ابي اركب كفرات باث فايندر

[برزان]

ياشباب ابي اركب كفرات لسيارتي وودي تعطوني رايكم في الزين منها الي يكون زين في التطعيس وخفيف مطباته

سيارتي باث فايندر موديل 2003 جنط 17

[شايب الصمان]

السلام عليكم ورحمه الله وبركاته

برزان /

رأيي وشخصيا مركب على النيسان الباترول والدوج الرام مشلان الفرنسي .... أذا أنت تبحث عن التطعيس
والراحه بالخطوط .... لكن القيمه غاليه شوي والضمان مفتوح من الجفالي .
----------------------------
ولكن ملاحظه تراه بالدروب الحجريه لازم تنسم الهواء شوي ...ولا يتحمل مثل الكفرات الاخرى .

[فرووووس]

السلام عليكم
اذاكانت جنوطك 17انش لا تركب الا مشلان لان اساسا ماراح تلقا الا مشلان وتراة قليل او برجستون (شدبلد) لاكن البرجستون قاسي ومواصفاتة تعبانة شوي مو زي مقاس ال16 انش بس اهم شي المقاس لازم يكون مطابق لاتركب اعرض فيه تلقى دنلوب عريض لاكن بيتعبك بالبنزين ويثقل الموتر ويتعب الدفرنس على فترة طويلة واي استفسار عن الباث فايندر بالذلت اسألني مباشرة وعلى فكرة ترى سعر المشلان من 600-680ريال والبرجستون من400-480 ريال لاكن رح ركبة من عند الوكالة مباشرة شفهم خلف بووش بالغرابي او تلقاهم اذاتعديت وكالة رنج رووفر على اليمين وانت متجه شرق على خريص حول ماكس طبعا لما تاخذها من الوكيل مو بس المشلان كل الانواع صح بتلقا فرق بسيط بالسعر لاكن تلقا خدمة حلوة وجودة عالية وتاخذ شي وانت عارف ومتاكد من مصدرة وطريقة تخزينه سليمة وتاريخه جديد طبعا الخدمة عبارة عن نوعية البلف اللي يركبونة اصلي (الماني أو ايطالي ) بينما البناشر يركبون نوع اماراتي ) الرصاص يركبون لك جديد ونوعية جيدة مو مستعمل زي البناشر ولاتنسى يرصصلك من جوى ترى الترصيص الداخلي لزق وموجودمنة انواع تعبانة مرة ماتاخذ اسبوع الاوهي طايحة بينما الوكالات تعطيك انواع ممتازة
;) ;) ;) ;) ;) ;) ;)

[برزان]

الأخ شايب الصمان والأخ فرووووس يعطيكم العافية

[فرووووس]

السلام عليكم ورحمة اللة وبركاتة وبعد:

بالنسبة لكفرات الباثفايندر لا تركب الا مشلان ورح ركبة من عند الجفالي مباشرة شف مركزهم فالدواعيس اللي خلف بوش يالغرابي احيانا يكون سعرهم ارخص من السوق وحتى لوكان سعرهم اغلى مو مشكلة لانهم بيركبون لك بلوف كفرات اصلية وكفرات مخزنة تخزين جيد وذات تاريخ جديد وبعدين نوعية الرصاص المستخدمة عندهم جدا ممتازة واصلية واحسن من حقت الوكالة مو زي حقت الغرابي يرصصلك من جهة وحدة ويصرفك :no2:

[قرم]

الأخوان

برزان
فروووس
شايب الصمان

يالله حيهم جميع

انا سيارتي باثفندر 2003 ومن شهر ركبت عليها كفرات دونلوب مقاس 265|65|17 ياباني وبقيمه 460 اللي يجي مع البرادو وضمان سنه والحقيقه مع إحترامي الشديد لكل من اختلف معه بالرأي الكفرات ممتازه لا من حيث الراحه ولا الرساوه ولا التماسك وفي الرمال عرضهن لا يعفيك من تنسيمهن والحقيقه لم الحظ اي استهلاك غير مألوف بالوقود فإعتقدي الراسخ ان الإفراط في استهلاك الوقود المسئول عنه هو!!!رجلك ثم رجلك ثم اشياء اخرى لسنا بصدد ذكرها . واما من ناحيه العزم الباثفندر خبل والله انه عندي مادرى عنهن وفارق الوزن

لم يشكل عبء على المحركات ابداً والحقيقه الكفرات اعطت للباث مظهر متوثب وشرس احسن من قبل وبالنهايه
رايي هذا يحتمل الخطأ والصواب وقديكون غيري هو ا لمحق و القصد هوا لفائده وتنويع الأراء وصاحب الموضوع يختار ماهو انسب وأقرب والسلام عليكم ورحمه الله وبركاته.

[ناجز]

بسم الله الرحمن الرحيم
السلام عليكم ورحمة الله وبركاته
اخوي برزان الشباب ما قصرو الله يجزاهم خير
انا زيك كفرات بلاده لها اربع سنوات ولا تمسحت واجد ومشلان رشحوه اثنين والدنلوب رشحه واحد حاجه تحير
اذاركبت علمني ايش ركبت الله لايهينك.
البريد armj@gawab.com



اللهم اني اعوذ بك من علم لاينفع ونفس لاتشبع وقلب لايخشع وعين لاتدمع

[قناص الليل]

انا مجرب على الباثفايندر كفرات دنلوب مقاس 265|65|17 ياباني . و هي نفس الكفرات الي تجي مع تويوتا برادو جنط 17 .
ما شاء الله مريحه و عريضة و في الرمل نسم و شف ماشاء الله ما يردك و لا طعس ..
و تنفع للحصى ، و سعرها معقول ، و في الحقيقه راضي عنها كل الرضى و لله الحمد ...

[غضنفر]

الاخوان الي ركبوا كفرات دنلوب قرم وقناص الليل:
هل مطب الموتر فرق عن البرجستون بشكل واضح هل زاد استهلاك الوقود وقل العزم ؟؟؟؟؟؟؟؟؟؟
والسؤال الاهم هل فرق ممشى الموتر في النفد يعني البرجستون لازم انسم الى 5 ثم يمشي تمام او انه ما فيه فرق اذا نسمت ؟؟؟؟؟؟؟؟
هل زادت الرساوة او قلت او مافيه فرق؟؟؟؟؟؟؟؟؟
هل تنصحوني اني اركب دنلوب ؟؟؟؟؟ او اغير الجنط الى 16 واركب عليها يوكوهاما ؟؟؟؟؟؟

بالاخير اسف على كثرت الاستفهامات :D

[قناص الليل]

بالنسبه للدنلوب .

اختلاف واضح و خصوصاَ في التطعيس >>>> اذا حطيت الهواء 15 ماشاء الله لا حول و لا قوة الا بالله تتفنن في المشي على الرمل ..

الدنلوب اذا هواه 15 ما تلاحظ ان الكفرات منسمه تحس انها مليانه (( هذا يساعد انك تمشي على الاسفلت حتى اقرب محطه لاكن لا تتعدى 60 _ 70 مجرررب )) .

البرجيستون بعد تجربتي لها في الرمل صراحه ما جازت لي ابداَ >>> و لن اعود لها بإذن الله تعالى ..

الدنلوب في الخط السياره مريحه .
بالنسبه للصرفيه ما لاحظت فرق يذكر ، السرعه لها دور في الصرفيه (( لا تتعدى 140 )) و تلاحظ الصرفيه عاديه جداَ .

الدنلوب عليها ملاحظه واحده و هي (( اذا ديورت بالسياره الكفر يطلع صوت صرير )) و هذا عادي في الدنلوب (( جربته على اللاندكروزر و كان يطلع نفس الأصوات ))
على اقتناعي بهذا النوع لا يعتبر الصوت عيباَ ...

هذه وجهة نظري الشخصيه .
و اي استفسار تراني حاظر .....

[sultan8861]

كفرات الدنلوب 265/65/17 ممتازه ومريحه وراسيه

الاخوان الي ركبوا كفرات دنلوب قرم وقناص الليل كم تحطون هوا الكفرات في المدينه وكم في النفود

[غضنفر]

طيب الله لا يهينك نسيت اسألك عن حاجة مهمة
اذا لفيت الطارة الى الاخير هل يحك الكفر في النسفات الامامية
بسب انه عريض وهل يحتاج اني ارفع الموتر كم سنتي ؟؟؟؟؟؟
ومشكور على تجاوبك

[أبوناصر]

والله أنا مثلك احترت إلين قلت بس في تركيب الكفرات و آخر شي ركبت حقت الوكالة بصراحة ما شفت منها شر طول الثلاث سنوات الي كانت راكبه فيه على السيارة وخصوصا إنها تتحمل الحصى وخلافه

الدنلوب لو كان فيه نفس مقاس السيارة بدون فرق كان ركبتها لكن للأسف

[قناص الليل]

بالنسبه لضغط الهواء .

أحطه في المدينة 35 . (( كاتلوج السياره يقول حطه في المدينة 30 ، لاكن هذا الكلام على الكفرات الشد بلد الي هي بريجستون و مقاسها يختلف عن الدنلوب )) . الدنلوب 35 بالنسبه لي .

و في النفود 15 ماشاء الله ..


اخوي black path
بالنسبه لسؤالك عن النسافات الأماميه و هل هي تحك (( بالنسبه لموتري كنت فاك النسافات الأمامية قبل اركب الدنلوب و ركبت الكفرات و الموتر بدون نسافات )) ، لاكن اليوم شفت باثفندر 2005 مركب نفس كفراتي الدنلوب و نسافاته موجوده (( اتوقع انها ما تحك في النسافه )) مع اني اجزم لك بنسبة 99% انها ما تحك بحكم التجربة و الخبره...

و بالنسبه لرفع السياره (( ركبتها بدون ارفع السياره يعني على شد بلدها )) لاكن غيرت اليايات الخلفيه و ركبت استراليه علشان تحميل الأغراض ، والا هي تركب بالراحه و لا تحتاج إلى رفع سياره ..

هذا و الله اعلم ...

[نمر بن حثلين]

اخوي فيه مثل صيني يقول : اليابان ابخص :d

لذلك لا تركب كفرات الا نفس المقاس المعتمد للسياره من المصنع
لان الدركسون والرفارف والعكوس وكل شي موزون على هذا المقاس

ولو ركبت مقاس اعرض بتزيد الحمل عليهن

لذلك ما قدامك الا شد بلد برجستون او مشلان

[قرم]

السلام عليكم ورحمة الله وبركاته



هلا والله بالشباب اسف على التأخير...

قناص الليل ! ماخليت لنا شي نقوله ماشا الله عليك كفيت ووفيت لكن مانب طالع إلا لمن اكتب لي كلمتين يقرقعن بقلبي
اخوي black path يالله حيه
يا اخي ليش تغير هالجنط الحلو ركب ال دنلوب وتغير نظرتك واما من ناحيه الإستهلاك يا اخي والله ماتغير شي
اما المطب ال دنلوب اكثر راحه وبخصوص إحتكاك الكفر بالنسافه غير صحيح الكفر بعيد عن النسافه بحوالي إنش .. وشعورك بالخوف من إحتكاكهن كان نفس شعوري قبل اركبهن لكن ركبت الاماميات اولاً ولفيت بهن يمنه ويسره عند البنشري وبعد ماتأكدت من عدم إحتكاكهن ركبت الباقي

sultan8861 هلا والله
انا معتاد ا بالسفر اعايرهن على 40 بالمدينه 30 . اما بالرمل 15 يغنيك عن الدبل إلا في حالات الرباضات ال 10 نموذجي و 5 إلى منه ضاقتبك الوسيعه
ومعلومه للجميع مرتين مشيت والهوا كان على 15 ل30 كم اسفلت متواصله على سرعه 120 ليلاً ووجدتهن باردات ويمكن العامل الرئيسي هووزن السياره الخفيف.

نمر بن حثلين هلا بك
امثال اصينيين تراها مثل صناعتهم ما حولك احد اخوي لاتزعل مني اختلف معك قليلاً بمساله الصانع ابخص بكل شيء ...الصانع يصنع السياره بتجهيزات ملائمه إلى حد ما ويترك لك مساحه للإضافه واللعب والإبتكار بحدود المسموح والمنطق . كتغيير الكفرات بأخرى اكبر اواصغر قليلاً . إضافه بطاريه . تركيب ونش . كشافات. وشد وهنقلين لبعض السيارات والقائمه تطول من اتجهيزات اللتي سكت عنها الصانع ولم يحذر منها وعلى الرغم من ان بعض التجهيزات قد تضر سلباً على اداء بعض السيارات لكنها قدتكون ضروره حتميه
مثل توانك الماء هو فيه اثقل من الماء على السياره لكنه ضروري للسيارات الوعريه وقس ذلك على باقي التجهيزات . ومثل الطعام ليكون لذيذاً يحتاج للبهارات والملح كذلك الحال على السيارات تحتاج لبعض الإضافات
للتناسب وشخصيه سائقها وميوله والبيئه المحيطه . ونفس الصانع اللذي نضع لمحاذيره اهميه وقدسيه هونفس
الصانع اللذي يأتينا بالعيوب المصنعيه حتى يكاد لاتخلو سياره من عيب او اكثر واحياناً يكون علاج هالعيب
بسيط وتستغرب كيف فاتت عليهم وتجزم احياناً انها مقصوده مساعدات الباثفندرالخلفيه اكبر مثال والله لوتشوفهن
كنهن طرمبه بسكليت والله العظيم مازل علبكم وبعد ماركبت الإسترالي( اولدمان الأصفر ) شفت الفرق معقوله نيسان يفوتها صنع مساعد مثل الإسترالي لكن الصانع غير منزه للأسف يجهلون الشيء الكثير عن بيئتنا الصحراويه وما يتناسب معها وينكرون علينا تجهيزسيارتنا بمايتناسب وصحرائنا ونقول ايها الصانع إسترح
ماقصرت فيه سنكمله نحن حتى نطامر شامخات الطعوس ونغامر في مجاهل صحرائنا وندهل حرثها ورباضاتها بكفراتنا وبتجهيزاتنا اللي حنا وليس الصانع اللذي وضعها ولا ننسى فضله بعد الله والحمد لله رب العالمين

[قرم]

صور للدنلوب على لباثفندر


http://members.lycos.co.uk/alshohooh/shohooh/IMGA0215.JPG

http://members.lycos.co.uk/alshohooh/shohooh/IMGA0220.JPG

http://members.lycos.co.uk/alshohooh/shohooh/IMGA0215.JPG

http://members.lycos.co.uk/alshohooh/shohooh/IMGA0218.JPG

http://members.lycos.co.uk/alshohooh/shohooh/IMGA0219.JPG

http://members.lycos.co.uk/alshohooh/shohooh/IMGA0221.JPG

[ناجز]

اخواني قناص الليل وقرم
والمشلان وش رئيكم فيها هي او الدنلوب

[ابوسبيل]

مساء الخير اخوي خير الكلام ماقل ودل عليك بكفرات مارشال الكوريه لاتفوتك انا مجربها على جيب سفاري والله اني ماعمري شفت الكفرات زي كذا لاراحه ولاتطعيس وللعلم هي تتحمل حراره اي تتحمل سرعه تقريبا 220كم بالساعه مقارنه بالدنلوب مايتحمل اكثر من 170كم بالساعه هي معادلة السرعه لي تحمل الحراره
اسئل مجرب ولا تسأل طبيب

[جذع رمث]

السلام عليكم
انا اضم صوتي للاخ نمر بن حثلين ، انا بحثت بالسوق و وجدت ان المشلان بحوالي 600 ريال و حصلت البرجستون بـ 480 وعند الوكالة قالوا 490 والهنكوك بـ 420 وقررت اركب برجستون لانه شد بلدة و قد مشيت عليه 3 سنوات في الطعوس والصمان و ما اشتكيت منه لكن لاحظ ان البرجستون يجي منه نوع اماراتي ما يستاهل لذا تأكد انك تأخذ ياباني وتأكد ان التاريخ جديد مهما كان نوع الكفر الي تأخذ وبالتوفيق

[عرندس]

أنا معي باث فاندر 2003

الحمد لله أني بدّلت كفراتي البرجستون بكفرات مشلان >> نفس المقاس.>>> سعر المشلان 600 ريال.

لأن برجستون يكسرن الظهر والسيارة.

مع احترامي لو جهات النظر الأخرى.

[يوسف88]

اخوي عرندس يقولون ان المشلان تطلع وهي تمشي صوت مزعج مدري اذا ذا الكلام صح ولالا لاني والله متوهق بذا البريجستون
والمشلان الظاهر سعرها 590 ولالا ؟

[العـابر]

ترى ماراح تحصل زي الميشلان ناعمة وعملية ونفس المقاس انا ركبتها بعد البرجستون شد البلد وصراحة الفرق ماهوب شوي لا بالديرة ولا بالبر فلا تعدى الميشلان .

[عرندس]

أخوي / يوسف88

بالنسبة لي لم ألاحظ هذا الصوت .

ولكني ولله الحمد ..>>> وجدت الراحة لي ولسيارتي >>> بعد أن تعذبت مع البرجستون.

[NOOOMAS]

السلام عليكم ورحمة الله وبركاته
حبيبي انا معي باث 2003 كفراته بردجستون حقات بلده جنط 17 ماهنا صفراء مامشيت فيها قاطع فيه الدهناء والنفود الكبير مالقيت منهن عذروب اسمع الناس يمدحون الدنلوب والميشلان لكن من خلال تجربتي ماشفت منهن خلاف وركبت ثانيات من وكالتهن طريق خريص ولاشفت منهن شي الا هالحين الله يتميبهن