نداء لأهل القصيم,,,رجاء المساعده

[m1m2m3m4m5m6]

السلام عليكم ورحمة الله وبركاته ,,,



طلبي منكم الله لا يهينكم رقم تلفون ورشة النمير في بريده في الشارع التجاري ,,,
واللي يقدر يجيب رقم السمكري حياتي (( الله من زين الاسم )) أكن له ممنووووون وشاكر,,
أنا من سكان الرياض وابودي موتري للورشه هذي يمدحون تعديلهم بدون الرش ,,

واخاف اوديه بسطحه وخمسمية ريال وفي النهاية تصير زحمه ولا مهوب فاضي ولا مسافر ,,,,
واللي يعرف شغل الورشه يقول لي رايه فيها تسوا العنوه ولا لا ,,,

لأني رحت لحق المزاحميه وصار مسافر وورشة ابو فهد في بريده يقول زحمه منيب فاضي,,
و سرقان اللي في النسيم(( حتى ذا بعد اسمه غريب )) مايمدحون شغله مره,,,

مع وافر شكري لكم ودعواتي لكم بالخير,,,

[برايدوي عنيد]

هلابك اخووي...........

الحمدلله على السلامه والله يخلف عليك

ممكن ماتضبط تعديل لان بعض السمكريين يقوول لك تجي تعديل بس ماتضبط صح

فهي على حسب الصدمه وقووته ومكاانه ....( يعني لازم يشوووفه قبل ازين )

وعلى مااعرف ان به الحنيني والحربي على طريق عنيزه زنين بالتعديل .

وانا كد عدلت سياره هايلوكس عند الحربي شغل محترم حتى انه عدل الكبوت بدون فك.


والصراحه مااعرف رقمه ولانب بالديره هالايام والا ابشر باللي يسرك.

تقبل مروري ...........

[m1m2m3m4m5m6]

الله يبيض وجهك ويعافيك يا بريداوي ,,,

اكون ممنوم وشاكر لك لو تسأل أي احد من جمعتك في بريده عنها ,,,

ولا اقدر اجازيك الا بدعوه في ظهر الغيب ,,,

[مبتكر]

ورشة ابو فهد في محافظة عنيزة هذا للتوضيح

[m1m2m3m4m5m6]

صادق يا مبتكر وانا من العجله نسيت ,,,

ليتك كملت ردك بالرقم ,,

[قرم العيال]

الناس تمدح ابو فهد راعي عنيزة .. عيبه الوحيد ما يشتغل إلا على اول صدمه يعني بدي وكاله فقط لو كان المكان مصدوم قبل ومسمكر ما يشتغل .. يقول اخاف الناس تشوفه ويصير الي مسمكره قبلي دمار بعدين يسأل راعي الموتر ويقول هذا شغل ابو فهد <<< شف الحركات فن ما شاء الله عليه

[سوبر VTC]

عندك الحربي بطريق عنيزة

ورشة الهويشل بصناعية الرواف
من قديم تخصصه تعديل يوم كانت ورشته بالموطأ

فيه ورش جيده بالتعديل لكن مهضوم حقه مانتشرت بين الناس

[رااعي الفزعات]

السلام عليكم ورحمة الله وبركـاته . .
ألــف ألــف الحمد لله على سلامتك وتهــون دامه بالحديد . .
أنا والله ماقد جربت الا ورشـــه ( ( الرســــم ) ) بالشارع التجاري وكل شغلي عندهم الصراحه شغلهم محترم مره ولا تفرقه عن الوكاله وهــذا رقمهم بعد اذن الأدارة ( 063242034 )

تــقبل مروورري . .

دمــــت بــود . .

[برايدوي عنيد]

هلابك اخووي.........

رقم حياتي 0507908563

وسوال للاخ سوبرvtc وشي الورشه الزينه اللي مانتشرت لاتصير ورشه الجطيلي اللي

على طريق الضاحي (مصنع البيبسي )؟

تقبل مروري ..........

[m1m2m3m4m5m6]

الله يعافيك يابريداوي ويجزاك خير

والله يا شباب اللي جرب النمير يقول لي رايه تكفون,,,

واللي يخبر ورشه ازين من النمير وابو فهد يعلمني اياها واكون ممنون وشاكر وأبشروا بخالص الدعوات ,,,

[ويلومني]

الحمد لله على السلامه والله يخلف عليك من واسع رزقه الورشه
مثل ماذكره أخوي سوبر vtc شغل محترم بس الأفضل أنه يشتغل فيها صاحب الورشه الهويشل بس تراه من عند الرقبه شوي والله يسر أمرك

[المقيرش]

السلام عليكم عليك اخوي بورشة الحربي طريق عنيزة ببريدة ولا تشااااااااااور ابد تراي مجربة