بطل الدروب لم يحقق الهدف المنشود

[Hwer]

كنت في جولة بمعارض النسيم بالرياض يوم الجمعه الثاني من جماد الاولى
ولاحظت كثير من المعارض عارض سيارتين او اكثر باترول الجديد امام المعرض وكنت اتوقع انها للدعايه فقط لاكن تفاجأت عند سؤالي لمسوق المبيعات باحدى المعارض المشهوره بحركة البيع قال ان الاقبال عليه ضعيف مقارنه بمنافسه الفي اكس ار حيث ماتم بيعه خلال اسبوع سيارتين باترول الجديد مقابل 9 لاندكروز
طلبت المفتاح من المسوق وشاهدة من الداخل وكلمة حق فخم بكل ماتعنيه الكلمه وكان احدر الرجال الكبير بالسن ينظر الى الداخل وقال كلمه (مابعد السفارى موتر)وذهب
للمعلوميه حسب قول المسوق انه الفل كامل وسعره 215 الف ريال .
سؤالي هل احجام الناس عن شرائه لغلا سعره ؟ او انه جديد والناس متخوفه منه؟

[رباان السلاام]

هذا عندنا في الرياض

ما شاء الله تبارك الله

[هويدي]

الناس دايم تتخوف من الجديد لسببين

الاول مابعد هظموا شكله

والثاني يقولك ابشتري الموديل اللي بعده علشان لو فيه اخطاء او عيوب مصنعيه يتفادونها بالموديل اللي بعده

[أبو فيصل 99]

..

..

الناس أعداء ما جهلوا

..

..

[بو خليفه]

السعر مرتفع هذا سبب عدم الشراء لأن اليوكون والدوج لديهم عروضات تخلي البعض لا يفكر في السفاري بسبب السعر هذا الكلام الشرقية

[بو خليفه]

يحتاجون ينزلون الاسعار و يجدون الاقبال عليه

و يعطون ضمان بدون صيانة و يزيد الاقبال عليه

لكن بهذا السعر يفضل عدم الشراء

[مرقاب الشرق]

اصبر شوي وتمل من كثر ماتشوفه بالشارع.

[.أبوعبدالرحمن]

الى الان الناس ما اقتنعوا فيه

مثل ما نزل شكل اللاند 2008 زادت مبيعات الباترول والان نفس النظام زادت مبيعات اللاند


بس خل الباترول يثبت جدارته في التحمل والصبر واراح تشوفه اكثر من الكوامري والهايلوكسات

[GMC79]

لانه فقد اهم ميزه في الباترول وهي رخص السعر مقارنه بالمنافسين فلما اصبح سعره مثل واغلى من غيره طاح سوق؟

كيف اشتري باترول وانا اقدر اشتري لاند كروزر بنفس السعر اوكثرشوي

[حبل الوريد]

انا لو معي دراهمه ما أخذته

اصبر اذا نزلت الدفعه الثانيه

واشتريه

وهو بصراحه افضل من اللاند

مشكوور

[منتظر الجديد]

أخس مامداه ينزل

تحكم عليه

نص الشعب أصلن مايدري إن فيه باترول جديد

لسى باقي ينزل بالشارع وبعدين يصير خير

الي يسمعك يقول نازل له سنة على الأقل

[هاواي التاهو]

أخوي زي ما قال أغلب الشباب خله ينزل السوق و يجربونه الناس و بعدين يتم الحكم عليه من حيث التحمل و الرفاهية

[AASEM]

لانه فقد اهم ميزه في الباترول وهي رخص السعر مقارنه بالمنافسين فلما اصبح سعره مثل واغلى من غيره طاح سوق؟

كيف اشتري باترول وانا اقدر اشتري لاند كروزر بنفس السعر اوكثرشوي


لا بس الباتروح احسن
أخوي مر وكالة الجبر عندنا في الهفوف قالو له فيه شكلين الجديد 8 سرندل و الشكل القديم 6 سرندل

[ابوطاقية]

اتوقع والله اعلم
عشاق النيسان مصدومين من الاسعار المرتفعه لانهم سنين متعودين على الاسعار المعتدله

[دله وفنجال]

السلام عليكم


اخوي مع احترامي للشايب الي قابلته في المعارض انه مايفهم بلمواتر وتلقاه توهق بلقديم ولا يقدر على الجديد او انه شريطي ونت خابر سواليفهم ايام الشاص الجديد اول ماغيرو مكينته وش قالو عنه والحين هم الي رافعين سعره بعد ماصرفو الاول .. ومن ناحيت البيع فمن الطبيعي ان الناس ما التفتت له .. لان الوكيل ماسواله دعايه عندنا .. والشي الثاني ماجانا الا كم حبه .. والمعارض دابلين السعر لان الوكيل ماوفره الا بكميات قليله .. هذا هو سبب الإحجام عنه .

اصبرله سنه وتبي تشوفه بكل شارع ولفه

عقبال للمهزله ( المفخره ) التايوتا يطورونه ويصير المفخرة بكل جداره

[الجندي2005]

اتوقع والله اعلم
عشاق النيسان مصدومين من الاسعار المرتفعه لانهم سنين متعودين على الاسعار المعتدله




:good2: :good2: والله اتفق معك مليون بالمية ،،،،،،،،،،،،،،،،،،،،،،،،،،،،،،،،، :good2: :good2:

السوبر سفاري موديل 2009 كان تقريباً 180 الف ،،،،،،،،،، مريت الوكالة ببريدة لقيت ما عندهم الإ فئة le صراحة روووعة لكن الله لا يبلانا يقول بـ 300 الف ريال

[الايام]

وش معنى كلمة(لسى باقي ما نزل)؟؟؟؟ باحد الردود

احد يفهمن؟

[star22]

النيسان مهما صارت قيمتة يبقى نيسان
خل الدعايات

مافية مثل تويوتا

[بو خليفه]

السي باقي ما نزل المقصود السدرك

[بو خليفه]

وش معنى كلمة(لسى باقي ما نزل)؟؟؟؟ باحد الردود

احد يفهمن؟


المقصود السدرك

[ساري 111]

قول المسوق انه الفل كامل وسعره 215 الف ريال

معقول الفل كامل ينزل من 280 الى 215 بظرف اسبوع ؟؟
متأكد اخوي ؟؟


يااحول ياللي شراه بـ 280 راح غلطه

[NissaN 1990]

السعر غالي والوكيل ماسواله دعايه وبعدين اللي بيوصل ال 320000 يبي ياخذ اللي هو أفخم من النيسان وله سنين وهو بالسوق ومعروف عن مصنعه إنه ماينتج إلا سيارات فخمه ،،
مثل :-
الرنج
الكاديلاك إسكاليد
اليوكون الدينالي
ال Bmw
جيب المرسيدس اللي يستخدمونه الإماراتيين
وغيرها من السيارات المعروف عنها الفخامه والتقنيه الجديده ،،،

[مزدهر]

يا أخي الكريم اللي معروض في المعارض هو فئة Vip وهو لفئة مخصصة من الناس سعره في الوكالة 301 ألف
ويعرض في المعارض بزيادة 30 إلى 40 ألف
أما بقية الأصناف راح تنزل في الأيام القليلة القادمة وهي اللي في متناول الجميع

[أبو أسامة]

يا أخي الكريم :

اللي بالمعارض فئة الـ في آي بي والمرتبة الخلفية مفصولة يعني بالعربي ماراح يشتريه إلا التجار اللي كل شهر مغير سيارته ......

بالنسبة للناس العادية تبي مرتبة خلفية موصولة .........

[ساري 111]

قال ان الاقبال عليه ضعيف مقارنه بمنافسه الفي اكس ار حيث ماتم بيعه خلال اسبوع سيارتين باترول الجديد مقابل 9 لاندكروز

ترى الموتر جديد اصبر عليه
الشي الثاني
نيسان اخطأت خطاء كبير وضحت بكثير من زباينه بهاالاسعار

[bigdady]

انا اشوف الباترول عادي جدا ما فية شي مميز مرة واذا عن المحرك فيوجد هناك الدرانقو دوج طبعا الشكل لك علية لكن قوة المحرك(همي) ومواصفات وسعر جيد.وعلي فكرة ما فية زي اللاند كروزر تويوتا

[سفاري959]

ما اقول الا الله يشفي المتعصبين والباترول بطل مهما قالوا وخلهم عايشين على الأطلال ويستاهل فلوسه وزياده بعد يكفي انه ملك الصحراء

[الشقردي 999]

يباع بالحمراني حاليا ب220الف!!

[التعـ King ـديل]

للمعلوميه المسعود بالامارات جميع الدفعه الاولى راحت

البابطين بالكويت نفس الشي انا اليوم واصل من الكويت وكنت بزياره لهم

الحمراني قبل اروح للكويت كنت عند زميل لي بفرع الحمراء قالي ان السياره عليها طلب

وعلشان تشتري موتر لازم تنتظر الدفعه الجايه اللي بعد 9 ايام توصل

نوته لأخوي ساري 111 متعصب التويوتا للعلم النيسان نزل ب 245 ومازال السعر نفسه ماعدا الفئات الخاصه

اما الخبل اللي شراه ب 280 قبل ينزل من معارض فهذا شي راجع له والوكيل ماله دخل

[الصخرة]

عن نفسي ماراح أبدا أحط فيه هالمبلغ ولو بعد سنتين من ظهوره

[alhtan]

لموتر مش بطال بس سعره عالي كثير

[Hwer]

نصبر ونشوف

[ابوعليa.a.m]

السلام عليكم
أخي العزيز لاتقارن الباترول بالفكسار
قارن بالكزز ربما يكون كلامك معقول

بعدين الموصفات الموجودة حتى الان الفل
لكن اصبر لماتنزل جميع الموصفات بالسوق وتتعرف الناس عليه
تعال وأحكم


لاتستابق الاحداث

بعدين الاخ اللي يقول الباترول يتفكك والاند متماسك
للاسف وجدة العكس والتغرير
بالاند والدعية الوهمية

لن اطيل الموضوع فأنا جربت وبما شاهدة انا مقتنع
اسأل مجرب ولا تسأل طبيب


تقبل مروري

[اسبيدر مان]

انا بنسبه لي اخذلي سياره امنه تهربد بعد اربع او خمس اسنين ولا اخذ سياره بها عيب مصنعي واعرض نفسي والناس للخطر
اشوف تايوتا كل يوم والثاني ساحبه سيارات من اجل عيب مصنعي والشريطيه الى هنا بالشين بالي عندهم ودهم يصرفونه فمن الطبيعي انهم يطبلون لتايوتا

[سفاري959]

انا بنسبه لي اخذلي سياره امنه تهربد بعد اربع او خمس اسنين ولا اخذ سياره بها عيب مصنعي واعرض نفسي والناس للخطر
اشوف تايوتا كل يوم والثاني ساحبه سيارات من اجل عيب مصنعي والشريطيه الى هنا بالشين بالي عندهم ودهم يصرفونه فمن الطبيعي انهم يطبلون لتايوتا
صح لسانك كلام في الصميم كفيت ووفيت وش ذبحنا غير الشريطيه اللي يوزعون اشاعاتهم علشان يصرفون بضاعتهم اللي عندهم والمشكله يمدحه دامه عنده واذا شريته ورجعت له عشان تبيع حط العيوب كلها فيه وخلاه من اخس المواتر وهو امس من احسنهن يوم كان عنده بس عشان يجدع سعره ضحك على الناس

[ابو زنه]

يارجال خل عنك Vx.r وبس

قال ايش قال باترول

[S4500]

يارجال خل عنك Vx.r وبس

قال ايش قال باترول


اخوي على اي اساس قلت vx.r افضل من باترول

شف مواصفات الباترول وش مواصفات الاند vx.r واحكم بالعقل مو بالعاطفة

[ساري 111]

شف مواصفات الباترول وش مواصفات الاند vx.r واحكم بالعقل مو بالعاطفة


شف جودة ومتانه الـ فكس ار ومتانه وجوده الباترول

وحكم العقل قبل العاطفه

انت اخذتك العاطفه قبل العقل بالمواصفات ونسيت حساب المتانه

لاتجلس تقولي الباترول جودته افضل

تبي الدليل رح جرب فكس ار وجرب باترول مثلاً موديل 2005 وكلهن حول ممشى بعض وراح تشوف الفرق

والدليل الاخر
جب هدد عادي وحطه بالخامس وانت تمشي 50 وادعس اخر البنص راح تحصله يعيطك وبدون ادنى اهتزاز بالطبلون او الديكورت

ونفس التجربه رح سوه بفتك عادي حطه بالخامس وانت على سرعه 50 وادعس البنص شرط يجيك احساس ان الديكور يبي يطيح من قوه الاهتزاز والقرقعه

[التعـ King ـديل]

مع احترامي لك اخوي ساري

جربت هالطريقه في برادو 2007 قير عادي ويعتبر اخف من الهدد ومع ذلك اهتز

وجربتها على هدد 2002 ومع ذلك اهتز مع العلم ان السرعه بالاثنين 60 وليست 50

[سفاري959]

مع احترامي لك اخوي ساري

جربت هالطريقه في برادو 2007 قير عادي ويعتبر اخف من الهدد ومع ذلك اهتز

وجربتها على هدد 2002 ومع ذلك اهتز مع العلم ان السرعه بالاثنين 60 وليست 50

والله حرام عليك اكيد انك غلطان هذا تايوتا ما يهتز حديد اقوى من الألماني قل ايه مصدق انت والله لو انا ما سقناه كان يمكن كرتون وكله عيوب مصنعيه

[قرم العيال]

شف جودة ومتانه الـ فكس ار ومتانه وجوده الباترول

وحكم العقل قبل العاطفه

انت اخذتك العاطفه قبل العقل بالمواصفات ونسيت حساب المتانه

لاتجلس تقولي الباترول جودته افضل

تبي الدليل رح جرب فكس ار وجرب باترول مثلاً موديل 2005 وكلهن حول ممشى بعض وراح تشوف الفرق

والدليل الاخر
جب هدد عادي وحطه بالخامس وانت تمشي 50 وادعس اخر البنص راح تحصله يعيطك وبدون ادنى اهتزاز بالطبلون او الديكورت

ونفس التجربه رح سوه بفتك عادي حطه بالخامس وانت على سرعه 50 وادعس البنص شرط يجيك احساس ان الديكور يبي يطيح من قوه الاهتزاز والقرقعه


كان معكم بطل الراليات السابق , والمهندس و خبره السنين ما بين الباترول واللاندكروزر

ساري والايام تباري :D

[سيف الظفير]

يالغالي سعر الجديد الفل بـ 215

لكن الموجود فيه النسيم بـ 350 عشانهم جايبينه قبل الوكيل و و و و وحق التميز