رحلتي الاسبوع الماضي الى جال المستوي ونفود صعافيق

[((( الحر)))]

يوم الخميس الماضي كانت وجهتنا يم جال المستوي وهي منطقه مميزه ومناسبه للكشتات وهو حدود التقاء صفراء المستوي مع نفود السر وفيه فياض بين الجال والنفود
طبعاً الجال رفيع وصعب طلوعه الا مع دربين يدلونها الكشاته.
السيل الي ينحدر من الجال شرق يكون شعبان الخويشات الشمالي والجنوبي
والسيل الي ينحدر غرب يكفه النفود مكون خمس فياض اكبرهن روضة عيسى ومنطقة الجال على الطبيعة مشابه لمنطقة العرمه في تضاريسها لاكن فرق كبير بالارتفاع وتنبت هذي الفياض الروض والحرف وبحكم انها منطقة بعيده فهي بكر وقليل الناس فيها خاصة الفياض الوسطى منها ...ويسمونها اهل القصيم فياض ام حزم لانهم ياتون اليها من عند طريق بلدة ام حزم الي على طريق الغاط - المذنب .. مع اعمدة الكهرباء
الفياض جميعها خضراء اشبه ماتكون برشاش محوري الا الروضه الي حنا اخترنا فلم ينبت الا جزء منها واخترناها لاتساعها وسهل طريقها ووجود ارسال الجوال فيها
هذي خريطه للموقع وواضح حد الجال مع النفود- وواضح شعبان المستوي ( الخويشات)

http://www.mekshat.com/pix/upload/images7/mk1112_kkk555.JPG

صوره من اعلى الجال
http://www.mekshat.com/pix/upload/images7/mk1112_alswelm 054.jpg

صورة للفيضه من جهة الجال
http://www.mekshat.com/pix/upload/images7/mk1112_alswelm 036.jpg

صوره لروضه من جهة النفود
http://www.mekshat.com/pix/upload/images7/mk1112_alswelm 075.jpg

صور مشتركه للجال والنفود
http://www.mekshat.com/pix/upload/images7/mk1112_alswelm 032.jpg

يتبــــــــــــــــــع

[((( الحر)))]

صوره للمكان المختار وهو اقل الفياض نباتاً
http://www.mekshat.com/pix/upload/images7/mk1112_alswelm 030.jpg
صوره لعضو مكشات الشقاوي ....ادرجت هذه الصوره لتشاهدون ارتفاع الجال
http://www.mekshat.com/pix/upload/images7/mk1112_alswelm 037.jpg

وهذي سيارة عضو مكشات الشقاوي ..اشغلني لين ادرجتها يالله انبسط ياعم
http://www.mekshat.com/pix/upload/images7/mk1112_alswelm 023.jpg

هذا لقيته فوق الجال وقلت اصوره ...
http://www.mekshat.com/pix/upload/images7/mk1112_alswelm 047.jpg

وهذي الشجره غريبه اعجبني زهرها واول مره اشوفها ياليت الي يعرفها يفيدنا الله يبارك بعلمه
http://www.mekshat.com/pix/upload/images7/mk1112_alswelm 055.jpg

بعد كذا طلعنا لنفود صعافيق وصراحة الصور واجد لاكن
اخترت هالصورتين علشان ما اشغلكم بالتحميل
الموقع المختار
http://www.mekshat.com/pix/upload/images7/mk1112_alswelm 129.jpg

لوحه من جمال نفود صعافيق.
http://www.mekshat.com/pix/upload/images7/mk1112_alswelm 140.jpg
وافر تحيتي لجميع

[رسلان]

ماشاء الله ..تبارك الله ..
وش ذا الزين أخوي :الحر ....
مناظر ممتازة ومنطقة بكر بعد وش خليت :)
الله يعافيك أخوي ...
وممكن لو تكرمت وصف للمنطقة معين نجيها ؟ أنا طبعاً من الرس ...
وعجل علينا هذي ماتنخلى أخوي ....(أخوك مشفوح ربيع)
بارك الله فيك ... وبانتظار الرد ...

[عاشق شمال911]

مساك الله بالخيـر أخوي الحر
جمال ولا أروع الفياض هاذي جيناه العام وعلى قولك تقول محوري ماشاء الله
أخوي ذكرت خمس فياض أنا مريت على ثلاث فياض الباقي وصفهن الله لا يهينك 00
اللــــــــه يعطيك العافيه 00


اخوكم // عاشق شمال 911

[صدق_المشاعر]

مشكور اخوي يالحر ....... بس تدري صورة الخيمه في ذيك الفيضه والله شي

[المسفهل]

ما شاء الله رحلة موفقة أخي أبا محمد .. أسأل الله أن تكونوا قد استمتعتم بها
مكان جميل واختيار موفق .. وصور حلوة ..
والشجرة التي ذكرتها توجد في أماكن كثيرة وخصوصا عندنا في القصيم
وفي الصمان فلعلك لم تنتبه لها وهي تسمى ( الـنُّـقْـد ) بضم النون وسكون القاف

[((( الحر)))]

اشكر الجميع على ردودهم ومداخلاتهم...!!!

وهذا وصف لطريق الجال..لاهل القصيم

بعد المذنب بكيلو وانت متجه الى الجنوب يجيك يسار مفرق روضة الحسو تمشي معه 10كم ثم تفرق يسار لام حزم قبل ام حزم 2كم تجيك ابراج كهرب يمين امسكها صحراء متجه جنوب الى ان تشوف النفود يمينك وهذا حد الجال والفياض تحت على حد النفود تخير الي تبي منها
فيه سكه على حد الجال من فوق تفرج منها على النفود وبتشوف الفياض كلها وانت فوق الجال الي يعجبك منها انزله واخر فيضه اسمها فيضة عيسى فيها سكه بوسطها وشعيبها فيه كم طلحه ومن وجهة نظري اول فيضه تلقاها لاتعداها

واحداثيات الفياض الخمس غدا في هذا الرد ان شاء الله

[مريقب العيفار]

ما شاء الله عليك يا ابو محمد

بالنسبة للفياض فيه منزال قريب من طريق الابراج بس

والله ما اعرف رقمه لكن ما هو بعيد اذا مشيت مع طريق الابراج تاخد باليمين تلقى المنزال

والا المنزال الآخر فمع البرج رقم 86

طبعا الابراج مرقمة اذا وصلت رقم 86 شف فيه طريق ياخذ يمين

ينزل للفيضة الي فيها الطلاح

وتقدر من هالفيضة تروح للفياض اللي قبلها الدرب سمح بالحيل

تحياتي لك اخوي الحر

اخوك مريق العيفار

[اسيزو 4x4]

حيالله أخوي المبدع أبو محمد ((الحر)) والله الصور ابداع وتسلم يمينك






تحياتي.........

[أبو فراس]

السلام عليكم ورحمة الله وبركاته

والله زمان يا ام حزم

شكرا يالحر هيجتنا بهالرحلة

منزالنا اذا رحنا لهاك الفياض من عند البرج 82 به شعيب يفتح النفس على يسارك الجبل اللي هو الجال ويمينك النفود وخذ حطبك من هالك النفود

ذكرتنا يالحر هاك الديار ولازم نروح له مرة على الاقل

سمعت يالجارمن رتب لنا رحلة

[عريدان]

والله أنكم هبلتوا بنا في الرياض ما عاد ندري نكشت شمال - أو شرق- أو غرب ضاع الفكر لكن الشكر لله وحده على عطاياه والحمد لله وحده على إبتلاه.
علوم سفرة ووجيه نظره ماشاء الله تبارك الله. لكن ما أسهل طريق للي جاي من الرياض لأني بكره بإذن الله سأكون موجود بمحافظة الوشم ولي زرقة لها بعون الواحد الأحد. تكفون لاتبخلون ردو علي قبل أمشي. (وهل يوجد شجر للتضلل أم لازم نأخذ شرِييِع).

[العطة]

السلام عليكم ورحمة الله وبركاته

الحمد على السلامة اخوي الحر
كنت كاشت حولك قريب في الخويش الجنوبي نسيت انادي على الشباب بالايكوم ,كنت مشغل الجهاز او مطفية اخوي الحر, سؤال اذا ممكن كيف كان الجو (هواء) بهذلنا الهواء

اخوك العطة

[عنيزاوي]

صور جدا رائعة يعطيك العافية اما بالنسبة للنبات فانة يسمى بالنقد او نقد وهو مر المذاق ينبت في السهول والجبال

[آل حسين]

السلام عليكم
ماشاء الله تبارك الله صور رائعة وسبق وزرت المنطقة في ربيع 1421هـــــ
وبالنسبة للطريق من الوشم
طريق بعد شقراء اتجه لوشيقر ثم طريق المستوي أم حزم وهو واضح جداً وهو اللي على الخريطة وبعد ماتعدي نفود الملحاء تجيك الخويشات الخويش الجنوبي ثم الخويش الشمالي وهي الشعبان اللي طالعه في الخريطة ادخل يسار مع اي جهة ولا ادري بالضبط لكن الاخوان ماقصروا ارقام الابراج تقرب لك المسافة
وبالنسبة للمسافة من وشيقر مهيب بعيدة مرة الظاهر مابين وشيقر والخويش الجنوبي الا 70 كيلو تقريباً ولا تشرهون علي معلومات يبي لها تحديث
ويعتبر الخويش الشمالي اخر حدود منطقة الرياض الادارية وام حزم تبع القصيم
وهذه خريطة لمحافظة شقراء وفيها الخويشات وحجر نفود السر
http://www.megnas.com/vb/uploaded/shagra2.jpg