماقلته الا بعد ما قتلتها وفهمته انا العقرب وقرصتك وطمنته انها بسيطه وشوي ونوديك وتاخذ ابره مصل وينتهي الموضوع لانه ماشالله رجال ابو 15 وخله يتعلم وتقبل الامر ببساطه وشكل العقرب من صغرها القرصه بسيطه جداً

كشوتي
هلابك وسلامتك من الروعه وهذا شيء متوقع انه يحصل للجميع اي احد يطلع البر ممكن يتعرض لها ولكن الاخذ بالاسباب مهم جداجدا النظافه والادعيه والاسعافات المناسبه والباقي ستر الله الله يحفظ الجميع من كل مكروه


تنويه
النظافه مهمه جداً جداً للموقع وخاصه من مخلفات اللحوم والاكل بصوره عامه والابتعاد عن اماكن الشجر الكثير وعن ابو نسب ؟؟؟؟؟!!!!!!!!
رفع الاشيا عن الارض وخاصه فرش النوم والملابس

أسأل الله الحمايه للجميع من كل مكروه

والسلام لللجميع حفظكم الله جميعا

الرحال2003

[ابوعروب]

الحمد لله على السلامة 00 يمكن تجمع المياة في الخفس بعد الامطار جعل العقارب تخرج

[ANS]

بمنا سبة ا لعقا رب وا لثعا بين الله يحما نا والجميع من كل ذلك ما هي ا للوازم لإ سعا ف حا لات اللدغ و خا صةً الثعا بين؟وطريقة إ سعافها بحكم خبراتكم وما يشوفون مكروه الملدوغين من أ قا رب رحا ل 2003

[سيف السيف1]

الحمدلله على السلامة.
إلا على طاري القرصة وشلون ربيع الخفس!!!!؟

[راعيها2]

يرجااال حمدلله على السلامه والله ستر عليكم .
لكن لتذكير زي ماقالو الاخوان قرات الادعيه في كل مكان مهم مو لسكن بس ولكن حتى ينشرح الصدر وتطمأن
النفس مهما صار وكان
ختيار المكان مهم جدا الخفس روضه جدا جميله بس الايام هذي حاول قدر الامكان ان تبتعد عن الشجر
ونا ملاحظ الفار الابيض مسوي زحمه مره هناك لكن لو مديت شوى وابعدت عن الشجرات والحفر (الزواحف )كانن افضل والله يحمنا جميعا من كل شر

[أبو فراس]

السلام عليكم ورحمة الله وبركاته

اخونا الغالي اللي جاب كل رخيص وغالي

تف عليك من العين ولكن عين اخونا المربد لا تخاف منها تراه عين باردة

الحمد لله على السلامة

الخميس اللي راح وحنا نظف العفش نبي ندخل الديرة من الشعيب اللي عند العاذرية وكان اخوي يصلي العشاء لاننا كنا جامعين وهو لا لانه من اهل الرياض وما يحق له الجمع
المهم وهو يصلي والعين ضلما شوي شاف اللي يتحرك قدامه ولا يدري وش هو ويوم سلم من الصلاة قال شفت شي اسود يمشي وقمنا ندور على هالشي والاه عقرب كبر الحمار( هذي صيغة مبالغة عن الخوف ) وطيناه بالحذيان لين ماتت والحمد لله على سلامة الجميع

اخوي ابو ناصر مشكور جزيل الشكر على التحذير اللي جا بوقته

هاه الى هالحين مالقيت مفاتيح المدير ترانا نبي طلعة وداعية

[الربذي]

اخوي يازين وصفك بصراحة مبدع وحلو ا اكلوا العشي عني
تصدق اخوي يكون لها طعم خاص بعض الحركات عاد تلقاهم يتعذرون اللي يقول جعنا واللي يقول تاخرت والي يقول نحسبك مانتبجاي واللي يقول انتظرناك وتعشينا
اللمهم الحمد لله على السلامه
ويجب الانتباه واسلوا اخونا العضو الازرق عن العقارب الي تروع وهو يجيبكم !!!
والحمد لله على السلامه وربي يهنيكم
ودمتم برعاية الله

[المرنقط]

اخوي رحال 2001 اولا الحمدلله على السلامة

والصراحة طريقة طرح الموضوع طرح واحد رايق :cool: ماشاء الله

والصراحة وانا اقرا يوم وصلت الى ( يقولك خالى في شي يتحرك فوق راسي يوم شفتة اثاري عقرب )
قلت الله يستر على راس الولد يبي يروح العقرب وراس الولد ملح :p
بس الله جاب العواقب سليمة :good:

اخوي المربذي

بالنسبة لاكلو العشا عني هذا يعتمد اذا كان في توصيات واصلة لابو نسب من الوزارة ولا لا واضاهر مافية لانه راح يسوي عشاه بحالة وغزوة واكلو معاة العشاء
لو في توصيات ولا محد يقرب :j :heart:

ومع التحية / اخوك المرنقط

[اسيزو 4x4]

أولا سلامات

ثانيا الله يجزاك الجنة أسلوبك مأنتك :p

الضحك مافكني إلا بعد ما ضربني واحد من أخواني بالبيت :p وقالي تراك زودتها ضحك ضحك :p ...

و ولا تحرمنا من جديدك يالغالي :good:

الله يعطيك العافية وسلامات يالنشمي :)