ملبد وابو فالح ومغباش يحاكمون خشم الحصان ........ والسبب

[حد السيف]

اخواني اعضاء مكشات
السلام عليكم ورحمة الله وبركاتة
الغرض من هذة المحاكمة اولا موقف خشم الحصان بين هؤلاء :no: :confused:
ثانيا من هو المحامي الذي سوف يعينة خشم الحصان لدفاع عنة بشرط اذا ما لقى مخرج خشم الحصان يتدخل المحامي :j
ثالثا حقيقي نبي نشوف كيف يتصرف خشم الحصان :confused:
اليكم القصة كاملة
كتب حبيبنا خشم الحصان موضوعا يبارك لبعض الاعضاء بمناسبة التنظيمات الجديدة لمنتدى مكشات
بخصوص ادارة المنتدى وترقية بعض المشرفين وتعيين مشرفين جدد ليتواكب مع العدد المذهل للمشاركات والعدد المتزايد من الاعضاء المنتسبين للمنتدى وتجديد التنظيم للمنتدى
وارتكب حبيبنا خطاء اداري فادح و بحت بالعرف الاداري :no2:
وهو الذي بين ضهرينا لمدة تزيد عن السنة وهو العضو المميز
صاحب المشراق المشرق بعبق التاريخ وريحة التراث
وبالرغم من ذلك ارتكب محبوبنا هذا الخطاء الاداري
وهذا رابط الموضوع
اضغط هنا (http://www.mekshat.com/vb/showthread.php?t=29246)
وعلى الفور تم تشكيل هذة المحاكمة وتعيين اعضائها لمحاكمة خشم الحصان على هذا الخطاء الفادح بحق ادارة مكشات
مشرفنا الكبير السمح ريس مجلس المحاكمة
شقردي مراقب للمحاكمة
القضاة
ملبد :D
ابوفالح :D
مغباش :looney:
SilverSniper مقرر المحكمة :type:
بانتظار مايدور بالمحكمة ومدولات الجلسات :good2:
وهلابكم وممنوع دخول غير الشهود الى قاعات المحكمة


محبكم اخيكم حد السيف

[مغباش]

حد السيف انت قصدك انا اصير قاضي ولا واحد ثاني لاني دريت بالصدفة جتني برقية بالتكليف
ومعاها ربطة فلوس الله لا يخلينا منك ومن كرمك (عسى ما زل لساني)

اما بالنسبة لموضوع الترقيات ما اقول الا مبروكين والله يعينهم ويقويهم على مهمتهم الكبيرة في ضبط وادارة المنتديات والموقع بشكل عام وانتم قدها
والى الامام

[SilverSniper]

أين المتهم؟؟؟؟؟
ما عليش يا حد السيف ولا يهون حضرة القاضي(المنتهي) مغباش :D .. أنتم خابرين الشيبان .. خشم الحصان يتمرخ هالحين..خبركم الركب مهيب مثل أول.. طولوا بالكم عليه شوي.. وباقي القضاة (أبوفالح وملبدلو) :looney: .. يتقهوون شاهي بارد على راس طعس بجمب الشعيب ويتداولان في أمور القضية.. لكي يحكموا الخناق على شايبنا العزيز لمنعه من النتوق من بين أدلة الادانة الواضحة عليه..
لكن اسمح لي أعينك يا حد السيف بمنصب المدعي العام في هذه القضية

[مغباش]

سلفر سنايبر
شنهو قصدك حضرة القاضي المنتهي
قصدك اني اتخذت حكمي النهائي ولا العقل منتهي

[SilverSniper]

يا أعـدل الناس إلا في معاملتـي **** فيك الخصام وأنت الخصم والحكم
---------------
أعتقد يا حبيب قلبي مغباش انها واضحة.. :D.. صح والا لا؟؟
طبعاً البيت هذا يحكي حال شايبنا العزيز خشم الحصان أمام تصريح القاضي الموقر مغباش.. وبحضور المُدّعس ( آآآآ -- عفواً.. المدعي :good2: ) حد السيف.. ولا تزال المحكمة في انتظار حضور باقي طاقم القضاة (ملبد وأبوفالح) << ايوالله طقم :D

[ملبد]

بسم الله الرحمن الرحيم
بعد مداولات مع أبو فالح اللي من شهر حتى الآن ماشفته :looney: تقرر التالي :
1- سيتم ارسال اشعار بالحضور الفوري للمدعو خشم الحصان .. ومن المتوقع أن يستلم الاشعار ويعطيه ولده ويقول : خذ سدد فاتورة الماء .. < ( يالله القداة )
2- سيتم ارسال اشعار ثاني له .. ومن المتوقع يقطعه ويقول : ( الفاتورة وسددها الولد ) < يالله حسن الخاتمة.
3- سيتم ارسال اشعار نهائي .. ومن المتوقع أن يطنش لأن النظارات مضيعها مع انشغاله بالروحات للصمان ..< ( هين ). :mad:
4- بعدها يتم ارسال فرقة بقيادة ( SilverSniper ) لاحضار خشم الحصان ( مخفور = يعني يرد خلال اسبوع وإلا).. وعلى قائد الفرقة الرأفة ومراعاة الشايب وألا يتسلح بشوازنه .. ولا مانع من ( المقمع ) مراعاة ( طبيعة المشراق). ;)
5- من المتوقع أن المدعو سيحضر أخيرا ويدعي إنه ماهو داري وش السالفة بسبب انشغاله بالكشتات ..والمحكمة مايمشي عليها هالكلام .. وستحكم حكم مخفف وهو : تغريم خشم الحصان خروف نعيمي مع ثلاثة هرافي ( لباني ) وينتظر ( السمح ومن معه ) بطلعة بويب على أن يراعي الابتعاد عن بيوت النمل لايتورط ( باللي معه يشفطهن ) .. :D
6- لأن السمح ( سمح ) سيقول : مابيننا حقوق يابو محمد .. :mad:
ولذلك يعود النعيمي للمدعى عليه .. أما اللبانيات فـ تصرف للقضاة بواقع ( لباني لكل قاضي ) حتى تكون في الأمور ( عدالة ).
7- ينتظر ( خشم الحصان ) خلال اسبوع حكم آخر لأن حد السيف سيستأنف بداعي أن الحكم مخفف ..
8- يعاد النظر بالقضية بعد أكل الهرافي .. ولأن حد السيف ماشاور القضاة يوم يعينهم ..< ( على كيفك آخذ الأمور سمردحة ) :no2: .. تصدر المحكمة حكم مماثل ( مخفف ) على حد السيف.. ويلحقك ما لحق خشم الحصان يابعدهم.
9- ولأن ( SilverSniper ) أول من نطق بملابسات القضية وهو ليس من القضاة .. مع إمعان التفكير برده الأخير ( طاف بالاشراف الله يوفقه ) وهذا الترزز يعتبر تدخل سافر في ( عدالة القضاء ) :no2: ستقرر المحكمة حكم مخفف آخر .. وعلى اعتباره برنجي وخبير بالشوازن سوف نستبدل اللبانيات بثلاث حافظات صيد على التوالي : ( قميري , حصد , درج ) .. وللعدل يكون التوزيع بالتساوي : القميري لملبد , والحصد لابو فالح , والدرج لمغباش ..ولأن ابو فالح سيعترض ويقول القميري أنا أولى بهن مراعاة توقيعي .. وهذا طعن في (نزاهة القضاء) تقرر المحكمة عزل ابو فالح من فريق المحكمة.. ويتم تحويل الحصد إلى مغباش..
10- مغباش شكلة ( مايسده اللي يسد غيرة ) ويبي يحمر العين .. وبالنظر إلى توقيعه :looney: وما تحمله يمناه الله لايشلها
..

http://www.mekshat.com/pix/upload/images7/mk13608_Untitled-2.jpgأخيرا نعلن التنازل عن القميري واللبانيات .. وخذ اللي تبي يامغباش ( ولا يصير خاطرك إلا طيب يابعدهم ) .. :burnout2:

[مغباش]

الله يعافيك يا ملبد ويوفقك

انت وين كنت ملبد وطلعت لي
انا ما امداني فصلت روب المحكمة وتدربت على مطرقة مخيمنا المصدية
الا والمحكمة منعقدة والحكم اصدرتوه دون الرجوع الينا نحن

نحن ..نحن . الذين رمينا النقود التي ارسلها لنا حد السيف في جيبنا دون ان نعدها
نحن الذين نقتل القتيل بس ما نمشي في جنازته


لكن وبما انك زميل مهنة يالمربد واصدرت حكمك وانا ما ودي اكسر كلمتك
واذا ودك نصدر حكم بأعدام خشم الحصان انا ما عندي مانع وراح اصدر حكمي


بما ان على قولتكم ان خشم الحصان شايب فأننا نحكم عليه بحكم الاعدام التالي

ربطه فوق جحر نمل ونجبره على ان يقدع (أي ياكل تمر) عدد 60 تمره وسكب دلة قهوة مبهرة بالهيل والزعفران امام عينه دون ان يرشف حتى رشفة واحدة

ادري
ادري راح تقولون عني قاسي وما عندي قلب لكن ماذا اعمل هاذي هي ضريبة المسئولية وعسى الله يعيني على اداء مهمتي باكمل وجه واكون عند حسن ضن من رشحوني (رجاء بدون تصفيق )

[حد السيف]

الاخوة الكرام
حياكم الله
نظرا لتواجد اثنين من القضاة حاليا وهم ملبد الي بدا يفصل ويلبس على كيفة ومابقى الا يقول كرتون فشق لكل واحد من القضاة مع نصف الحلبي اللي بالفشقة مقابلها قميري زايد ما طلب بحكمة المخفف وهو ما ناقش المتهم خشم الحصان بالتهم الموجهة الية وهنا نشك بنزاهة المحاكمة :D
ومفباش اللي بدا يتهرب من ان يكون احد القضاة
السادة القضاة تم اختياركم للاسباب التالية
اولا ان خشم الحصان لايستطيع الفبركة امامكم :no2:
ثانيا ان خشم الحصان يحب التمسكن وانتم من يستطيع كشفة بسهولة :confused:
ثالثا انتم القضاة تم تعينكم بسبب نزاهتكم وقراتكم ما بين السطور
وشاربين النحو والبلاغة على قولت خشم الحصان شرب :D

الدعوى المقدمة ضد خشم الحصان
اولا الخطاء الاداري الفادح الذي ارتكبة في حق قمة هرم مكشات السمح والهل مرة نبية يتنازل عن سموحتة مقابل
انزال اقصى الغرامات والعقوبات بحق خشم الحصان جزا لة وردعا لامثالة بسب عجلتة وتسرعة والتاكيد علية بتفصيل نظرات مقاس 10 على 10 ;) وهو اللي معنا لة اكثر من سنة بيننا :p ;)
ثانيا
اغفالة للدور المعنوي والمادي الذي يقدمة مساعد المشرف على المنتديات شقردي
ونسيان تقديم التهنيئة الى شقردي بمناسبة موقعة الجديد وهو مساعد المشرف على المنتديات
ثالثا
نسيان تقديم التهنيئة للمشرفين الجدد وهم من الاعضاء الذين اثرو المنتدى بجهدهم وحماسهم وخبرتهم مما يجعلنا نشك بنوايا خشم الحصان لماذا تم اغفال هؤلاء
ومن خلال ما تقدم ارى ان يتم انزال اقصى العقوبات على خشم الحصان وطلعت البويب ماتكفي واقل شي نرضا بة كل اسبوعين طلعة ايتدا بالريس ثم المساعد واعضاء المحكمة الموقرين بالسرا قبل يدخل الصيف
او اقامة مخيم باجمل رياض الصمان وفياضة
وتكون الزيارة لة اسبوعيا اغتناما للربيع حتى ينتهى الدورابتدا من السمح مرورا بشقردي والسادة القضاة حتى
SilverSniper
بحضورنا للتاكد من التزام المذكور لتطبيق كل ما انزل بة من عقوبة وحضور الكشاتة الكاشتين
هذا ما لدينا
ويحق لخشم الحصان تعيين محامي بشرط واحد بعد ان يدلي بما لدية خشم الحصان ويتم بعد ذلك تدخل المحامي :o


حد السيف محبكم كلكم

[خشم الحصان]

الاخوه الغالين
السلام عليكم
اخواني خشم الحصان مر من هنا ويبحث عن صك اعسار ضاع منه كان منول يطربه عند المساجد من لقاه الله يجزه خير ويثيبه يرسله الي اخوه (حد السيف) ................. قوي علي المسكين الله كريم
اقول انت لي رفعة الدعواء وانت لي شكلت القضاة وانت لي دهنة سيرهم لين املصو من الطاره خذ نقدي
(حد السيف انت قصدك انا اصير قاضي ولا واحد ثاني لاني دريت بالصدفة جتني برقية بالتكليف
ومعاها ربطة فلوس الله لا يخلينا منك ومن كرمك (عسى ما زل لساني)
لالالالا مازل لاسانك ياخلفهم زل ضميرك ماتحب الماء من تحت الساس :D
اخوي حد السيف
ارحمو شايب ذل والدليل توقيع اخوي الغالي (مغباش)
اقول الله لا يسلطك علي ورث مسكين مثلي ............. :(
وبعدين الغالي ابو تركي مشرفنا هو موكلك الله يثيبك........ والله يانت راعي طلايب قطع الظاهر لو يكح واحد نشبتا في حلزه الله يقصرنا ويقاصرك بالاحسان
وبعدين اقر قرقرة عيون العدو وش انا اقول
(هذولا لي شفتهم الحين احد خابر غيرهم عموم ميروك لنا ثم لكم يالغالين) يعني انشد اذا فيه غيرهم وعلي قولتك
( الذي يقدمة مساعد المشرف على المنتديات شقردي
ونسيان تقديم التهنيئة الى شقردي بمناسبة موقعة الجديد وهو مساعد المشرف على المنتديات)
انا وش دراني عن البازين هو انا شمس شارقه علي كلش ورا ماعلمتني الله يغفر لنا ولك
طيب بركان هذا هو ترقا معهم ومادريت الا اليوم
وفيه غيرهم
وبعدين تعال يومك تقول (نسيان تقديم التهنيئة للمشرفين الجدد وهم من الاعضاء الذين اثرو المنتدى بجهدهم وحماسهم وخبرتهم مما يجعلنا نشك بنوايا خشم الحصان لماذا تم اغفال هؤلاء
بالله انت قاري العنوان) هذا هو اقر الله يثيبك
(مبروك عليكم........... يا.....السوبر) وش اقول مبروك او انا كاتب بالفريقي علي وزن بريقي الغظار
اقول ابو سليمان
انت الخصم ولا واحد جوعان قل اعزمنا وريح عمرك من هاتوه ودوه
اقول ابو سليمان فك الهوشه بين (مغباش ) (الصياد الفضي) سنهم تلقطو الحلوق هذا وحنا مابعد جينا
الصياد الفضي................ ايه كلامك صح الله لايخلينا منك خشم الحصان يتمرخ بالفقس وابو فاس
واحد وصل الي هالمرحله هو فيه شدة محاكم الله يرفع قدرك يابعدهم
اقول انت متاكد من الطاقم لاياه طقم صيني وطاح مع الدرج اخا هاد وش يجمعه ياكود مكنسة شفط
(ملبد) اقول ورا ماتلبد علي اسمك او هذي من اثار الحصبيات ........... اقول اكسجين الحصبا
سنه نزل في البطن الله يانت مربص النحو والمحفوظات والمطالعه ولا لقيت تشربهن الا علي.....
اخيي المثل بقول (يوم لك ويوم عليك ويوم الله يكفيك شره) وهقوتي ان اخر المثل بطبقه علي .. :cool:
يعني ماشفت الا انا او الكشمات حقة تلحيم حديد
ايه الله كريم يابو سليمان كلما شفت لي كتبته تذكرة (فوزي محسون ) الله يغفر لنا وله يومه يقول
يعيني حضنا تعبان ...........دا مهما نسوي ماينبان
نستنا وحنا في الاسترحه...... وسته عشر بريق مصفوف
مغباش
يالغالي لا ياك تحكم بالاعدام تر توقيعك........................ اتعب انا منه متعبني بالحيل مره هو اعدامي يابعدهم كلهم وعلي قول (عبادي الجوهر ) الله يغفر لنا وله يومه يقول
انا اتعب انا بالحبل اتعب.............واذا قالو شفتت توقيعه قلت شفته
وفي النهايه اقولك يابو سليمان
حد السيف
سن الاخوان جاين من مجاعه اقول اجيب بيره ولا ببسي ولا سفن عقب الاكل كود يخرطون لي في بطونهم
تدري عاد وش رايك في سحيلة لبن غنم و فذحة جحيحه (رقيه) انا عندي سنه احسن تدري ليش
علشان ينسهلون ................ ثم قومهم اذا هم قامو
اخوك
المسكين
خشمشم الحصان
بالله يابو سليمان ماكسرة خاطرك ما ارحم

[حد السيف]

السادة القضاة
السلام عليكم ورحمة الله وبركاتة
الم اقل لكم انة من يحاول التمسكن وبداها انة يدور على صك اعسار وهل من يوجد لدية صك اعسار يضيعة
او يبحث عنة ........وهذا اول الاعذار
حاول استدرار العواطف من خلال سردة التاريخي وايهام الاخرين انة على علاقة جيدة بالقضاة واطراف القضية
والتذكير الاباريق وعددها وهل يوم من الايام اخذ بالاباريق كا شهود
و هنا اشبة بمثل من يكسر يدة ويشحذ عليها لاستدرار عواطف الناس
اما ابو تركي وكلني او لا هذا ليس من اختصاصك
وبعدين تعال ها انت توكد ما ادعينا عليك بة مرة اخرى بقولك
(هذولا لي شفتهم الحين احد خابر غيرهم عموم ميروك لنا ثم لكم يالغالين)
يعني ما اتهمنا بطلان وزور
وهنا تاكيد اخر على تماديك بتجاهل الاخرين انظرو ما قال
انا وش دراني عن البازين هو انا شمس شارقه علي كلش ورا ماعلمتني الله يغفر لنا ولك
طيب بركان هذا هو ترقا معهم ومادريت الا اليوم
يعني يوم بغيت تعرف من ترقا لقيت اسمه وهذ يناقض قولك وانا شمس شارقة
وها انت تتهمني بالجوع
لا انا من يبي ياخذ حق الجميع خامس ومخمس
ومن زين الطبايع يبي يعزمهم على
رقي حمر مع لبن والله اعلم متى محلوب اللبن ويمكن محمض بعد
ومن مراوغاتة حاول التوقيع بين القضاة مغباش وملبد بعد ان دعاء على ملبد وهو الذي لتو اتي من رحلة نقاهة لشم الاكسجين ومغابش المعين حديثا لصرف الانظار عن فعلتة الشنيعة في حق ادارة مكشات وادارة الموقرة
وللايقاع بينهم وهي هات ان يحدث هذا لسبب بسيط جدا
وهو ان الملابش بينهم لفضح اساليب خشم الحصان وهل هو من يبحث عن الثغرات للملوص مما ينظرة
من اشد العقوبات والطلايب
ايها القضاة انكم امام واحد من اخطر الاشخاص الذين وقفوا امامكم خلال تاريخكم القضائي
فلا تاخذكم بة رافة ولا شفقة
انظر ما كتب اخيرا
لاحساسة انة استطاع ان يستدر عطفكم
المسكين
خشمشم الحصان
بالله يابو سليمان ماكسرة خاطرك ما ارحم


المدعي على خشم الحصان
حد السيف

[أعرابي]

حد السيف

صياح ونياح وتشكيل مجالس وتركيز عمدان
وصجه ولجة
لا ...... وبعد تنكخ ازين الرجاجيل
وحاط ايمن وايسر وظهير
وهجوم

الصراحة قلت :
الله يعين المحكوم عليه !


وبكل برودة
يصير الشايب

يعني شايب وتهتم
وتعد وتنذر وتزمجر



لكن أقول شايبكم طلع شايب صغير متمرد
عرف كيف يحامي عن نفسه ويقلب الموازين

قلبي هو والله يزيده من ويرطب لسانه أكثر بالدعاء

ويركب هاالطبيعة بنا



شكراً لكم ،،،،،

[* ضب *]

انا افدى ذا الشيب يا خشم الحصان
لا يغلبونك الرجاجيل .. فيك البركة ان شاء الله(لسانك طويل ما غالبك احد) ..
لكن اذا تبغى فزعة محامي تراي دونك لا تعداني وابشر باللي يسرك

(مكتب * ضب * للمرافعة والاستشارات البرية) في خدمتكم طوال العام.. ما عدا المربعانية دور غيري

[راع الكحيلة]

شايبنا العزيز

أولا أشكر لك شعورك اللطيف والتهنئة الألطف

وبعدين ما عليك من ها الشباب يا شايبنا العزيز

تراني وكّلت لك محامي عنده حزام أسود في المحاماة..مع اربعة دان

رجال سنع وشجاع واقشر وما يوقف بطريقه شي ..صحيح إنه فقد القدرة على النطق قبل كم سنة نتيجة لشجار بسيط

لكن فيه ناس تمدحه في وصاياها اللي كتبتها ..قبيل الإعدام بكم يوم.

شايبنا العزيز

خذ هذا الجزء من هديتي لك وسأعطيك الباقي بعد أن تحكم المحكمة وإن شاء الله براءة ..:)


ملف صوتي ..وإذا ما اشتغل عندك علمني
http://wesdom_words.siteatnet.com/foreign/wesdom_words/aaaaa2.mp3

[الطبيب]

طيب !!!!!!!!!!!

انا جيت

ولي مداخله بسيطه

وهي ان خشم الحصان (( جد جد جد جد.........الخ جدي الاكبر من اكبر جد لي :) ))

اقول خشم الحصان تدرون ومتأكدين بأنه (( بلغ من العمر عتيا )) والدليل انه ما يمشي الا مع (( مربد )) :) الكهل

ولذلك استغليتوا هذه الثغره (( العمريه )) وقلة ذات الشباب وشبيتوا على الرجال

لا لا لا ابد انا ما ارضى على خشم الحصان حتى لو غلط علي

تدرون ليه ؟؟؟؟؟؟

لانه للسن احكامه ولان الشيبان يغفون وهم يسولفون ثم(ن) يصحى ثاني يوم ويكمل سالفته

نستنتج من الحقائق اعلاه بأن جد جد جد ......... الخ جدي خشم رغبه ... احم احم عفوا ......... خشم الحصان ليس الا من هؤلاء الشيبان

ويدل على ذلك بأنه بارك للسوبر مشرفين وأخذ غفوه ولم يبارك للمشرفين


وبعدين يا اخوان ارحموه

تراه طاح من يد نشيط ليد متعافي :)

ولا يهمك يا ابو محمد مدام محاميك (( ضب )) والقيض جاي فهو يبي يفزع لك :) الا اذا تناشب الرمي من فوقه فهو معذور حينئذ

الشيء الاخير

(( تروا خشم الحصان الله العالم انه بادي يقط خيط وخيط :) يعني يخذرف )) وللسن احكامه

الله يحسن خاتمتنا وخاتمتكم

====

ملبد .......... ملبد ......... ملبد

الظاهر انك تبي حلق خشم الحصان وكذلك سنايبر

لانك حكمت على خشم الحصان بما يتمنى اي منا تحقيقه لنفسه واطريت البواريد لسنايبر فانت تستميله لجهتك لان سعابيله تخر على طاري الرمي :) << الله لا يبلاكم مدمن مثلي على ريح القفش بعد الرمي

اقول .........

في امان الله انا رايح انام :) مثل خشم الحصان

ويمكن اصحى وأكمل سالفتي فلا تشرهون علي حيل :)

من كثر ما اجلس مع خشم الحصان

هههههههههه

اقول

تصبحون على خير قبل ما تشتغل المشاعيب

هذا والله اعلم

والسلام ختام

[مغباش]

اشهد ان خشم الحصان ولى
محامي ضب لكن لا يترافع في المربعانية (مع انه يقدر يلبس بدلة فرو جربوع بدون بنطرون بس لفة اوزار تعرفون العكره ولزوم الستر )

وراعي الكحيلة موكل محامي فقد النطق وما يمدحونه الا قبل الاعدام
ولو انها من صالحة لان راح يصير اثنين ما ينفهم كلامهم المحامي والمتهم وراح يدوخونا وبالتالي راح نخلي سبيل المتهم مراعاة لصحتنا
ومراعاة لسلامة شايبنا خشم الحصان لان ممكن تجيه غفوته في المحكمة والارضية رخام واحنا خايفين راسه لايقمع فيه

لو اني منك يا خشم الحصان وبلا هالبهذله والمرمطه اعترف بكل اخطائك حتى الي عملته في لقطة توقيعك (لان في نعجة حزينة قدمت بلاغ ضدك)

[SilverSniper]

أخي الغالي الطبيب... وينك يا بعد الدنيا.. اشتقنا لك...
(((واطريت البواريد لسنايبر فانت تستميله لجهتك لان سعابيله تخر على طاري الرمي << الله لا يبلاكم مدمن مثلي على ريح القفش بعد الرمي)))
لا تفضحنا الله يكافينا شرك... :D.. إذا ابتليتم فاستتروا.. أنا واياك ذاك اليوم قاعدين على هاك الطعس وكل واحد ماسك له قفش بولندي ويتنشق..:D... تذكر؟؟؟؟
القاضي الموقر .. مغباش..
((ممكن تجيه غفوته في المحكمة والارضية رخام واحنا خايفين راسه لايقمع فيه)) .. لا تخاف على راسه يا بعد الدنيا... خف على الرخام:D
.....................
ولا تزال المحكمة في انتظار القاضي أبو فالخـ... آآآ عفواً.. أبوفالح

[أبو فالح]

السلام عليكم ورحمة الله وبركاته

:heart: حد السيف يا بعد الدنيا :heart:

بعد قرائتي لجميع الردود والمداخلات والهوشات .. ضيعت الطاسة .. واخر رد نسيت معه أول رد ..

يعني ... قررت أفصخ بشت القضاء لعدم فهمي أبعاد وملابسات القضية ..

لكن !!

ظلماً با السوية عدل با الرعية .. :good:

يعني .. أقترح

يجلد جميع شخص شارك في هذا الموضوع ... :mad:

عدا مقدم هذا الإقتراح
:no2:
[line]

:heart: سلفر سلفوري :heart:

أشوفك بعد الإشراف أخذت تنفخ علينا يا باشا :D

لكن تعال أعلمك شئ ... ولا أبي أحد يدري فيه ..

نعم .. قد أكون فالخ في تقلص مشاركاتي الجديدة .. ولكن سأضل أبو فالح في انتمائي وحبي لهذا المنتدى المكشاتي ...

أخي ... هل تعذرني إذا أخبرتك أنّ أبو فالح منذ الأيام الخوالي وحتى الآن .. يعيش مراسلات وحوار كيبوردي باسم وجاد ، أخذ منه الزمن الوفتي والجهد الذهني .. هو الآن في مراحلة الأخيرة ... إذاً فلختي ليست طويلة يا بعد الخرازات كلهن

أخيراً :

كانت مفاجأة سارة وجميلة .. حين رأيت أسمك يكتحل بلفظ ( مشرف )
لن أقول .. ألف مبروك .. فأنت تستحق هذا التشريف التكليفي منذ البداية .

سؤال سفري :

منتدى مكشات يعيش الآن نقلة تكليفية جديدة ... ممكن أشوي تفاصيل ..؟؟
طبعاً ... يا مشرف سنايبر :good2:


أعذب تحية

[حد السيف]

النطق يالحكم
نظرا لكثرة المحامين الذين يحبون الترافع عن خشم الحصان
ولوجود صك الاعسار تحت فراش شايبنا خشم الحصان في المشراق تدرون من لقاة راعي البلدية اللي ينظف الشارع وشاف طرف الخشم قصدي ختم الخشم على الصك وعرف انة لشايبنا
ولاكتمال القضاة
وكلن صار يعيزل ويبزل على كيفة
حتى وصل الخوف على الرخام والمونة اللي تحتة
لذا قررنا سحب الدعوة من المحكمة وتاجيل الحكم بالمحكمة حتى اشعار اخر
عملا بنصيحة القاضي ابو فالح
ظلماً با السوية عدل با الرعية ..

لذا نعلن رفع الجلسة
وتعتبر القضية منتهيه

حدالسيف :no: :no: :no: :no: :no: :no: :no: :no: